(၅) ပစ္စုပ္ပန္နာနာဂတဝါရော
(က) အနုလောမပုဂ္ဂလော
၁၈၆. (က) ယဿ ရူပက္ခန္ဓော ဥပ္ပဇ္ဇတိ တဿ ဝေဒနာက္ခန္ဓော နိရုဇ္ဈိဿတီတိ? အာမန္တာ.
(ခ) ယဿ ဝါ ပန ဝေဒနာက္ခန္ဓော နိရုဇ္ဈိဿတိ တဿ ရူပက္ခန္ဓော ဥပ္ပဇ္ဇတီတိ?
သဗ္ဗေသံ စဝန္တာနံ အရူပံ ဥပပဇ္ဇန္တာနံ တေသံ ဝေဒနာက္ခန္ဓော နိရုဇ္ဈိဿတိ၊ နော စ တေသံ ရူပက္ခန္ဓော ဥပ္ပဇ္ဇတိ. ပဉ္စဝေါကာရံ ဥပပဇ္ဇန္တာနံ အသညသတ္တံ ဥပပဇ္ဇန္တာနံ တေသံ ဝေဒနာက္ခန္ဓော စ နိရုဇ္ဈိဿတိ ရူပက္ခန္ဓော စ ဥပ္ပဇ္ဇတိ.
၁၈၇. (က) ယဿ ဝေဒနာက္ခန္ဓော ဥပ္ပဇ္ဇတိ တဿ သညာက္ခန္ဓော နိရုဇ္ဈိဿတီတိ? အာမန္တာ.
(ခ) ယဿ ဝါ ပန သညာက္ခန္ဓော နိရုဇ္ဈိဿတိ တဿ ဝေဒနာက္ခန္ဓော ဥပ္ပဇ္ဇတီတိ?
သဗ္ဗေသံ စဝန္တာနံ အသညသတ္တံ ဥပပဇ္ဇန္တာနံ တေသံ သညာက္ခန္ဓော နိရုဇ္ဈိဿတိ၊ နော စ တေသံ ဝေဒနာက္ခန္ဓော ဥပ္ပဇ္ဇတိ. စတုဝေါကာရံ ပဉ္စဝေါကာရံ ဥပပဇ္ဇန္တာနံ တေသံ သညာက္ခန္ဓော စ နိရုဇ္ဈိဿတိ ဝေဒနာက္ခန္ဓော စ ဥပ္ပဇ္ဇတိ.
(ခ) အနုလောမဩကာသော
၁၈၈. ယတ္ထ ရူပက္ခန္ဓော ဥပ္ပဇ္ဇတိ။ပေ။.
(ဂ) အနုလောမပုဂ္ဂလောကာသာ
၁၈၉. (က) ယဿ ယတ္ထ ရူပက္ခန္ဓော ဥပ္ပဇ္ဇတိ တဿ တတ္ထ ဝေဒနာက္ခန္ဓော နိရုဇ္ဈိဿတီတိ?
အသညသတ္တံ ဥပပဇ္ဇန္တာနံ တေသံ တတ္ထ ရူပက္ခန္ဓော ဥပ္ပဇ္ဇတိ၊ နော စ တေသံ တတ္ထ ဝေဒနာက္ခန္ဓော နိရုဇ္ဈိဿတိ. ပဉ္စဝေါကာရံ ဥပပဇ္ဇန္တာနံ တေသံ တတ္ထ ရူပက္ခန္ဓော စ ဥပ္ပဇ္ဇတိ ဝေဒနာက္ခန္ဓော စ နိရုဇ္ဈိဿတိ.
(ခ) ယဿ ဝါ ပန ယတ္ထ ဝေဒနာက္ခန္ဓော နိရုဇ္ဈိဿတိ တဿ တတ္ထ ရူပက္ခန္ဓော ဥပ္ပဇ္ဇတီတိ?
ပဉ္စဝေါကာရာ စဝန္တာနံ အရူပါနံ တေသံ တတ္ထ ဝေဒနာက္ခန္ဓော နိရုဇ္ဈိဿတိ၊ နော စ တေသံ တတ္ထ ရူပက္ခန္ဓော ဥပ္ပဇ္ဇတိ. ပဉ္စဝေါကာရံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော စ နိရုဇ္ဈိဿတိ ရူပက္ခန္ဓော စ ဥပ္ပဇ္ဇတိ.
၁၉၀. (က) ယဿ ယတ္ထ ဝေဒနာက္ခန္ဓော ဥပ္ပဇ္ဇတိ တဿ တတ္ထ သညာက္ခန္ဓော နိရုဇ္ဈိဿတီတိ? အာမန္တာ.
(ခ) ယဿ ဝါ ပန ယတ္ထ သညာက္ခန္ဓော နိရုဇ္ဈိဿတိ တဿ တတ္ထ ဝေဒနာက္ခန္ဓော ဥပ္ပဇ္ဇတီတိ?
စတုဝေါကာရာ ပဉ္စဝေါကာရာ စဝန္တာနံ တေသံ တတ္ထ သညာက္ခန္ဓော နိရုဇ္ဈိဿတိ၊ နော စ တေသံ တတ္ထ ဝေဒနာက္ခန္ဓော ဥပ္ပဇ္ဇတိ. စတုဝေါကာရံ ပဉ္စဝေါကာရံ ဥပပဇ္ဇန္တာနံ တေသံ တတ္ထ သညာက္ခန္ဓော စ နိရုဇ္ဈိဿတိ ဝေဒနာက္ခန္ဓော စ ဥပ္ပဇ္ဇတိ.
