၁. ပဒသောဓနဝါရော

(က) အနုလောမံ

၁၀. (က) စက္ခု စက္ခာယတနန္တိ?

ဒိဗ္ဗစက္ခု ပညာစက္ခု စက္ခု၊ န စက္ခာယတနံ. စက္ခာယတနံ စက္ခု စေဝ စက္ခာယတနဉ္စ.

(ခ) စက္ခာယတနံ စက္ခူတိ? အာမန္တာ.

(က) သောတံ သောတာယတနန္တိ?

ဒိဗ္ဗသောတံ တဏှာသောတံ သောတံ၊ န သောတာယတနံ. သောတာယတနံ သောတဉ္စေဝ သောတာယတနဉ္စ.

(ခ) သောတာယတနံ သောတန္တိ? အာမန္တာ.

(က) ဃာနံ ဃာနာယတနန္တိ? အာမန္တာ.

(ခ) ဃာနာယတနံ ဃာနန္တိ? အာမန္တာ.

(က) ဇိဝှါ ဇိဝှါယတနန္တိ? အာမန္တာ.

(ခ) ဇိဝှါယတနံ ဇိဝှါတိ? အာမန္တာ.

(က) ကာယော ကာယာယတနန္တိ?

ကာယာယတနံ ဌပေတွာ အဝသေသော ကာယော၊ န ကာယာယတနံ. ကာယာယတနံ ကာယော စေဝ ကာယာယတနဉ္စ.

(ခ) ကာယာယတနံ ကာယောတိ? အာမန္တာ.

(က) ရူပံ ရူပါယတနန္တိ?

ရူပါယတနံ ဌပေတွာ အဝသေသံ ရူပံ၊ န ရူပါယတနံ. ရူပါယတနံ ရူပဉ္စေဝ ရူပါယတနဉ္စ.

(ခ) ရူပါယတနံ ရူပန္တိ? အာမန္တာ.

(က) သဒ္ဒေါ သဒ္ဒါယတနန္တိ? အာမန္တာ.

(ခ) သဒ္ဒါယတနံ သဒ္ဒေါတိ? အာမန္တာ.

(က) ဂန္ဓော ဂန္ဓာယတနန္တိ?

သီလဂန္ဓော သမာဓိဂန္ဓော ပညာဂန္ဓော ဂန္ဓော၊ န ဂန္ဓာယတနံ. ဂန္ဓာယတနံ ဂန္ဓော စေဝ ဂန္ဓာယတနဉ္စ.

(ခ) ဂန္ဓာယတနံ ဂန္ဓောတိ? အာမန္တာ.

(က) ရသော ရသာယတနန္တိ?

အတ္ထရသော ဓမ္မရသော ဝိမုတ္တိရသော ရသော၊ န ရသာယတနံ. ရသာယတနံ ရသော စေဝ ရသာယတနဉ္စ.

(ခ) ရသာယတနံ ရသောတိ? အာမန္တာ.

(က) ဖောဋ္ဌဗ္ဗော ဖောဋ္ဌဗ္ဗာယတနန္တိ? အာမန္တာ.

(ခ) ဖောဋ္ဌဗ္ဗာယတနံ ဖောဋ္ဌဗ္ဗောတိ? အာမန္တာ.

(က) မနော မနာယတနန္တိ? အာမန္တာ.

(ခ) မနာယတနံ မနောတိ? အာမန္တာ.

(က) ဓမ္မော ဓမ္မာယတနန္တိ?

ဓမ္မာယတနံ ဌပေတွာ အဝသေသော ဓမ္မော၊ န ဓမ္မာယတနံ. ဓမ္မာယတနံ ဓမ္မော စေဝ ဓမ္မာယတနဉ္စ.

(ခ) ဓမ္မာယတနံ ဓမ္မောတိ? အာမန္တာ.

(ခ) ပစ္စနီကံ

၁၁. (က) န စက္ခု န စက္ခာယတနန္တိ? အာမန္တာ.

(ခ) န စက္ခာယတနံ န စက္ခူတိ?

