(၆) အတီတာနာဂတဝါရော

(က) အနုလောမပုဂ္ဂလော

၂၄၈. (က) ယဿ စက္ခာယတနံ ဥပ္ပဇ္ဇိတ္ထ တဿ သောတာယတနံ နိရုဇ္ဈိဿတီတိ?

ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ စက္ခာယတနံ ဥပ္ပဇ္ဇိတ္ထ၊ နော စ တေသံ သောတာယတနံ နိရုဇ္ဈိဿတိ. ဣတရေသံ တေသံ စက္ခာယတနဉ္စ ဥပ္ပဇ္ဇိတ္ထ သောတာယတနဉ္စ နိရုဇ္ဈိဿတိ.

(ခ) ယဿ ဝါ ပန သောတာယတနံ နိရုဇ္ဈိဿတိ တဿ စက္ခာယတနံ ဥပ္ပဇ္ဇိတ္ထာတိ? အာမန္တာ.

(ယထာ နိရောဓဝါရေ အတီတာနာဂတာ [အတီတေနာနာဂတာ (သျာ.)] ပုစ္ဆာ ယဿကမ္ပိ ယတ္ထကမ္ပိ ယဿယတ္ထကမ္ပိ အနုလောမမ္ပိ ပစ္စနီကမ္ပိ ဝိဘတ္တံ၊ ဧဝံ ဥပ္ပါဒနိရောဓေပိ အတီတာနာဂတာ ပုစ္ဆာ ဝိဘဇိတဗ္ဗာ.)

ဥပ္ပါဒနိရောဓဝါရော.

ပဝတ္တိဝါရော နိဋ္ဌိတော.