(၅) ပစ္စုပ္ပန္နာနာဂတဝါရော

(က) အနုလောမပုဂ္ဂလော

၈၀. (က) ယဿ ရူပက္ခန္ဓော ဥပ္ပဇ္ဇတိ တဿ ဝေဒနာက္ခန္ဓော ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ တေသံ ရူပက္ခန္ဓော ဥပ္ပဇ္ဇတိ၊ နော စ တေသံ ဝေဒနာက္ခန္ဓော ဥပ္ပဇ္ဇိဿတိ. ဣတရေသံ ပဉ္စဝေါကာရံ ဥပပဇ္ဇန္တာနံ အသညသတ္တံ ဥပပဇ္ဇန္တာနံ တေသံ ရူပက္ခန္ဓော စ ဥပ္ပဇ္ဇတိ ဝေဒနာက္ခန္ဓော စ ဥပ္ပဇ္ဇိဿတိ.

(ခ) ယဿ ဝါ ပန ဝေဒနာက္ခန္ဓော ဥပ္ပဇ္ဇိဿတိ တဿ ရူပက္ခန္ဓော ဥပ္ပဇ္ဇတီတိ?

သဗ္ဗေသံ စဝန္တာနံ အရူပံ ဥပပဇ္ဇန္တာနံ တေသံ ဝေဒနာက္ခန္ဓော ဥပ္ပဇ္ဇိဿတိ၊ နော စ တေသံ ရူပက္ခန္ဓော ဥပ္ပဇ္ဇတိ. ပဉ္စဝေါကာရံ ဥပပဇ္ဇန္တာနံ အသညသတ္တံ ဥပပဇ္ဇန္တာနံ တေသံ ဝေဒနာက္ခန္ဓော စ ဥပ္ပဇ္ဇိဿတိ ရူပက္ခန္ဓော စ ဥပ္ပဇ္ဇတိ.

၈၁. (က) ယဿ ဝေဒနာက္ခန္ဓော ဥပ္ပဇ္ဇတိ တဿ သညာက္ခန္ဓော ဥပ္ပဇ္ဇိဿတီတိ?

ပစ္ဆိမဘဝိကာနံ ဥပပဇ္ဇန္တာနံ တေသံ ဝေဒနာက္ခန္ဓော ဥပ္ပဇ္ဇတိ၊ နော စ တေသံ သညာက္ခန္ဓော ဥပ္ပဇ္ဇိဿတိ. ဣတရေသံ စတုဝေါကာရံ ပဉ္စဝေါကာရံ ဥပပဇ္ဇန္တာနံ တေသံ ဝေဒနာက္ခန္ဓော စ ဥပ္ပဇ္ဇတိ သညာက္ခန္ဓော စ ဥပ္ပဇ္ဇိဿတိ.

(ခ) ယဿ ဝါ ပန သညာက္ခန္ဓော ဥပ္ပဇ္ဇိဿတိ တဿ ဝေဒနာက္ခန္ဓော ဥပ္ပဇ္ဇတီတိ?

သဗ္ဗေသံ စဝန္တာနံ အသညသတ္တံ ဥပပဇ္ဇန္တာနံ တေသံ သညာက္ခန္ဓော ဥပ္ပဇ္ဇိဿတိ၊ နော စ တေသံ ဝေဒနာက္ခန္ဓော ဥပ္ပဇ္ဇတိ. စတုဝေါကာရံ ပဉ္စဝေါကာရံ ဥပပဇ္ဇန္တာနံ တေသံ သညာက္ခန္ဓော စ ဥပ္ပဇ္ဇိဿတိ ဝေဒနာက္ခန္ဓော စ ဥပ္ပဇ္ဇတိ.

(ခ) အနုလောမဩကာသော

၈၂. (က) ယတ္ထ ရူပက္ခန္ဓော ဥပ္ပဇ္ဇတိ တတ္ထ ဝေဒနာက္ခန္ဓော ဥပ္ပဇ္ဇိဿတီတိ?

အသညသတ္တေ တတ္ထ ရူပက္ခန္ဓော ဥပ္ပဇ္ဇတိ၊ နော စ တတ္ထ ဝေဒနာက္ခန္ဓော ဥပ္ပဇ္ဇိဿတိ. ပဉ္စဝေါကာရေ တတ္ထ ရူပက္ခန္ဓော စ ဥပ္ပဇ္ဇတိ ဝေဒနာက္ခန္ဓော စ ဥပ္ပဇ္ဇိဿတိ.

(ခ) ယတ္ထ ဝါ ပန ဝေဒနာက္ခန္ဓော ဥပ္ပဇ္ဇိဿတိ တတ္ထ ရူပက္ခန္ဓော ဥပ္ပဇ္ဇတီတိ?

