(၃) အနာဂတဝါရော
(က) အနုလောမပုဂ္ဂလော
၉၇. (က) ယဿ ဒုက္ခသစ္စံ နိရုဇ္ဈိဿတိ တဿ သမုဒယသစ္စံ နိရုဇ္ဈိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ [ပဋိလဘိဿန္တိ တဿ စိတ္တဿ ဥပ္ပါဒက္ခဏေ (သီ. သျာ.) ဥပ္ပါဒဝါရေ ပန ပါဌန္တရံ နတ္ထိ] တေသံ ဒုက္ခသစ္စံ နိရုဇ္ဈိဿတိ၊ နော စ တေသံ သမုဒယသစ္စံ နိရုဇ္ဈိဿတိ. ဣတရေသံ တေသံ ဒုက္ခသစ္စဉ္စ နိရုဇ္ဈိဿတိ သမုဒယသစ္စဉ္စ နိရုဇ္ဈိဿတိ.
(ခ) ယဿ ဝါ ပန။ပေ။? အာမန္တာ.
(က) ယဿ ဒုက္ခသစ္စံ နိရုဇ္ဈိဿတိ တဿ မဂ္ဂသစ္စံ နိရုဇ္ဈိဿတီတိ?
အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဒုက္ခသစ္စံ နိရုဇ္ဈိဿတိ၊ နော စ တေသံ မဂ္ဂသစ္စံ နိရုဇ္ဈိဿတိ. အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ ဒုက္ခသစ္စဉ္စ နိရုဇ္ဈိဿတိ မဂ္ဂသစ္စဉ္စ နိရုဇ္ဈိဿတိ.
(ခ) ယဿ ဝါ ပန။ပေ။. အာမန္တာ.
၉၈. (က) ယဿ သမုဒယသစ္စံ နိရုဇ္ဈိဿတိ တဿ မဂ္ဂသစ္စံ နိရုဇ္ဈိဿတီတိ?
ယေ ပုထုဇ္ဇနာ မဂ္ဂံ န ပဋိလဘိဿန္တိ တေသံ သမုဒယသစ္စံ နိရုဇ္ဈိဿတိ၊ နော စ တေသံ မဂ္ဂသစ္စံ နိရုဇ္ဈိဿတိ. ယေ မဂ္ဂံ ပဋိလဘိဿန္တိ တေသံ သမုဒယသစ္စဉ္စ နိရုဇ္ဈိဿတိ မဂ္ဂသစ္စဉ္စ နိရုဇ္ဈိဿတိ.
(ခ) ယဿ ဝါ ပန မဂ္ဂသစ္စံ နိရုဇ္ဈိဿတိ တဿ သမုဒယသစ္စံ နိရုဇ္ဈိဿတီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ မဂ္ဂသစ္စံ နိရုဇ္ဈိဿတိ၊ နော စ တေသံ သမုဒယသစ္စံ နိရုဇ္ဈိဿတိ. ယေ မဂ္ဂံ ပဋိလဘိဿန္တိ တေသံ မဂ္ဂသစ္စဉ္စ နိရုဇ္ဈိဿတိ သမုဒယသစ္စဉ္စ နိရုဇ္ဈိဿတိ.
(ခ) အနုလောမဩကာသော
၉၉. ယတ္ထ ဒုက္ခသစ္စံ နိရုဇ္ဈိဿတိ။ပေ။.
(ဂ) အနုလောမပုဂ္ဂလောကာသာ
၁၀၀. ယဿ ယတ္ထ ဒုက္ခသစ္စံ နိရုဇ္ဈိဿတိ တဿ တတ္ထ သမုဒယသစ္စံ နိရုဇ္ဈိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ အသညသတ္တာနံ တေသံ တတ္ထ ဒုက္ခသစ္စံ နိရုဇ္ဈိဿတိ၊ နော စ တေသံ တတ္ထ သမုဒယသစ္စံ နိရုဇ္ဈိဿတိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ဒုက္ခသစ္စဉ္စ နိရုဇ္ဈိဿတိ သမုဒယသစ္စဉ္စ နိရုဇ္ဈိဿတိ။ပေ။.
(ယဿကမ္ပိ ယဿယတ္ထကမ္ပိ သဒိသံ).
(ဃ) ပစ္စနီကပုဂ္ဂလော
၁၀၁. (က) ယဿ ဒုက္ခသစ္စံ န နိရုဇ္ဈိဿတိ တဿ သမုဒယသစ္စံ န နိရုဇ္ဈိဿတီတိ? အာမန္တာ.
(ခ) ယဿ ဝါ ပန သမုဒယသစ္စံ န နိရုဇ္ဈိဿတိ တဿ ဒုက္ခသစ္စံ န နိရုဇ္ဈိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ သမုဒယသစ္စံ န နိရုဇ္ဈိဿတိ၊ နော စ တေသံ ဒုက္ခသစ္စံ န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ သမုဒယသစ္စဉ္စ န နိရုဇ္ဈိဿတိ ဒုက္ခသစ္စဉ္စ န နိရုဇ္ဈိဿတိ.
