(၆) အတီတာနာဂတဝါရော
(က) အနုလောမပုဂ္ဂလော
၁၉၆. (က) ယဿ ရူပက္ခန္ဓော ဥပ္ပဇ္ဇိတ္ထ တဿ ဝေဒနာက္ခန္ဓော နိရုဇ္ဈိဿတီတိ?
ပရိနိဗ္ဗန္တာနံ တေသံ ရူပက္ခန္ဓော ဥပ္ပဇ္ဇိတ္ထ၊ နော စ တေသံ ဝေဒနာက္ခန္ဓော နိရုဇ္ဈိဿတိ. ဣတရေသံ တေသံ ရူပက္ခန္ဓော စ ဥပ္ပဇ္ဇိတ္ထ ဝေဒနာက္ခန္ဓော စ နိရုဇ္ဈိဿတိ.
(ခ) ယဿ ဝါ ပန ဝေဒနာက္ခန္ဓော နိရုဇ္ဈိဿတိ တဿ ရူပက္ခန္ဓော ဥပ္ပဇ္ဇိတ္ထာတိ? အာမန္တာ.
၁၉၇. (က) ယဿ ဝေဒနာက္ခန္ဓော ဥပ္ပဇ္ဇိတ္ထ တဿ သညာက္ခန္ဓော နိရုဇ္ဈိဿတီတိ?
ပရိနိဗ္ဗန္တာနံ တေသံ ဝေဒနာက္ခန္ဓော ဥပ္ပဇ္ဇိတ္ထ၊ နော စ တေသံ သညာက္ခန္ဓော နိရုဇ္ဈိဿတိ. ဣတရေသံ တေသံ ဝေဒနာက္ခန္ဓော စ ဥပ္ပဇ္ဇိတ္ထ သညာက္ခန္ဓော စ နိရုဇ္ဈိဿတိ.
(ခ) ယဿ ဝါ ပန သညာက္ခန္ဓော နိရုဇ္ဈိဿတိ တဿ ဝေဒနာက္ခန္ဓော ဥပ္ပဇ္ဇိတ္ထာတိ? အာမန္တာ.
(ခ) အနုလောမဩကာသော
၁၉၈. ယတ္ထ ရူပက္ခန္ဓော ဥပ္ပဇ္ဇိတ္ထ။ပေ။.
(ဂ) အနုလောမပုဂ္ဂလောကာသာ
၁၉၉. (က) ယဿ ယတ္ထ ရူပက္ခန္ဓော ဥပ္ပဇ္ဇိတ္ထ တဿ တတ္ထ ဝေဒနာက္ခန္ဓော နိရုဇ္ဈိဿတီတိ?
ပဉ္စဝေါကာရေ ပရိနိဗ္ဗန္တာနံ အသညသတ္တာနံ တေသံ တတ္ထ ရူပက္ခန္ဓော ဥပ္ပဇ္ဇိတ္ထ၊ နော စ တေသံ တတ္ထ ဝေဒနာက္ခန္ဓော နိရုဇ္ဈိဿတိ. ဣတရေသံ ပဉ္စဝေါကာရာနံ တေသံ တတ္ထ ရူပက္ခန္ဓော စ ဥပ္ပဇ္ဇိတ္ထ ဝေဒနာက္ခန္ဓော စ နိရုဇ္ဈိဿတိ.
(ခ) ယဿ ဝါ ပန ယတ္ထ ဝေဒနာက္ခန္ဓော နိရုဇ္ဈိဿတိ တဿ တတ္ထ ရူပက္ခန္ဓော ဥပ္ပဇ္ဇိတ္ထာတိ?
သုဒ္ဓါဝါသံ ဥပပဇ္ဇန္တာနံ အရူပါနံ တေသံ တတ္ထ ဝေဒနာက္ခန္ဓော နိရုဇ္ဈိဿတိ၊ နော စ တေသံ တတ္ထ ရူပက္ခန္ဓော ဥပ္ပဇ္ဇိတ္ထ. ဣတရေသံ ပဉ္စဝေါကာရာနံ တေသံ တတ္ထ ဝေဒနာက္ခန္ဓော စ နိရုဇ္ဈိဿတိ ရူပက္ခန္ဓော စ ဥပ္ပဇ္ဇိတ္ထ.
၂၀၀. (က) ယဿ ယတ္ထ ဝေဒနာက္ခန္ဓော ဥပ္ပဇ္ဇိတ္ထ တဿ တတ္ထ သညာက္ခန္ဓော နိရုဇ္ဈိဿတီတိ?
ပရိနိဗ္ဗန္တာနံ တေသံ တတ္ထ ဝေဒနာက္ခန္ဓော ဥပ္ပဇ္ဇိတ္ထ၊ နော စ တေသံ တတ္ထ သညာက္ခန္ဓော နိရုဇ္ဈိဿတိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ဝေဒနာက္ခန္ဓော စ ဥပ္ပဇ္ဇိတ္ထ သညာက္ခန္ဓော စ နိရုဇ္ဈိဿတိ.
(ခ) ယဿ ဝါ ပန ယတ္ထ သညာက္ခန္ဓော နိရုဇ္ဈိဿတိ တဿ တတ္ထ ဝေဒနာက္ခန္ဓော ဥပ္ပဇ္ဇိတ္ထာတိ?
