(၅) ပစ္စုပ္ပန္နာနာဂတဝါရော
(က) အနုလောမပုဂ္ဂလော
၂၃၀. (က) ယဿ စက္ခာယတနံ ဥပ္ပဇ္ဇတိ တဿ သောတာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန သောတာယတနံ နိရုဇ္ဈိဿတိ တဿ စက္ခာယတနံ ဥပ္ပဇ္ဇတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ သောတာယတနံ နိရုဇ္ဈိဿတိ၊ နော စ တေသံ စက္ခာယတနံ ဥပ္ပဇ္ဇတိ. သစက္ခုကာနံ ဥပပဇ္ဇန္တာနံ တေသံ သောတာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇတိ.
(က) ယဿ စက္ခာယတနံ ဥပ္ပဇ္ဇတိ တဿ ဃာနာယတနံ နိရုဇ္ဈိဿတီတိ?
ပစ္ဆိမဘဝိကာနံ ရူပါဝစရံ ဥပပဇ္ဇန္တာနံ တေသံ စက္ခာယတနံ ဥပ္ပဇ္ဇတိ၊ နော စ တေသံ ဃာနာယတနံ နိရုဇ္ဈိဿတိ. ဣတရေသံ သစက္ခုကာနံ ဥပပဇ္ဇန္တာနံ တေသံ စက္ခာယတနဉ္စ ဥပ္ပဇ္ဇတိ ဃာနာယတနဉ္စ နိရုဇ္ဈိဿတိ.
(ခ) ယဿ ဝါ ပန ဃာနာယတနံ နိရုဇ္ဈိဿတိ တဿ စက္ခာယတနံ ဥပ္ပဇ္ဇတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ ဃာနာယတနံ နိရုဇ္ဈိဿတိ၊ နော စ တေသံ စက္ခာယတနံ ဥပ္ပဇ္ဇတိ. သစက္ခုကာနံ ဥပပဇ္ဇန္တာနံ တေသံ ဃာနာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇတိ.
(က) ယဿ စက္ခာယတနံ ဥပ္ပဇ္ဇတိ တဿ ရူပါယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ရူပါယတနံ နိရုဇ္ဈိဿတိ တဿ စက္ခာယတနံ ဥပ္ပဇ္ဇတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ။ပေ။ သစက္ခုကာနံ ဥပပဇ္ဇန္တာနံ တေသံ ရူပါယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇတိ.
(က) ယဿ စက္ခာယတနံ ဥပ္ပဇ္ဇတိ တဿ မနာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန မနာယတနံ နိရုဇ္ဈိဿတိ တဿ စက္ခာယတနံ ဥပ္ပဇ္ဇတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ။ပေ။ သစက္ခုကာနံ ဥပပဇ္ဇန္တာနံ တေသံ မနာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇတိ.
(က) ယဿ စက္ခာယတနံ ဥပ္ပဇ္ဇတိ တဿ ဓမ္မာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ဓမ္မာယတနံ နိရုဇ္ဈိဿတိ တဿ စက္ခာယတနံ ဥပ္ပဇ္ဇတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ။ပေ။ သစက္ခုကာနံ ဥပပဇ္ဇန္တာနံ တေသံ ဓမ္မာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇတိ.
၂၃၁. ယဿ ဃာနာယတနံ ဥပ္ပဇ္ဇတိ တဿ ရူပါယတနံ။ပေ။ မနာယတနံ။ ဓမ္မာယတနံ နိရုဇ္ဈိဿတီတိ? အာမန္တာ.
ယဿ ဝါ ပန ဓမ္မာယတနံ နိရုဇ္ဈိဿတိ တဿ ဃာနာယတနံ ဥပ္ပဇ္ဇတီတိ?
သဗ္ဗေသံ စဝန္တာနံ အဃာနကာနံ ဥပပဇ္ဇန္တာနံ တေသံ ဓမ္မာယတနံ နိရုဇ္ဈိဿတိ၊ နော စ တေသံ ဃာနာယတနံ ဥပ္ပဇ္ဇတိ. သဃာနကာနံ ဥပပဇ္ဇန္တာနံ တေသံ ဓမ္မာယတနဉ္စ နိရုဇ္ဈိဿတိ ဃာနာယတနဉ္စ ဥပ္ပဇ္ဇတိ.
