(၄) ပစ္စုပ္ပန္နာတီတဝါရော

(က) အနုလောမပုဂ္ဂလော

၁၂၂. (က) ယဿ ရူပက္ခန္ဓော နိရုဇ္ဈတိ တဿ ဝေဒနာက္ခန္ဓော နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန ဝေဒနာက္ခန္ဓော နိရုဇ္ဈိတ္ထ တဿ ရူပက္ခန္ဓော နိရုဇ္ဈတီတိ?

သဗ္ဗေသံ ဥပပဇ္ဇန္တာနံ အရူပါ စဝန္တာနံ တေသံ ဝေဒနာက္ခန္ဓော နိရုဇ္ဈိတ္ထ၊ နော စ တေသံ ရူပက္ခန္ဓော နိရုဇ္ဈတိ. ပဉ္စဝေါကာရာ စဝန္တာနံ အသညသတ္တာ စဝန္တာနံ တေသံ ဝေဒနာက္ခန္ဓော စ နိရုဇ္ဈိတ္ထ ရူပက္ခန္ဓော စ နိရုဇ္ဈတိ.

၁၂၃. (က) ယဿ ဝေဒနာက္ခန္ဓော နိရုဇ္ဈတိ တဿ သညာက္ခန္ဓော နိရုဇ္ဈိတ္ထာတိ? အာမန္တာ.

(ခ) ယဿ ဝါ ပန သညာက္ခန္ဓော နိရုဇ္ဈိတ္ထ တဿ ဝေဒနာက္ခန္ဓော နိရုဇ္ဈတီတိ?

သဗ္ဗေသံ ဥပပဇ္ဇန္တာနံ အသညသတ္တာ စဝန္တာနံ တေသံ သညာက္ခန္ဓော နိရုဇ္ဈိတ္ထ၊ နော စ တေသံ ဝေဒနာက္ခန္ဓော နိရုဇ္ဈတိ. စတုဝေါကာရာ ပဉ္စဝေါကာရာ စဝန္တာနံ တေသံ သညာက္ခန္ဓော စ နိရုဇ္ဈိတ္ထ ဝေဒနာက္ခန္ဓော စ နိရုဇ္ဈတိ.

(ခ) အနုလောမဩကာသော

၁၂၄. (က) ယတ္ထ ရူပက္ခန္ဓော နိရုဇ္ဈတိ တတ္ထ ဝေဒနာက္ခန္ဓော နိရုဇ္ဈိတ္ထာတိ?

အသညသတ္တေ တတ္ထ ရူပက္ခန္ဓော နိရုဇ္ဈတိ၊ နော စ တတ္ထ ဝေဒနာက္ခန္ဓော နိရုဇ္ဈိတ္ထ. ပဉ္စဝေါကာရေ တတ္ထ ရူပက္ခန္ဓော စ နိရုဇ္ဈတိ ဝေဒနာက္ခန္ဓော စ နိရုဇ္ဈိတ္ထ.

(ခ) ယတ္ထ ဝါ ပန ဝေဒနာက္ခန္ဓော နိရုဇ္ဈိတ္ထ တတ္ထ ရူပက္ခန္ဓော နိရုဇ္ဈတီတိ?

အရူပေ တတ္ထ ဝေဒနာက္ခန္ဓော နိရုဇ္ဈိတ္ထ၊ နော စ တတ္ထ ရူပက္ခန္ဓော နိရုဇ္ဈတိ. ပဉ္စဝေါကာရေ တတ္ထ ဝေဒနာက္ခန္ဓော စ နိရုဇ္ဈိတ္ထ ရူပက္ခန္ဓော စ နိရုဇ္ဈတိ.

၁၂၅. (က) ယတ္ထ ဝေဒနာက္ခန္ဓော နိရုဇ္ဈတိ တတ္ထ သညာက္ခန္ဓော နိရုဇ္ဈိတ္ထာတိ? အာမန္တာ.

(ခ) ယတ္ထ ဝါ ပန သညာက္ခန္ဓော နိရုဇ္ဈိတ္ထ တတ္ထ ဝေဒနာက္ခန္ဓော နိရုဇ္ဈတီတိ? အာမန္တာ.

