(၄) ပစ္စုပ္ပန္နာတီတဝါရော
(က) အနုလောမပုဂ္ဂလော
၅၈. (က) ယဿ ဒုက္ခသစ္စံ ဥပ္ပဇ္ဇတိ တဿ သမုဒယသစ္စံ ဥပ္ပဇ္ဇိတ္ထာတိ? အာမန္တာ.
(ခ) ယဿ ဝါ ပန သမုဒယသစ္စံ ဥပ္ပဇ္ဇိတ္ထ တဿ ဒုက္ခသစ္စံ ဥပ္ပဇ္ဇတီတိ?
သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ သမုဒယသစ္စံ ဥပ္ပဇ္ဇိတ္ထ၊ နော စ တေသံ ဒုက္ခသစ္စံ ဥပ္ပဇ္ဇတိ. သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ သမုဒယသစ္စဉ္စ ဥပ္ပဇ္ဇိတ္ထ ဒုက္ခသစ္စဉ္စ ဥပ္ပဇ္ဇတိ.
(က) ယဿ ဒုက္ခသစ္စံ ဥပ္ပဇ္ဇတိ တဿ မဂ္ဂသစ္စံ ဥပ္ပဇ္ဇိတ္ထာတိ? အနဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ ဒုက္ခသစ္စံ ဥပ္ပဇ္ဇတိ၊ နော စ တေသံ မဂ္ဂသစ္စံ ဥပ္ပဇ္ဇိတ္ထ. အဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ ဒုက္ခသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇိတ္ထ.
(ခ) ယဿ ဝါ ပန မဂ္ဂသစ္စံ ဥပ္ပဇ္ဇိတ္ထ တဿ ဒုက္ခသစ္စံ ဥပ္ပဇ္ဇတီတိ?
အဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ မဂ္ဂသစ္စံ ဥပ္ပဇ္ဇိတ္ထ၊ နော စ တေသံ ဒုက္ခသစ္စံ ဥပ္ပဇ္ဇတိ. အဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ မဂ္ဂသစ္စဉ္စ ဥပ္ပဇ္ဇိတ္ထ ဒုက္ခသစ္စဉ္စ ဥပ္ပဇ္ဇတိ.
၅၉. (က) ယဿ သမုဒယသစ္စံ ဥပ္ပဇ္ဇတိ တဿ မဂ္ဂသစ္စံ ဥပ္ပဇ္ဇိတ္ထာတိ?
အနဘိသမေတာဝီနံ တဏှာယ ဥပ္ပါဒက္ခဏေ တေသံ သမုဒယသစ္စံ ဥပ္ပဇ္ဇတိ၊ နော စ တေသံ မဂ္ဂသစ္စံ ဥပ္ပဇ္ဇိတ္ထ. အဘိသမေတာဝီနံ တဏှာယ ဥပ္ပါဒက္ခဏေ တေသံ သမုဒယသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇိတ္ထ.
(ခ) ယဿ ဝါ ပန မဂ္ဂသစ္စံ ဥပ္ပဇ္ဇိတ္ထ တဿ သမုဒယသစ္စံ ဥပ္ပဇ္ဇတီတိ?
အဘိသမေတာဝီနံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ နိရောဓသမာပန္နာနံ တေသံ မဂ္ဂသစ္စံ ဥပ္ပဇ္ဇိတ္ထ၊ နော စ တေသံ သမုဒယသစ္စံ ဥပ္ပဇ္ဇတိ. အဘိသမေတာဝီနံ တဏှာယ ဥပ္ပါဒက္ခဏေ တေသံ မဂ္ဂသစ္စဉ္စ ဥပ္ပဇ္ဇိတ္ထ သမုဒယသစ္စဉ္စ ဥပ္ပဇ္ဇတိ.
(ခ) အနုလောမဩကာသော
၆၀. ယတ္ထ ဒုက္ခသစ္စံ ဥပ္ပဇ္ဇတိ။ပေ။ (ယတ္ထကာ သဒိသာ သဗ္ဗေ).
(ဂ) အနုလောမပုဂ္ဂလောကာသာ
၆၁. (က) ယဿ ယတ္ထ ဒုက္ခသစ္စံ ဥပ္ပဇ္ဇတိ တဿ တတ္ထ သမုဒယသစ္စံ ဥပ္ပဇ္ဇိတ္ထာတိ?