၂၃၂. ယဿ ရူပါယတနံ ဥပ္ပဇ္ဇတိ တဿ မနာယတနံ။ပေ။ ဓမ္မာယတနံ နိရုဇ္ဈိဿတီတိ? အာမန္တာ.
ယဿ ဝါ ပန ဓမ္မာယတနံ နိရုဇ္ဈိဿတိ တဿ ရူပါယတနံ ဥပ္ပဇ္ဇတီတိ?
သဗ္ဗေသံ စဝန္တာနံ အရူပကာနံ ဥပပဇ္ဇန္တာနံ တေသံ ဓမ္မာယတနံ နိရုဇ္ဈိဿတိ၊ နော စ တေသံ ရူပါယတနံ ဥပ္ပဇ္ဇတိ. သရူပကာနံ ဥပပဇ္ဇန္တာနံ တေသံ ဓမ္မာယတနဉ္စ နိရုဇ္ဈိဿတိ ရူပါယတနဉ္စ ဥပ္ပဇ္ဇတိ.
၂၃၃. (က) ယဿ မနာယတနံ ဥပ္ပဇ္ဇတိ တဿ ဓမ္မာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ဓမ္မာယတနံ။ပေ။?
သဗ္ဗေသံ စဝန္တာနံ အစိတ္တကာနံ ဥပပဇ္ဇန္တာနံ တေသံ ဓမ္မာယတနံ နိရုဇ္ဈိဿတိ၊ နော စ တေသံ မနာယတနံ ဥပ္ပဇ္ဇတိ. သစိတ္တကာနံ ဥပပဇ္ဇန္တာနံ တေသံ ဓမ္မာယတနဉ္စ နိရုဇ္ဈိဿတိ မနာယတနဉ္စ ဥပ္ပဇ္ဇတိ.
(ခ) အနုလောမဩကာသော
၂၃၄. ယတ္ထ စက္ခာယတနံ ဥပ္ပဇ္ဇတိ။ပေ။.
(ဂ) အနုလောမပုဂ္ဂလောကာသာ
၂၃၅. (က) ယဿ ယတ္ထ စက္ခာယတနံ ဥပ္ပဇ္ဇတိ တဿ တတ္ထ သောတာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ သောတာယတနံ နိရုဇ္ဈိဿတိ တဿ တတ္ထ စက္ခာယတနံ ဥပ္ပဇ္ဇတီတိ?
ပဉ္စဝေါကာရာ စဝန္တာနံ အစက္ခုကာနံ ကာမာဝစရံ ဥပပဇ္ဇန္တာနံ တေသံ တတ္ထ သောတာယတနံ နိရုဇ္ဈိဿတိ၊ နော စ တေသံ တတ္ထ စက္ခာယတနံ ဥပ္ပဇ္ဇတိ. သစက္ခုကာနံ ဥပပဇ္ဇန္တာနံ တေသံ တတ္ထ သောတာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇတိ.
(က) ယဿ ယတ္ထ စက္ခာယတနံ ဥပ္ပဇ္ဇတိ တဿ တတ္ထ ဃာနာယတနံ နိရုဇ္ဈိဿတီတိ?
ရူပါဝစရံ ဥပပဇ္ဇန္တာနံ တေသံ တတ္ထ စက္ခာယတနံ ဥပ္ပဇ္ဇတိ၊ နော စ တေသံ တတ္ထ ဃာနာယတနံ နိရုဇ္ဈိဿတိ. သစက္ခုကာနံ ကာမာဝစရံ ဥပပဇ္ဇန္တာနံ တေသံ တတ္ထ စက္ခာယတနဉ္စ ဥပ္ပဇ္ဇတိ ဃာနာယတနဉ္စ နိရုဇ္ဈိဿတိ.
(ခ) ယဿ ဝါ ပန ယတ္ထ ဃာနာယတနံ နိရုဇ္ဈိဿတိ တဿ တတ္ထ စက္ခာယတနံ ဥပ္ပဇ္ဇတီတိ?