(ဂ) အနုလောမပုဂ္ဂလောကာသာ

၁၂၆. (က) ယဿ ယတ္ထ ရူပက္ခန္ဓော နိရုဇ္ဈတိ တဿ တတ္ထ ဝေဒနာက္ခန္ဓော နိရုဇ္ဈိတ္ထာတိ?

သုဒ္ဓါဝါသေ ပရိနိဗ္ဗန္တာနံ အသညသတ္တာ စဝန္တာနံ တေသံ တတ္ထ ရူပက္ခန္ဓော နိရုဇ္ဈတိ၊ နော စ တေသံ တတ္ထ ဝေဒနာက္ခန္ဓော နိရုဇ္ဈိတ္ထ. ဣတရေသံ ပဉ္စဝေါကာရာ စဝန္တာနံ တေသံ တတ္ထ ရူပက္ခန္ဓော စ နိရုဇ္ဈတိ ဝေဒနာက္ခန္ဓော စ နိရုဇ္ဈိတ္ထ.

(ခ) ယဿ ဝါ ပန ယတ္ထ ဝေဒနာက္ခန္ဓော နိရုဇ္ဈိတ္ထ တဿ တတ္ထ ရူပက္ခန္ဓော နိရုဇ္ဈတီတိ?

ပဉ္စဝေါကာရံ ဥပပဇ္ဇန္တာနံ အရူပါနံ တေသံ တတ္ထ ဝေဒနာက္ခန္ဓော နိရုဇ္ဈိတ္ထ၊ နော စ တေသံ တတ္ထ ရူပက္ခန္ဓော နိရုဇ္ဈတိ. ပဉ္စဝေါကာရာ စဝန္တာနံ တေသံ တတ္ထ ဝေဒနာက္ခန္ဓော စ နိရုဇ္ဈိတ္ထ ရူပက္ခန္ဓော စ နိရုဇ္ဈတိ.

၁၂၇. (က) ယဿ ယတ္ထ ဝေဒနာက္ခန္ဓော နိရုဇ္ဈတိ တဿ တတ္ထ သညာက္ခန္ဓော နိရုဇ္ဈိတ္ထာတိ?

သုဒ္ဓါဝါသေ ပရိနိဗ္ဗန္တာနံ တေသံ တတ္ထ ဝေဒနာက္ခန္ဓော နိရုဇ္ဈတိ၊ နော စ တေသံ တတ္ထ သညာက္ခန္ဓော နိရုဇ္ဈိတ္ထ. ဣတရေသံ စတုဝေါကာရာ ပဉ္စဝေါကာရာ စဝန္တာနံ တေသံ တတ္ထ ဝေဒနာက္ခန္ဓော စ နိရုဇ္ဈတိ သညာက္ခန္ဓော စ နိရုဇ္ဈိတ္ထ.

(ခ) ယဿ ဝါ ပန ယတ္ထ သညာက္ခန္ဓော နိရုဇ္ဈိတ္ထ တဿ တတ္ထ ဝေဒနာက္ခန္ဓော နိရုဇ္ဈတီတိ?

စတုဝေါကာရံ ပဉ္စဝေါကာရံ ဥပပဇ္ဇန္တာနံ တေသံ တတ္ထ သညာက္ခန္ဓော နိရုဇ္ဈိတ္ထ၊ နော စ တေသံ တတ္ထ ဝေဒနာက္ခန္ဓော နိရုဇ္ဈတိ. စတုဝေါကာရာ ပဉ္စဝေါကာရာ စဝန္တာနံ တေသံ တတ္ထ သညာက္ခန္ဓော စ နိရုဇ္ဈိတ္ထ ဝေဒနာက္ခန္ဓော စ နိရုဇ္ဈတိ.

(ဃ) ပစ္စနီကပုဂ္ဂလော

၁၂၈. (က) ယဿ ရူပက္ခန္ဓော န နိရုဇ္ဈတိ တဿ ဝေဒနာက္ခန္ဓော န နိရုဇ္ဈိတ္ထာတိ? နိရုဇ္ဈိတ္ထ.

(ခ) ယဿ ဝါ ပန ဝေဒနာက္ခန္ဓော န နိရုဇ္ဈိတ္ထ တဿ ရူပက္ခန္ဓော န နိရုဇ္ဈတီတိ? နတ္ထိ.

