(၄) ပစ္စုပ္ပန္နာတီတဝါရော

(က) အနုလောမပုဂ္ဂလော

၁၀၆. (က) ယဿ ဒုက္ခသစ္စံ နိရုဇ္ဈတိ တဿ သမုဒယသစ္စံ နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန သမုဒယသစ္စံ နိရုဇ္ဈိတ္ထ တဿ ဒုက္ခသစ္စံ နိရုဇ္ဈတီတိ?

သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ သမုဒယသစ္စံ နိရုဇ္ဈိတ္ထ၊ နော စ တေသံ ဒုက္ခသစ္စံ နိရုဇ္ဈတိ. သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ သမုဒယသစ္စဉ္စ နိရုဇ္ဈိတ္ထ ဒုက္ခသစ္စဉ္စ နိရုဇ္ဈတိ.

(က) ယဿ ဒုက္ခသစ္စံ နိရုဇ္ဈတိ တဿ မဂ္ဂသစ္စံ နိရုဇ္ဈိတ္ထာတိ?

အနဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ ဒုက္ခသစ္စံ နိရုဇ္ဈတိ၊ နော စ တေသံ မဂ္ဂသစ္စံ နိရုဇ္ဈိတ္ထ. အဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ ဒုက္ခသစ္စဉ္စ နိရုဇ္ဈတိ မဂ္ဂသစ္စဉ္စ နိရုဇ္ဈိတ္ထ.

(ခ) ယဿ ဝါ ပန မဂ္ဂသစ္စံ နိရုဇ္ဈိတ္ထ တဿ ဒုက္ခသစ္စံ နိရုဇ္ဈတီတိ?

အဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ မဂ္ဂသစ္စံ နိရုဇ္ဈိတ္ထ၊ နော စ တေသံ ဒုက္ခသစ္စံ နိရုဇ္ဈတိ. အဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ မဂ္ဂသစ္စဉ္စ နိရုဇ္ဈိတ္ထ ဒုက္ခသစ္စဉ္စ နိရုဇ္ဈတိ.

၁၀၇. (က) ယဿ သမုဒယသစ္စံ နိရုဇ္ဈတိ တဿ မဂ္ဂသစ္စံ နိရုဇ္ဈိတ္ထာတိ?

အနဘိသမေတာဝီနံ တဏှာယ ဘင်္ဂက္ခဏေ တေသံ သမုဒယသစ္စံ နိရုဇ္ဈတိ၊ နော စ တေသံ မဂ္ဂသစ္စံ နိရုဇ္ဈိတ္ထ. အဘိသမေတာဝီနံ တဏှာယ ဘင်္ဂက္ခဏေ တေသံ သမုဒယသစ္စဉ္စ နိရုဇ္ဈတိ မဂ္ဂသစ္စဉ္စ နိရုဇ္ဈိတ္ထ.

(ခ) ယဿ ဝါ ပန မဂ္ဂသစ္စံ နိရုဇ္ဈိတ္ထ တဿ သမုဒယသစ္စံ နိရုဇ္ဈတီတိ?

အဘိသမေတာဝီနံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ နိရောဓသမာပန္နာနံ တေသံ မဂ္ဂသစ္စံ နိရုဇ္ဈိတ္ထ၊ နော စ တေသံ သမုဒယသစ္စံ နိရုဇ္ဈတိ. အဘိသမေတာဝီနံ တဏှာယ ဘင်္ဂက္ခဏေ တေသံ မဂ္ဂသစ္စဉ္စ နိရုဇ္ဈိတ္ထ သမုဒယသစ္စဉ္စ နိရုဇ္ဈတိ.

(ခ) အနုလောမဩကာသော

၁၀၈. ယတ္ထ ဒုက္ခသစ္စံ နိရုဇ္ဈတိ။ပေ။.

(ဂ) အနုလောမပုဂ္ဂလောကာသာ

၁၀၉. (က) ယဿ ယတ္ထ ဒုက္ခသစ္စံ နိရုဇ္ဈတိ တဿ တတ္ထ သမုဒယသစ္စံ နိရုဇ္ဈိတ္ထာတိ?