ကာမာဝစရာ စဝန္တာနံ အစက္ခုကာနံ ကာမာဝစရံ ဥပပဇ္ဇန္တာနံ တေသံ တတ္ထ ဃာနာယတနံ နိရုဇ္ဈိဿတိ၊ နော စ တေသံ တတ္ထ စက္ခာယတနံ ဥပ္ပဇ္ဇတိ. သစက္ခုကာနံ ကာမာဝစရံ ဥပပဇ္ဇန္တာနံ တေသံ တတ္ထ ဃာနာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇတိ.
(က) ယဿ ယတ္ထ စက္ခာယတနံ ဥပ္ပဇ္ဇတိ တဿ တတ္ထ ရူပါယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ ရူပါယတနံ နိရုဇ္ဈိဿတိ တဿ တတ္ထ စက္ခာယတနံ ဥပ္ပဇ္ဇတီတိ?
ပဉ္စဝေါကာရာ စဝန္တာနံ အစက္ခုကာနံ ကာမာဝစရံ ဥပပဇ္ဇန္တာနံ အသညသတ္တာနံ တေသံ တတ္ထ ရူပါယတနံ နိရုဇ္ဈိဿတိ၊ နော စ တေသံ တတ္ထ စက္ခာယတနံ ဥပ္ပဇ္ဇတိ. သစက္ခုကာနံ ဥပပဇ္ဇန္တာနံ တေသံ တတ္ထ ရူပါယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇတိ.
(က) ယဿ ယတ္ထ စက္ခာယတနံ ဥပ္ပဇ္ဇတိ တဿ တတ္ထ မနာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ မနာယတနံ နိရုဇ္ဈိဿတိ တဿ တတ္ထ စက္ခာယတနံ ဥပ္ပဇ္ဇတီတိ?
ပဉ္စဝေါကာရာ စဝန္တာနံ အစက္ခုကာနံ ကာမာဝစရံ ဥပပဇ္ဇန္တာနံ အရူပါနံ တေသံ တတ္ထ မနာယတနံ နိရုဇ္ဈိဿတိ၊ နော စ တေသံ တတ္ထ စက္ခာယတနံ ဥပ္ပဇ္ဇတိ. သစက္ခုကာနံ ဥပပဇ္ဇန္တာနံ တေသံ တတ္ထ မနာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇတိ.
(က) ယဿ ယတ္ထ စက္ခာယတနံ ဥပ္ပဇ္ဇတိ တဿ တတ္ထ ဓမ္မာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ ဓမ္မာယတနံ နိရုဇ္ဈိဿတိ တဿ တတ္ထ စက္ခာယတနံ ဥပ္ပဇ္ဇတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ တတ္ထ ဓမ္မာယတနံ နိရုဇ္ဈိဿတိ၊ နော စ တေသံ တတ္ထ စက္ခာယတနံ ဥပ္ပဇ္ဇတိ. သစက္ခုကာနံ ဥပပဇ္ဇန္တာနံ တေသံ တတ္ထ ဓမ္မာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇတိ. (စက္ခာယတနမူလကံ)
၂၃၆. (က) ယဿ ယတ္ထ ဃာနာယတနံ ဥပ္ပဇ္ဇတိ တဿ တတ္ထ ရူပါယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ ရူပါယတနံ နိရုဇ္ဈိဿတိ တဿ တတ္ထ ဃာနာယတနံ ဥပ္ပဇ္ဇတီတိ?
ကာမာဝစရာ စဝန္တာနံ အဃာနကာနံ ကာမာဝစရံ ဥပပဇ္ဇန္တာနံ ရူပါဝစရာနံ တေသံ တတ္ထ ရူပါယတနံ နိရုဇ္ဈိဿတိ၊ နော စ တေသံ တတ္ထ ဃာနာယတနံ ဥပ္ပဇ္ဇတိ. သဃာနကာနံ ဥပပဇ္ဇန္တာနံ တေသံ တတ္ထ ရူပါယတနဉ္စ နိရုဇ္ဈိဿတိ ဃာနာယတနဉ္စ ဥပ္ပဇ္ဇတိ.
(က) ယဿ ယတ္ထ ဃာနာယတနံ ဥပ္ပဇ္ဇတိ တဿ တတ္ထ မနာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ မနာယတနံ။ပေ။?