အရူပေ တတ္ထ ဝေဒနာက္ခန္ဓော ဥပ္ပဇ္ဇိဿတိ၊ နော စ တတ္ထ ရူပက္ခန္ဓော ဥပ္ပဇ္ဇတိ. ပဉ္စဝေါကာရေ တတ္ထ ဝေဒနာက္ခန္ဓော စ ဥပ္ပဇ္ဇိဿတိ ရူပက္ခန္ဓော စ ဥပ္ပဇ္ဇတိ.

၈၃. (က) ယတ္ထ ဝေဒနာက္ခန္ဓော ဥပ္ပဇ္ဇတိ တတ္ထ သညာက္ခန္ဓော ဥပ္ပဇ္ဇိဿတီတိ? အာမန္တာ.

(ခ) ယတ္ထ ဝါ ပန သညာက္ခန္ဓော ဥပ္ပဇ္ဇိဿတိ တတ္ထ ဝေဒနာက္ခန္ဓော ဥပ္ပဇ္ဇတီတိ? အာမန္တာ.

(ဂ) အနုလောမပုဂ္ဂလောကာသာ

၈၄. (က) ယဿ ယတ္ထ ရူပက္ခန္ဓော ဥပ္ပဇ္ဇတိ တဿ တတ္ထ ဝေဒနာက္ခန္ဓော ဥပ္ပဇ္ဇိဿတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အသညသတ္တံ ဥပပဇ္ဇန္တာနံ တေသံ တတ္ထ ရူပက္ခန္ဓော ဥပ္ပဇ္ဇတိ၊ နော စ တေသံ တတ္ထ ဝေဒနာက္ခန္ဓော ဥပ္ပဇ္ဇိဿတိ. ဣတရေသံ ပဉ္စဝေါကာရံ ဥပပဇ္ဇန္တာနံ တေသံ တတ္ထ ရူပက္ခန္ဓော စ ဥပ္ပဇ္ဇတိ ဝေဒနာက္ခန္ဓော စ ဥပ္ပဇ္ဇိဿတိ.

(ခ) ယဿ ဝါ ပန ယတ္ထ ဝေဒနာက္ခန္ဓော ဥပ္ပဇ္ဇိဿတိ တဿ တတ္ထ ရူပက္ခန္ဓော ဥပ္ပဇ္ဇတီတိ?

ပဉ္စဝေါကာရာ စဝန္တာနံ အရူပါနံ တေသံ တတ္ထ ဝေဒနာက္ခန္ဓော ဥပ္ပဇ္ဇိဿတိ၊ နော စ တေသံ တတ္ထ ရူပက္ခန္ဓော ဥပ္ပဇ္ဇတိ. ပဉ္စဝေါကာရံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော စ ဥပ္ပဇ္ဇိဿတိ ရူပက္ခန္ဓော စ ဥပ္ပဇ္ဇတိ.

၈၅. (က) ယဿ ယတ္ထ ဝေဒနာက္ခန္ဓော ဥပ္ပဇ္ဇတိ တဿ တတ္ထ သညာက္ခန္ဓော ဥပ္ပဇ္ဇိဿတီတိ?

ပစ္ဆိမဘဝိကာနံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော ဥပ္ပဇ္ဇတိ၊ နော စ တေသံ တတ္ထ သညာက္ခန္ဓော ဥပ္ပဇ္ဇိဿတိ. ဣတရေသံ စတုဝေါကာရံ ပဉ္စဝေါကာရံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော စ ဥပ္ပဇ္ဇတိ သညာက္ခန္ဓော စ ဥပ္ပဇ္ဇိဿတိ.

(ခ) ယဿ ဝါ ပန ယတ္ထ သညာက္ခန္ဓော ဥပ္ပဇ္ဇိဿတိ တဿ တတ္ထ ဝေဒနာက္ခန္ဓော ဥပ္ပဇ္ဇတီတိ?

စတုဝေါကာရာ ပဉ္စဝေါကာရာ စဝန္တာနံ တေသံ တတ္ထ သညာက္ခန္ဓော ဥပ္ပဇ္ဇိဿတိ၊ နော စ တေသံ တတ္ထ ဝေဒနာက္ခန္ဓော ဥပ္ပဇ္ဇတိ. စတုဝေါကာရံ ပဉ္စဝေါကာရံ ဥပပဇ္ဇန္တာနံ တေသံ တတ္ထ သညာက္ခန္ဓော စ ဥပ္ပဇ္ဇိဿတိ ဝေဒနာက္ခန္ဓော စ ဥပ္ပဇ္ဇတိ.