သုဒ္ဓါဝါသာနံ ဥပပတ္တိစိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ ဒုက္ခသစ္စံ နိရုဇ္ဈတိ၊ နော စ တေသံ တတ္ထ သမုဒယသစ္စံ နိရုဇ္ဈိတ္ထ. ဣတရေသံ စတုဝေါကာရာ ပဉ္စဝေါကာရာ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ တတ္ထ ဒုက္ခသစ္စဉ္စ နိရုဇ္ဈတိ သမုဒယသစ္စဉ္စ နိရုဇ္ဈိတ္ထ.

(ခ) ယဿ ဝါ ပန ယတ္ထ သမုဒယသစ္စံ နိရုဇ္ဈိတ္ထ တဿ တတ္ထ ဒုက္ခသစ္စံ နိရုဇ္ဈတီတိ?

စတုဝေါကာရံ ပဉ္စဝေါကာရံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ တတ္ထ သမုဒယသစ္စံ နိရုဇ္ဈိတ္ထ၊ နော စ တေသံ တတ္ထ ဒုက္ခသစ္စံ နိရုဇ္ဈတိ. စတုဝေါကာရာ ပဉ္စဝေါကာရာ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ တတ္ထ သမုဒယသစ္စဉ္စ နိရုဇ္ဈိတ္ထ ဒုက္ခသစ္စဉ္စ နိရုဇ္ဈတိ.

(က) ယဿ ယတ္ထ ဒုက္ခသစ္စံ နိရုဇ္ဈတိ တဿ တတ္ထ မဂ္ဂသစ္စံ နိရုဇ္ဈိတ္ထာတိ?

သုဒ္ဓါဝါသာနံ ဥပပတ္တိစိတ္တဿ ဘင်္ဂက္ခဏေ အနဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ ဒုက္ခသစ္စံ နိရုဇ္ဈတိ၊ နော စ တေသံ တတ္ထ မဂ္ဂသစ္စံ နိရုဇ္ဈိတ္ထ. အဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ တတ္ထ ဒုက္ခသစ္စဉ္စ နိရုဇ္ဈတိ မဂ္ဂသစ္စဉ္စ နိရုဇ္ဈိတ္ထ.

(ခ) ယဿ ဝါ ပန ယတ္ထ မဂ္ဂသစ္စံ နိရုဇ္ဈိတ္ထ တဿ တတ္ထ ဒုက္ခသစ္စံ နိရုဇ္ဈတီတိ?

အဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ တတ္ထ မဂ္ဂသစ္စံ နိရုဇ္ဈိတ္ထ၊ နော စ တေသံ တတ္ထ ဒုက္ခသစ္စံ နိရုဇ္ဈတိ. အဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ တတ္ထ မဂ္ဂသစ္စဉ္စ နိရုဇ္ဈိတ္ထ ဒုက္ခသစ္စဉ္စ နိရုဇ္ဈတိ.

၁၁၀. (က) ယဿ ယတ္ထ သမုဒယသစ္စံ နိရုဇ္ဈတိ တဿ တတ္ထ မဂ္ဂသစ္စံ နိရုဇ္ဈိတ္ထာတိ?

အနဘိသမေတာဝီနံ တဏှာယ ဘင်္ဂက္ခဏေ တေသံ တတ္ထ သမုဒယသစ္စံ နိရုဇ္ဈတိ၊ နော စ တေသံ တတ္ထ မဂ္ဂသစ္စံ နိရုဇ္ဈိတ္ထ. အဘိသမေတာဝီနံ တဏှာယ ဘင်္ဂက္ခဏေ တေသံ တတ္ထ သမုဒယသစ္စဉ္စ နိရုဇ္ဈတိ မဂ္ဂသစ္စဉ္စ နိရုဇ္ဈိတ္ထ.

(ခ) ယဿ ဝါ ပန ယတ္ထ မဂ္ဂသစ္စံ နိရုဇ္ဈိတ္ထ တဿ တတ္ထ သမုဒယသစ္စံ နိရုဇ္ဈတီတိ?

အဘိသမေတာဝီနံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ တတ္ထ မဂ္ဂသစ္စံ နိရုဇ္ဈိတ္ထ၊ နော စ တေသံ တတ္ထ သမုဒယသစ္စံ နိရုဇ္ဈတိ. အဘိသမေတာဝီနံ တဏှာယ ဘင်္ဂက္ခဏေ တေသံ တတ္ထ မဂ္ဂသစ္စဉ္စ နိရုဇ္ဈိတ္ထ သမုဒယသစ္စဉ္စ နိရုဇ္ဈတိ.

