(၃) အနာဂတဝါရော

(က) အနုလောမပုဂ္ဂလော

၂၁၁. (က) ယဿ စက္ခာယတနံ ဥပ္ပဇ္ဇိဿတိ တဿ သောတာယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန သောတာယတနံ နိရုဇ္ဈိဿတိ တဿ စက္ခာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ဥပပဇ္ဇန္တာနံ တေသံ သောတာယတနံ နိရုဇ္ဈိဿတိ၊ နော စ တေသံ စက္ခာယတနံ ဥပ္ပဇ္ဇိဿတိ. ဣတရေသံ တေသံ သောတာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇိဿတိ.

(က) ယဿ စက္ခာယတနံ ဥပ္ပဇ္ဇိဿတိ တဿ ဃာနာယတနံ နိရုဇ္ဈိဿတီတိ?

ယေ ရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ စက္ခာယတနံ ဥပ္ပဇ္ဇိဿတိ၊ နော စ တေသံ ဃာနာယတနံ နိရုဇ္ဈိဿတိ. ဣတရေသံ တေသံ စက္ခာယတနဉ္စ ဥပ္ပဇ္ဇိဿတိ ဃာနာယတနဉ္စ နိရုဇ္ဈိဿတိ.

(ခ) ယဿ ဝါ ပန ဃာနာယတနံ နိရုဇ္ဈိဿတိ တဿ စက္ခာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ကာမာဝစရံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ဥပပဇ္ဇန္တာနံ တေသံ ဃာနာယတနံ နိရုဇ္ဈိဿတိ၊ နော စ တေသံ စက္ခာယတနံ ဥပ္ပဇ္ဇိဿတိ. ဣတရေသံ တေသံ ဃာနာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇိဿတိ.

(က) ယဿ စက္ခာယတနံ ဥပ္ပဇ္ဇိဿတိ တဿ ရူပါယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန ရူပါယတနံ နိရုဇ္ဈိဿတိ တဿ စက္ခာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ဥပပဇ္ဇန္တာနံ တေသံ ရူပါယတနံ နိရုဇ္ဈိဿတိ၊ နော စ တေသံ စက္ခာယတနံ ဥပ္ပဇ္ဇိဿတိ. ဣတရေသံ တေသံ ရူပါယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇိဿတိ.

ယဿ စက္ခာယတနံ ဥပ္ပဇ္ဇိဿတိ တဿ မနာယတနံ။ပေ။ ဓမ္မာယတနံ နိရုဇ္ဈိဿတီတိ? အာမန္တာ.

ယဿ ဝါ ပန ဓမ္မာယတနံ နိရုဇ္ဈိဿတိ တဿ စက္ခာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ဓမ္မာယတနံ နိရုဇ္ဈိဿတိ၊ နော စ တေသံ စက္ခာယတနံ ဥပ္ပဇ္ဇိဿတိ. ဣတရေသံ တေသံ ဓမ္မာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇိဿတိ. (စက္ခာယတနမူလကံ)

၂၁၂. (က) ယဿ ဃာနာယတနံ ဥပ္ပဇ္ဇိဿတိ တဿ ရူပါယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန ရူပါယတနံ နိရုဇ္ဈိဿတိ တဿ ဃာနာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ ဥပပဇ္ဇန္တာနံ တေသံ ရူပါယတနံ နိရုဇ္ဈိဿတိ၊ နော စ တေသံ ဃာနာယတနံ ဥပပဇ္ဇိဿတိ. ဣတရေသံ တေသံ ရူပါယတနဉ္စ နိရုဇ္ဈိဿတိ ဃာနာယတနဉ္စ ဥပ္ပဇ္ဇိဿတိ.

ယဿ ဃာနာယတနံ ဥပ္ပဇ္ဇိဿတိ တဿ မနာယတနံ။ပေ။ ဓမ္မာယတနံ နိရုဇ္ဈိဿတီတိ? အာမန္တာ.

