၄. ပစ္စုပ္ပန္နာတီတဝါရော

၂၀၉. (က) ယော ရူပက္ခန္ဓံ ပရိဇာနာတိ သော ဝေဒနာက္ခန္ဓံ ပရိဇာနိတ္ထာတိ? နော.

(ခ) ယော ဝါ ပန ဝေဒနာက္ခန္ဓံ ပရိဇာနိတ္ထ သော ရူပက္ခန္ဓံ ပရိဇာနာတီတိ? နော.

(က) ယော ရူပက္ခန္ဓံ န ပရိဇာနာတိ သော ဝေဒနာက္ခန္ဓံ န ပရိဇာနိတ္ထာတိ?

အရဟာ ရူပက္ခန္ဓံ န ပရိဇာနာတိ၊ နော စ ဝေဒနာက္ခန္ဓံ န ပရိဇာနိတ္ထ. အဂ္ဂမဂ္ဂသမင်္ဂိဉ္စ အရဟန္တဉ္စ ဌပေတွာ အဝသေသာ ပုဂ္ဂလာ ရူပက္ခန္ဓဉ္စ န ပရိဇာနန္တိ ဝေဒနာက္ခန္ဓဉ္စ န ပရိဇာနိတ္ထ.

(ခ) ယော ဝါ ပန ဝေဒနာက္ခန္ဓံ န ပရိဇာနိတ္ထ သော ရူပက္ခန္ဓံ န ပရိဇာနာတီတိ?

အဂ္ဂမဂ္ဂသမင်္ဂီ ဝေဒနာက္ခန္ဓံ န ပရိဇာနိတ္ထ၊ နော စ ရူပက္ခန္ဓံ န ပရိဇာနာတိ. အဂ္ဂမဂ္ဂသမင်္ဂိဉ္စ အရဟန္တဉ္စ ဌပေတွာ အဝသေသာ ပုဂ္ဂလာ ဝေဒနာက္ခန္ဓဉ္စ န ပရိဇာနိတ္ထ ရူပက္ခန္ဓဉ္စ န ပရိဇာနန္တိ.