(၅) ပစ္စုပ္ပန္နာနာဂတဝါရော

(က) အနုလောမပုဂ္ဂလော

၆၈. (က) ယဿ ဒုက္ခသစ္စံ ဥပ္ပဇ္ဇတိ တဿ သမုဒယသစ္စံ ဥပ္ပဇ္ဇိဿတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ ဒုက္ခသစ္စံ ဥပ္ပဇ္ဇတိ၊ နော စ တေသံ သမုဒယသစ္စံ ဥပ္ပဇ္ဇိဿတိ. ဣတရေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ ဒုက္ခသစ္စဉ္စ ဥပ္ပဇ္ဇတိ သမုဒယသစ္စဉ္စ ဥပ္ပဇ္ဇိဿတိ.

(ခ) ယဿ ဝါ ပန သမုဒယသစ္စံ ဥပ္ပဇ္ဇိဿတိ တဿ ဒုက္ခသစ္စံ ဥပ္ပဇ္ဇတီတိ?

သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ သမုဒယသစ္စံ ဥပ္ပဇ္ဇိဿတိ၊ နော စ တေသံ ဒုက္ခသစ္စံ ဥပ္ပဇ္ဇတိ. သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ သမုဒယသစ္စဉ္စ ဥပ္ပဇ္ဇိဿတိ ဒုက္ခသစ္စဉ္စ ဥပ္ပဇ္ဇတိ.

(က) ယဿ ဒုက္ခသစ္စံ ဥပ္ပဇ္ဇတိ တဿ မဂ္ဂသစ္စံ ဥပ္ပဇ္ဇိဿတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ ဒုက္ခသစ္စံ ဥပ္ပဇ္ဇတိ၊ နော စ တေသံ မဂ္ဂသစ္စံ ဥပ္ပဇ္ဇိဿတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ ဒုက္ခသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇိဿတိ.

(ခ) ယဿ ဝါ ပန မဂ္ဂသစ္စံ ဥပ္ပဇ္ဇိဿတိ တဿ ဒုက္ခသစ္စံ ဥပ္ပဇ္ဇတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ မဂ္ဂသစ္စံ ဥပ္ပဇ္ဇိဿတိ၊ နော စ တေသံ ဒုက္ခသစ္စံ ဥပ္ပဇ္ဇတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ မဂ္ဂသစ္စဉ္စ ဥပ္ပဇ္ဇိဿတိ ဒုက္ခသစ္စဉ္စ ဥပ္ပဇ္ဇတိ.

၆၉. (က) ယဿ သမုဒယသစ္စံ ဥပ္ပဇ္ဇတိ တဿ မဂ္ဂသစ္စံ ဥပ္ပဇ္ဇိဿတီတိ?

ယေ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ သမုဒယသစ္စံ ဥပ္ပဇ္ဇတိ၊ နော စ တေသံ မဂ္ဂသစ္စံ ဥပ္ပဇ္ဇိဿတိ. ယေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ သမုဒယသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇိဿတိ.

(ခ) ယဿ ဝါ ပန မဂ္ဂသစ္စံ ဥပ္ပဇ္ဇိဿတိ တဿ သမုဒယသစ္စံ ဥပ္ပဇ္ဇတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ [ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ (သီ. သျာ.) ပုဂ္ဂလောကာသဝါရေပိ] စညေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ နိရောဓသမာပန္နာနံ အသညသတ္တာနံ တေသံ မဂ္ဂသစ္စံ ဥပ္ပဇ္ဇိဿတိ၊ နော စ တေသံ သမုဒယသစ္စံ ဥပ္ပဇ္ဇတိ. ယေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ မဂ္ဂသစ္စဉ္စ ဥပ္ပဇ္ဇိဿတိ သမုဒယသစ္စဉ္စ ဥပ္ပဇ္ဇတိ.

(ခ) အနုလောမဩကာသော

၇၀. ယတ္ထ ဒုက္ခသစ္စံ ဥပ္ပဇ္ဇတိ။ပေ။ (ယတ္ထကမ္ပိ ယဿယတ္ထကသဒိသံ ကာတဗ္ဗံ).

