(၃) အနာဂတဝါရော

(က) အနုလောမပုဂ္ဂလော

၁၇၅. (က) ယဿ ရူပက္ခန္ဓော ဥပ္ပဇ္ဇိဿတိ တဿ ဝေဒနာက္ခန္ဓော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ဝေဒနာက္ခန္ဓော နိရုဇ္ဈိဿတိ တဿ ရူပက္ခန္ဓော ဥပ္ပဇ္ဇိဿတီတိ?

ပစ္ဆိမဘဝိကာနံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ဝေဒနာက္ခန္ဓော နိရုဇ္ဈိဿတိ၊ နော စ တေသံ ရူပက္ခန္ဓော ဥပ္ပဇ္ဇိဿတိ. ဣတရေသံ တေသံ ဝေဒနာက္ခန္ဓော စ နိရုဇ္ဈိဿတိ ရူပက္ခန္ဓော စ ဥပ္ပဇ္ဇိဿတိ.

၁၇၆. (က) ယဿ ဝေဒနာက္ခန္ဓော ဥပ္ပဇ္ဇိဿတိ တဿ သညာက္ခန္ဓော နိရုဇ္ဈိဿတီတိ? အာမန္တာ.

(ခ) ယဿ ဝါ ပန သညာက္ခန္ဓော နိရုဇ္ဈိဿတိ တဿ ဝေဒနာက္ခန္ဓော ဥပ္ပဇ္ဇိဿတီတိ?

ပစ္ဆိမဘဝိကာနံ ဥပပဇ္ဇန္တာနံ တေသံ သညာက္ခန္ဓော နိရုဇ္ဈိဿတိ၊ နော စ တေသံ ဝေဒနာက္ခန္ဓော ဥပ္ပဇ္ဇိဿတိ. ဣတရေသံ တေသံ သညာက္ခန္ဓော စ နိရုဇ္ဈိဿတိ ဝေဒနာက္ခန္ဓော စ ဥပ္ပဇ္ဇိဿတိ.

(ခ) အနုလောမဩကာသော

၁၇၇. ယတ္ထ ရူပက္ခန္ဓော ဥပ္ပဇ္ဇိဿတိ။ပေ။.

(ဂ) အနုလောမပုဂ္ဂလောကာသာ

၁၇၈. (က) ယဿ ယတ္ထ ရူပက္ခန္ဓော ဥပ္ပဇ္ဇိဿတိ တဿ တတ္ထ ဝေဒနာက္ခန္ဓော နိရုဇ္ဈိဿတီတိ?

အသညသတ္တာနံ တေသံ တတ္ထ ရူပက္ခန္ဓော ဥပ္ပဇ္ဇိဿတိ၊ နော စ တေသံ တတ္ထ ဝေဒနာက္ခန္ဓော နိရုဇ္ဈိဿတိ. ပဉ္စဝေါကာရာနံ တေသံ တတ္ထ ရူပက္ခန္ဓော စ ဥပ္ပဇ္ဇိဿတိ ဝေဒနာက္ခန္ဓော စ နိရုဇ္ဈိဿတိ.

(ခ) ယဿ ဝါ ပန ယတ္ထ ဝေဒနာက္ခန္ဓော နိရုဇ္ဈိဿတိ တဿ တတ္ထ ရူပက္ခန္ဓော ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အရူပါနံ တေသံ တတ္ထ ဝေဒနာက္ခန္ဓော နိရုဇ္ဈိဿတိ၊ နော စ တေသံ တတ္ထ ရူပက္ခန္ဓော ဥပ္ပဇ္ဇိဿတိ. ဣတရေသံ ပဉ္စဝေါကာရာနံ တေသံ တတ္ထ ဝေဒနာက္ခန္ဓော စ နိရုဇ္ဈိဿတိ ရူပက္ခန္ဓော စ ဥပ္ပဇ္ဇိဿတိ.

၁၇၉. (က) ယဿ ယတ္ထ ဝေဒနာက္ခန္ဓော ဥပ္ပဇ္ဇိဿတိ တဿ တတ္ထ သညာက္ခန္ဓော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ သညာက္ခန္ဓော နိရုဇ္ဈိဿတိ တဿ တတ္ထ ဝေဒနာက္ခန္ဓော ဥပ္ပဇ္ဇိဿတီတိ?

ပစ္ဆိမဘဝိကာနံ ဥပပဇ္ဇန္တာနံ တေသံ တတ္ထ သညာက္ခန္ဓော နိရုဇ္ဈိဿတိ၊ နော စ တေသံ တတ္ထ ဝေဒနာက္ခန္ဓော ဥပ္ပဇ္ဇိဿတိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ သညာက္ခန္ဓော စ နိရုဇ္ဈိဿတိ ဝေဒနာက္ခန္ဓော စ ဥပ္ပဇ္ဇိဿတိ.

