(၁) ပစ္စုပ္ပန္နဝါရော

(က) အနုလောမပုဂ္ဂလော

၁၅၃. (က) ယဿ ရူပက္ခန္ဓော ဥပ္ပဇ္ဇတိ တဿ ဝေဒနာက္ခန္ဓော နိရုဇ္ဈတီတိ? နော.

(ခ) ယဿ ဝါ ပန ဝေဒနာက္ခန္ဓော နိရုဇ္ဈတိ တဿ ရူပက္ခန္ဓော ဥပ္ပဇ္ဇတီတိ? နော.

၁၅၄. (က) ယဿ ဝေဒနာက္ခန္ဓော ဥပ္ပဇ္ဇတိ တဿ သညာက္ခန္ဓော နိရုဇ္ဈတီတိ? နော.

(ခ) ယဿ ဝါ ပန သညာက္ခန္ဓော နိရုဇ္ဈတိ တဿ ဝေဒနာက္ခန္ဓော ဥပ္ပဇ္ဇတီတိ? နော.

(ခ) အနုလောမဩကာသော

၁၅၅. (က) ယတ္ထ ရူပက္ခန္ဓော ဥပ္ပဇ္ဇတိ တတ္ထ ဝေဒနာက္ခန္ဓော နိရုဇ္ဈတီတိ?

အသညသတ္တေ တတ္ထ ရူပက္ခန္ဓော ဥပ္ပဇ္ဇတိ၊ နော စ တတ္ထ ဝေဒနာက္ခန္ဓော နိရုဇ္ဈတိ. ပဉ္စဝေါကာရေ တတ္ထ ရူပက္ခန္ဓော စ ဥပ္ပဇ္ဇတိ ဝေဒနာက္ခန္ဓော စ နိရုဇ္ဈတိ.

(ခ) ယတ္ထ ဝါ ပန ဝေဒနာက္ခန္ဓော နိရုဇ္ဈတိ တတ္ထ ရူပက္ခန္ဓော ဥပ္ပဇ္ဇတီတိ?

အရူပေ တတ္ထ ဝေဒနာက္ခန္ဓော နိရုဇ္ဈတိ၊ နော စ တတ္ထ ရူပက္ခန္ဓော ဥပ္ပဇ္ဇတိ. ပဉ္စဝေါကာရေ တတ္ထ ဝေဒနာက္ခန္ဓော စ နိရုဇ္ဈတိ ရူပက္ခန္ဓော စ ဥပ္ပဇ္ဇတိ.

၁၅၆. (က) ယတ္ထ ဝေဒနာက္ခန္ဓော ဥပ္ပဇ္ဇတိ တတ္ထ သညာက္ခန္ဓော နိရုဇ္ဈတီတိ? အာမန္တာ.

(ခ) ယတ္ထ ဝါ ပန သညာက္ခန္ဓော နိရုဇ္ဈတိ တတ္ထ ဝေဒနာက္ခန္ဓော ဥပ္ပဇ္ဇတီတိ? အာမန္တာ.

(ဂ) အနုလောမပုဂ္ဂလောကာသာ

၁၅၇. (က) ယဿ ယတ္ထ ရူပက္ခန္ဓော ဥပ္ပဇ္ဇတိ တဿ တတ္ထ ဝေဒနာက္ခန္ဓော နိရုဇ္ဈတီတိ? နော.

(ခ) ယဿ ဝါ ပန ယတ္ထ ဝေဒနာက္ခန္ဓော နိရုဇ္ဈတိ တဿ တတ္ထ ရူပက္ခန္ဓော ဥပ္ပဇ္ဇတီတိ? နော.

၁၅၈. (က) ယဿ ယတ္ထ ဝေဒနာက္ခန္ဓော ဥပ္ပဇ္ဇတိ တဿ တတ္ထ သညာက္ခန္ဓော နိရုဇ္ဈတီတိ? နော.