ယဿ ဝါ ပန ဓမ္မာယတနံ နိရုဇ္ဈိဿတိ တဿ ဃာနာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ဥပပဇ္ဇန္တာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ ဓမ္မာယတနံ နိရုဇ္ဈိဿတိ၊ နော စ တေသံ ဃာနာယတနံ ဥပ္ပဇ္ဇိဿတိ. ဣတရေသံ တေသံ ဓမ္မာယတနဉ္စ နိရုဇ္ဈိဿတိ ဃာနာယတနဉ္စ ဥပ္ပဇ္ဇိဿတိ.

၂၁၃. ယဿ ရူပါယတနံ ဥပ္ပဇ္ဇိဿတိ တဿ မနာယတနံ။ပေ။ ဓမ္မာယတနံ နိရုဇ္ဈိဿတီတိ? အာမန္တာ.

ယဿ ဝါ ပန ဓမ္မာယတနံ နိရုဇ္ဈိဿတိ တဿ ရူပါယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ဓမ္မာယတနံ နိရုဇ္ဈိဿတိ၊ နော စ တေသံ ရူပါယတနံ ဥပ္ပဇ္ဇိဿတိ. ဣတရေသံ တေသံ ဓမ္မာယတနဉ္စ နိရုဇ္ဈိဿတိ ရူပါယတနဉ္စ ဥပ္ပဇ္ဇိဿတိ.

၂၁၄. (က) ယဿ မနာယတနံ ဥပ္ပဇ္ဇိဿတိ တဿ ဓမ္မာယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန ဓမ္မာယတနံ နိရုဇ္ဈိဿတိ တဿ မနာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ဥပပဇ္ဇန္တာနံ တေသံ ဓမ္မာယတနံ နိရုဇ္ဈိဿတိ၊ နော စ တေသံ မနာယတနံ ဥပ္ပဇ္ဇိဿတိ. ဣတရေသံ တေသံ ဓမ္မာယတနဉ္စ နိရုဇ္ဈိဿတိ မနာယတနဉ္စ ဥပ္ပဇ္ဇိဿတိ.

(ခ) အနုလောမဩကာသော

၂၁၅. ယတ္ထ စက္ခာယတနံ ဥပ္ပဇ္ဇိဿတိ။ပေ။.

(ဂ) အနုလောမပုဂ္ဂလောကာသာ

၂၁၆. (က) ယဿ ယတ္ထ စက္ခာယတနံ ဥပ္ပဇ္ဇိဿတိ တဿ တတ္ထ သောတာယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ သောတာယတနံ နိရုဇ္ဈိဿတိ တဿ တတ္ထ စက္ခာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ တေသံ တတ္ထ သောတာယတနံ နိရုဇ္ဈိဿတိ၊ နော စ တေသံ တတ္ထ စက္ခာယတနံ ဥပ္ပဇ္ဇိဿတိ. ဣတရေသံ ပဉ္စဝေါကာရာနံ တေသံ တတ္ထ သောတာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇိဿတိ.

(က) ယဿ ယတ္ထ စက္ခာယတနံ ဥပ္ပဇ္ဇိဿတိ တဿ တတ္ထ ဃာနာယတနံ နိရုဇ္ဈိဿတီတိ?

ရူပါဝစရာနံ တေသံ တတ္ထ စက္ခာယတနံ ဥပ္ပဇ္ဇိဿတိ၊ နော စ တေသံ တတ္ထ ဃာနာယတနံ နိရုဇ္ဈိဿတိ. ကာမာဝစရာနံ တေသံ တတ္ထ စက္ခာယတနဉ္စ ဥပ္ပဇ္ဇိဿတိ ဃာနာယတနဉ္စ နိရုဇ္ဈိဿတိ.

(ခ) ယဿ ဝါ ပန ယတ္ထ ဃာနာယတနံ နိရုဇ္ဈိဿတိ တဿ တတ္ထ စက္ခာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ကာမာဝစရံ ဥပပဇ္ဇန္တာနံ တေသံ တတ္ထ ဃာနာယတနံ နိရုဇ္ဈိဿတိ၊ နော စ တေသံ တတ္ထ စက္ခာယတနံ ဥပ္ပဇ္ဇိဿတိ. ဣတရေသံ ကာမာဝစရာနံ တေသံ တတ္ထ ဃာနာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇိဿတိ.

