(၃) အနာဂတဝါရော

(က) အနုလောမပုဂ္ဂလော

၁၁၆. (က) ယဿ ရူပက္ခန္ဓော နိရုဇ္ဈိဿတိ တဿ ဝေဒနာက္ခန္ဓော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ဝေဒနာက္ခန္ဓော နိရုဇ္ဈိဿတိ တဿ ရူပက္ခန္ဓော နိရုဇ္ဈိဿတီတိ?

ပစ္ဆိမဘဝိကာနံ အရူပံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ဝေဒနာက္ခန္ဓော နိရုဇ္ဈိဿတိ၊ နော စ တေသံ ရူပက္ခန္ဓော နိရုဇ္ဈိဿတိ. ဣတရေသံ တေသံ ဝေဒနာက္ခန္ဓော စ နိရုဇ္ဈိဿတိ ရူပက္ခန္ဓော စ နိရုဇ္ဈိဿတိ.

(ခ) အနုလောမဩကာသော

၁၁၇. (က) ယတ္ထ ရူပက္ခန္ဓော နိရုဇ္ဈိဿတိ တတ္ထ ဝေဒနာက္ခန္ဓော နိရုဇ္ဈိဿတီတိ?

အသညသတ္တေ တတ္ထ ရူပက္ခန္ဓော နိရုဇ္ဈိဿတိ၊ နော စ တတ္ထ ဝေဒနာက္ခန္ဓော နိရုဇ္ဈိဿတိ. ပဉ္စဝေါကာရေ တတ္ထ ရူပက္ခန္ဓော စ နိရုဇ္ဈိဿတိ ဝေဒနာက္ခန္ဓော စ နိရုဇ္ဈိဿတိ.

(ခ) ယတ္ထ ဝါ ပန ဝေဒနာက္ခန္ဓော နိရုဇ္ဈိဿတိ တတ္ထ ရူပက္ခန္ဓော နိရုဇ္ဈိဿတီတိ?

အရူပေ တတ္ထ ဝေဒနာက္ခန္ဓော နိရုဇ္ဈိဿတိ၊ နော စ တတ္ထ ရူပက္ခန္ဓော နိရုဇ္ဈိဿတိ. ပဉ္စဝေါကာရေ တတ္ထ ဝေဒနာက္ခန္ဓော စ နိရုဇ္ဈိဿတိ ရူပက္ခန္ဓော စ နိရုဇ္ဈိဿတိ.

(ဂ) အနုလောမပုဂ္ဂလောကာသာ

၁၁၈. (က) ယဿ ယတ္ထ ရူပက္ခန္ဓော နိရုဇ္ဈိဿတိ တဿ တတ္ထ ဝေဒနာက္ခန္ဓော နိရုဇ္ဈိဿတီတိ?

အသညသတ္တာနံ တေသံ တတ္ထ ရူပက္ခန္ဓော နိရုဇ္ဈိဿတိ၊ နော စ တေသံ တတ္ထ ဝေဒနာက္ခန္ဓော နိရုဇ္ဈိဿတိ. ပဉ္စဝေါကာရာနံ တေသံ တတ္ထ ရူပက္ခန္ဓော စ နိရုဇ္ဈိဿတိ ဝေဒနာက္ခန္ဓော စ နိရုဇ္ဈိဿတိ.

(ခ) ယဿ ဝါ ပန ယတ္ထ ဝေဒနာက္ခန္ဓော နိရုဇ္ဈိဿတိ တဿ တတ္ထ ရူပက္ခန္ဓော နိရုဇ္ဈိဿတီတိ?

အရူပါနံ တေသံ တတ္ထ ဝေဒနာက္ခန္ဓော နိရုဇ္ဈိဿတိ၊ နော စ တေသံ တတ္ထ ရူပက္ခန္ဓော နိရုဇ္ဈိဿတိ. ပဉ္စဝေါကာရာနံ တေသံ တတ္ထ ဝေဒနာက္ခန္ဓော စ နိရုဇ္ဈိဿတိ ရူပက္ခန္ဓော စ နိရုဇ္ဈိဿတိ.

(ဃ) ပစ္စနီကပုဂ္ဂလော

၁၁၉. (က) ယဿ ရူပက္ခန္ဓော န နိရုဇ္ဈိဿတိ တဿ ဝေဒနာက္ခန္ဓော န နိရုဇ္ဈိဿတီတိ?

ပစ္ဆိမဘဝိကာနံ အရူပံ ဥပပဇ္ဇန္တာနံ ယေ စ အရူပံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ရူပက္ခန္ဓော န နိရုဇ္ဈိဿတိ၊ နော စ တေသံ ဝေဒနာက္ခန္ဓော န နိရုဇ္ဈိဿတိ. ပရိနိဗ္ဗန္တာနံ တေသံ ရူပက္ခန္ဓော စ န နိရုဇ္ဈိဿတိ ဝေဒနာက္ခန္ဓော စ န နိရုဇ္ဈိဿတိ.

(ခ) ယဿ ဝါ ပန ဝေဒနာက္ခန္ဓော န နိရုဇ္ဈိဿတိ တဿ ရူပက္ခန္ဓော န နိရုဇ္ဈိဿတီတိ? အာမန္တာ.

(င) ပစ္စနီကဩကာသော

၁၂၀. (က) ယတ္ထ ရူပက္ခန္ဓော န နိရုဇ္ဈိဿတိ တတ္ထ ဝေဒနာက္ခန္ဓော န နိရုဇ္ဈိဿတီတိ? နိရုဇ္ဈိဿတိ.

(ခ) ယတ္ထ ဝါ ပန ဝေဒနာက္ခန္ဓော န နိရုဇ္ဈိဿတိ တတ္ထ ရူပက္ခန္ဓော န နိရုဇ္ဈိဿတီတိ? နိရုဇ္ဈိဿတိ.

(စ) ပစ္စနီကပုဂ္ဂလောကာသာ

၁၂၁. (က) ယဿ ယတ္ထ ရူပက္ခန္ဓော န နိရုဇ္ဈိဿတိ တဿ တတ္ထ ဝေဒနာက္ခန္ဓော န နိရုဇ္ဈိဿတီတိ?

အရူပါနံ တေသံ တတ္ထ ရူပက္ခန္ဓော န နိရုဇ္ဈိဿတိ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ ရူပက္ခန္ဓော စ န နိရုဇ္ဈိဿတိ ဝေဒနာက္ခန္ဓော စ န နိရုဇ္ဈိဿတိ.

(ခ) ယဿ ဝါ ပန ယတ္ထ ဝေဒနာက္ခန္ဓော န နိရုဇ္ဈိဿတိ တဿ တတ္ထ ရူပက္ခန္ဓော န နိရုဇ္ဈိဿတီတိ?

အသညသတ္တာနံ တေသံ တတ္ထ ဝေဒနာက္ခန္ဓော န နိရုဇ္ဈိဿတိ၊ နော စ တေသံ တတ္ထ ရူပက္ခန္ဓော န နိရုဇ္ဈိဿတိ. ပရိနိဗ္ဗန္တာနံ တေသံ တတ္ထ ဝေဒနာက္ခန္ဓော စ န နိရုဇ္ဈိဿတိ ရူပက္ခန္ဓော စ န နိရုဇ္ဈိဿတိ.