ကာမာဝစရာ စဝန္တာနံ အဃာနကာနံ ကာမာဝစရံ ဥပပဇ္ဇန္တာနံ ရူပါဝစရာနံ အရူပါဝစရာနံ တေသံ တတ္ထ မနာယတနံ။ပေ။ သဃာနကာနံ ဥပပဇ္ဇန္တာနံ တေသံ တတ္ထ မနာယတနဉ္စ နိရုဇ္ဈိဿတိ ဃာနာယတနဉ္စ ဥပ္ပဇ္ဇတိ.
(က) ယဿ ယတ္ထ ဃာနာယတနံ ဥပ္ပဇ္ဇတိ တဿ တတ္ထ ဓမ္မာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ ဓမ္မာယတနံ။ပေ။?
သဗ္ဗေသံ စဝန္တာနံ အဃာနကာနံ ဥပပဇ္ဇန္တာနံ တေသံ တတ္ထ ဓမ္မာယတနံ။ပေ။ သဃာနကာနံ ဥပပဇ္ဇန္တာနံ တေသံ တတ္ထ ဓမ္မာယတနဉ္စ နိရုဇ္ဈိဿတိ ဃာနာယတနဉ္စ ဥပ္ပဇ္ဇတိ. (ဃာနာယတနမူလကံ)
၂၃၇. (က) ယဿ ယတ္ထ ရူပါယတနံ ဥပ္ပဇ္ဇတိ တဿ တတ္ထ မနာယတနံ နိရုဇ္ဈိဿတီတိ?
အသညသတ္တံ ဥပပဇ္ဇန္တာနံ တေသံ တတ္ထ ရူပါယတနံ ဥပ္ပဇ္ဇတိ၊ နော စ တေသံ တတ္ထ။ပေ။ ပဉ္စဝေါကာရံ ဥပပဇ္ဇန္တာနံ တေသံ တတ္ထ။ပေ။.
(ခ) ယဿ ဝါ ပန ယတ္ထ မနာယတနံ။ပေ။?
ပဉ္စဝေါကာရာ စဝန္တာနံ အရူပါနံ တေသံ တတ္ထ။ပေ။ ပဉ္စဝေါကာရံ ဥပပဇ္ဇန္တာနံ တေသံ တတ္ထ မနာယတနဉ္စ နိရုဇ္ဈိဿတိ ရူပါယတနဉ္စ ဥပ္ပဇ္ဇတိ.
(က) ယဿ ယတ္ထ ရူပါယတနံ ဥပ္ပဇ္ဇတိ တဿ တတ္ထ ဓမ္မာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ ဓမ္မာယတနံ။ပေ။?
သဗ္ဗေသံ စဝန္တာနံ အရူပကာနံ ဥပပဇ္ဇန္တာနံ တေသံ တတ္ထ ဓမ္မာယတနံ နိရုဇ္ဈိဿတိ၊ နော စ တေသံ တတ္ထ ရူပါယတနံ ဥပ္ပဇ္ဇတိ. သရူပကာနံ ဥပပဇ္ဇန္တာနံ တေသံ တတ္ထ ဓမ္မာယတနဉ္စ နိရုဇ္ဈိဿတိ ရူပါယတနဉ္စ ဥပ္ပဇ္ဇတိ.
၂၃၈. (က) ယဿ ယတ္ထ မနာယတနံ ဥပ္ပဇ္ဇတိ တဿ တတ္ထ ဓမ္မာယတနံ နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ ဓမ္မာယတနံ နိရုဇ္ဈိဿတိ တဿ တတ္ထ မနာယတနံ ဥပ္ပဇ္ဇတီတိ?
သဗ္ဗေသံ စဝန္တာနံ အစိတ္တကာနံ ဥပပဇ္ဇန္တာနံ တေသံ တတ္ထ ဓမ္မာယတနံ နိရုဇ္ဈိဿတိ၊ နော စ တေသံ တတ္ထ မနာယတနံ ဥပ္ပဇ္ဇတိ. သစိတ္တကာနံ ဥပပဇ္ဇန္တာနံ တေသံ တတ္ထ ဓမ္မာယတနဉ္စ နိရုဇ္ဈိဿတိ မနာယတနဉ္စ ဥပ္ပဇ္ဇတိ.
