(၆) အတီတာနာဂတဝါရော
(က) အနုလောမပုဂ္ဂလော
၇၈. (က) ယဿ ဒုက္ခသစ္စံ ဥပ္ပဇ္ဇိတ္ထ တဿ သမုဒယသစ္စံ ဥပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ ဒုက္ခသစ္စံ ဥပ္ပဇ္ဇိတ္ထ၊ နော စ တေသံ သမုဒယသစ္စံ ဥပ္ပဇ္ဇိဿတိ. ဣတရေသံ တေသံ ဒုက္ခသစ္စဉ္စ ဥပ္ပဇ္ဇိတ္ထ သမုဒယသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန သမုဒယသစ္စံ ဥပ္ပဇ္ဇိဿတိ တဿ ဒုက္ခသစ္စံ ဥပ္ပဇ္ဇိတ္ထာတိ? အာမန္တာ.
(က) ယဿ ဒုက္ခသစ္စံ ဥပ္ပဇ္ဇိတ္ထ တဿ မဂ္ဂသစ္စံ ဥပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဒုက္ခသစ္စံ ဥပ္ပဇ္ဇိတ္ထ၊ နော စ တေသံ မဂ္ဂသစ္စံ ဥပ္ပဇ္ဇိဿတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ ဒုက္ခသစ္စဉ္စ ဥပ္ပဇ္ဇိတ္ထ မဂ္ဂသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန။ပေ။? အာမန္တာ.
၇၉. (က) ယဿ သမုဒယသစ္စံ ဥပ္ပဇ္ဇိတ္ထ တဿ မဂ္ဂသစ္စံ ဥပ္ပဇ္ဇိဿတီတိ? အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ သမုဒယသစ္စံ ဥပ္ပဇ္ဇိတ္ထ၊ နော စ တေသံ မဂ္ဂသစ္စံ ဥပ္ပဇ္ဇိဿတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ၊ ယေ စညေ မဂ္ဂံ ပဋိလဘိဿန္တိ တေသံ သမုဒယသစ္စဉ္စ ဥပ္ပဇ္ဇိတ္ထ မဂ္ဂသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန။ပေ။? အာမန္တာ.
(ခ) အနုလောမဩကာသော
၈၀. ယတ္ထ ဒုက္ခသစ္စံ ဥပ္ပဇ္ဇိတ္ထ။ပေ။.
(ဂ) အနုလောမပုဂ္ဂလောကာသာ
၈၁. (က) ယဿ ယတ္ထ ဒုက္ခသစ္စံ ဥပ္ပဇ္ဇိတ္ထ တဿ တတ္ထ သမုဒယသစ္စံ ဥပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ အသညသတ္တာနံ တေသံ တတ္ထ ဒုက္ခသစ္စံ ဥပ္ပဇ္ဇိတ္ထ၊ နော စ တေသံ တတ္ထ သမုဒယသစ္စံ ဥပ္ပဇ္ဇိဿတိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ဒုက္ခသစ္စဉ္စ ဥပ္ပဇ္ဇိတ္ထ သမုဒယသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ သမုဒယသစ္စံ ဥပ္ပဇ္ဇိဿတိ တဿ တတ္ထ ဒုက္ခသစ္စံ ဥပ္ပဇ္ဇိတ္ထာတိ?
သုဒ္ဓါဝါသံ ဥပပဇ္ဇန္တာနံ တေသံ တတ္ထ သမုဒယသစ္စံ ဥပ္ပဇ္ဇိဿတိ၊ နော စ တေသံ တတ္ထ ဒုက္ခသစ္စံ ဥပ္ပဇ္ဇိတ္ထ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ သမုဒယသစ္စဉ္စ ဥပ္ပဇ္ဇိဿတိ ဒုက္ခသစ္စဉ္စ ဥပ္ပဇ္ဇိတ္ထ.
(က) ယဿ ယတ္ထ ဒုက္ခသစ္စံ ဥပ္ပဇ္ဇိတ္ထ တဿ တတ္ထ မဂ္ဂသစ္စံ ဥပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ အာပါယိကာနံ အသညသတ္တာနံ တေသံ တတ္ထ ဒုက္ခသစ္စံ ဥပ္ပဇ္ဇိတ္ထ၊ နော စ တေသံ တတ္ထ မဂ္ဂသစ္စံ ဥပ္ပဇ္ဇိဿတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တတ္ထ ဒုက္ခသစ္စဉ္စ ဥပ္ပဇ္ဇိတ္ထ မဂ္ဂသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ မဂ္ဂသစ္စံ ဥပ္ပဇ္ဇိဿတိ တဿ တတ္ထ ဒုက္ခသစ္စံ ဥပ္ပဇ္ဇိတ္ထာတိ?
သုဒ္ဓါဝါသံ ဥပပဇ္ဇန္တာနံ တေသံ တတ္ထ မဂ္ဂသစ္စံ ဥပ္ပဇ္ဇိဿတိ၊ နော စ တေသံ တတ္ထ ဒုက္ခသစ္စံ ဥပ္ပဇ္ဇိတ္ထ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တတ္ထ မဂ္ဂသစ္စဉ္စ ဥပ္ပဇ္ဇိဿတိ ဒုက္ခသစ္စဉ္စ ဥပ္ပဇ္ဇိတ္ထ.