(ဃ) ပစ္စနီကပုဂ္ဂလော

၁၈၀. (က) ယဿ ရူပက္ခန္ဓော နုပ္ပဇ္ဇိဿတိ တဿ ဝေဒနာက္ခန္ဓော န နိရုဇ္ဈိဿတီတိ?

ပစ္ဆိမဘဝိကာနံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ ရူပက္ခန္ဓော နုပ္ပဇ္ဇိဿတိ၊ နော စ တေသံ ဝေဒနာက္ခန္ဓော န နိရုဇ္ဈိဿတိ. ပရိနိဗ္ဗန္တာနံ တေသံ ရူပက္ခန္ဓော စ နုပ္ပဇ္ဇိဿတိ ဝေဒနာက္ခန္ဓော စ န နိရုဇ္ဈိဿတိ.

(ခ) ယဿ ဝါ ပန ဝေဒနာက္ခန္ဓော န နိရုဇ္ဈိဿတိ တဿ ရူပက္ခန္ဓော နုပ္ပဇ္ဇိဿတီတိ? အာမန္တာ.

၁၈၁. (က) ယဿ ဝေဒနာက္ခန္ဓော နုပ္ပဇ္ဇိဿတိ တဿ သညာက္ခန္ဓော န နိရုဇ္ဈိဿတီတိ?

ပစ္ဆိမဘဝိကာနံ ဥပပဇ္ဇန္တာနံ တေသံ ဝေဒနာက္ခန္ဓော နုပ္ပဇ္ဇိဿတိ၊ နော စ တေသံ သညာက္ခန္ဓော န နိရုဇ္ဈိဿတိ. ပရိနိဗ္ဗန္တာနံ တေသံ ဝေဒနာက္ခန္ဓော စ နုပ္ပဇ္ဇိဿတိ သညာက္ခန္ဓော စ န နိရုဇ္ဈိဿတိ.

(ခ) ယဿ ဝါ ပန သညာက္ခန္ဓော န နိရုဇ္ဈိဿတိ တဿ ဝေဒနာက္ခန္ဓော နုပ္ပဇ္ဇိဿတီတိ? အာမန္တာ.

(င) ပစ္စနီကဩကာသော

၁၈၂. ယတ္ထ ရူပက္ခန္ဓော နုပ္ပဇ္ဇိဿတိ။ပေ။.

(စ) ပစ္စနီကပုဂ္ဂလောကာသာ

၁၈၃. (က) ယဿ ယတ္ထ ရူပက္ခန္ဓော နုပ္ပဇ္ဇိဿတိ တဿ တတ္ထ ဝေဒနာက္ခန္ဓော န နိရုဇ္ဈိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အရူပါနံ တေသံ တတ္ထ ရူပက္ခန္ဓော နုပ္ပဇ္ဇိဿတိ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ ရူပက္ခန္ဓော စ နုပ္ပဇ္ဇိဿတိ ဝေဒနာက္ခန္ဓော စ န နိရုဇ္ဈိဿတိ.

(ခ) ယဿ ဝါ ပန ယတ္ထ ဝေဒနာက္ခန္ဓော န နိရုဇ္ဈိဿတိ တဿ တတ္ထ ရူပက္ခန္ဓော နုပ္ပဇ္ဇိဿတီတိ?

အသညသတ္တာနံ တေသံ တတ္ထ ဝေဒနာက္ခန္ဓော န နိရုဇ္ဈိဿတိ၊ နော စ တေသံ တတ္ထ ရူပက္ခန္ဓော နုပ္ပဇ္ဇိဿတိ. ပရိနိဗ္ဗန္တာနံ တေသံ တတ္ထ ဝေဒနာက္ခန္ဓော စ န နိရုဇ္ဈိဿတိ ရူပက္ခန္ဓော စ နုပ္ပဇ္ဇိဿတိ.

၁၈၄. (က) ယဿ ယတ္ထ ဝေဒနာက္ခန္ဓော နုပ္ပဇ္ဇိဿတိ တဿ တတ္ထ သညာက္ခန္ဓော န နိရုဇ္ဈိဿတီတိ?

ပစ္ဆိမဘဝိကာနံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော နုပ္ပဇ္ဇိဿတိ၊ နော စ တေသံ တတ္ထ သညာက္ခန္ဓော န နိရုဇ္ဈိဿတိ. ပရိနိဗ္ဗန္တာနံ အသညသတ္တာနံ တေသံ တတ္ထ ဝေဒနာက္ခန္ဓော စ နုပ္ပဇ္ဇိဿတိ သညာက္ခန္ဓော စ န နိရုဇ္ဈိဿတိ.

(ခ) ယဿ ဝါ ပန ယတ္ထ သညာက္ခန္ဓော န နိရုဇ္ဈိဿတိ တဿ တတ္ထ ဝေဒနာက္ခန္ဓော နုပ္ပဇ္ဇိဿတီတိ? အာမန္တာ.