(က) ယဿ ဒုက္ခသစ္စံ န နိရုဇ္ဈိဿတိ တဿ မဂ္ဂသစ္စံ န နိရုဇ္ဈိဿတီတိ? အာမန္တာ.
(ခ) ယဿ ဝါ ပန မဂ္ဂသစ္စံ န နိရုဇ္ဈိဿတိ တဿ ဒုက္ခသစ္စံ န နိရုဇ္ဈိဿတီတိ?
အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ မဂ္ဂသစ္စံ န နိရုဇ္ဈိဿတိ၊ နော စ တေသံ ဒုက္ခသစ္စံ န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ မဂ္ဂသစ္စဉ္စ န နိရုဇ္ဈိဿတိ ဒုက္ခသစ္စဉ္စ န နိရုဇ္ဈိဿတိ.
၁၀၂. (က) ယဿ သမုဒယသစ္စံ န နိရုဇ္ဈိဿတိ တဿ မဂ္ဂသစ္စံ န နိရုဇ္ဈိဿတီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ သမုဒယသစ္စံ န နိရုဇ္ဈိဿတိ၊ နော စ တေသံ မဂ္ဂသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ တေသံ သမုဒယသစ္စဉ္စ န နိရုဇ္ဈိဿတိ မဂ္ဂသစ္စဉ္စ န နိရုဇ္ဈိဿတိ.
(ခ) ယဿ ဝါ ပန မဂ္ဂသစ္စံ န နိရုဇ္ဈိဿတိ တဿ သမုဒယသစ္စံ န နိရုဇ္ဈိဿတီတိ?
ယေ ပုထုဇ္ဇနာ မဂ္ဂံ န ပဋိလဘိဿန္တိ တေသံ မဂ္ဂသစ္စံ န နိရုဇ္ဈိဿတိ၊ နော စ တေသံ သမုဒယသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ တေသံ မဂ္ဂသစ္စဉ္စ န နိရုဇ္ဈိဿတိ သမုဒယသစ္စဉ္စ န နိရုဇ္ဈိဿတိ.
(င) ပစ္စနီကဩကာသော
၁၀၃. ယတ္ထ ဒုက္ခသစ္စံ န နိရုဇ္ဈိဿတိ။ပေ။.
(စ) ပစ္စနီကပုဂ္ဂလောကာသာ
၁၀၄. (က) ယဿ ယတ္ထ ဒုက္ခသစ္စံ န နိရုဇ္ဈိဿတိ တဿ တတ္ထ သမုဒယသစ္စံ န နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ သမုဒယသစ္စံ န နိရုဇ္ဈိဿတိ တဿ တတ္ထ ဒုက္ခသစ္စံ န နိရုဇ္ဈိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ အသညသတ္တာနံ တေသံ တတ္ထ သမုဒယသစ္စံ န နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ တတ္ထ သမုဒယသစ္စဉ္စ န နိရုဇ္ဈိဿတိ ဒုက္ခသစ္စဉ္စ န နိရုဇ္ဈိဿတိ.
(က) ယဿ ယတ္ထ ဒုက္ခသစ္စံ န နိရုဇ္ဈိဿတိ တဿ တတ္ထ မဂ္ဂသစ္စံ န နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ မဂ္ဂသစ္စံ န နိရုဇ္ဈိဿတိ တဿ တတ္ထ ဒုက္ခသစ္စံ န နိရုဇ္ဈိဿတီတိ?
အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ အာပါယိကာနံ အသညသတ္တာနံ တေသံ တတ္ထ မဂ္ဂသစ္စံ န နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ တတ္ထ မဂ္ဂသစ္စဉ္စ န နိရုဇ္ဈိဿတိ ဒုက္ခသစ္စဉ္စ န နိရုဇ္ဈိဿတိ.
၁၀၅. (က) ယဿ ယတ္ထ သမုဒယသစ္စံ န နိရုဇ္ဈိဿတိ တဿ တတ္ထ မဂ္ဂသစ္စံ န နိရုဇ္ဈိဿတီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ တတ္ထ သမုဒယသစ္စံ န နိရုဇ္ဈိဿတိ၊ နော စ တေသံ တတ္ထ မဂ္ဂသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ အသညသတ္တာနံ တေသံ တတ္ထ သမုဒယသစ္စဉ္စ န နိရုဇ္ဈိဿတိ မဂ္ဂသစ္စဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ မဂ္ဂသစ္စံ န နိရုဇ္ဈိဿတိ တဿ တတ္ထ သမုဒယသစ္စံ န နိရုဇ္ဈိဿတီတိ?
အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တတ္ထ မဂ္ဂသစ္စံ န နိရုဇ္ဈိဿတိ၊ နော စ တေသံ တတ္ထ သမုဒယသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ အသညသတ္တာနံ တေသံ တတ္ထ မဂ္ဂသစ္စဉ္စ န နိရုဇ္ဈိဿတိ သမုဒယသစ္စဉ္စ န နိရုဇ္ဈိဿတိ.