(က) ယဿ ယတ္ထ စက္ခာယတနံ ဥပ္ပဇ္ဇိဿတိ တဿ တတ္ထ ရူပါယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ ရူပါယတနံ နိရုဇ္ဈိဿတိ တဿ တတ္ထ စက္ခာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အသညသတ္တာနံ တေသံ တတ္ထ ရူပါယတနံ နိရုဇ္ဈိဿတိ၊ နော စ တေသံ တတ္ထ စက္ခာယတနံ ဥပ္ပဇ္ဇိဿတိ. ဣတရေသံ ပဉ္စဝေါကာရာနံ တေသံ တတ္ထ ရူပါယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇိဿတိ.

(က) ယဿ ယတ္ထ စက္ခာယတနံ ဥပ္ပဇ္ဇိဿတိ တဿ တတ္ထ မနာယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ မနာယတနံ နိရုဇ္ဈိဿတိ တဿ တတ္ထ စက္ခာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အရူပါနံ တေသံ တတ္ထ မနာယတနံ နိရုဇ္ဈိဿတိ၊ နော စ တေသံ တတ္ထ စက္ခာယတနံ ဥပ္ပဇ္ဇိဿတိ. ဣတရေသံ ပဉ္စဝေါကာရာနံ တေသံ တတ္ထ မနာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇိဿတိ.

(က) ယဿ ယတ္ထ စက္ခာယတနံ ဥပ္ပဇ္ဇိဿတိ တဿ တတ္ထ ဓမ္မာယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ ဓမ္မာယတနံ နိရုဇ္ဈိဿတိ တဿ တတ္ထ စက္ခာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အသညသတ္တာနံ အရူပါနံ တေသံ တတ္ထ ဓမ္မာယတနံ နိရုဇ္ဈိဿတိ၊ နော စ တေသံ တတ္ထ စက္ခာယတနံ ဥပ္ပဇ္ဇိဿတိ. ဣတရေသံ ပဉ္စဝေါကာရာနံ တေသံ တတ္ထ ဓမ္မာယတနဉ္စ နိရုဇ္ဈိဿတိ စက္ခာယတနဉ္စ ဥပ္ပဇ္ဇိဿတိ. (စက္ခာယတနမူလကံ)

၂၁၇. (က) ယဿ ယတ္ထ ဃာနာယတနံ ဥပ္ပဇ္ဇိဿတိ တဿ တတ္ထ ရူပါယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ ရူပါယတနံ နိရုဇ္ဈိဿတိ တဿ တတ္ထ ဃာနာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ကာမာဝစရံ ဥပပဇ္ဇန္တာနံ ရူပါဝစရာနံ တေသံ တတ္ထ ရူပါယတနံ နိရုဇ္ဈိဿတိ၊ နော စ တေသံ တတ္ထ ဃာနာယတနံ ဥပ္ပဇ္ဇိဿတိ. ဣတရေသံ ကာမာဝစရာနံ တေသံ တတ္ထ ရူပါယတနဉ္စ နိရုဇ္ဈိဿတိ ဃာနာယတနဉ္စ ဥပ္ပဇ္ဇိဿတိ.

ယဿ ယတ္ထ ဃာနာယတနံ ဥပ္ပဇ္ဇိဿတိ တဿ တတ္ထ မနာယတနံ ။ပေ။ ဓမ္မာယတနံ နိရုဇ္ဈိဿတီတိ? အာမန္တာ.