(ဃ) ပစ္စနီကပုဂ္ဂလော
၂၃၉. (က) ယဿ စက္ခာယတနံ နုပ္ပဇ္ဇတိ တဿ သောတာယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ စက္ခာယတနံ နုပ္ပဇ္ဇတိ၊ နော စ တေသံ သောတာယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ စက္ခာယတနဉ္စ နုပ္ပဇ္ဇတိ သောတာယတနဉ္စ န နိရုဇ္ဈိဿတိ.
(ခ) ယဿ ဝါ ပန သောတာယတနံ န နိရုဇ္ဈိဿတိ တဿ စက္ခာယတနံ နုပ္ပဇ္ဇတီတိ? အာမန္တာ.
(က) ယဿ စက္ခာယတနံ နုပ္ပဇ္ဇတိ တဿ ဃာနာယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ စက္ခာယတနံ နုပ္ပဇ္ဇတိ၊ နော စ တေသံ ဃာနာယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ စက္ခာယတနဉ္စ နုပ္ပဇ္ဇတိ ဃာနာယတနဉ္စ န နိရုဇ္ဈိဿတိ.
(ခ) ယဿ ဝါ ပန ဃာနာယတနံ န နိရုဇ္ဈိဿတိ တဿ စက္ခာယတနံ နုပ္ပဇ္ဇတီတိ?
ပစ္ဆိမဘဝိကာနံ ရူပါဝစရံ ဥပပဇ္ဇန္တာနံ တေသံ ဃာနာယတနံ န နိရုဇ္ဈိဿတိ၊ နော စ တေသံ စက္ခာယတနံ နုပ္ပဇ္ဇတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ဃာနာယတနဉ္စ န နိရုဇ္ဈိဿတိ စက္ခာယတနဉ္စ နုပ္ပဇ္ဇတိ.
(က) ယဿ စက္ခာယတနံ နုပ္ပဇ္ဇတိ တဿ ရူပါယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ စက္ခာယတနံ နုပ္ပဇ္ဇတိ၊ နော စ တေသံ ရူပါယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ စက္ခာယတနဉ္စ နုပ္ပဇ္ဇတိ ရူပါယတနဉ္စ န နိရုဇ္ဈိဿတိ.
(ခ) ယဿ ဝါ ပန ရူပါယတနံ။ပေ။? အာမန္တာ.
ယဿ စက္ခာယတနံ နုပ္ပဇ္ဇတိ တဿ မနာယတနံ။ပေ။ ဓမ္မာယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ စက္ခာယတနံ နုပ္ပဇ္ဇတိ၊ နော စ တေသံ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ စက္ခာယတနဉ္စ နုပ္ပဇ္ဇတိ ဓမ္မာယတနဉ္စ န နိရုဇ္ဈိဿတိ.
ယဿ ဝါ ပန ဓမ္မာယတနံ။ပေ။? အာမန္တာ. (စက္ခာယတနမူလကံ)
၂၄၀. (က) ယဿ ဃာနာယတနံ နုပ္ပဇ္ဇတိ တဿ ရူပါယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အဃာနကာနံ ဥပပဇ္ဇန္တာနံ တေသံ ဃာနာယတနံ နုပ္ပဇ္ဇတိ၊ နော စ တေသံ ရူပါယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ဃာနာယတနဉ္စ နုပ္ပဇ္ဇတိ ရူပါယတနဉ္စ န နိရုဇ္ဈိဿတိ.
(ခ) ယဿ ဝါ ပန ရူပါယတနံ။ပေ။? အာမန္တာ.
ယဿ ဃာနာယတနံ နုပ္ပဇ္ဇတိ တဿ မနာယတနံ။ပေ။ ဓမ္မာယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အဃာနကာနံ ဥပပဇ္ဇန္တာနံ တေသံ ဃာနာယတနံ နုပ္ပဇ္ဇတိ၊ နော စ တေသံ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ ဃာနာယတနဉ္စ နုပ္ပဇ္ဇတိ ဓမ္မာယတနဉ္စ န နိရုဇ္ဈိဿတိ.
