၄. ပစ္စုပ္ပန္နာတီတဝါရော

၂၅၂. (က) ယော စက္ခာယတနံ ပရိဇာနာတိ သော သောတာယတနံ ပရိဇာနိတ္ထာတိ? နော.

(ခ) ယော ဝါ ပန သောတာယတနံ ပရိဇာနိတ္ထ သော စက္ခာယတနံ ပရိဇာနာတီတိ? နော.

(က) ယော စက္ခာယတနံ န ပရိဇာနာတိ သော သောတာယတနံ န ပရိဇာနိတ္ထာတိ?

အရဟာ စက္ခာယတနံ န ပရိဇာနာတိ၊ နော စ သောတာယတနံ န ပရိဇာနိတ္ထ. အဂ္ဂမဂ္ဂသမင်္ဂိဉ္စ အရဟန္တဉ္စ ဌပေတွာ အဝသေသာ ပုဂ္ဂလာ စက္ခာယတနဉ္စ န ပရိဇာနန္တိ သောတာယတနဉ္စ န ပရိဇာနိတ္ထ.

(ခ) ယော ဝါ ပန သောတာယတနံ န ပရိဇာနိတ္ထ သော စက္ခာယတနံ န ပရိဇာနာတီတိ?

အဂ္ဂမဂ္ဂသမင်္ဂီ သောတာယတနံ န ပရိဇာနိတ္ထ၊ နော စ စက္ခာယတနံ န ပရိဇာနာတိ. အဂ္ဂမဂ္ဂသမင်္ဂိဉ္စ အရဟန္တဉ္စ ဌပေတွာ အဝသေသာ ပုဂ္ဂလာ သောတာယတနဉ္စ န ပရိဇာနိတ္ထ စက္ခာယတနဉ္စ န ပရိဇာနန္တိ.