ယဿ ဝါ ပန ယတ္ထ ဓမ္မာယတနံ နိရုဇ္ဈိဿတိ တဿ တတ္ထ ဃာနာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ကာမာဝစရံ ဥပပဇ္ဇန္တာနံ ရူပါဝစရာနံ အရူပါဝစရာနံ တေသံ တတ္ထ ဓမ္မာယတနံ နိရုဇ္ဈိဿတိ၊ နော စ တေသံ တတ္ထ ဃာနာယတနံ ဥပ္ပဇ္ဇိဿတိ. ဣတရေသံ ကာမာဝစရာနံ တေသံ တတ္ထ ဓမ္မာယတနဉ္စ နိရုဇ္ဈိဿတိ ဃာနာယတနဉ္စ ဥပ္ပဇ္ဇိဿတိ. (ဃာနာယတနမူလကံ)

၂၁၈. (က) ယဿ ယတ္ထ ရူပါယတနံ ဥပ္ပဇ္ဇိဿတိ တဿ တတ္ထ မနာယတနံ နိရုဇ္ဈိဿတီတိ?

အသညသတ္တာနံ တေသံ တတ္ထ ရူပါယတနံ ဥပ္ပဇ္ဇိဿတိ၊ နော စ တေသံ တတ္ထ မနာယတနံ နိရုဇ္ဈိဿတိ. ပဉ္စဝေါကာရာနံ တေသံ တတ္ထ ရူပါယတနဉ္စ ဥပ္ပဇ္ဇိဿတိ မနာယတနဉ္စ နိရုဇ္ဈိဿတိ.

(ခ) ယဿ ဝါ ပန ယတ္ထ မနာယတနံ နိရုဇ္ဈိဿတိ တဿ တတ္ထ ရူပါယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အရူပါနံ တေသံ တတ္ထ မနာယတနံ နိရုဇ္ဈိဿတိ၊ နော စ တေသံ တတ္ထ ရူပါယတနံ ဥပ္ပဇ္ဇိဿတိ. ဣတရေသံ ပဉ္စဝေါကာရာနံ တေသံ တတ္ထ မနာယတနဉ္စ နိရုဇ္ဈိဿတိ ရူပါယတနဉ္စ ဥပ္ပဇ္ဇိဿတိ.

(က) ယဿ ယတ္ထ ရူပါယတနံ ဥပ္ပဇ္ဇိဿတိ တဿ တတ္ထ ဓမ္မာယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ ဓမ္မာယတနံ နိရုဇ္ဈိဿတိ တဿ တတ္ထ ရူပါယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အရူပါနံ တေသံ တတ္ထ ဓမ္မာယတနံ နိရုဇ္ဈိဿတိ၊ နော စ တေသံ တတ္ထ ရူပါယတနံ ဥပ္ပဇ္ဇိဿတိ. ဣတရေသံ ပဉ္စဝေါကာရာနံ အသညသတ္တာနံ တေသံ တတ္ထ ဓမ္မာယတနဉ္စ နိရုဇ္ဈိဿတိ ရူပါယတနဉ္စ ဥပ္ပဇ္ဇိဿတိ. (ရူပါယတနမူလကံ)

၂၁၉. (က) ယဿ ယတ္ထ မနာယတနံ ဥပ္ပဇ္ဇိဿတိ တဿ တတ္ထ ဓမ္မာယတနံ နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ ဓမ္မာယတနံ နိရုဇ္ဈိဿတိ တဿ တတ္ထ မနာယတနံ ဥပ္ပဇ္ဇိဿတီတိ?

ပစ္ဆိမဘဝိကာနံ ဥပပဇ္ဇန္တာနံ အသညသတ္တာနံ တေသံ တတ္ထ ဓမ္မာယတနံ နိရုဇ္ဈိဿတိ၊ နော စ တေသံ တတ္ထ မနာယတနံ ဥပ္ပဇ္ဇိဿတိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ဓမ္မာယတနဉ္စ နိရုဇ္ဈိဿတိ မနာယတနဉ္စ ဥပ္ပဇ္ဇိဿတိ.

(ဃ) ပစ္စနီကပုဂ္ဂလော

၂၂၀. (က) ယဿ စက္ခာယတနံ နုပ္ပဇ္ဇိဿတိ တဿ သောတာယတနံ န နိရုဇ္ဈိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ဥပပဇ္ဇန္တာနံ တေသံ စက္ခာယတနံ နုပ္ပဇ္ဇိဿတိ၊ နော စ တေသံ သောတာယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ စက္ခာယတနဉ္စ နုပ္ပဇ္ဇိဿတိ သောတာယတနဉ္စ န နိရုဇ္ဈိဿတိ.

