(၃) အနာဂတဝါရော
(က) အနုလောမပုဂ္ဂလော
၄၈. (က) ယဿ ဒုက္ခသစ္စံ ဥပ္ပဇ္ဇိဿတိ တဿ သမုဒယသစ္စံ ဥပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ ဒုက္ခသစ္စံ ဥပ္ပဇ္ဇိဿတိ၊ နော စ တေသံ သမုဒယသစ္စံ ဥပ္ပဇ္ဇိဿတိ. ဣတရေသံ တေသံ ဒုက္ခသစ္စဉ္စ ဥပ္ပဇ္ဇိဿတိ သမုဒယသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန။ပေ။? အာမန္တာ.
(က) ယဿ ဒုက္ခသစ္စံ ဥပ္ပဇ္ဇိဿတိ တဿ မဂ္ဂသစ္စံ ဥပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဒုက္ခသစ္စံ ဥပ္ပဇ္ဇိဿတိ၊ နော စ တေသံ မဂ္ဂသစ္စံ ဥပ္ပဇ္ဇိဿတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ ဒုက္ခသစ္စဉ္စ ဥပ္ပဇ္ဇိဿတိ မဂ္ဂသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန။ပေ။ ဥပ္ပဇ္ဇိဿတီတိ? အာမန္တာ.
၄၉. (က) ယဿ သမုဒယသစ္စံ ဥပ္ပဇ္ဇိဿတိ တဿ မဂ္ဂသစ္စံ ဥပ္ပဇ္ဇိဿတီတိ?
ယေ ပုထုဇ္ဇနာ မဂ္ဂံ န ပဋိလဘိဿန္တိ တေသံ သမုဒယသစ္စံ ဥပ္ပဇ္ဇိဿတိ၊ နော စ တေသံ မဂ္ဂသစ္စံ ဥပ္ပဇ္ဇိဿတိ. ယေ မဂ္ဂံ ပဋိလဘိဿန္တိ တေသံ သမုဒယသစ္စဉ္စ ဥပ္ပဇ္ဇိဿတိ မဂ္ဂသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန မဂ္ဂသစ္စံ ဥပ္ပဇ္ဇိဿတိ တဿ သမုဒယသစ္စံ ဥပ္ပဇ္ဇိဿတီတိ?
ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ မဂ္ဂသစ္စံ ဥပ္ပဇ္ဇိဿတိ၊ နော စ တေသံ သမုဒယသစ္စံ ဥပ္ပဇ္ဇိဿတိ. ယေ မဂ္ဂံ ပဋိလဘိဿန္တိ တေသံ မဂ္ဂသစ္စဉ္စ ဥပ္ပဇ္ဇိဿတိ သမုဒယသစ္စဉ္စ ဥပ္ပဇ္ဇိဿတိ.
(ခ) အနုလောမဩကာသော
၅၀. ယတ္ထ ဒုက္ခသစ္စံ ဥပ္ပဇ္ဇိဿတိ။ပေ။.
(ဂ) အနုလောမပုဂ္ဂလောကာသာ
၅၁. (က) ယဿ ယတ္ထ ဒုက္ခသစ္စံ ဥပ္ပဇ္ဇိဿတိ တဿ တတ္ထ သမုဒယသစ္စံ ဥပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ အသညသတ္တာနံ တေသံ တတ္ထ ဒုက္ခသစ္စံ ဥပ္ပဇ္ဇိဿတိ၊ နော စ တေသံ တတ္ထ သမုဒယသစ္စံ ဥပ္ပဇ္ဇိဿတိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ဒုက္ခသစ္စဉ္စ ဥပ္ပဇ္ဇိဿတိ သမုဒယသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ သမုဒယသစ္စံ ဥပ္ပဇ္ဇိဿတိ။ပေ။ ဥပ္ပဇ္ဇိဿတီတိ? အာမန္တာ.
(က) ယဿ ယတ္ထ ဒုက္ခသစ္စံ ဥပ္ပဇ္ဇိဿတိ တဿ တတ္ထ မဂ္ဂသစ္စံ ဥပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ အာပါယိကာနံ အသညသတ္တာနံ တေသံ တတ္ထ ဒုက္ခသစ္စံ ဥပ္ပဇ္ဇိဿတိ၊ နော စ တေသံ တတ္ထ မဂ္ဂသစ္စံ ဥပ္ပဇ္ဇိဿတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ၊ ယေ စညေ မဂ္ဂံ ပဋိလဘိဿန္တိ တေသံ တတ္ထ ဒုက္ခသစ္စဉ္စ ဥပ္ပဇ္ဇိဿတိ မဂ္ဂသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ မဂ္ဂသစ္စံ ဥပ္ပဇ္ဇိဿတိ တဿ တတ္ထ ဒုက္ခသစ္စံ ဥပ္ပဇ္ဇိဿတီတိ? အာမန္တာ.
