(၂) အတီတဝါရော

(က) အနုလောမပုဂ္ဂလော

၁၆၅. (က) ယဿ ရူပက္ခန္ဓော ဥပ္ပဇ္ဇိတ္ထ တဿ ဝေဒနာက္ခန္ဓော နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန ဝေဒနာက္ခန္ဓော နိရုဇ္ဈိတ္ထ တဿ ရူပက္ခန္ဓော ဥပ္ပဇ္ဇိတ္ထာတိ? အာမန္တာ.

၁၆၆. (က) ယဿ ဝေဒနာက္ခန္ဓော ဥပ္ပဇ္ဇိတ္ထ တဿ သညာက္ခန္ဓော နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန သညာက္ခန္ဓော နိရုဇ္ဈိတ္ထ တဿ ဝေဒနာက္ခန္ဓော ဥပ္ပဇ္ဇိတ္ထာတိ? အာမန္တာ.

(ခ) အနုလောမဩကာသော

၁၆၇. ယတ္ထ ရူပက္ခန္ဓော ဥပ္ပဇ္ဇိတ္ထ။ပေ။.

(ဂ) အနုလောမပုဂ္ဂလောကာသာ

၁၆၈. (က) ယဿ ယတ္ထ ရူပက္ခန္ဓော ဥပ္ပဇ္ဇိတ္ထ တဿ တတ္ထ ဝေဒနာက္ခန္ဓော နိရုဇ္ဈိတ္ထာတိ?

အသညသတ္တာနံ တေသံ တတ္ထ ရူပက္ခန္ဓော ဥပ္ပဇ္ဇိတ္ထ၊ နော စ တေသံ တတ္ထ ဝေဒနာက္ခန္ဓော နိရုဇ္ဈိတ္ထ. ပဉ္စဝေါကာရာနံ တေသံ တတ္ထ ရူပက္ခန္ဓော စ ဥပ္ပဇ္ဇိတ္ထ ဝေဒနာက္ခန္ဓော စ နိရုဇ္ဈိတ္ထ.

(ခ) ယဿ ဝါ ပန ယတ္ထ ဝေဒနာက္ခန္ဓော နိရုဇ္ဈိတ္ထ တဿ တတ္ထ ရူပက္ခန္ဓော ဥပ္ပဇ္ဇိတ္ထာတိ?

အရူပါနံ တေသံ တတ္ထ ဝေဒနာက္ခန္ဓော နိရုဇ္ဈိတ္ထ၊ နော စ တေသံ တတ္ထ ရူပက္ခန္ဓော ဥပ္ပဇ္ဇိတ္ထ. ပဉ္စဝေါကာရာနံ တေသံ တတ္ထ ဝေဒနာက္ခန္ဓော စ နိရုဇ္ဈိတ္ထ ရူပက္ခန္ဓော စ ဥပ္ပဇ္ဇိတ္ထ.

၁၆၉. (က) ယဿ ယတ္ထ ဝေဒနာက္ခန္ဓော ဥပ္ပဇ္ဇိတ္ထ တဿ တတ္ထ သညာက္ခန္ဓော နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန ယတ္ထ သညာက္ခန္ဓော နိရုဇ္ဈိတ္ထ တဿ တတ္ထ ဝေဒနာက္ခန္ဓော ဥပ္ပဇ္ဇိတ္ထာတိ? အာမန္တာ.

(ဃ) ပစ္စနီကပုဂ္ဂလော

၁၇၀. (က) ယဿ ရူပက္ခန္ဓော နုပ္ပဇ္ဇိတ္ထ တဿ ဝေဒနာက္ခန္ဓော န နိရုဇ္ဈိတ္ထာတိ? နတ္ထိ.

(ခ) ယဿ ဝါ ပန ဝေဒနာက္ခန္ဓော န နိရုဇ္ဈိတ္ထ တဿ ရူပက္ခန္ဓော နုပ္ပဇ္ဇိတ္ထာတိ? နတ္ထိ.

၁၇၁. (က) ယဿ ဝေဒနာက္ခန္ဓော နုပ္ပဇ္ဇိတ္ထ တဿ သညာက္ခန္ဓော န နိရုဇ္ဈိတ္ထာတိ? နတ္ထိ.

(ခ) ယဿ ဝါ ပန သညာက္ခန္ဓော န နိရုဇ္ဈိတ္ထ တဿ ဝေဒနာက္ခန္ဓော နုပ္ပဇ္ဇိတ္ထာတိ? နတ္ထိ.

(င) ပစ္စနီကဩကာသော

၁၇၂. ယတ္ထ ရူပက္ခန္ဓော နုပ္ပဇ္ဇိတ္ထ။ပေ။.

(စ) ပစ္စနီကပုဂ္ဂလောကာသာ

၁၇၃. (က) ယဿ ယတ္ထ ရူပက္ခန္ဓော နုပ္ပဇ္ဇိတ္ထ တဿ တတ္ထ ဝေဒနာက္ခန္ဓော န နိရုဇ္ဈိတ္ထာတိ?

အရူပါနံ တေသံ တတ္ထ ရူပက္ခန္ဓော နုပ္ပဇ္ဇိတ္ထ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈိတ္ထ. သုဒ္ဓါဝါသာနံ တေသံ တတ္ထ ရူပက္ခန္ဓော စ နုပ္ပဇ္ဇိတ္ထ ဝေဒနာက္ခန္ဓော စ န နိရုဇ္ဈိတ္ထ.

(ခ) ယဿ ဝါ ပန ယတ္ထ ဝေဒနာက္ခန္ဓော န နိရုဇ္ဈိတ္ထ တဿ တတ္ထ ရူပက္ခန္ဓော နုပ္ပဇ္ဇိတ္ထာတိ?

အသညသတ္တာနံ တေသံ တတ္ထ ဝေဒနာက္ခန္ဓော န နိရုဇ္ဈိတ္ထ၊ နော စ တေသံ တတ္ထ ရူပက္ခန္ဓော နုပ္ပဇ္ဇိတ္ထ. သုဒ္ဓါဝါသာနံ တေသံ တတ္ထ ဝေဒနာက္ခန္ဓော စ န နိရုဇ္ဈိတ္ထ ရူပက္ခန္ဓော စ နုပ္ပဇ္ဇိတ္ထ.

၁၇၄. (က) ယဿ ယတ္ထ ဝေဒနာက္ခန္ဓော နုပ္ပဇ္ဇိတ္ထ တဿ တတ္ထ သညာက္ခန္ဓော န နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန ယတ္ထ သညာက္ခန္ဓော န နိရုဇ္ဈိတ္ထ တဿ တတ္ထ ဝေဒနာက္ခန္ဓော နုပ္ပဇ္ဇိတ္ထာတိ? အာမန္တာ.