(ခ) ယဿ ဝါ ပန သောတာယတနံ န နိရုဇ္ဈိဿတိ တဿ စက္ခာယတနံ နုပ္ပဇ္ဇိဿတီတိ? အာမန္တာ.

(က) ယဿ စက္ခာယတနံ နုပ္ပဇ္ဇိဿတိ တဿ ဃာနာယတနံ န နိရုဇ္ဈိဿတီတိ?

ပစ္ဆိမဘဝိကာနံ ကာမာဝစရံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ဥပပဇ္ဇန္တာနံ တေသံ စက္ခာယတနံ နုပ္ပဇ္ဇိဿတိ၊ နော စ တေသံ ဃာနာယတနံ န နိရုဇ္ဈိဿတိ. ကာမာဝစရေ ပရိနိဗ္ဗန္တာနံ ရူပါဝစရေ အရူပါဝစရေ ပစ္ဆိမဘဝိကာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ စက္ခာယတနဉ္စ နုပ္ပဇ္ဇိဿတိ ဃာနာယတနဉ္စ န နိရုဇ္ဈိဿတိ.

(ခ) ယဿ ဝါ ပန ဃာနာယတနံ န နိရုဇ္ဈိဿတိ တဿ စက္ခာယတနံ နုပ္ပဇ္ဇိဿတီတိ?

ယေ ရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ဃာနာယတနံ န နိရုဇ္ဈိဿတိ၊ နော စ တေသံ စက္ခာယတနံ နုပ္ပဇ္ဇိဿတိ. ကာမာဝစရေ ပရိနိဗ္ဗန္တာနံ ရူပါဝစရေ အရူပါဝစရေ ပစ္ဆိမဘဝိကာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ဃာနာယတနဉ္စ န နိရုဇ္ဈိဿတိ စက္ခာယတနဉ္စ နုပ္ပဇ္ဇိဿတိ.

(က) ယဿ စက္ခာယတနံ နုပ္ပဇ္ဇိဿတိ တဿ ရူပါယတနံ န နိရုဇ္ဈိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ဥပပဇ္ဇန္တာနံ တေသံ စက္ခာယတနံ နုပ္ပဇ္ဇိဿတိ၊ နော စ တေသံ ရူပါယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ စက္ခာယတနဉ္စ နုပ္ပဇ္ဇိဿတိ ရူပါယတနဉ္စ န နိရုဇ္ဈိဿတိ.

(ခ) ယဿ ဝါ ပန ရူပါယတနံ န နိရုဇ္ဈိဿတိ တဿ စက္ခာယတနံ နုပ္ပဇ္ဇိဿတီတိ? အာမန္တာ.

ယဿ စက္ခာယတနံ နုပ္ပဇ္ဇိဿတိ တဿ မနာယတနံ။ပေ။ ဓမ္မာယတနံ န နိရုဇ္ဈိဿတီတိ?

ပစ္ဆိမဘဝိကာနံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စက္ခာယတနံ နုပ္ပဇ္ဇိဿတိ၊ နော စ တေသံ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ စက္ခာယတနဉ္စ နုပ္ပဇ္ဇိဿတိ ဓမ္မာယတနဉ္စ န နိရုဇ္ဈိဿတိ.

ယဿ ဝါ ပန ဓမ္မာယတနံ။ပေ။? အာမန္တာ. (စက္ခာယတနမူလကံ)

၂၂၁. (က) ယဿ ဃာနာယတနံ နုပ္ပဇ္ဇိဿတိ တဿ ရူပါယတနံ န နိရုဇ္ဈိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ ဥပပဇ္ဇန္တာနံ တေသံ ဃာနာယတနံ နုပ္ပဇ္ဇိဿတိ၊ နော စ တေသံ ရူပါယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ဃာနာယတနဉ္စ နုပ္ပဇ္ဇိဿတိ ရူပါယတနဉ္စ န နိရုဇ္ဈိဿတိ.