(ခ) ယဿ ဝါ ပန ယတ္ထ သညာက္ခန္ဓော နိရုဇ္ဈတိ တဿ တတ္ထ ဝေဒနာက္ခန္ဓော ဥပ္ပဇ္ဇတီတိ? နော.

(ဃ) ပစ္စနီကပုဂ္ဂလော

၁၅၉. (က) ယဿ ရူပက္ခန္ဓော နုပ္ပဇ္ဇတိ တဿ ဝေဒနာက္ခန္ဓော န နိရုဇ္ဈတီတိ?

စတုဝေါကာရာ ပဉ္စဝေါကာရာ စဝန္တာနံ တေသံ ရူပက္ခန္ဓော နုပ္ပဇ္ဇတိ၊ နော စ တေသံ ဝေဒနာက္ခန္ဓော န နိရုဇ္ဈတိ. အရူပံ ဥပပဇ္ဇန္တာနံ အသညသတ္တာ စဝန္တာနံ တေသံ ရူပက္ခန္ဓော စ နုပ္ပဇ္ဇတိ ဝေဒနာက္ခန္ဓော စ န နိရုဇ္ဈတိ.

(ခ) ယဿ ဝါ ပန ဝေဒနာက္ခန္ဓော န နိရုဇ္ဈတိ တဿ ရူပက္ခန္ဓော နုပ္ပဇ္ဇတီတိ?

ပဉ္စဝေါကာရံ ဥပပဇ္ဇန္တာနံ အသညသတ္တံ ဥပပဇ္ဇန္တာနံ တေသံ ဝေဒနာက္ခန္ဓော န နိရုဇ္ဈတိ၊ နော စ တေသံ ရူပက္ခန္ဓော နုပ္ပဇ္ဇတိ. အရူပံ ဥပပဇ္ဇန္တာနံ အသညသတ္တာ စဝန္တာနံ တေသံ ဝေဒနာက္ခန္ဓော စ န နိရုဇ္ဈတိ ရူပက္ခန္ဓော စ နုပ္ပဇ္ဇတိ.

၁၆၀. (က) ယဿ ဝေဒနာက္ခန္ဓော နုပ္ပဇ္ဇတိ တဿ သညာက္ခန္ဓော န နိရုဇ္ဈတီတိ?

စတုဝေါကာရာ ပဉ္စဝေါကာရာ စဝန္တာနံ တေသံ ဝေဒနာက္ခန္ဓော နုပ္ပဇ္ဇတိ၊ နော စ တေသံ သညာက္ခန္ဓော န နိရုဇ္ဈတိ. အသညသတ္တာနံ တေသံ ဝေဒနာက္ခန္ဓော စ နုပ္ပဇ္ဇတိ သညာက္ခန္ဓော စ န နိရုဇ္ဈတိ.

(ခ) ယဿ ဝါ ပန သညာက္ခန္ဓော န နိရုဇ္ဈတိ တဿ ဝေဒနာက္ခန္ဓော နုပ္ပဇ္ဇတီတိ?

စတုဝေါကာရံ ပဉ္စဝေါကာရံ ဥပပဇ္ဇန္တာနံ တေသံ သညာက္ခန္ဓော န နိရုဇ္ဈတိ၊ နော စ တေသံ ဝေဒနာက္ခန္ဓော နုပ္ပဇ္ဇတိ. အသညသတ္တာနံ တေသံ သညာက္ခန္ဓော စ န နိရုဇ္ဈတိ ဝေဒနာက္ခန္ဓော စ နုပ္ပဇ္ဇတိ.

(င) ပစ္စနီကဩကာသော

၁၆၁. (က) ယတ္ထ ရူပက္ခန္ဓော နုပ္ပဇ္ဇတိ တတ္ထ ဝေဒနာက္ခန္ဓော န နိရုဇ္ဈတီတိ? နိရုဇ္ဈတိ.

(ခ) ယတ္ထ ဝါ ပန ဝေဒနာက္ခန္ဓော န နိရုဇ္ဈတိ တတ္ထ ရူပက္ခန္ဓော နုပ္ပဇ္ဇတီတိ? ဥပ္ပဇ္ဇတိ.