သုဒ္ဓါဝါသာနံ ဥပပတ္တိစိတ္တဿ [ဥပ္ပတ္တိစိတ္တဿ (သျာ.)] ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ ဒုက္ခသစ္စံ ဥပ္ပဇ္ဇတိ၊ နော စ တေသံ တတ္ထ သမုဒယသစ္စံ ဥပ္ပဇ္ဇိတ္ထ. ဣတရေသံ စတုဝေါကာရံ ပဉ္စဝေါကာရံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ ဒုက္ခသစ္စဉ္စ ဥပ္ပဇ္ဇတိ သမုဒယသစ္စဉ္စ ဥပ္ပဇ္ဇိတ္ထ.
(ခ) ယဿ ဝါ ပန ယတ္ထ သမုဒယသစ္စံ ဥပ္ပဇ္ဇိတ္ထ တဿ တတ္ထ ဒုက္ခသစ္စံ ဥပ္ပဇ္ဇတီတိ?
စတုဝေါကာရာ ပဉ္စဝေါကာရာ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ သမုဒယသစ္စံ ဥပ္ပဇ္ဇိတ္ထ၊ နော စ တေသံ တတ္ထ ဒုက္ခသစ္စံ ဥပ္ပဇ္ဇတိ. စတုဝေါကာရံ ပဉ္စဝေါကာရံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ သမုဒယသစ္စဉ္စ ဥပ္ပဇ္ဇိတ္ထ ဒုက္ခသစ္စဉ္စ ဥပ္ပဇ္ဇတိ.
(က) ယဿ ယတ္ထ ဒုက္ခသစ္စံ ဥပ္ပဇ္ဇတိ တဿ တတ္ထ မဂ္ဂသစ္စံ ဥပ္ပဇ္ဇိတ္ထာတိ?
သုဒ္ဓါဝါသာနံ ဥပပတ္တိစိတ္တဿ ဥပ္ပါဒက္ခဏေ အနဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ ဒုက္ခသစ္စံ ဥပ္ပဇ္ဇတိ၊ နော စ တေသံ တတ္ထ မဂ္ဂသစ္စံ ဥပ္ပဇ္ဇိတ္ထ. အဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ ဒုက္ခသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇိတ္ထ.
(ခ) ယဿ ဝါ ပန ယတ္ထ မဂ္ဂသစ္စံ ဥပ္ပဇ္ဇိတ္ထ တဿ တတ္ထ ဒုက္ခသစ္စံ ဥပ္ပဇ္ဇတီတိ?
အဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ မဂ္ဂသစ္စံ ဥပ္ပဇ္ဇိတ္ထ၊ နော စ တေသံ တတ္ထ ဒုက္ခသစ္စံ ဥပ္ပဇ္ဇတိ. အဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ တတ္ထ မဂ္ဂသစ္စဉ္စ ဥပ္ပဇ္ဇိတ္ထ ဒုက္ခသစ္စဉ္စ ဥပ္ပဇ္ဇတိ.
၆၂. (က) ယဿ ယတ္ထ သမုဒယသစ္စံ ဥပ္ပဇ္ဇတိ တဿ တတ္ထ မဂ္ဂသစ္စံ ဥပ္ပဇ္ဇိတ္ထာတိ?
အနဘိသမေတာဝီနံ တဏှာယ ဥပ္ပါဒက္ခဏေ တေသံ တတ္ထ သမုဒယသစ္စံ ဥပ္ပဇ္ဇတိ၊ နော စ တေသံ တတ္ထ မဂ္ဂသစ္စံ ဥပ္ပဇ္ဇိတ္ထ. အဘိသမေတာဝီနံ တဏှာယ ဥပ္ပါဒက္ခဏေ တေသံ တတ္ထ သမုဒယသစ္စဉ္စ ဥပ္ပဇ္ဇတိ မဂ္ဂသစ္စဉ္စ ဥပ္ပဇ္ဇိတ္ထ.
(ခ) ယဿ ဝါ ပန ယတ္ထ မဂ္ဂသစ္စံ ဥပ္ပဇ္ဇိတ္ထ တဿ တတ္ထ သမုဒယသစ္စံ ဥပ္ပဇ္ဇတီတိ?
အဘိသမေတာဝီနံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ တတ္ထ မဂ္ဂသစ္စံ ဥပ္ပဇ္ဇိတ္ထ၊ နော စ တေသံ တတ္ထ သမုဒယသစ္စံ ဥပ္ပဇ္ဇတိ. အဘိသမေတာဝီနံ တဏှာယ ဥပ္ပါဒက္ခဏေ တေသံ တတ္ထ မဂ္ဂသစ္စဉ္စ ဥပ္ပဇ္ဇိတ္ထ သမုဒယသစ္စဉ္စ ဥပ္ပဇ္ဇတိ.