(ဂ) အနုလောမပုဂ္ဂလောကာသာ

၇၁. (က) ယဿ ယတ္ထ ဒုက္ခသစ္စံ ဥပ္ပဇ္ဇတိ တဿ တတ္ထ သမုဒယသစ္စံ ဥပ္ပဇ္ဇိဿတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ ဒုက္ခသစ္စံ ဥပ္ပဇ္ဇတိ၊ နော စ တေသံ တတ္ထ သမုဒယသစ္စံ ဥပ္ပဇ္ဇိဿတိ. ဣတရေသံ စတုဝေါကာရံ ပဉ္စဝေါကာရံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ ဒုက္ခသစ္စဉ္စ ဥပ္ပဇ္ဇတိ သမုဒယသစ္စဉ္စ ဥပ္ပဇ္ဇိဿတိ.

(ခ) ယဿ ဝါ ပန ယတ္ထ သမုဒယသစ္စံ ဥပ္ပဇ္ဇိဿတိ တဿ တတ္ထ ဒုက္ခသစ္စံ ဥပ္ပဇ္ဇတီတိ?

စတုဝေါကာရာ ပဉ္စဝေါကာရာ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ သမုဒယသစ္စံ ဥပ္ပဇ္ဇိဿတိ၊ နော စ တေသံ တတ္ထ ဒုက္ခသစ္စံ ဥပ္ပဇ္ဇတိ. စတုဝေါကာရံ ပဉ္စဝေါကာရံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ သမုဒယသစ္စဉ္စ ဥပ္ပဇ္ဇိဿတိ ဒုက္ခသစ္စဉ္စ ဥပ္ပဇ္ဇတိ.

(က) ယဿ ယတ္ထ ဒုက္ခသစ္စံ ဥပ္ပဇ္ဇတိ တဿ တတ္ထ မဂ္ဂသစ္စံ ဥပ္ပဇ္ဇိဿတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ ဒုက္ခသစ္စံ ဥပ္ပဇ္ဇတိ၊ နော စ တေသံ တတ္ထ မဂ္ဂသစ္စံ ဥပ္ပဇ္ဇိဿတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ ဒုက္ခသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇိဿတိ.

(ခ) ယဿ ဝါ ပန ယတ္ထ မဂ္ဂသစ္စံ ဥပ္ပဇ္ဇိဿတိ တဿ တတ္ထ ဒုက္ခသစ္စံ ဥပ္ပဇ္ဇတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ မဂ္ဂသစ္စံ ဥပ္ပဇ္ဇိဿတိ၊ နော စ တေသံ တတ္ထ ဒုက္ခသစ္စံ ဥပ္ပဇ္ဇတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ မဂ္ဂသစ္စဉ္စ ဥပ္ပဇ္ဇိဿတိ ဒုက္ခသစ္စဉ္စ ဥပ္ပဇ္ဇတိ.

၇၂. (က) ယဿ ယတ္ထ သမုဒယသစ္စံ ဥပ္ပဇ္ဇတိ တဿ တတ္ထ မဂ္ဂသစ္စံ ဥပ္ပဇ္ဇိဿတီတိ?

အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ တတ္ထ သမုဒယသစ္စံ ဥပ္ပဇ္ဇတိ၊ နော စ တေသံ တတ္ထ မဂ္ဂသစ္စံ ဥပ္ပဇ္ဇိဿတိ. ယေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ တတ္ထ သမုဒယသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇိဿတိ.

(ခ) ယဿ ဝါ ပန ယတ္ထ မဂ္ဂသစ္စံ ဥပ္ပဇ္ဇိဿတိ တဿ တတ္ထ သမုဒယသစ္စံ ဥပ္ပဇ္ဇတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ တတ္ထ မဂ္ဂသစ္စံ ဥပ္ပဇ္ဇိဿတိ၊ နော စ တေသံ တတ္ထ သမုဒယသစ္စံ ဥပ္ပဇ္ဇတိ. ယေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ တတ္ထ မဂ္ဂသစ္စဉ္စ ဥပ္ပဇ္ဇိဿတိ သမုဒယသစ္စဉ္စ ဥပ္ပဇ္ဇတိ.

