၅. ပစ္စုပ္ပန္နာနာဂတဝါရော

၂၁၀. (က) ယော ရူပက္ခန္ဓံ ပရိဇာနာတိ သော ဝေဒနာက္ခန္ဓံ ပရိဇာနိဿတီတိ? နော.

(ခ) ယော ဝါ ပန ဝေဒနာက္ခန္ဓံ ပရိဇာနိဿတိ သော ရူပက္ခန္ဓံ ပရိဇာနာတီတိ? နော.

(က) ယော ရူပက္ခန္ဓံ န ပရိဇာနာတိ သော ဝေဒနာက္ခန္ဓံ န ပရိဇာနိဿတီတိ?

ယေ မဂ္ဂံ ပဋိလဘိဿန္တိ တေ ရူပက္ခန္ဓံ န ပရိဇာနန္တိ၊ နော စ ဝေဒနာက္ခန္ဓံ န ပရိဇာနိဿန္တိ. အရဟာ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေ ရူပက္ခန္ဓဉ္စ န ပရိဇာနန္တိ ဝေဒနာက္ခန္ဓဉ္စ န ပရိဇာနိဿန္တိ.

(ခ) ယော ဝါ ပန ဝေဒနာက္ခန္ဓံ န ပရိဇာနိဿတိ သော ရူပက္ခန္ဓံ န ပရိဇာနာတီတိ?

အဂ္ဂမဂ္ဂသမင်္ဂီ ဝေဒနာက္ခန္ဓံ န ပရိဇာနိဿတိ၊ နော စ ရူပက္ခန္ဓံ န ပရိဇာနာတိ. အရဟာ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေ ဝေဒနာက္ခန္ဓဉ္စ န ပရိဇာနိဿန္တိ ရူပက္ခန္ဓဉ္စ န ပရိဇာနန္တိ.