၁. ပဒသောဓနဝါရော

(က) အနုလောမံ

၁၀. (က) စက္ခု စက္ခုဓာတူတိ?

ဒိဗ္ဗစက္ခု ပညာစက္ခု စက္ခု၊ န စက္ခုဓာတု. စက္ခုဓာတု စက္ခု စေဝ စက္ခုဓာတု စ.

(ခ) စက္ခုဓာတု စက္ခူတိ? အာမန္တာ.

(က) သောတံ သောတဓာတူတိ?

ဒိဗ္ဗသောတံ တဏှာသောတံ သောတံ၊ န သောတဓာတု. သောတဓာတု သောတဉ္စေဝ သောတဓာတု စ.

(ခ) သောတဓာတု သောတန္တိ? အာမန္တာ.

(က) ဃာနံ ဃာနဓာတူတိ? အာမန္တာ.

(ခ) ဃာနဓာတု ဃာနန္တိ? အာမန္တာ. (ဇိဝှါပိ ဃာနဓာတုသဒိသာ).

(က) ကာယော ကာယဓာတူတိ?

ကာယဓာတုံ ဌပေတွာ အဝသေသော ကာယော [အဝသေသော ကာယော ကာယော (သျာ.)]၊ န ကာယဓာတု. ကာယဓာတု ကာယော စေဝ ကာယဓာတု စ.

(ခ) ကာယဓာတု ကာယောတိ? အာမန္တာ.

(က) ရူပံ ရူပဓာတူတိ?

ရူပဓာတုံ ဌပေတွာ အဝသေသံ ရူပံ၊ န ရူပဓာတု. ရူပဓာတု ရူပဉ္စေဝ ရူပဓာတု စ.

(ခ) ရူပဓာတု ရူပန္တိ? အာမန္တာ. (သဒ္ဒေါ ဃာနသဒိသော).

(က) ဂန္ဓော ဂန္ဓဓာတူတိ?

သီလဂန္ဓော သမာဓိဂန္ဓော ပညာဂန္ဓော ဂန္ဓော၊ န ဂန္ဓဓာတု. ဂန္ဓဓာတု ဂန္ဓော စေဝ ဂန္ဓဓာတု စ.

(ခ) ဂန္ဓဓာတု ဂန္ဓောတိ? အာမန္တာ.

(က) ရသော ရသဓာတူတိ?

အတ္ထရသော ဓမ္မရသော ဝိမုတ္တိရသော ရသော၊ န ရသဓာတု. ရသဓာတု ရသော စေဝ ရသဓာတု စ.

(ခ) ရသဓာတု ရသောတိ? အာမန္တာ. (ဖောဋ္ဌဗ္ဗော ဃာနသဒိသော).

(က) စက္ခုဝိညာဏံ စက္ခုဝိညာဏဓာတူတိ? အာမန္တာ.

(ခ) စက္ခုဝိညာဏဓာတု စက္ခုဝိညာဏန္တိ? အာမန္တာ.

သောတဝိညာဏံ။ပေ။ ဃာနဝိညာဏံ။ ဇိဝှါဝိညာဏံ။ ကာယဝိညာဏံ။.

(က) မနော မနောဓာတူတိ?

မနောဓာတုံ ဌပေတွာ အဝသေသော မနော၊ န မနောဓာတု. မနောဓာတု မနော စေဝ မနောဓာတု စ.

(ခ) မနောဓာတု မနောတိ? အာမန္တာ.

(က) မနောဝိညာဏံ မနောဝိညာဏဓာတူတိ? အာမန္တာ.

(ခ) မနောဝိညာဏဓာတု မနောဝိညာဏန္တိ? အာမန္တာ.

(က) ဓမ္မော ဓမ္မဓာတူတိ?

ဓမ္မဓာတုံ ဌပေတွာ အဝသေသော ဓမ္မော၊ န ဓမ္မဓာတု. ဓမ္မဓာတု ဓမ္မော စေဝ ဓမ္မဓာတု စ.

(ခ) ဓမ္မဓာတု ဓမ္မောတိ? အာမန္တာ.

(ခ) ပစ္စနီကံ

၁၁. (က) န စက္ခု န စက္ခုဓာတူတိ? အာမန္တာ.

(ခ) န စက္ခုဓာတု န စက္ခူတိ?

ဒိဗ္ဗစက္ခု ပညာစက္ခု န စက္ခုဓာတု၊ စက္ခု. စက္ခုဉ္စ စက္ခုဓာတုဉ္စ ဌပေတွာ အဝသေသံ န စေဝ စက္ခု န စ စက္ခုဓာတု.