၅၂. (က) ယဿ ယတ္ထ သမုဒယသစ္စံ ဥပ္ပဇ္ဇိဿတိ တဿ တတ္ထ မဂ္ဂသစ္စံ ဥပ္ပဇ္ဇိဿတီတိ?
အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တတ္ထ သမုဒယသစ္စံ ဥပ္ပဇ္ဇိဿတိ၊ နော စ တေသံ တတ္ထ မဂ္ဂသစ္စံ ဥပ္ပဇ္ဇိဿတိ. ယေ မဂ္ဂံ ပဋိလဘိဿန္တိ တေသံ တတ္ထ သမုဒယသစ္စဉ္စ ဥပ္ပဇ္ဇိဿတိ မဂ္ဂသစ္စဉ္စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ မဂ္ဂသစ္စံ ဥပ္ပဇ္ဇိဿတိ တဿ တတ္ထ သမုဒယသစ္စံ ဥပ္ပဇ္ဇိဿတီတိ?
ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ တတ္ထ မဂ္ဂသစ္စံ ဥပ္ပဇ္ဇိဿတိ၊ နော စ တေသံ တတ္ထ သမုဒယသစ္စံ ဥပ္ပဇ္ဇိဿတိ. ယေ မဂ္ဂံ ပဋိလဘိဿန္တိ တေသံ တတ္ထ မဂ္ဂသစ္စဉ္စ ဥပ္ပဇ္ဇိဿတိ သမုဒယသစ္စဉ္စ ဥပ္ပဇ္ဇိဿတိ.
(ဃ) ပစ္စနီကပုဂ္ဂလော
၅၃. (က) ယဿ ဒုက္ခသစ္စံ နုပ္ပဇ္ဇိဿတိ တဿ သမုဒယသစ္စံ နုပ္ပဇ္ဇိဿတီတိ? အာမန္တာ.
(ခ) ယဿ ဝါ ပန သမုဒယသစ္စံ နုပ္ပဇ္ဇိဿတိ တဿ ဒုက္ခသစ္စံ နုပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ သမုဒယသစ္စံ နုပ္ပဇ္ဇိဿတိ၊ နော စ တေသံ ဒုက္ခသစ္စံ နုပ္ပဇ္ဇိဿတိ. ပစ္ဆိမစိတ္တသမင်္ဂီနံ တေသံ သမုဒယသစ္စဉ္စ နုပ္ပဇ္ဇိဿတိ ဒုက္ခသစ္စဉ္စ နုပ္ပဇ္ဇိဿတိ.
(က) ယဿ ဒုက္ခသစ္စံ နုပ္ပဇ္ဇိဿတိ တဿ မဂ္ဂသစ္စံ နုပ္ပဇ္ဇိဿတီတိ? အာမန္တာ.
(ခ) ယဿ ဝါ ပန မဂ္ဂသစ္စံ နုပ္ပဇ္ဇိဿတိ တဿ ဒုက္ခသစ္စံ နုပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ မဂ္ဂသစ္စံ နုပ္ပဇ္ဇိဿတိ၊ နော စ တေသံ ဒုက္ခသစ္စံ နုပ္ပဇ္ဇိဿတိ. ပစ္ဆိမစိတ္တသမင်္ဂီနံ တေသံ မဂ္ဂသစ္စဉ္စ နုပ္ပဇ္ဇိဿတိ ဒုက္ခသစ္စဉ္စ နုပ္ပဇ္ဇိဿတိ.
၅၄. (က) ယဿ သမုဒယသစ္စံ နုပ္ပဇ္ဇိဿတိ တဿ မဂ္ဂသစ္စံ နုပ္ပဇ္ဇိဿတီတိ?
ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ သမုဒယသစ္စံ နုပ္ပဇ္ဇိဿတိ၊ နော စ တေသံ မဂ္ဂသစ္စံ နုပ္ပဇ္ဇိဿတိ. အဂ္ဂမဂ္ဂသမင်္ဂီနံ အရဟန္တာနံ တေသံ သမုဒယသစ္စဉ္စ နုပ္ပဇ္ဇိဿတိ မဂ္ဂသစ္စဉ္စ နုပ္ပဇ္ဇိဿတိ.
(ခ) ယဿ ဝါ ပန မဂ္ဂသစ္စံ နုပ္ပဇ္ဇိဿတိ တဿ သမုဒယသစ္စံ နုပ္ပဇ္ဇိဿတီတိ?