ယဿ ဝါ ပန ဓမ္မာယတနံ။ပေ။? အာမန္တာ. (ဃာနာယတနမူလကံ)
၂၄၁. ယဿ ရူပါယတနံ နုပ္ပဇ္ဇတိ တဿ မနာယတနံ။ပေ။ ဓမ္မာယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အရူပကာနံ ဥပပဇ္ဇန္တာနံ တေသံ ရူပါယတနံ နုပ္ပဇ္ဇတိ၊ နော စ တေသံ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ ရူပါယတနဉ္စ နုပ္ပဇ္ဇတိ ဓမ္မာယတနဉ္စ န နိရုဇ္ဈိဿတိ.
ယဿ ဝါ ပန ဓမ္မာယတနံ။ပေ။? အာမန္တာ.
၂၄၂. (က) ယဿ မနာယတနံ နုပ္ပဇ္ဇတိ တဿ ဓမ္မာယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အစိတ္တကာနံ ဥပပဇ္ဇန္တာနံ တေသံ မနာယတနံ နုပ္ပဇ္ဇတိ၊ နော စ တေသံ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ မနာယတနဉ္စ နုပ္ပဇ္ဇတိ ဓမ္မာယတနဉ္စ န နိရုဇ္ဈိဿတိ.
(ခ) ယဿ ဝါ ပန ဓမ္မာယတနံ န နိရုဇ္ဈိဿတိ တဿ မနာယတနံ နုပ္ပဇ္ဇတီတိ? အာမန္တာ.
(င) ပစ္စနီကဩကာသော
၂၄၃. ယတ္ထ စက္ခာယတနံ နုပ္ပဇ္ဇတိ။ပေ။.
(စ) ပစ္စနီကပုဂ္ဂလောကာသာ
၂၄၄. (က) ယဿ ယတ္ထ စက္ခာယတနံ နုပ္ပဇ္ဇတိ တဿ တတ္ထ သောတာယတနံ န နိရုဇ္ဈိဿတီတိ?
ပဉ္စဝေါကာရာ စဝန္တာနံ အစက္ခုကာနံ ကာမာဝစရံ ဥပပဇ္ဇန္တာနံ တေသံ တတ္ထ စက္ခာယတနံ နုပ္ပဇ္ဇတိ၊ နော စ တေသံ တတ္ထ သောတာယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အသညသတ္တာနံ အရူပါနံ တေသံ တတ္ထ စက္ခာယတနဉ္စ နုပ္ပဇ္ဇတိ သောတာယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ သောတာယတနံ န နိရုဇ္ဈိဿတိ တဿ တတ္ထ စက္ခာယတနံ နုပ္ပဇ္ဇတီတိ? အာမန္တာ.
(က) ယဿ ယတ္ထ စက္ခာယတနံ နုပ္ပဇ္ဇတိ တဿ တတ္ထ ဃာနာယတနံ န နိရုဇ္ဈိဿတီတိ?
ကာမာဝစရာ စဝန္တာနံ အစက္ခုကာနံ ကာမာဝစရံ ဥပပဇ္ဇန္တာနံ တေသံ တတ္ထ စက္ခာယတနံ နုပ္ပဇ္ဇတိ၊ နော စ တေသံ တတ္ထ ဃာနာယတနံ န နိရုဇ္ဈိဿတိ. ကာမာဝစရေ ပရိနိဗ္ဗန္တာနံ ရူပါဝစရာ စဝန္တာနံ အသညသတ္တာနံ အရူပါနံ တေသံ တတ္ထ စက္ခာယတနဉ္စ နုပ္ပဇ္ဇတိ ဃာနာယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ ဃာနာယတနံ န နိရုဇ္ဈိဿတိ တဿ တတ္ထ စက္ခာယတနံ နုပ္ပဇ္ဇတီတိ?
ရူပါဝစရံ ဥပပဇ္ဇန္တာနံ တေသံ တတ္ထ ဃာနာယတနံ န နိရုဇ္ဈိဿတိ၊ နော စ တေသံ တတ္ထ စက္ခာယတနံ နုပ္ပဇ္ဇတိ. ကာမာဝစရေ ပရိနိဗ္ဗန္တာနံ ရူပါဝစရာ စဝန္တာနံ အသညသတ္တာနံ အရူပါနံ တေသံ တတ္ထ ဃာနာယတနဉ္စ န နိရုဇ္ဈိဿတိ စက္ခာယတနဉ္စ နုပ္ပဇ္ဇတိ.
