၅. ပစ္စုပ္ပန္နာနာဂတဝါရော

၂၅၃. (က) ယော စက္ခာယတနံ ပရိဇာနာတိ သော သောတာယတနံ ပရိဇာနိဿတီတိ? နော.

(ခ) ယော ဝါ ပန သောတာယတနံ ပရိဇာနိဿတိ သော စက္ခာယတနံ ပရိဇာနာတီတိ? နော.

(က) ယော စက္ခာယတနံ န ပရိဇာနာတိ သော သောတာယတနံ န ပရိဇာနိဿတီတိ?

ယေ မဂ္ဂံ ပဋိလဘိဿန္တိ တေ စက္ခာယတနံ န ပရိဇာနန္တိ၊ နော စ သောတာယတနံ န ပရိဇာနိဿန္တိ. အရဟာ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေ စက္ခာယတနဉ္စ န ပရိဇာနန္တိ သောတာယတနဉ္စ န ပရိဇာနိဿန္တိ.

(ခ) ယော ဝါ ပန သောတာယတနံ န ပရိဇာနိဿတိ သော စက္ခာယတနံ န ပရိဇာနာတီတိ?

အဂ္ဂမဂ္ဂသမင်္ဂီ သောတာယတနံ န ပရိဇာနိဿတိ၊ နော စ စက္ခာယတနံ န ပရိဇာနာတိ. အရဟာ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေ သောတာယတနဉ္စ န ပရိဇာနိဿန္တိ စက္ခာယတနဉ္စ န ပရိဇာနန္တိ.