၁၂၉. (က) ယဿ ဝေဒနာက္ခန္ဓော န နိရုဇ္ဈတိ တဿ သညာက္ခန္ဓော န နိရုဇ္ဈိတ္ထာတိ? နိရုဇ္ဈိတ္ထ.

(ခ) ယဿ ဝါ ပန သညာက္ခန္ဓော န နိရုဇ္ဈိတ္ထ တဿ ဝေဒနာက္ခန္ဓော န နိရုဇ္ဈတီတိ? နတ္ထိ.

(င) ပစ္စနီကဩကာသော

၁၃၀. ယတ္ထ ရူပက္ခန္ဓော န နိရုဇ္ဈတိ (ယတ္ထကံ ပရိပုဏ္ဏံ ကာတဗ္ဗံ).

(စ) ပစ္စနီကပုဂ္ဂလောကာသာ

၁၃၁. (က) ယဿ ယတ္ထ ရူပက္ခန္ဓော န နိရုဇ္ဈတိ တဿ တတ္ထ ဝေဒနာက္ခန္ဓော န နိရုဇ္ဈိတ္ထာတိ?

ပဉ္စဝေါကာရံ ဥပပဇ္ဇန္တာနံ အရူပါနံ တေသံ တတ္ထ ရူပက္ခန္ဓော န နိရုဇ္ဈတိ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈိတ္ထ. သုဒ္ဓါဝါသံ ဥပပဇ္ဇန္တာနံ အသညသတ္တံ ဥပပဇ္ဇန္တာနံ တေသံ တတ္ထ ရူပက္ခန္ဓော စ န နိရုဇ္ဈတိ ဝေဒနာက္ခန္ဓော စ န နိရုဇ္ဈိတ္ထ.

(ခ) ယဿ ဝါ ပန ယတ္ထ ဝေဒနာက္ခန္ဓော န နိရုဇ္ဈိတ္ထ တဿ တတ္ထ ရူပက္ခန္ဓော န နိရုဇ္ဈတီတိ?

သုဒ္ဓါဝါသေ ပရိနိဗ္ဗန္တာနံ အသညသတ္တာ စဝန္တာနံ တေသံ တတ္ထ ဝေဒနာက္ခန္ဓော န နိရုဇ္ဈိတ္ထ၊ နော စ တေသံ တတ္ထ ရူပက္ခန္ဓော န နိရုဇ္ဈတိ. သုဒ္ဓါဝါသံ ဥပပဇ္ဇန္တာနံ အသညသတ္တံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော စ န နိရုဇ္ဈိတ္ထ ရူပက္ခန္ဓော စ န နိရုဇ္ဈတိ.

၁၃၂. (က) ယဿ ယတ္ထ ဝေဒနာက္ခန္ဓော န နိရုဇ္ဈတိ တဿ တတ္ထ သညာက္ခန္ဓော န နိရုဇ္ဈိတ္ထာတိ?

စတုဝေါကာရံ ပဉ္စဝေါကာရံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော န နိရုဇ္ဈတိ၊ နော စ တေသံ တတ္ထ သညာက္ခန္ဓော န နိရုဇ္ဈိတ္ထ. သုဒ္ဓါဝါသံ ဥပပဇ္ဇန္တာနံ အသညသတ္တာနံ တေသံ တတ္ထ ဝေဒနာက္ခန္ဓော စ န နိရုဇ္ဈတိ သညာက္ခန္ဓော စ န နိရုဇ္ဈိတ္ထ.

(ခ) ယဿ ဝါ ပန ယတ္ထ သညာက္ခန္ဓော န နိရုဇ္ဈိတ္ထ တဿ တတ္ထ ဝေဒနာက္ခန္ဓော န နိရုဇ္ဈတီတိ?

သုဒ္ဓါဝါသေ ပရိနိဗ္ဗန္တာနံ တေသံ တတ္ထ သညာက္ခန္ဓော န နိရုဇ္ဈိတ္ထ၊ နော စ တေသံ တတ္ထ ဝေဒနာက္ခန္ဓော န နိရုဇ္ဈတိ. သုဒ္ဓါဝါသံ ဥပပဇ္ဇန္တာနံ အသညသတ္တာနံ တေသံ တတ္ထ သညာက္ခန္ဓော စ န နိရုဇ္ဈိတ္ထ ဝေဒနာက္ခန္ဓော စ န နိရုဇ္ဈတိ.