၆. အတီတာနာဂတဝါရော

၂၅၄. (က) ယော စက္ခာယတနံ ပရိဇာနိတ္ထ သော သောတာယတနံ ပရိဇာနိဿတီတိ? နော.

(ခ) ယော ဝါ ပန သောတာယတနံ ပရိဇာနိဿတိ သော စက္ခာယတနံ ပရိဇာနိတ္ထာတိ? နော.

(က) ယော စက္ခာယတနံ န ပရိဇာနိတ္ထ သော သောတာယတနံ န ပရိဇာနိဿတီတိ?

ယေ မဂ္ဂံ ပဋိလဘိဿန္တိ တေ စက္ခာယတနံ န ပရိဇာနိတ္ထ၊ နော စ သောတာယတနံ န ပရိဇာနိဿန္တိ. အဂ္ဂမဂ္ဂသမင်္ဂီ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေ စက္ခာယတနဉ္စ န ပရိဇာနိတ္ထ သောတာယတနဉ္စ န ပရိဇာနိဿန္တိ.

(ခ) ယော ဝါ ပန သောတာယတနံ န ပရိဇာနိဿတိ သော စက္ခာယတနံ န ပရိဇာနိတ္ထာတိ?

အရဟာ သောတာယတနံ န ပရိဇာနိဿတိ၊ နော စ စက္ခာယတနံ န ပရိဇာနိတ္ထ. အဂ္ဂမဂ္ဂသမင်္ဂီ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေ သောတာယတနဉ္စ န ပရိဇာနိဿန္တိ စက္ခာယတနဉ္စ န ပရိဇာနိတ္ထ.

ပရိညာဝါရော.

အာယတနယမကံ နိဋ္ဌိတံ.

နမော တဿ ဘဂဝတော အရဟတော သမ္မာသမ္ဗုဒ္ဓဿ