(ခ) ယဿ ဝါ ပန ရူပါယတနံ။ပေ။? အာမန္တာ.

ယဿ ဃာနာယတနံ နုပ္ပဇ္ဇိဿတိ တဿ မနာယတနံ။ပေ။ ဓမ္မာယတနံ န နိရုဇ္ဈိဿတီတိ?

ပစ္ဆိမဘဝိကာနံ ဥပပဇ္ဇန္တာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ ဃာနာယတနံ နုပ္ပဇ္ဇိဿတိ၊ နော စ တေသံ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ ဃာနာယတနဉ္စ နုပ္ပဇ္ဇိဿတိ ဓမ္မာယတနဉ္စ န နိရုဇ္ဈိဿတိ.

ယဿ ဝါ ပန ဓမ္မာယတနံ။ပေ။? အာမန္တာ.

၂၂၂. ယဿ ရူပါယတနံ နုပ္ပဇ္ဇိဿတိ တဿ မနာယတနံ။ပေ။ ဓမ္မာယတနံ န နိရုဇ္ဈိဿတီတိ?

ပစ္ဆိမဘဝိကာနံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ရူပါယတနံ နုပ္ပဇ္ဇိဿတိ၊ နော စ တေသံ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ ရူပါယတနဉ္စ နုပ္ပဇ္ဇိဿတိ ဓမ္မာယတနဉ္စ န နိရုဇ္ဈိဿတိ.

ယဿ ဝါ ပန ဓမ္မာယတနံ။ပေ။? အာမန္တာ.

၂၂၃. (က) ယဿ မနာယတနံ နုပ္ပဇ္ဇိဿတိ တဿ ဓမ္မာယတနံ န နိရုဇ္ဈိဿတီတိ?

ပစ္ဆိမဘဝိကာနံ ဥပပဇ္ဇန္တာနံ တေသံ မနာယတနံ နုပ္ပဇ္ဇိဿတိ၊ နော စ တေသံ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ မနာယတနဉ္စ နုပ္ပဇ္ဇိဿတိ ဓမ္မာယတနဉ္စ န နိရုဇ္ဈိဿတိ.

(ခ) ယဿ ဝါ ပန ဓမ္မာယတနံ န နိရုဇ္ဈိဿတိ တဿ မနာယတနံ နုပ္ပဇ္ဇိဿတီတိ? အာမန္တာ.

(င) ပစ္စနီကဩကာသော

၂၂၄. ယတ္ထ စက္ခာယတနံ နုပ္ပဇ္ဇိဿတိ။ပေ။.

(စ) ပစ္စနီကပုဂ္ဂလောကာသာ

၂၂၅. (က) ယဿ ယတ္ထ စက္ခာယတနံ နုပ္ပဇ္ဇိဿတိ တဿ တတ္ထ သောတာယတနံ န နိရုဇ္ဈိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ တေသံ တတ္ထ စက္ခာယတနံ နုပ္ပဇ္ဇိဿတိ၊ နော စ တေသံ တတ္ထ သောတာယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အသညသတ္တာနံ အရူပါနံ တေသံ တတ္ထ စက္ခာယတနဉ္စ နုပ္ပဇ္ဇိဿတိ သောတာယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ။ပေ။? အာမန္တာ.

(က) ယဿ ယတ္ထ စက္ခာယတနံ နုပ္ပဇ္ဇိဿတိ တဿ တတ္ထ ဃာနာယတနံ န နိရုဇ္ဈိဿတီတိ?

ပစ္ဆိမဘဝိကာနံ ကာမာဝစရံ ဥပပဇ္ဇန္တာနံ တေသံ တတ္ထ စက္ခာယတနံ နုပ္ပဇ္ဇိဿတိ၊ နော စ တေသံ တတ္ထ ဃာနာယတနံ န နိရုဇ္ဈိဿတိ. ကာမာဝစရေ ပရိနိဗ္ဗန္တာနံ ရူပါဝစရေ ပစ္ဆိမဘဝိကာနံ အသညသတ္တာနံ အရူပါနံ တေသံ တတ္ထ စက္ခာယတနဉ္စ နုပ္ပဇ္ဇိဿတိ ဃာနာယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ ဃာနာယတနံ န နိရုဇ္ဈိဿတိ တဿ တတ္ထ စက္ခာယတနံ နုပ္ပဇ္ဇိဿတီတိ?