၈၂. (က) ယဿ ယတ္ထ သမုဒယသစ္စံ ဥပ္ပဇ္ဇိတ္ထ တဿ တတ္ထ မဂ္ဂသစ္စံ ဥပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ အာပါယိကာနံ တေသံ တတ္ထ သမုဒယသစ္စံ ဥပ္ပဇ္ဇိတ္ထ၊ နော စ တေသံ တတ္ထ မဂ္ဂသစ္စံ ဥပ္ပဇ္ဇိဿတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တတ္ထ သမုဒယသစ္စဉ္စ ဥပ္ပဇ္ဇိတ္ထ မဂ္ဂသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ မဂ္ဂသစ္စံ ဥပ္ပဇ္ဇိဿတိ တဿ တတ္ထ သမုဒယသစ္စံ ဥပ္ပဇ္ဇိတ္ထာတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ တေသံ တတ္ထ မဂ္ဂသစ္စံ ဥပ္ပဇ္ဇိဿတိ၊ နော စ တေသံ တတ္ထ သမုဒယသစ္စံ ဥပ္ပဇ္ဇိတ္ထ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တတ္ထ မဂ္ဂသစ္စဉ္စ ဥပ္ပဇ္ဇိဿတိ သမုဒယသစ္စဉ္စ ဥပ္ပဇ္ဇိတ္ထ.
(ဃ) ပစ္စနီကပုဂ္ဂလော
၈၃. (က) ယဿ ဒုက္ခသစ္စံ နုပ္ပဇ္ဇိတ္ထ တဿ သမုဒယသစ္စံ နုပ္ပဇ္ဇိဿတီတိ? နတ္ထိ.
(ခ) ယဿ ဝါ ပန သမုဒယသစ္စံ နုပ္ပဇ္ဇိဿတိ တဿ ဒုက္ခသစ္စံ နုပ္ပဇ္ဇိတ္ထာတိ? ဥပ္ပဇ္ဇိတ္ထ.
(က) ယဿ ဒုက္ခသစ္စံ နုပ္ပဇ္ဇိတ္ထ တဿ မဂ္ဂသစ္စံ နုပ္ပဇ္ဇိဿတီတိ? နတ္ထိ.
(ခ) ယဿ ဝါ ပန မဂ္ဂသစ္စံ နုပ္ပဇ္ဇိဿတိ တဿ ဒုက္ခသစ္စံ နုပ္ပဇ္ဇိတ္ထာတိ? ဥပ္ပဇ္ဇိတ္ထ.
၈၄. (က) ယဿ သမုဒယသစ္စံ နုပ္ပဇ္ဇိတ္ထ တဿ မဂ္ဂသစ္စံ နုပ္ပဇ္ဇိဿတီတိ? နတ္ထိ.
(ခ) ယဿ ဝါ ပန မဂ္ဂသစ္စံ နုပ္ပဇ္ဇိဿတိ တဿ သမုဒယသစ္စံ နုပ္ပဇ္ဇိတ္ထာတိ? ဥပ္ပဇ္ဇိတ္ထ.
(င) ပစ္စနီကဩကာသော
၈၅. ယတ္ထ ဒုက္ခသစ္စံ နုပ္ပဇ္ဇိတ္ထ။ပေ။.
(စ) ပစ္စနီကပုဂ္ဂလောကာသာ
၈၆. (က) ယဿ ယတ္ထ ဒုက္ခသစ္စံ နုပ္ပဇ္ဇိတ္ထ တဿ တတ္ထ သမုဒယသစ္စံ နုပ္ပဇ္ဇိဿတီတိ? ဥပ္ပဇ္ဇိဿတိ.
(ခ) ယဿ ဝါ ပန ယတ္ထ သမုဒယသစ္စံ နုပ္ပဇ္ဇိဿတိ တဿ တတ္ထ ဒုက္ခသစ္စံ နုပ္ပဇ္ဇိတ္ထာတိ? ဥပ္ပဇ္ဇိတ္ထ.
(က) ယဿ ယတ္ထ ဒုက္ခသစ္စံ နုပ္ပဇ္ဇိတ္ထ တဿ တတ္ထ မဂ္ဂသစ္စံ နုပ္ပဇ္ဇိဿတီတိ? ဥပ္ပဇ္ဇိဿတိ.
(ခ) ယဿ ဝါ ပန ယတ္ထ မဂ္ဂသစ္စံ နုပ္ပဇ္ဇိဿတိ တဿ တတ္ထ ဒုက္ခသစ္စံ နုပ္ပဇ္ဇိတ္ထာတိ? ဥပ္ပဇ္ဇိတ္ထ.
၈၇. (က) ယဿ ယတ္ထ သမုဒယသစ္စံ နုပ္ပဇ္ဇိတ္ထ တဿ တတ္ထ မဂ္ဂသစ္စံ နုပ္ပဇ္ဇိဿတီတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ တေသံ တတ္ထ သမုဒယသစ္စံ နုပ္ပဇ္ဇိတ္ထ၊ နော စ တေသံ တတ္ထ မဂ္ဂသစ္စံ နုပ္ပဇ္ဇိဿတိ. အသညသတ္တာနံ တေသံ တတ္ထ သမုဒယသစ္စဉ္စ နုပ္ပဇ္ဇိတ္ထ မဂ္ဂသစ္စဉ္စ နုပ္ပဇ္ဇိဿတိ.
(ခ) ယဿ ဝါ ပန ယတ္ထ မဂ္ဂသစ္စံ နုပ္ပဇ္ဇိဿတိ တဿ တတ္ထ သမုဒယသစ္စံ နုပ္ပဇ္ဇိတ္ထာတိ?
အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ အာပါယိကာနံ တေသံ တတ္ထ မဂ္ဂသစ္စံ နုပ္ပဇ္ဇိဿတိ၊ နော စ တေသံ တတ္ထ သမုဒယသစ္စံ နုပ္ပဇ္ဇိတ္ထ. အသညသတ္တာနံ တေသံ တတ္ထ မဂ္ဂသစ္စဉ္စ နုပ္ပဇ္ဇိဿတိ သမုဒယသစ္စဉ္စ နုပ္ပဇ္ဇိတ္ထ.
ဥပ္ပါဒဝါရော.