(ဃ) ပစ္စနီကပုဂ္ဂလော

၁၁၁. (က) ယဿ ဒုက္ခသစ္စံ န နိရုဇ္ဈတိ တဿ သမုဒယသစ္စံ န နိရုဇ္ဈိတ္ထာတိ? နိရုဇ္ဈိတ္ထ.

(ခ) ယဿ ဝါ ပန သမုဒယသစ္စံ န နိရုဇ္ဈိတ္ထ တဿ ဒုက္ခသစ္စံ န နိရုဇ္ဈတီတိ? နတ္ထိ.

(က) ယဿ ဒုက္ခသစ္စံ န နိရုဇ္ဈတိ တဿ မဂ္ဂသစ္စံ န နိရုဇ္ဈိတ္ထာတိ?

အဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ ဒုက္ခသစ္စံ န နိရုဇ္ဈတိ၊ နော စ တေသံ မဂ္ဂသစ္စံ န နိရုဇ္ဈိတ္ထ. အနဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ ဒုက္ခသစ္စဉ္စ န နိရုဇ္ဈတိ မဂ္ဂသစ္စဉ္စ န နိရုဇ္ဈိတ္ထ.

(ခ) ယဿ ဝါ ပန မဂ္ဂသစ္စံ န နိရုဇ္ဈိတ္ထ တဿ ဒုက္ခသစ္စံ န နိရုဇ္ဈတီတိ?

အနဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ မဂ္ဂသစ္စံ န နိရုဇ္ဈိတ္ထ၊ နော စ တေသံ ဒုက္ခသစ္စံ န နိရုဇ္ဈတိ. အနဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ မဂ္ဂသစ္စဉ္စ န နိရုဇ္ဈိတ္ထ ဒုက္ခသစ္စဉ္စ န နိရုဇ္ဈတိ.

၁၁၂. (က) ယဿ သမုဒယသစ္စံ န နိရုဇ္ဈတိ တဿ မဂ္ဂသစ္စံ န နိရုဇ္ဈိတ္ထာတိ?

အဘိသမေတာဝီနံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ နိရောဓသမာပန္နာနံ တေသံ သမုဒယသစ္စံ န နိရုဇ္ဈတိ၊ နော စ တေသံ မဂ္ဂသစ္စံ န နိရုဇ္ဈိတ္ထ. အနဘိသမေတာဝီနံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ သမုဒယသစ္စဉ္စ န နိရုဇ္ဈတိ မဂ္ဂသစ္စဉ္စ န နိရုဇ္ဈိတ္ထ.

(ခ) ယဿ ဝါ ပန မဂ္ဂသစ္စံ န နိရုဇ္ဈိတ္ထ တဿ သမုဒယသစ္စံ န နိရုဇ္ဈတီတိ?

အနဘိသမေတာဝီနံ တဏှာယ ဘင်္ဂက္ခဏေ တေသံ မဂ္ဂသစ္စံ န နိရုဇ္ဈိတ္ထ၊ နော စ တေသံ သမုဒယသစ္စံ န နိရုဇ္ဈတိ. အနဘိသမေတာဝီနံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ မဂ္ဂသစ္စဉ္စ န နိရုဇ္ဈိတ္ထ သမုဒယသစ္စဉ္စ န နိရုဇ္ဈတိ.

(င) ပစ္စနီကဩကာသော

၁၁၃. ယတ္ထ ဒုက္ခသစ္စံ န နိရုဇ္ဈတိ။ပေ။.

(စ) ပစ္စနီကပုဂ္ဂလောကာသာ

၁၁၄. (က) ယဿ ယတ္ထ ဒုက္ခသစ္စံ န နိရုဇ္ဈတိ တဿ တတ္ထ သမုဒယသစ္စံ န နိရုဇ္ဈိတ္ထာတိ?

စတုဝေါကာရံ ပဉ္စဝေါကာရံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ တတ္ထ ဒုက္ခသစ္စံ န နိရုဇ္ဈတိ၊ နော စ တေသံ တတ္ထ သမုဒယသစ္စံ န နိရုဇ္ဈိတ္ထ. သုဒ္ဓါဝါသာနံ ဥပပတ္တိစိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ ဒုက္ခသစ္စဉ္စ န နိရုဇ္ဈတိ သမုဒယသစ္စဉ္စ န နိရုဇ္ဈိတ္ထ.