ရူပါဝစရာနံ တေသံ တတ္ထ ဃာနာယတနံ န နိရုဇ္ဈိဿတိ၊ နော စ တေသံ တတ္ထ စက္ခာယတနံ နုပ္ပဇ္ဇိဿတိ. ကာမာဝစရေ ပရိနိဗ္ဗန္တာနံ ရူပါဝစရေ ပစ္ဆိမဘဝိကာနံ အသညသတ္တာနံ အရူပါနံ တေသံ တတ္ထ ဃာနာယတနဉ္စ န နိရုဇ္ဈိဿတိ စက္ခာယတနဉ္စ နုပ္ပဇ္ဇိဿတိ.

(က) ယဿ ယတ္ထ စက္ခာယတနံ နုပ္ပဇ္ဇိဿတိ တဿ တတ္ထ ရူပါယတနံ န နိရုဇ္ဈိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အသညသတ္တာနံ တေသံ တတ္ထ စက္ခာယတနံ နုပ္ပဇ္ဇိဿတိ၊ နော စ တေသံ တတ္ထ ရူပါယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပါနံ တေသံ တတ္ထ စက္ခာယတနဉ္စ နုပ္ပဇ္ဇိဿတိ ရူပါယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ။ပေ။? အာမန္တာ.

(က) ယဿ ယတ္ထ စက္ခာယတနံ နုပ္ပဇ္ဇိဿတိ တဿ တတ္ထ မနာယတနံ န နိရုဇ္ဈိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အရူပါနံ တေသံ တတ္ထ စက္ခာယတနံ နုပ္ပဇ္ဇိဿတိ၊ နော စ တေသံ တတ္ထ မနာယတနံ န နိရုဇ္ဈိဿတိ. ပရိနိဗ္ဗန္တာနံ အသညသတ္တာနံ တေသံ တတ္ထ စက္ခာယတနဉ္စ နုပ္ပဇ္ဇိဿတိ မနာယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ။ပေ။? အာမန္တာ.

(က) ယဿ ယတ္ထ စက္ခာယတနံ နုပ္ပဇ္ဇိဿတိ တဿ တတ္ထ ဓမ္မာယတနံ န နိရုဇ္ဈိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အသညသတ္တာနံ အရူပါနံ တေသံ တတ္ထ စက္ခာယတနံ နုပ္ပဇ္ဇိဿတိ၊ နော စ တေသံ တတ္ထ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ စက္ခာယတနဉ္စ နုပ္ပဇ္ဇိဿတိ ဓမ္မာယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ။ပေ။? အာမန္တာ. (စက္ခာယတနမူလကံ)

၂၂၆. (က) ယဿ ယတ္ထ ဃာနာယတနံ နုပ္ပဇ္ဇိဿတိ တဿ တတ္ထ ရူပါယတနံ န နိရုဇ္ဈိဿတီတိ?

ပစ္ဆိမဘဝိကာနံ ကာမာဝစရံ ဥပပဇ္ဇန္တာနံ ရူပါဝစရာနံ တေသံ တတ္ထ ဃာနာယတနံ နုပ္ပဇ္ဇိဿတိ၊ နော စ တေသံ တတ္ထ ရူပါယတနံ န နိရုဇ္ဈိဿတိ. ပဉ္စဝေါကာရေ ပရိနိဗ္ဗန္တာနံ အရူပါနံ တေသံ တတ္ထ ဃာနာယတနဉ္စ နုပ္ပဇ္ဇိဿတိ ရူပါယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ။ပေ။? အာမန္တာ.

(က) ယဿ ယတ္ထ ဃာနာယတနံ နုပ္ပဇ္ဇိဿတိ တဿ တတ္ထ မနာယတနံ န နိရုဇ္ဈိဿတီတိ?