(ဃ) ပစ္စနီကပုဂ္ဂလော
၆၃. (က) ယဿ ဒုက္ခသစ္စံ နုပ္ပဇ္ဇတိ တဿ သမုဒယသစ္စံ နုပ္ပဇ္ဇိတ္ထာတိ?
ဥပ္ပဇ္ဇိတ္ထ.
(ခ) ယဿ ဝါ ပန သမုဒယသစ္စံ နုပ္ပဇ္ဇိတ္ထ တဿ ဒုက္ခသစ္စံ နုပ္ပဇ္ဇတီတိ? နတ္ထိ.
(က) ယဿ ဒုက္ခသစ္စံ နုပ္ပဇ္ဇတိ တဿ မဂ္ဂသစ္စံ နုပ္ပဇ္ဇိတ္ထာတိ?
အဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ ဒုက္ခသစ္စံ နုပ္ပဇ္ဇတိ၊ နော စ တေသံ မဂ္ဂသစ္စံ နုပ္ပဇ္ဇိတ္ထ. အနဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ ဒုက္ခသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇိတ္ထ.
(ခ) ယဿ ဝါ ပန မဂ္ဂသစ္စံ နုပ္ပဇ္ဇိတ္ထ တဿ ဒုက္ခသစ္စံ နုပ္ပဇ္ဇတီတိ?
အနဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ တေသံ မဂ္ဂသစ္စံ နုပ္ပဇ္ဇိတ္ထ၊ နော စ တေသံ ဒုက္ခသစ္စံ နုပ္ပဇ္ဇတိ. အနဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ မဂ္ဂသစ္စဉ္စ နုပ္ပဇ္ဇိတ္ထ ဒုက္ခသစ္စဉ္စ နုပ္ပဇ္ဇတိ.
၆၄. (က) ယဿ သမုဒယသစ္စံ နုပ္ပဇ္ဇတိ တဿ မဂ္ဂသစ္စံ နုပ္ပဇ္ဇိတ္ထာတိ?
အဘိသမေတာဝီနံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ နိရောဓသမာပန္နာနံ တေသံ သမုဒယသစ္စံ နုပ္ပဇ္ဇတိ၊ နော စ တေသံ မဂ္ဂသစ္စံ နုပ္ပဇ္ဇိတ္ထ. အနဘိသမေတာဝီနံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ သမုဒယသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇိတ္ထ.
(ခ) ယဿ ဝါ ပန မဂ္ဂသစ္စံ နုပ္ပဇ္ဇိတ္ထ တဿ သမုဒယသစ္စံ နုပ္ပဇ္ဇတီတိ?
အနဘိသမေတာဝီနံ တဏှာယ ဥပ္ပါဒက္ခဏေ တေသံ မဂ္ဂသစ္စံ နုပ္ပဇ္ဇိတ္ထ၊ နော စ တေသံ သမုဒယသစ္စံ နုပ္ပဇ္ဇတိ. အနဘိသမေတာဝီနံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ မဂ္ဂသစ္စဉ္စ နုပ္ပဇ္ဇိတ္ထ သမုဒယသစ္စဉ္စ နုပ္ပဇ္ဇတိ.
(င) ပစ္စနီကဩကာသော
၆၅. ယတ္ထ ဒုက္ခသစ္စံ နုပ္ပဇ္ဇတိ။ပေ။.
(စ) ပစ္စနီကပုဂ္ဂလောကာသာ
၆၆. (က) ယဿ ယတ္ထ ဒုက္ခသစ္စံ နုပ္ပဇ္ဇတိ တဿ တတ္ထ သမုဒယသစ္စံ နုပ္ပဇ္ဇိတ္ထာတိ?
စတုဝေါကာရာ ပဉ္စဝေါကာရာ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ ဒုက္ခသစ္စံ နုပ္ပဇ္ဇတိ၊ နော စ တေသံ တတ္ထ သမုဒယသစ္စံ နုပ္ပဇ္ဇိတ္ထ. သုဒ္ဓါဝါသာနံ ဥပပတ္တိစိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ ဒုက္ခသစ္စဉ္စ နုပ္ပဇ္ဇတိ သမုဒယသစ္စဉ္စ နုပ္ပဇ္ဇိတ္ထ.
(ခ) ယဿ ဝါ ပန ယတ္ထ သမုဒယသစ္စံ နုပ္ပဇ္ဇိတ္ထ တဿ တတ္ထ ဒုက္ခသစ္စံ နုပ္ပဇ္ဇတီတိ?