(က) န သောတံ န သောတဓာတူတိ? အာမန္တာ.

(ခ) န သောတဓာတု န သောတန္တိ?

ဒိဗ္ဗသောတံ တဏှာသောတံ န သောတဓာတု၊ သောတံ. သောတဉ္စ သောတဓာတုဉ္စ ဌပေတွာ အဝသေသံ န စေဝ သောတံ န စ သောတဓာတု.

(က) န ဃာနံ န ဃာနဓာတူတိ? အာမန္တာ.

(ခ) န ဃာနဓာတု န ဃာနန္တိ? အာမန္တာ.

န ဇိဝှါ။ (သံခိတ္တံ [ယံ သံခိတ္တံ (သျာ.)]၊ ဥဘတော အာမန္တာ).

(က) န ကာယော န ကာယဓာတူတိ? အာမန္တာ.

(ခ) န ကာယဓာတု န ကာယောတိ?

ကာယဓာတုံ ဌပေတွာ အဝသေသော န ကာယဓာတု၊ ကာယော. ကာယဉ္စ ကာယဓာတုဉ္စ ဌပေတွာ အဝသေသော [အဝသေသော ကာယော (သျာ.)] န စေဝ ကာယော န စ ကာယဓာတု.

(က) န ရူပံ န ရူပဓာတူတိ? အာမန္တာ.

(ခ) န ရူပဓာတု န ရူပန္တိ?

ရူပဓာတုံ ဌပေတွာ အဝသေသံ န ရူပဓာတု၊ ရူပံ. ရူပဉ္စ ရူပဓာတုဉ္စ ဌပေတွာ အဝသေသံ န စေဝ ရူပံ န စ ရူပဓာတု.

န သဒ္ဒေါ။ပေ။ န ဂန္ဓော န ဂန္ဓဓာတူတိ? အာမန္တာ.

န ဂန္ဓဓာတု န ဂန္ဓောတိ?

သီလဂန္ဓော သမာဓိဂန္ဓော ပညာဂန္ဓော န ဂန္ဓဓာတု၊ ဂန္ဓော. ဂန္ဓဉ္စ ဂန္ဓဓာတုဉ္စ ဌပေတွာ အဝသေသော န စေဝ ဂန္ဓော န စ ဂန္ဓဓာတု.

(က) န ရသော န ရသဓာတူတိ? အာမန္တာ.

(ခ) န ရသဓာတု န ရသောတိ?

အတ္ထရသော ဓမ္မရသော ဝိမုတ္တိရသော န ရသဓာတု၊ ရသော. ရသဉ္စ ရသဓာတုဉ္စ ဌပေတွာ အဝသေသော န စေဝ ရသော န စ ရသဓာတု.

န ဖောဋ္ဌဗ္ဗော။ပေ။ န စက္ခုဝိညာဏံ န စက္ခုဝိညာဏဓာတူတိ? အာမန္တာ.

န စက္ခုဝိညာဏဓာတု န စက္ခုဝိညာဏန္တိ? အာမန္တာ.

န သောတဝိညာဏံ။ပေ။ န ဃာနဝိညာဏံ။ န ဇိဝှါဝိညာဏံ။ န ကာယဝိညာဏံ။.

(က) န မနော န မနောဓာတူတိ? အာမန္တာ.

(ခ) န မနောဓာတု န မနောတိ?

မနောဓာတုံ ဌပေတွာ အဝသေသော န မနောဓာတု၊ မနော. မနဉ္စ မနောဓာတုဉ္စ ဌပေတွာ အဝသေသော န စေဝ မနော န စ မနောဓာတု.

(က) န မနောဝိညာဏံ န မနောဝိညာဏဓာတူတိ? အာမန္တာ.

(ခ) န မနောဝိညာဏဓာတု န မနောဝိညာဏန္တိ? အာမန္တာ.

(က) န ဓမ္မော န ဓမ္မဓာတူတိ? အာမန္တာ.

(ခ) န ဓမ္မဓာတု န ဓမ္မောတိ?

ဓမ္မဓာတုံ ဌပေတွာ အဝသေသော န ဓမ္မဓာတု၊ ဓမ္မော. ဓမ္မဉ္စ ဓမ္မဓာတုဉ္စ ဌပေတွာ အဝသေသော န စေဝ ဓမ္မော န စ ဓမ္မဓာတု.