(ဃ) ပစ္စနီကပုဂ္ဂလော
၁၉၁. (က) ယဿ ရူပက္ခန္ဓော နုပ္ပဇ္ဇတိ တဿ ဝေဒနာက္ခန္ဓော န နိရုဇ္ဈိဿတီတိ?
သဗ္ဗေသံ စဝန္တာနံ အရူပံ ဥပပဇ္ဇန္တာနံ တေသံ ရူပက္ခန္ဓော နုပ္ပဇ္ဇတိ၊ နော စ တေသံ ဝေဒနာက္ခန္ဓော န နိရုဇ္ဈိဿတိ. ပရိနိဗ္ဗန္တာနံ တေသံ ရူပက္ခန္ဓော စ နုပ္ပဇ္ဇတိ ဝေဒနာက္ခန္ဓော စ န နိရုဇ္ဈိဿတိ.
(ခ) ယဿ ဝါ ပန ဝေဒနာက္ခန္ဓော န နိရုဇ္ဈိဿတိ တဿ ရူပက္ခန္ဓော နုပ္ပဇ္ဇတီတိ? အာမန္တာ.
၁၉၂. (က) ယဿ ဝေဒနာက္ခန္ဓော နုပ္ပဇ္ဇတိ တဿ သညာက္ခန္ဓော န နိရုဇ္ဈိဿတီတိ?
သဗ္ဗေသံ စဝန္တာနံ အသညသတ္တံ ဥပပဇ္ဇန္တာနံ တေသံ ဝေဒနာက္ခန္ဓော နုပ္ပဇ္ဇတိ၊ နော စ တေသံ သညာက္ခန္ဓော န နိရုဇ္ဈိဿတိ. ပရိနိဗ္ဗန္တာနံ တေသံ ဝေဒနာက္ခန္ဓော စ နုပ္ပဇ္ဇတိ သညာက္ခန္ဓော စ န နိရုဇ္ဈိဿတိ.
(ခ) ယဿ ဝါ ပန သညာက္ခန္ဓော န နိရုဇ္ဈိဿတိ တဿ ဝေဒနာက္ခန္ဓော နုပ္ပဇ္ဇတီတိ? အာမန္တာ.
(င) ပစ္စနီကဩကာသော
၁၉၃. ယတ္ထ ရူပက္ခန္ဓော နုပ္ပဇ္ဇတိ။ပေ။.
(စ) ပစ္စနီကပုဂ္ဂလောကာသာ
၁၉၄. (က) ယဿ ယတ္ထ ရူပက္ခန္ဓော နုပ္ပဇ္ဇတိ တဿ တတ္ထ ဝေဒနာက္ခန္ဓော န နိရုဇ္ဈိဿတီတိ?
ပဉ္စဝေါကာရာ စဝန္တာနံ အရူပါနံ တေသံ တတ္ထ ရူပက္ခန္ဓော နုပ္ပဇ္ဇတိ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈိဿတိ. ပရိနိဗ္ဗန္တာနံ အသညသတ္တာ စဝန္တာနံ တေသံ တတ္ထ ရူပက္ခန္ဓော စ နုပ္ပဇ္ဇတိ ဝေဒနာက္ခန္ဓော စ န နိရုဇ္ဈိဿတိ.
(ခ) ယဿ ဝါ ပန ယတ္ထ ဝေဒနာက္ခန္ဓော န နိရုဇ္ဈိဿတိ တဿ တတ္ထ ရူပက္ခန္ဓော နုပ္ပဇ္ဇတီတိ?
အသညသတ္တံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော န နိရုဇ္ဈိဿတိ၊ နော စ တေသံ တတ္ထ ရူပက္ခန္ဓော နုပ္ပဇ္ဇတိ. ပရိနိဗ္ဗန္တာနံ အသညသတ္တာ စဝန္တာနံ တေသံ တတ္ထ ဝေဒနာက္ခန္ဓော စ န နိရုဇ္ဈိဿတိ ရူပက္ခန္ဓော စ နုပ္ပဇ္ဇတိ.
၁၉၅. (က) ယဿ ယတ္ထ ဝေဒနာက္ခန္ဓော နုပ္ပဇ္ဇတိ တဿ တတ္ထ သညာက္ခန္ဓော န နိရုဇ္ဈိဿတီတိ?
စတုဝေါကာရာ ပဉ္စဝေါကာရာ စဝန္တာနံ တေသံ တတ္ထ ဝေဒနာက္ခန္ဓော နုပ္ပဇ္ဇတိ၊ နော စ တေသံ တတ္ထ သညာက္ခန္ဓော န နိရုဇ္ဈိဿတိ. ပရိနိဗ္ဗန္တာနံ အသညသတ္တာနံ တေသံ တတ္ထ ဝေဒနာက္ခန္ဓော စ နုပ္ပဇ္ဇတိ သညာက္ခန္ဓော စ န နိရုဇ္ဈိဿတိ.
(ခ) ယဿ ဝါ ပန ယတ္ထ သညာက္ခန္ဓော န နိရုဇ္ဈိဿတိ တဿ တတ္ထ ဝေဒနာက္ခန္ဓော နုပ္ပဇ္ဇတီတိ? အာမန္တာ.