၁၆၂. (က) ယတ္ထ ဝေဒနာက္ခန္ဓော နုပ္ပဇ္ဇတိ တတ္ထ သညာက္ခန္ဓော န နိရုဇ္ဈတီတိ? အာမန္တာ.

(ခ) ယတ္ထ ဝါ ပန သညာက္ခန္ဓော န နိရုဇ္ဈတိ တတ္ထ ဝေဒနာက္ခန္ဓော နုပ္ပဇ္ဇတီတိ? အာမန္တာ.

(စ) ပစ္စနီကပုဂ္ဂလောကာသာ

၁၆၃. (က) ယဿ ယတ္ထ ရူပက္ခန္ဓော နုပ္ပဇ္ဇတိ တဿ တတ္ထ ဝေဒနာက္ခန္ဓော န နိရုဇ္ဈတီတိ?

စတုဝေါကာရာ ပဉ္စဝေါကာရာ စဝန္တာနံ တေသံ တတ္ထ ရူပက္ခန္ဓော နုပ္ပဇ္ဇတိ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈတိ. အရူပံ ဥပပဇ္ဇန္တာနံ အသညသတ္တာ စဝန္တာနံ တေသံ တတ္ထ ရူပက္ခန္ဓော နုပ္ပဇ္ဇတိ ဝေဒနာက္ခန္ဓော စ န နိရုဇ္ဈတိ.

(ခ) ယဿ ဝါ ပန ယတ္ထ ဝေဒနာက္ခန္ဓော န နိရုဇ္ဈတိ တဿ တတ္ထ ရူပက္ခန္ဓော နုပ္ပဇ္ဇတီတိ?

ပဉ္စဝေါကာရံ ဥပပဇ္ဇန္တာနံ အသညသတ္တံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော န နိရုဇ္ဈတိ၊ နော စ တေသံ တတ္ထ ရူပက္ခန္ဓော နုပ္ပဇ္ဇတိ. အရူပံ ဥပပဇ္ဇန္တာနံ အသညသတ္တာ စဝန္တာနံ တေသံ တတ္ထ ဝေဒနာက္ခန္ဓော စ န နိရုဇ္ဈတိ ရူပက္ခန္ဓော စ နုပ္ပဇ္ဇတိ.

၁၆၄. (က) ယဿ ယတ္ထ ဝေဒနာက္ခန္ဓော နုပ္ပဇ္ဇတိ တဿ တတ္ထ သညာက္ခန္ဓော န နိရုဇ္ဈတီတိ?

စတုဝေါကာရာ ပဉ္စဝေါကာရာ စဝန္တာနံ တေသံ တတ္ထ ဝေဒနာက္ခန္ဓော နုပ္ပဇ္ဇတိ၊ နော စ တေသံ တတ္ထ သညာက္ခန္ဓော န နိရုဇ္ဈတိ. အသညသတ္တာနံ တေသံ တတ္ထ ဝေဒနာက္ခန္ဓော စ နုပ္ပဇ္ဇတိ သညာက္ခန္ဓော စ န နိရုဇ္ဈတိ.

(ခ) ယဿ ဝါ ပန ယတ္ထ သညာက္ခန္ဓော န နိရုဇ္ဈတိ တဿ တတ္ထ ဝေဒနာက္ခန္ဓော နုပ္ပဇ္ဇတီတိ?

စတုဝေါကာရံ ပဉ္စဝေါကာရံ ဥပပဇ္ဇန္တာနံ တေသံ တတ္ထ သညာက္ခန္ဓော န နိရုဇ္ဈတိ၊ နော စ တေသံ တတ္ထ ဝေဒနာက္ခန္ဓော နုပ္ပဇ္ဇတိ. အသညသတ္တာနံ တေသံ တတ္ထ သညာက္ခန္ဓော စ န နိရုဇ္ဈတိ ဝေဒနာက္ခန္ဓော စ နုပ္ပဇ္ဇတိ.