(၆) အတီတာနာဂတဝါရော
(က) အနုလောမပုဂ္ဂလော
၁၂၆. (က) ယဿ ဒုက္ခသစ္စံ နိရုဇ္ဈိတ္ထ တဿ သမုဒယသစ္စံ နိရုဇ္ဈိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ ဒုက္ခသစ္စံ နိရုဇ္ဈိတ္ထ၊ နော စ တေသံ သမုဒယသစ္စံ နိရုဇ္ဈိဿတိ. ဣတရေသံ တေသံ ဒုက္ခသစ္စဉ္စ နိရုဇ္ဈိတ္ထ သမုဒယသစ္စဉ္စ နိရုဇ္ဈိဿတိ.
(ခ) ယဿ ဝါ ပန။ပေ။? အာမန္တာ.
(က) ယဿ ဒုက္ခသစ္စံ နိရုဇ္ဈိတ္ထ တဿ မဂ္ဂသစ္စံ နိရုဇ္ဈိဿတီတိ?
အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဒုက္ခသစ္စံ နိရုဇ္ဈိတ္ထ၊ နော စ တေသံ မဂ္ဂသစ္စံ နိရုဇ္ဈိဿတိ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ ဒုက္ခသစ္စဉ္စ နိရုဇ္ဈိတ္ထ မဂ္ဂသစ္စဉ္စ နိရုဇ္ဈိဿတိ.
(ခ) ယဿ ဝါ ပန။ပေ။? အာမန္တာ.
၁၂၇. (က) ယဿ သမုဒယသစ္စံ နိရုဇ္ဈိတ္ထ တဿ မဂ္ဂသစ္စံ နိရုဇ္ဈိဿတီတိ?
အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ သမုဒယသစ္စံ နိရုဇ္ဈိတ္ထ၊ နော စ တေသံ မဂ္ဂသစ္စံ နိရုဇ္ဈိဿတိ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ သမုဒယသစ္စဉ္စ နိရုဇ္ဈိတ္ထ မဂ္ဂသစ္စဉ္စ နိရုဇ္ဈိဿတိ.
(ခ) ယဿ ဝါ ပန။ပေ။? အာမန္တာ.
(ခ) အနုလောမဩကာသော
၁၂၈. ယတ္ထ ဒုက္ခသစ္စံ နိရုဇ္ဈိတ္ထ။ပေ။.
(ဂ) အနုလောမပုဂ္ဂလောကာသာ
၁၂၉. (က) ယဿ ယတ္ထ ဒုက္ခသစ္စံ နိရုဇ္ဈိတ္ထ တဿ တတ္ထ သမုဒယသစ္စံ နိရုဇ္ဈိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ အသညသတ္တာနံ တေသံ တတ္ထ ဒုက္ခသစ္စံ နိရုဇ္ဈိတ္ထ၊ နော စ တေသံ တတ္ထ သမုဒယသစ္စံ နိရုဇ္ဈိဿတိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ဒုက္ခသစ္စဉ္စ နိရုဇ္ဈိတ္ထ သမုဒယသစ္စဉ္စ နိရုဇ္ဈိဿတိ.
(ခ) ယဿ ဝါ ပန ယတ္ထ သမုဒယသစ္စံ နိရုဇ္ဈိဿတိ တဿ တတ္ထ ဒုက္ခသစ္စံ နိရုဇ္ဈိတ္ထာတိ?
သုဒ္ဓါဝါသံ ဥပပဇ္ဇန္တာနံ တေသံ တတ္ထ သမုဒယသစ္စံ နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ နိရုဇ္ဈိတ္ထ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ သမုဒယသစ္စဉ္စ နိရုဇ္ဈိဿတိ ဒုက္ခသစ္စဉ္စ နိရုဇ္ဈိတ္ထ.
(က) ယဿ ယတ္ထ ဒုက္ခသစ္စံ နိရုဇ္ဈိတ္ထ တဿ တတ္ထ မဂ္ဂသစ္စံ နိရုဇ္ဈိဿတီတိ?
အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ အာပါယိကာနံ အသညသတ္တာနံ တေသံ တတ္ထ ဒုက္ခသစ္စံ နိရုဇ္ဈိတ္ထ၊ နော စ တေသံ တတ္ထ မဂ္ဂသစ္စံ နိရုဇ္ဈိဿတိ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တတ္ထ ဒုက္ခသစ္စဉ္စ နိရုဇ္ဈိတ္ထ မဂ္ဂသစ္စဉ္စ နိရုဇ္ဈိဿတိ.
(ခ) ယဿ ဝါ ပန ယတ္ထ မဂ္ဂသစ္စံ နိရုဇ္ဈိဿတိ တဿ တတ္ထ ဒုက္ခသစ္စံ နိရုဇ္ဈိတ္ထာတိ?
သုဒ္ဓါဝါသံ ဥပပဇ္ဇန္တာနံ တေသံ တတ္ထ မဂ္ဂသစ္စံ နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ နိရုဇ္ဈိတ္ထ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တတ္ထ မဂ္ဂသစ္စဉ္စ နိရုဇ္ဈိဿတိ ဒုက္ခသစ္စဉ္စ နိရုဇ္ဈိတ္ထ.
၁၃၀. (က) ယဿ ယတ္ထ သမုဒယသစ္စံ နိရုဇ္ဈိတ္ထ တဿ တတ္ထ မဂ္ဂသစ္စံ နိရုဇ္ဈိဿတီတိ?
အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ အာပါယိကာနံ တေသံ တတ္ထ သမုဒယသစ္စံ နိရုဇ္ဈိတ္ထ၊ နော စ တေသံ တတ္ထ မဂ္ဂသစ္စံ နိရုဇ္ဈိဿတိ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တတ္ထ သမုဒယသစ္စဉ္စ နိရုဇ္ဈိတ္ထ မဂ္ဂသစ္စဉ္စ နိရုဇ္ဈိဿတိ.
(ခ) ယဿ ဝါ ပန ယတ္ထ မဂ္ဂသစ္စံ နိရုဇ္ဈိဿတိ တဿ တတ္ထ သမုဒယသစ္စံ နိရုဇ္ဈိတ္ထာတိ.
သုဒ္ဓါဝါသာနံ ဒုတိယေ စိတ္တေ ဝတ္တမာနေ တေသံ တတ္ထ မဂ္ဂသစ္စံ နိရုဇ္ဈိဿတိ၊ နော စ တေသံ တတ္ထ သမုဒယသစ္စံ နိရုဇ္ဈိတ္ထ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တတ္ထ မဂ္ဂသစ္စဉ္စ နိရုဇ္ဈိဿတိ သမုဒယသစ္စဉ္စ နိရုဇ္ဈိတ္ထ.
(ဃ) ပစ္စနီကပုဂ္ဂလော
၁၃၁. (က) ယဿ ဒုက္ခသစ္စံ န နိရုဇ္ဈိတ္ထ တဿ သမုဒယသစ္စံ န နိရုဇ္ဈိဿတီတိ? နတ္ထိ.
(ခ) ယဿ ဝါ ပန သမုဒယသစ္စံ န နိရုဇ္ဈိဿတိ တဿ ဒုက္ခသစ္စံ န နိရုဇ္ဈိတ္ထာတိ? နိရုဇ္ဈိတ္ထ.
(က) ယဿ ဒုက္ခသစ္စံ န နိရုဇ္ဈိတ္ထ တဿ မဂ္ဂသစ္စံ န နိရုဇ္ဈိဿတီတိ? နတ္ထိ.
(ခ) ယဿ ဝါ ပန မဂ္ဂသစ္စံ န နိရုဇ္ဈိဿတိ တဿ ဒုက္ခသစ္စံ န နိရုဇ္ဈိတ္ထာတိ? နိရုဇ္ဈိတ္ထ.
၁၃၂. (က) ယဿ သမုဒယသစ္စံ န နိရုဇ္ဈိတ္ထ တဿ မဂ္ဂသစ္စံ န နိရုဇ္ဈိဿတီတိ? နတ္ထိ.
(ခ) ယဿ ဝါ ပန မဂ္ဂသစ္စံ န နိရုဇ္ဈိဿတိ တဿ သမုဒယသစ္စံ န နိရုဇ္ဈိတ္ထာတိ? နိရုဇ္ဈိတ္ထ.
(င) ပစ္စနီကဩကာသော
၁၃၃. ယတ္ထ ဒုက္ခသစ္စံ န နိရုဇ္ဈိတ္ထ။ပေ။.
(စ) ပစ္စနီကပုဂ္ဂလောကာသာ
၁၃၄. (က) ယဿ ယတ္ထ ဒုက္ခသစ္စံ န နိရုဇ္ဈိတ္ထ တဿ တတ္ထ သမုဒယသစ္စံ န နိရုဇ္ဈိဿတီတိ? နိရုဇ္ဈိဿတိ.
(ခ) ယဿ ဝါ ပန ယတ္ထ သမုဒယသစ္စံ န နိရုဇ္ဈိဿတိ တဿ တတ္ထ ဒုက္ခသစ္စံ န နိရုဇ္ဈိတ္ထာတိ? နိရုဇ္ဈိတ္ထ.
(က) ယဿ ယတ္ထ ဒုက္ခသစ္စံ န နိရုဇ္ဈိတ္ထ တဿ တတ္ထ မဂ္ဂသစ္စံ န နိရုဇ္ဈိဿတီတိ? နိရုဇ္ဈိဿတိ.
(ခ) ယဿ ဝါ ပန ယတ္ထ မဂ္ဂသစ္စံ န နိရုဇ္ဈိဿတိ တဿ တတ္ထ ဒုက္ခသစ္စံ န နိရုဇ္ဈိတ္ထာတိ? နိရုဇ္ဈိတ္ထ.
၁၃၅. (က) ယဿ ယတ္ထ သမုဒယသစ္စံ န နိရုဇ္ဈိတ္ထ တဿ တတ္ထ မဂ္ဂသစ္စံ န နိရုဇ္ဈိဿတီတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ တေသံ တတ္ထ သမုဒယသစ္စံ န နိရုဇ္ဈိတ္ထ၊ နော စ တေသံ တတ္ထ မဂ္ဂသစ္စံ န နိရုဇ္ဈိဿတိ. အသညသတ္တာနံ တေသံ တတ္ထ သမုဒယသစ္စဉ္စ န နိရုဇ္ဈိတ္ထ မဂ္ဂသစ္စဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ မဂ္ဂသစ္စံ န နိရုဇ္ဈိဿတိ တဿ တတ္ထ သမုဒယသစ္စံ န နိရုဇ္ဈိတ္ထာတိ?
အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ အာပါယိကာနံ တေသံ တတ္ထ မဂ္ဂသစ္စံ န နိရုဇ္ဈိဿတိ၊ နော စ တေသံ တတ္ထ သမုဒယသစ္စံ န နိရုဇ္ဈိတ္ထ. အသညသတ္တာနံ တေသံ တတ္ထ မဂ္ဂသစ္စဉ္စ န နိရုဇ္ဈိဿတိ သမုဒယသစ္စဉ္စ န နိရုဇ္ဈိတ္ထ.
နိရောဓဝါရော.