သုဒ္ဓါဝါသာနံ ဥပပတ္တိစိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ သမုဒယသစ္စံ နုပ္ပဇ္ဇိတ္ထ၊ နော စ တေသံ တတ္ထ ဒုက္ခသစ္စံ နုပ္ပဇ္ဇတိ. သုဒ္ဓါဝါသာနံ ဥပပတ္တိစိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ သမုဒယသစ္စဉ္စ နုပ္ပဇ္ဇိတ္ထ ဒုက္ခသစ္စဉ္စ နုပ္ပဇ္ဇတိ.
(က) ယဿ ယတ္ထ ဒုက္ခသစ္စံ နုပ္ပဇ္ဇတိ တဿ တတ္ထ မဂ္ဂသစ္စံ နုပ္ပဇ္ဇိတ္ထာတိ?
အဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပါဒက္ခဏေ တေသံ တတ္ထ ဒုက္ခသစ္စံ နုပ္ပဇ္ဇတိ၊ နော စ တေသံ တတ္ထ မဂ္ဂသစ္စံ နုပ္ပဇ္ဇိတ္ထ. သုဒ္ဓါဝါသာနံ ဥပပတ္တိစိတ္တဿ ဘင်္ဂက္ခဏေ အနဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ ဒုက္ခသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇိတ္ထ.
(ခ) ယဿ ဝါ ပန ယတ္ထ မဂ္ဂသစ္စံ နုပ္ပဇ္ဇိတ္ထ တဿ တတ္ထ ဒုက္ခသစ္စံ နုပ္ပဇ္ဇတီတိ?
သုဒ္ဓါဝါသာနံ ဥပပတ္တိစိတ္တဿ ဥပ္ပါဒက္ခဏေ အနဘိသမေတာဝီနံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ တေသံ တတ္ထ မဂ္ဂသစ္စံ နုပ္ပဇ္ဇိတ္ထ၊ နော စ တေသံ တတ္ထ ဒုက္ခသစ္စံ နုပ္ပဇ္ဇတိ. သုဒ္ဓါဝါသာနံ ဥပပတ္တိစိတ္တဿ ဘင်္ဂက္ခဏေ အနဘိသမေတာဝီနံ စဝန္တာနံ ပဝတ္တေ စိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ မဂ္ဂသစ္စဉ္စ နုပ္ပဇ္ဇိတ္ထ ဒုက္ခသစ္စဉ္စ နုပ္ပဇ္ဇတိ.
၆၇. (က) ယဿ ယတ္ထ သမုဒယသစ္စံ နုပ္ပဇ္ဇတိ တဿ တတ္ထ မဂ္ဂသစ္စံ နုပ္ပဇ္ဇိတ္ထာတိ?
အဘိသမေတာဝီနံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ တတ္ထ သမုဒယသစ္စံ နုပ္ပဇ္ဇတိ၊ နော စ တေသံ တတ္ထ မဂ္ဂသစ္စံ နုပ္ပဇ္ဇိတ္ထ. သုဒ္ဓါဝါသာနံ ဒုတိယေ စိတ္တေ ဝတ္တမာနေ အနဘိသမေတာဝီနံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ တတ္ထ သမုဒယသစ္စဉ္စ နုပ္ပဇ္ဇတိ မဂ္ဂသစ္စဉ္စ နုပ္ပဇ္ဇိတ္ထ.
(ခ) ယဿ ဝါ ပန ယတ္ထ မဂ္ဂသစ္စံ နုပ္ပဇ္ဇိတ္ထ တဿ တတ္ထ သမုဒယသစ္စံ နုပ္ပဇ္ဇတီတိ?
အနဘိသမေတာဝီနံ တဏှာယ ဥပ္ပါဒက္ခဏေ တေသံ တတ္ထ မဂ္ဂသစ္စံ နုပ္ပဇ္ဇိတ္ထ၊ နော စ တေသံ တတ္ထ သမုဒယသစ္စံ နုပ္ပဇ္ဇတိ. သုဒ္ဓါဝါသာနံ ဒုတိယေ စိတ္တေ ဝတ္တမာနေ အနဘိသမေတာဝီနံ တဏှာယ ဘင်္ဂက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ တတ္ထ မဂ္ဂသစ္စဉ္စ နုပ္ပဇ္ဇိတ္ထ သမုဒယသစ္စဉ္စ နုပ္ပဇ္ဇတိ.