(ဃ) ပစ္စနီကပုဂ္ဂလော

၇၃. (က) ယဿ ဒုက္ခသစ္စံ နုပ္ပဇ္ဇတိ တဿ သမုဒယသစ္စံ နုပ္ပဇ္ဇိဿတီတိ?

သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ ဒုက္ခသစ္စံ နုပ္ပဇ္ဇတိ၊ နော စ တေသံ သမုဒယသစ္စံ နုပ္ပဇ္ဇိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ တေသံ ဒုက္ခသစ္စဉ္စ နုပ္ပဇ္ဇတိ သမုဒယသစ္စဉ္စ နုပ္ပဇ္ဇိဿတိ.

(ခ) ယဿ ဝါ ပန သမုဒယသစ္စံ နုပ္ပဇ္ဇိဿတိ တဿ ဒုက္ခသစ္စံ နုပ္ပဇ္ဇတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ သမုဒယသစ္စံ နုပ္ပဇ္ဇိဿတိ၊ နော စ တေသံ ဒုက္ခသစ္စံ နုပ္ပဇ္ဇတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ တေသံ သမုဒယသစ္စဉ္စ နုပ္ပဇ္ဇိဿတိ ဒုက္ခသစ္စဉ္စ နုပ္ပဇ္ဇတိ.

(က) ယဿ ဒုက္ခသစ္စံ နုပ္ပဇ္ဇတိ တဿ မဂ္ဂသစ္စံ နုပ္ပဇ္ဇိဿတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ ဒုက္ခသစ္စံ နုပ္ပဇ္ဇတိ၊ နော စ တေသံ မဂ္ဂသစ္စံ နုပ္ပဇ္ဇိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ တေသံ ဒုက္ခသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇိဿတိ.

(ခ) ယဿ ဝါ ပန မဂ္ဂသစ္စံ နုပ္ပဇ္ဇိဿတိ တဿ ဒုက္ခသစ္စံ နုပ္ပဇ္ဇတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ မဂ္ဂသစ္စံ နုပ္ပဇ္ဇိဿတိ၊ နော စ တေသံ ဒုက္ခသစ္စံ နုပ္ပဇ္ဇတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ တေသံ မဂ္ဂသစ္စဉ္စ နုပ္ပဇ္ဇိဿတိ ဒုက္ခသစ္စဉ္စ နုပ္ပဇ္ဇတိ.

၇၄. (က) ယဿ သမုဒယသစ္စံ နုပ္ပဇ္ဇတိ တဿ မဂ္ဂသစ္စံ နုပ္ပဇ္ဇိဿတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿာန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ နိရောဓသမာပန္နာနံ အသညသတ္တာနံ တေသံ သမုဒယသစ္စံ နုပ္ပဇ္ဇတိ၊ နော စ တေသံ မဂ္ဂသစ္စံ နုပ္ပဇ္ဇိဿတိ. အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ သမုဒယသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇိဿတိ.

(ခ) ယဿ ဝါ ပန မဂ္ဂသစ္စံ နုပ္ပဇ္ဇိဿတိ တဿ သမုဒယသစ္စံ နုပ္ပဇ္ဇတီတိ?

ယေ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ မဂ္ဂသစ္စံ နုပ္ပဇ္ဇိဿတိ၊ နော စ တေသံ သမုဒယသစ္စံ နုပ္ပဇ္ဇတိ. အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ မဂ္ဂသစ္စဉ္စ နုပ္ပဇ္ဇိဿတိ သမုဒယသစ္စဉ္စ နုပ္ပဇ္ဇတိ.

(င) ပစ္စနီကဩကာသော

၇၅. ယတ္ထ ဒုက္ခသစ္စံ နုပ္ပဇ္ဇတိ။ပေ။.

(စ) ပစ္စနီကပုဂ္ဂလောကာသာ

၇၆. (က) ယဿ ယတ္ထ ဒုက္ခသစ္စံ နုပ္ပဇ္ဇတိ တဿ တတ္ထ သမုဒယသစ္စံ နုပ္ပဇ္ဇိဿတီတိ?