ယေ ပုထုဇ္ဇနာ မဂ္ဂံ န ပဋိလဘိဿန္တိ တေသံ မဂ္ဂသစ္စံ နုပ္ပဇ္ဇိဿတိ၊ နော စ တေသံ သမုဒယသစ္စံ နုပ္ပဇ္ဇိဿတိ. အဂ္ဂမဂ္ဂသမင်္ဂီနံ အရဟန္တာနံ တေသံ မဂ္ဂသစ္စဉ္စ နုပ္ပဇ္ဇိဿတိ သမုဒယသစ္စဉ္စ နုပ္ပဇ္ဇိဿတိ.
(င) ပစ္စနီကဩကာသော
၅၅. ယတ္ထ ဒုက္ခသစ္စံ နုပ္ပဇ္ဇိဿတိ။ပေ။.
(စ) ပစ္စနီကပုဂ္ဂလောကာသာ
၅၆. (က) ယဿ ယတ္ထ ဒုက္ခသစ္စံ နုပ္ပဇ္ဇိဿတိ တဿ တတ္ထ သမုဒယသစ္စံ နုပ္ပဇ္ဇိဿတီတိ? အာမန္တာ.
(ခ) ယဿ ဝါ ပန ယတ္ထ သမုဒယသစ္စံ နုပ္ပဇ္ဇိဿတိ တဿ တတ္ထ ဒုက္ခသစ္စံ နုပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ အသညသတ္တာနံ တေသံ တတ္ထ သမုဒယသစ္စံ နုပ္ပဇ္ဇိဿတိ၊ နော စ တေသံ တတ္ထ ဒုက္ခသစ္စံ နုပ္ပဇ္ဇိဿတိ. ပစ္ဆိမစိတ္တသမင်္ဂီနံ တေသံ တတ္ထ သမုဒယသစ္စဉ္စ နုပ္ပဇ္ဇိဿတိ ဒုက္ခသစ္စဉ္စ နုပ္ပဇ္ဇိဿတိ.
(က) ယဿ ယတ္ထ ဒုက္ခသစ္စံ နုပ္ပဇ္ဇိဿတိ တဿ တတ္ထ မဂ္ဂသစ္စံ နုပ္ပဇ္ဇိဿတီတိ? အာမန္တာ.
(ခ) ယဿ ဝါ ပန ယတ္ထ မဂ္ဂသစ္စံ နုပ္ပဇ္ဇိဿတိ တဿ တတ္ထ ဒုက္ခသစ္စံ နုပ္ပဇ္ဇိဿတီတိ?
အဂ္ဂမဂ္ဂသမင်္ဂီနံ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ အာပါယိကာနံ အသညသတ္တာနံ တေသံ တတ္ထ မဂ္ဂသစ္စံ နုပ္ပဇ္ဇိဿတိ၊ နော စ တေသံ တတ္ထ ဒုက္ခသစ္စံ နုပ္ပဇ္ဇိဿတိ. ပစ္ဆိမစိတ္တသမင်္ဂီနံ တေသံ တတ္ထ မဂ္ဂသစ္စဉ္စ နုပ္ပဇ္ဇိဿတိ ဒုက္ခသစ္စဉ္စ နုပ္ပဇ္ဇိဿတိ.
၅၇. (က) ယဿ ယတ္ထ သမုဒယသစ္စံ နုပ္ပဇ္ဇိဿတိ တဿ တတ္ထ မဂ္ဂသစ္စံ နုပ္ပဇ္ဇိဿတီတိ?
ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ တတ္ထ သမုဒယသစ္စံ နုပ္ပဇ္ဇိဿတိ၊ နော စ တေသံ တတ္ထ မဂ္ဂသစ္စံ နုပ္ပဇ္ဇိဿတိ. အဂ္ဂမဂ္ဂသမင်္ဂီနံ အရဟန္တာနံ အသညသတ္တာနံ တေသံ တတ္ထ သမုဒယသစ္စဉ္စ နုပ္ပဇ္ဇိဿတိ မဂ္ဂသစ္စဉ္စ နုပ္ပဇ္ဇိဿတိ.
(ခ) ယဿ ဝါ ပန ယတ္ထ မဂ္ဂသစ္စံ နုပ္ပဇ္ဇိဿတိ တဿ တတ္ထ သမုဒယသစ္စံ နုပ္ပဇ္ဇိဿတီတိ?
အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တတ္ထ မဂ္ဂသစ္စံ နုပ္ပဇ္ဇိဿတိ၊ နော စ တေသံ တတ္ထ သမုဒယသစ္စံ နုပ္ပဇ္ဇိဿတိ. အဂ္ဂမဂ္ဂသမင်္ဂီနံ အရဟန္တာနံ အသညသတ္တာနံ တေသံ တတ္ထ မဂ္ဂသစ္စဉ္စ နုပ္ပဇ္ဇိဿတိ သမုဒယသစ္စဉ္စ နုပ္ပဇ္ဇိဿတိ.