(ခ) ယဿ ဝါ ပန ယတ္ထ သမုဒယသစ္စံ န နိရုဇ္ဈိတ္ထ တဿ တတ္ထ ဒုက္ခသစ္စံ န နိရုဇ္ဈတီတိ?

သုဒ္ဓါဝါသာနံ ဥပပတ္တိစိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ သမုဒယသစ္စံ န နိရုဇ္ဈိတ္ထ၊ နော စ တေသံ တတ္ထ ဒုက္ခသစ္စံ န နိရုဇ္ဈတိ. သုဒ္ဓါဝါသာနံ ဥပပတ္တိစိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ သမုဒယသစ္စဉ္စ န နိရုဇ္ဈိတ္ထ ဒုက္ခသစ္စဉ္စ န နိရုဇ္ဈတိ.

(က) ယဿ ယတ္ထ ဒုက္ခသစ္စံ န နိရုဇ္ဈတိ တဿ တတ္ထ မဂ္ဂသစ္စံ န နိရုဇ္ဈိတ္ထာတိ?

အဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ တတ္ထ ဒုက္ခသစ္စံ န နိရုဇ္ဈတိ၊ နော စ တေသံ တတ္ထ မဂ္ဂသစ္စံ န နိရုဇ္ဈိတ္ထ. သုဒ္ဓါဝါသာနံ ဥပပတ္တိစိတ္တဿ ဥပ္ပါဒက္ခဏေ အနဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ ဒုက္ခသစ္စဉ္စ န နိရုဇ္ဈတိ မဂ္ဂသစ္စဉ္စ န နိရုဇ္ဈိတ္ထ.

(ခ) ယဿ ဝါ ပန ယတ္ထ မဂ္ဂသစ္စံ န နိရုဇ္ဈိတ္ထ တဿ တတ္ထ ဒုက္ခသစ္စံ န နိရုဇ္ဈတီတိ?

သုဒ္ဓါဝါသာနံ ဥပပတ္တိစိတ္တဿ ဘင်္ဂက္ခဏေ အနဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ မဂ္ဂသစ္စံ န နိရုဇ္ဈိတ္ထ၊ နော စ တေသံ တတ္ထ ဒုက္ခသစ္စံ န နိရုဇ္ဈတိ. သုဒ္ဓါဝါသာနံ ဥပပတ္တိစိတ္တဿ ဥပ္ပါဒက္ခဏေ အနဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ မဂ္ဂသစ္စဉ္စ န နိရုဇ္ဈိတ္ထ ဒုက္ခသစ္စဉ္စ န နိရုဇ္ဈတိ.

၁၁၅. (က) ယဿ ယတ္ထ သမုဒယသစ္စံ န နိရုဇ္ဈတိ တဿ တတ္ထ မဂ္ဂသစ္စံ န နိရုဇ္ဈိတ္ထာတိ?

အဘိသမေတာဝီနံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ တတ္ထ သမုဒယသစ္စံ န နိရုဇ္ဈတိ၊ နော စ တေသံ တတ္ထ မဂ္ဂသစ္စံ န နိရုဇ္ဈိတ္ထ. သုဒ္ဓါဝါသာနံ ဒုတိယေ စိတ္တေ ဝတ္တမာနေ အနဘိသမေတာဝီနံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ တတ္ထ သမုဒယသစ္စဉ္စ န နိရုဇ္ဈတိ မဂ္ဂသစ္စဉ္စ န နိရုဇ္ဈိတ္ထ.

(ခ) ယဿ ဝါ ပန ယတ္ထ မဂ္ဂသစ္စံ န နိရုဇ္ဈိတ္ထ တဿ တတ္ထ သမုဒယသစ္စံ န နိရုဇ္ဈတီတိ?

အနဘိသမေတာဝီနံ တဏှာယ ဘင်္ဂက္ခဏေ တေသံ တတ္ထ မဂ္ဂသစ္စံ န နိရုဇ္ဈိတ္ထ၊ နော စ တေသံ တတ္ထ သမုဒယသစ္စံ န နိရုဇ္ဈတိ. သုဒ္ဓါဝါသာနံ ဒုတိယေ စိတ္တေ ဝတ္တမာနေ အနဘိသမေတာဝီနံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ တတ္ထ မဂ္ဂသစ္စဉ္စ န နိရုဇ္ဈိတ္ထ သမုဒယသစ္စဉ္စ န နိရုဇ္ဈတိ.