(က) ယဿ ယတ္ထ စက္ခာယတနံ နုပ္ပဇ္ဇတိ တဿ တတ္ထ ရူပါယတနံ န နိရုဇ္ဈိဿတီတိ?
ပဉ္စဝေါကာရာ စဝန္တာနံ အစက္ခုကာနံ ကာမာဝစရံ ဥပပဇ္ဇန္တာနံ အသညသတ္တာနံ တေသံ တတ္ထ စက္ခာယတနံ နုပ္ပဇ္ဇတိ၊ နော စ တေသံ တတ္ထ ရူပါယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပါနံ တေသံ တတ္ထ စက္ခာယတနဉ္စ နုပ္ပဇ္ဇတိ ရူပါယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ ရူပါယတနံ န နိရုဇ္ဈိဿတိ တဿ တတ္ထ စက္ခာယတနံ နုပ္ပဇ္ဇတီတိ? အာမန္တာ.
(က) ယဿ ယတ္ထ စက္ခာယတနံ နုပ္ပဇ္ဇတိ တဿ တတ္ထ မနာယတနံ န နိရုဇ္ဈိဿတီတိ?
ပဉ္စဝေါကာရာ စဝန္တာနံ အစက္ခုကာနံ ကာမာဝစရံ ဥပပဇ္ဇန္တာနံ အရူပါနံ တသံ တတ္ထ စက္ခာယတနံ နုပ္ပဇ္ဇတိ၊ နော စ တေသံ တတ္ထ မနာယတနံ န နိရုဇ္ဈိဿတိ. ပရိနိဗ္ဗန္တာနံ အသညသတ္တာနံ တေသံ တတ္ထ စက္ခာယတနဉ္စ နုပ္ပဇ္ဇတိ မနာယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ မနာယတနံ န နိရုဇ္ဈိဿတိ တဿ တတ္ထ စက္ခာယတနံ နုပ္ပဇ္ဇတီတိ? အာမန္တာ.
(က) ယဿ ယတ္ထ စက္ခာယတနံ နုပ္ပဇ္ဇတိ တဿ တတ္ထ ဓမ္မာယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အစက္ခုကာနံ ဥပပဇ္ဇန္တာနံ တေသံ တတ္ထ စက္ခာယတနံ နုပ္ပဇ္ဇတိ၊ နော စ တေသံ တတ္ထ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ စက္ခာယတနဉ္စ နုပ္ပဇ္ဇတိ ဓမ္မာယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ ဓမ္မာယတနံ န နိရုဇ္ဈိဿတိ တဿ တတ္ထ စက္ခာယတနံ နုပ္ပဇ္ဇတီတိ? အာမန္တာ. (စက္ခာယတနမူလကံ)
၂၄၅. (က) ယဿ ယတ္ထ ဃာနာယတနံ နုပ္ပဇ္ဇတိ တဿ တတ္ထ ရူပါယတနံ န နိရုဇ္ဈိဿတီတိ?
ကာမာဝစရာ စဝန္တာနံ အဃာနကာနံ ကာမာဝစရံ ဥပပဇ္ဇန္တာနံ ရူပါဝစရာနံ တေသံ တတ္ထ ဃာနာယတနံ နုပ္ပဇ္ဇတိ၊ နော စ တေသံ တတ္ထ ရူပါယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပါနံ တေသံ တတ္ထ ဃာနာယတနဉ္စ နုပ္ပဇ္ဇတိ ရူပါယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ ရူပါယတနံ န နိရုဇ္ဈိဿတိ တဿ တတ္ထ ဃာနာယတနံ နုပ္ပဇ္ဇတီတိ? အာမန္တာ.
(က) ယဿ ယတ္ထ ဃာနာယတနံ နုပ္ပဇ္ဇတိ တဿ တတ္ထ မနာယတနံ န နိရုဇ္ဈိဿတီတိ?
ကာမာဝစရာ စဝန္တာနံ အဃာနကာနံ ကာမာဝစရံ ဥပပဇ္ဇန္တာနံ ရူပါဝစရာနံ အရူပါဝစရာနံ တေသံ တတ္ထ ဃာနာယတနံ နုပ္ပဇ္ဇတိ၊ နော စ တေသံ တတ္ထ မနာယတနံ န နိရုဇ္ဈိဿတိ. ပရိနိဗ္ဗန္တာနံ အသညသတ္တာနံ တေသံ တတ္ထ ဃာနာယတနဉ္စ နုပ္ပဇ္ဇတိ မနာယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ မနာယတနံ န နိရုဇ္ဈိဿတိ တဿ တတ္ထ ဃာနာယတနံ နုပ္ပဇ္ဇတီတိ? အာမန္တာ.