စတုဝေါကာရာ ပဉ္စဝေါကာရာ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ ဒုက္ခသစ္စံ နုပ္ပဇ္ဇတိ၊ နော စ တေသံ တတ္ထ သမုဒယသစ္စံ နုပ္ပဇ္ဇိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အသညသတ္တာ စဝန္တာနံ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ ဒုက္ခသစ္စဉ္စ နုပ္ပဇ္ဇတိ သမုဒယသစ္စဉ္စ နုပ္ပဇ္ဇိဿတိ.

(ခ) ယဿ ဝါ ပန ယတ္ထ သမုဒယသစ္စံ နုပ္ပဇ္ဇိဿတိ တဿ တတ္ထ ဒုက္ခသစ္စံ နုပ္ပဇ္ဇတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ သမုဒယသစ္စံ နုပ္ပဇ္ဇိဿတိ၊ နော စ တေသံ တတ္ထ ဒုက္ခသစ္စံ နုပ္ပဇ္ဇတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ အသညသတ္တာ စဝန္တာနံ တေသံ တတ္ထ သမုဒယသစ္စဉ္စ နုပ္ပဇ္ဇိဿတိ ဒုက္ခသစ္စဉ္စ နုပ္ပဇ္ဇတိ.

(က) ယဿ ယတ္ထ ဒုက္ခသစ္စံ နုပ္ပဇ္ဇတိ တဿ တတ္ထ မဂ္ဂသစ္စံ နုပ္ပဇ္ဇိဿတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ ဒုက္ခသစ္စံ နုပ္ပဇ္ဇတိ၊ နော စ တေသံ တတ္ထ မဂ္ဂသစ္စံ နုပ္ပဇ္ဇိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အသညတ္တာ စဝန္တာနံ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ အသညသတ္တာ စဝန္တာနံ တေသံ တတ္ထ ဒုက္ခသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇိဿတိ.

(ခ) ယဿ ဝါ ပန ယတ္ထ မဂ္ဂသစ္စံ နုပ္ပဇ္ဇိဿတိ တဿ တတ္ထ ဒုက္ခသစ္စံ နုပ္ပဇ္ဇတီတိ?

အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ မဂ္ဂသစ္စံ နုပ္ပဇ္ဇိဿတိ၊ နော စ တေသံ တတ္ထ ဒုက္ခသစ္စံ နုပ္ပဇ္ဇတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ အဂ္ဂမဂ္ဂဿ စ ဖလဿ စ ဥပ္ပါဒက္ခဏေ အသညသတ္တာ စဝန္တာနံ တေသံ တတ္ထ မဂ္ဂသစ္စဉ္စ နုပ္ပဇ္ဇိဿတိ ဒုက္ခသစ္စဉ္စ နုပ္ပဇ္ဇတိ.

၇၇. (က) ယဿ ယတ္ထ သမုဒယသစ္စံ နုပ္ပဇ္ဇတိ တဿ တတ္ထ မဂ္ဂသစ္စံ နုပ္ပဇ္ဇိဿတီတိ?

ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ တတ္ထ သမုဒယသစ္စံ နုပ္ပဇ္ဇတိ၊ နော စ တေသံ တတ္ထ မဂ္ဂသစ္စံ နုပ္ပဇ္ဇိဿတိ. အဂ္ဂမဂ္ဂသမင်္ဂီနံ အရဟန္တာနံ၊ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ တတ္ထ သမုဒယသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇိဿတိ.

(ခ) ယဿ ဝါ ပန ယတ္ထ မဂ္ဂသစ္စံ နုပ္ပဇ္ဇိဿတိ တဿ တတ္ထ သမုဒယသစ္စံ နုပ္ပဇ္ဇတီတိ?

အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တေသံ တတ္ထ မဂ္ဂသစ္စံ နုပ္ပဇ္ဇိဿတိ၊ နော စ တေသံ တတ္ထ သမုဒယသစ္စံ နုပ္ပဇ္ဇတိ. အဂ္ဂမဂ္ဂသမင်္ဂီနံ အရဟန္တာနံ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ တတ္ထ မဂ္ဂသစ္စဉ္စ နုပ္ပဇ္ဇိဿတိ သမုဒယသစ္စဉ္စ နုပ္ပဇ္ဇတိ.