သုဒ္ဓါဝါသံ ဥပပဇ္ဇန္တာနံ တေသံ တတ္ထ သညာက္ခန္ဓော နိရုဇ္ဈိဿတိ၊ နော စ တေသံ တတ္ထ ဝေဒနာက္ခန္ဓော ဥပ္ပဇ္ဇိတ္ထ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ သညာက္ခန္ဓော စ နိရုဇ္ဈိဿတိ ဝေဒနာက္ခန္ဓော စ ဥပ္ပဇ္ဇိတ္ထ.
(ဃ) ပစ္စနီကပုဂ္ဂလော
၂၀၁. (က) ယဿ ရူပက္ခန္ဓော နုပ္ပဇ္ဇိတ္ထ တဿ ဝေဒနာက္ခန္ဓော န နိရုဇ္ဈိဿတီတိ? နတ္ထိ.
(ခ) ယဿ ဝါ ပန ဝေဒနာက္ခန္ဓော န နိရုဇ္ဈိဿတိ တဿ ရူပက္ခန္ဓော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
၂၀၂. (က) ယဿ ဝေဒနာက္ခန္ဓော နုပ္ပဇ္ဇိတ္ထ တဿ သညာက္ခန္ဓော န နိရုဇ္ဈိဿတီတိ? နတ္ထိ.
(ခ) ယဿ ဝါ ပန သညာက္ခန္ဓော န နိရုဇ္ဈိဿတိ တဿ ဝေဒနာက္ခန္ဓော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
(င) ပစ္စနီကဩကာသော
၂၀၃. ယတ္ထ ရူပက္ခန္ဓော နုပ္ပဇ္ဇိတ္ထ။ပေ။.
(စ) ပစ္စနီကပုဂ္ဂလောကာသာ
၂၀၄. (က) ယဿ ယတ္ထ ရူပက္ခန္ဓော နုပ္ပဇ္ဇိတ္ထ တဿ တတ္ထ ဝေဒနာက္ခန္ဓော န နိရုဇ္ဈိဿတီတိ?
သုဒ္ဓါဝါသံ ဥပပဇ္ဇန္တာနံ အရူပါနံ တေသံ တတ္ထ ရူပက္ခန္ဓော နုပ္ပဇ္ဇိတ္ထ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈိဿတိ. သုဒ္ဓါဝါသေ ပရိနိဗ္ဗန္တာနံ အရူပေ ပရိနိဗ္ဗန္တာနံ တေသံ တတ္ထ ရူပက္ခန္ဓော စ နုပ္ပဇ္ဇိတ္ထ ဝေဒနာက္ခန္ဓော စ န နိရုဇ္ဈိဿတိ.
(ခ) ယဿ ဝါ ပန ယတ္ထ ဝေဒနာက္ခန္ဓော န နိရုဇ္ဈိဿတိ တဿ တတ္ထ ရူပက္ခန္ဓော နုပ္ပဇ္ဇိတ္ထာတိ?
ပဉ္စဝေါကာရေ ပရိနိဗ္ဗန္တာနံ အသညသတ္တာနံ တေသံ တတ္ထ ဝေဒနာက္ခန္ဓော န နိရုဇ္ဈိဿတိ၊ နော စ တေသံ တတ္ထ ရူပက္ခန္ဓော နုပ္ပဇ္ဇိတ္ထ. သုဒ္ဓါဝါသေ ပရိနိဗ္ဗန္တာနံ အရူပေ ပရိနိဗ္ဗန္တာနံ တေသံ တတ္ထ ဝေဒနာက္ခန္ဓော စ န နိရုဇ္ဈိဿတိ ရူပက္ခန္ဓော စ နုပ္ပဇ္ဇိတ္ထ.
၂၀၅. (က) ယဿ ယတ္ထ ဝေဒနာက္ခန္ဓော နုပ္ပဇ္ဇိတ္ထ တဿ တတ္ထ သညာက္ခန္ဓော န နိရုဇ္ဈိဿတီတိ?
သုဒ္ဓါဝါသံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော နုပ္ပဇ္ဇိတ္ထ၊ နော စ တေသံ တတ္ထ သညာက္ခန္ဓော န နိရုဇ္ဈိဿတိ. သုဒ္ဓါဝါသေ ပရိနိဗ္ဗန္တာနံ အသညသတ္တာနံ တေသံ တတ္ထ ဝေဒနာက္ခန္ဓော စ နုပ္ပဇ္ဇိတ္ထ သညာက္ခန္ဓော စ န နိရုဇ္ဈိဿတိ.
(ခ) ယဿ ဝါ ပန ယတ္ထ သညာက္ခန္ဓော န နိရုဇ္ဈိဿတိ တဿ တတ္ထ ဝေဒနာက္ခန္ဓော နုပ္ပဇ္ဇိတ္ထာတိ?
ပရိနိဗ္ဗန္တာနံ တေသံ တတ္ထ သညာက္ခန္ဓော န နိရုဇ္ဈိဿတိ၊ နော စ တေသံ တတ္ထ ဝေဒနာက္ခန္ဓော နုပ္ပဇ္ဇိတ္ထ. သုဒ္ဓါဝါသေ ပရိနိဗ္ဗန္တာနံ အသညသတ္တာနံ တေသံ တတ္ထ သညာက္ခန္ဓော စ န နိရုဇ္ဈိဿတိ ဝေဒနာက္ခန္ဓော စ နုပ္ပဇ္ဇိတ္ထ.
ဥပ္ပါဒနိရောဓဝါရော.
ပဝတ္တိဝါရော နိဋ္ဌိတော.