ဒိဗ္ဗစက္ခု ပညာစက္ခု န စက္ခာယတနံ၊ စက္ခု. စက္ခုဉ္စ စက္ခာယတနဉ္စ ဌပေတွာ အဝသေသံ [အဝသေသာ (သျာ. ပီ.)] န စေဝ စက္ခု န စ စက္ခာယတနံ.

(က) န သောတံ န သောတာယတနန္တိ? အာမန္တာ.

(ခ) န သောတာယတနံ န သောတန္တိ?

ဒိဗ္ဗသောတံ တဏှာသောတံ န သောတာယတနံ၊ သောတံ. သောတဉ္စ သောတာယတနဉ္စ ဌပေတွာ အဝသေသံ န စေဝ သောတံ န စ သောတာယတနံ.

(က) န ဃာနံ န ဃာနာယတနန္တိ? အာမန္တာ.

(ခ) န ဃာနာယတနံ န ဃာနန္တိ? အာမန္တာ.

(က) န ဇိဝှါ န ဇိဝှါယတနန္တိ? အာမန္တာ.

(ခ) န ဇိဝှါယတနံ န ဇိဝှါတိ? အာမန္တာ.

(က) န ကာယော န ကာယာယတနန္တိ? အာမန္တာ.

(ခ) န ကာယာယတနံ န ကာယောတိ?

ကာယာယတနံ ဌပေတွာ အဝသေသော န ကာယာယတနံ၊ ကာယော. ကာယဉ္စ ကာယာယတနဉ္စ ဌပေတွာ အဝသေသံ [အဝသေသော (သျာ.)] န စေဝ ကာယော န စ ကာယာယတနံ.

(က) န ရူပံ န ရူပါယတနန္တိ? အာမန္တာ.

(ခ) န ရူပါယတနံ န ရူပန္တိ?

ရူပါယတနံ ဌပေတွာ အဝသေသံ န ရူပါယတနံ၊ ရူပံ. ရူပဉ္စ ရူပါယတနဉ္စ ဌပေတွာ အဝသေသံ န စေဝ ရူပံ န စ ရူပါယတနံ.

(က) န သဒ္ဒေါ န သဒ္ဒါယတနန္တိ? အာမန္တာ.

(ခ) န သဒ္ဒါယတနံ န သဒ္ဒေါတိ? အာမန္တာ.

(က) န ဂန္ဓော န ဂန္ဓာယတနန္တိ? အာမန္တာ.

(ခ) န ဂန္ဓာယတနံ န ဂန္ဓောတိ?

သီလဂန္ဓော သမာဓိဂန္ဓော ပညာဂန္ဓော န ဂန္ဓာယတနံ၊ ဂန္ဓော. ဂန္ဓဉ္စ ဂန္ဓာယတနဉ္စ ဌပေတွာ အဝသေသံ [အဝသေသာ (သျာ.)] န စေဝ ဂန္ဓော န စ ဂန္ဓာယတနံ.

(က) န ရသော န ရသာယတနန္တိ? အာမန္တာ.

(ခ) န ရသာယတနံ န ရသောတိ?

အတ္ထရသော ဓမ္မရသော ဝိမုတ္တိရသော န ရသာယတနံ၊ ရသော. ရသဉ္စ ရသာယတနဉ္စ ဌပေတွာ အဝသေသံ န စေဝ ရသော န စ ရသာယတနံ.

(က) န ဖောဋ္ဌဗ္ဗော န ဖောဋ္ဌဗ္ဗာယတနန္တိ? အာမန္တာ.

(ခ) န ဖောဋ္ဌဗ္ဗာယတနံ န ဖောဋ္ဌဗ္ဗောတိ? အာမန္တာ.

(က) န မနော န မနာယတနန္တိ? အာမန္တာ.

(ခ) န မနာယတနံ န မနောတိ? အာမန္တာ.

(က) န ဓမ္မော န ဓမ္မာယတနန္တိ? အာမန္တာ.

(ခ) န ဓမ္မာယတနံ န ဓမ္မောတိ?

ဓမ္မာယတနံ ဌပေတွာ အဝသေသော န ဓမ္မာယတနံ၊ ဓမ္မော. ဓမ္မဉ္စ ဓမ္မာယတနဉ္စ ဌပေတွာ အဝသေသံ န စေဝ ဓမ္မော န စ ဓမ္မာယတနံ.