ပစ္ဆိမဘဝိကာနံ ကာမာဝစရံ ဥပပဇ္ဇန္တာနံ ရူပါဝစရာနံ အရူပါဝစရာနံ တေသံ တတ္ထ ဃာနာယတနံ နုပ္ပဇ္ဇိဿတိ၊ နော စ တေသံ တတ္ထ မနာယတနံ န နိရုဇ္ဈိဿတိ. ပရိနိဗ္ဗန္တာနံ အသညသတ္တာနံ တေသံ တတ္ထ ဃာနာယတနဉ္စ နုပ္ပဇ္ဇိဿတိ မနာယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ။ပေ။? အာမန္တာ.

(က) ယဿ ယတ္ထ ဃာနာယတနံ နုပ္ပဇ္ဇိဿတိ တဿ တတ္ထ ဓမ္မာယတနံ န နိရုဇ္ဈိဿတီတိ?

ပစ္ဆိမဘဝိကာနံ ကာမာဝစရံ ဥပပဇ္ဇန္တာနံ ရူပါဝစရာနံ အရူပါဝစရာနံ တေသံ တတ္ထ ဃာနာယတနံ နုပ္ပဇ္ဇိဿတိ၊ နော စ တေသံ တတ္ထ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ ဃာနာယတနဉ္စ နုပ္ပဇ္ဇိဿတိ ဓမ္မာယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ။ပေ။? အာမန္တာ. (ဃာနာယတနမူလကံ)

၂၂၇. (က) ယဿ ယတ္ထ ရူပါယတနံ နုပ္ပဇ္ဇိဿတိ တဿ တတ္ထ မနာယတနံ န နိရုဇ္ဈိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အရူပါနံ တေသံ တတ္ထ ရူပါယတနံ နုပ္ပဇ္ဇိဿတိ၊ နော စ တေသံ တတ္ထ မနာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ ရူပါယတနဉ္စ နုပ္ပဇ္ဇိဿတိ မနာယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ မနာယတနံ န နိရုဇ္ဈိဿတိ တဿ တတ္ထ ရူပါယတနံ နုပ္ပဇ္ဇိဿတီတိ?

အသညသတ္တာနံ တေသံ တတ္ထ မနာယတနံ န နိရုဇ္ဈိဿတိ၊ နော စ တေသံ တတ္ထ ရူပါယတနံ နုပ္ပဇ္ဇိဿတိ. ပရိနိဗ္ဗန္တာနံ တေသံ တတ္ထ မနာယတနဉ္စ န နိရုဇ္ဈိဿတိ ရူပါယတနဉ္စ နုပ္ပဇ္ဇိဿတိ.

(က) ယဿ ယတ္ထ ရူပါယတနံ နုပ္ပဇ္ဇိဿတိ တဿ တတ္ထ ဓမ္မာယတနံ န နိရုဇ္ဈိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အရူပါနံ တေသံ တတ္ထ ရူပါယတနံ နုပ္ပဇ္ဇိဿတိ၊ နော စ တေသံ တတ္ထ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ ရူပါယတနဉ္စ နုပ္ပဇ္ဇိဿတိ ဓမ္မာယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ။ပေ။? အာမန္တာ. (ရူပါယတနမူလကံ)

၂၂၈. (က) ယဿ ယတ္ထ မနာယတနံ နုပ္ပဇ္ဇိဿတိ တဿ တတ္ထ ဓမ္မာယတနံ န နိရုဇ္ဈိဿတီတိ?

ပစ္ဆိမဘဝိကာနံ ဥပပဇ္ဇန္တာနံ အသညသတ္တာနံ တေသံ တတ္ထ မနာယတနံ နုပ္ပဇ္ဇိဿတိ၊ နော စ တေသံ တတ္ထ ဓမ္မာယတနံ န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ မနာယတနဉ္စ နုပ္ပဇ္ဇိဿတိ ဓမ္မာယတနဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ ဓမ္မာယတနံ န နိရုဇ္ဈိဿတိ တဿ တတ္ထ မနာယတနံ နုပ္ပဇ္ဇိဿတီတိ? အာမန္တာ.