(က) ယဿ ယတ္ထ ဃာနာယတနံ နုပ္ပဇ္ဇတိ တဿ တတ္ထ ဓမ္မာယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အဃာနကာနံ ဥပပဇ္ဇန္တာနံ တေသံ တတ္ထ ဃာနာယတနံ နုပ္ပဇ္ဇတိ၊ နော စ တေသံ တတ္ထ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ ဃာနာယတနဉ္စ နုပ္ပဇ္ဇတိ ဓမ္မာယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ ဓမ္မာယတနံ န နိရုဇ္ဈိဿတိ တဿ တတ္ထ ဃာနာယတနံ နုပ္ပဇ္ဇတီတိ? အာမန္တာ. (ဃာနာယတနမူလကံ)
၂၄၆. (က) ယဿ ယတ္ထ ရူပါယတနံ နုပ္ပဇ္ဇတိ တဿ တတ္ထ မနာယတနံ န နိရုဇ္ဈိဿတီတိ?
ပဉ္စဝေါကာရာ စဝန္တာနံ အရူပါနံ တေသံ တတ္ထ ရူပါယတနံ နုပ္ပဇ္ဇတိ၊ နော စ တေသံ တတ္ထ မနာယတနံ န နိရုဇ္ဈိဿတိ. ပရိနိဗ္ဗန္တာနံ အသညသတ္တာ စဝန္တာနံ တေသံ တတ္ထ ရူပါယတနဉ္စ နုပ္ပဇ္ဇတိ မနာယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ မနာယတနံ န နိရုဇ္ဈိဿတိ တဿ တတ္ထ ရူပါယတနံ နုပ္ပဇ္ဇတီတိ?
အသညသတ္တံ ဥပပဇ္ဇန္တာနံ တေသံ တတ္ထ မနာယတနံ န နိရုဇ္ဈိဿတိ၊ နော စ တေသံ တတ္ထ ရူပါယတနံ နုပ္ပဇ္ဇတိ. ပရိနိဗ္ဗန္တာနံ အသညသတ္တာ စဝန္တာနံ တေသံ တတ္ထ မနာယတနဉ္စ န နိရုဇ္ဈိဿတိ ရူပါယတနဉ္စ နုပ္ပဇ္ဇတိ.
(က) ယဿ ယတ္ထ ရူပါယတနံ နုပ္ပဇ္ဇတိ တဿ တတ္ထ ဓမ္မာယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အရူပကာနံ ဥပပဇ္ဇန္တာနံ တေသံ တတ္ထ ရူပါယတနံ နုပ္ပဇ္ဇတိ၊ နော စ တေသံ တတ္ထ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ ရူပါယတနဉ္စ နုပ္ပဇ္ဇတိ ဓမ္မာယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ ဓမ္မာယတနံ န နိရုဇ္ဈိဿတိ တဿ တတ္ထ ရူပါယတနံ နုပ္ပဇ္ဇတီတိ? အာမန္တာ.
၂၄၇. (က) ယဿ ယတ္ထ မနာယတနံ နုပ္ပဇ္ဇတိ တဿ တတ္ထ ဓမ္မာယတနံ န နိရုဇ္ဈိဿတီတိ?
သဗ္ဗေသံ စဝန္တာနံ အစိတ္တကာနံ ဥပပဇ္ဇန္တာနံ တေသံ တတ္ထ မနာယတနံ နုပ္ပဇ္ဇတိ၊ နော စ တေသံ တတ္ထ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ မနာယတနဉ္စ နုပ္ပဇ္ဇတိ ဓမ္မာယတနဉ္စ န နိရုဇ္ဈိဿတိ.
(ခ) ယဿ ဝါ ပန ယတ္ထ ဓမ္မာယတနံ န နိရုဇ္ဈိဿတိ တဿ တတ္ထ မနာယတနံ နုပ္ပဇ္ဇတီတိ? အာမန္တာ.