(ဃ) ပစ္စနီကပုဂ္ဂလော

၈၆. (က) ယဿ ရူပက္ခန္ဓော နုပ္ပဇ္ဇတိ တဿ ဝေဒနာက္ခန္ဓော နုပ္ပဇ္ဇိဿတီတိ?

သဗ္ဗေသံ စဝန္တာနံ အရူပံ ဥပပဇ္ဇန္တာနံ တေသံ ရူပက္ခန္ဓော နုပ္ပဇ္ဇတိ၊ နော စ တေသံ ဝေဒနာက္ခန္ဓော နုပ္ပဇ္ဇိဿတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ တေသံ ရူပက္ခန္ဓော စ နုပ္ပဇ္ဇတိ ဝေဒနာက္ခန္ဓော စ နုပ္ပဇ္ဇိဿတိ.

(ခ) ယဿ ဝါ ပန ဝေဒနာက္ခန္ဓော နုပ္ပဇ္ဇိဿတိ တဿ ရူပက္ခန္ဓော နုပ္ပဇ္ဇတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ တေသံ ဝေဒနာက္ခန္ဓော နုပ္ပဇ္ဇိဿတိ၊ နော စ တေသံ ရူပက္ခန္ဓော နုပ္ပဇ္ဇတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ တေသံ ဝေဒနာက္ခန္ဓော စ နုပ္ပဇ္ဇိဿတိ ရူပက္ခန္ဓော စ နုပ္ပဇ္ဇတိ.

၈၇. (က) ယဿ ဝေဒနာက္ခန္ဓော နုပ္ပဇ္ဇတိ တဿ သညာက္ခန္ဓော နုပ္ပဇ္ဇိဿတီတိ?

သဗ္ဗေသံ စဝန္တာနံ အသညသတ္တံ ဥပပဇ္ဇန္တာနံ တေသံ ဝေဒနာက္ခန္ဓော နုပ္ပဇ္ဇတိ၊ နော စ တေသံ သညာက္ခန္ဓော နုပ္ပဇ္ဇိဿတိ. ပရိနိဗ္ဗန္တာနံ တေသံ ဝေဒနာက္ခန္ဓော စ နုပ္ပဇ္ဇတိ သညာက္ခန္ဓော စ နုပ္ပဇ္ဇိဿတိ.

(ခ) ယဿ ဝါ ပန သညာက္ခန္ဓော နုပ္ပဇ္ဇိဿတိ တဿ ဝေဒနာက္ခန္ဓော နုပ္ပဇ္ဇတီတိ?

ပစ္ဆိမဘဝိကာနံ ဥပပဇ္ဇန္တာနံ [ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ (သီ. သျာ.)] တေသံ သညာက္ခန္ဓော နုပ္ပဇ္ဇိဿတိ၊ နော စ တေသံ ဝေဒနာက္ခန္ဓော နုပ္ပဇ္ဇတိ. ပရိနိဗ္ဗန္တာနံ တေသံ သညာက္ခန္ဓော စ နုပ္ပဇ္ဇိဿတိ ဝေဒနာက္ခန္ဓော စ နုပ္ပဇ္ဇတိ.

(င) ပစ္စနီကဩကာသော

၈၈. (က) ယတ္ထ ရူပက္ခန္ဓော နုပ္ပဇ္ဇတိ တတ္ထ ဝေဒနာက္ခန္ဓော နုပ္ပဇ္ဇိဿတီတိ? ဥပ္ပဇ္ဇိဿတိ.

(ခ) ယတ္ထ ဝါ ပန ဝေဒနာက္ခန္ဓော နုပ္ပဇ္ဇိဿတိ တတ္ထ ရူပက္ခန္ဓော နုပ္ပဇ္ဇတီတိ? ဥပ္ပဇ္ဇတိ.

၈၉. (က) ယတ္ထ ဝေဒနာက္ခန္ဓော နုပ္ပဇ္ဇတိ တတ္ထ သညာက္ခန္ဓော နုပ္ပဇ္ဇိဿတီတိ? အာမန္တာ.

(ခ) ယတ္ထ ဝါ ပန သညာက္ခန္ဓော နုပ္ပဇ္ဇိဿတိ တတ္ထ ဝေဒနာက္ခန္ဓော နုပ္ပဇ္ဇတီတိ? အာမန္တာ.

(စ) ပစ္စနီကပုဂ္ဂလောကာသာ

၉၀. (က) ယဿ ယတ္ထ ရူပက္ခန္ဓော နုပ္ပဇ္ဇတိ တဿ တတ္ထ ဝေဒနာက္ခန္ဓော နုပ္ပဇ္ဇိဿတီတိ?

ပဉ္စဝေါကာရာ စဝန္တာနံ အရူပါနံ တေသံ တတ္ထ ရူပက္ခန္ဓော နုပ္ပဇ္ဇတိ၊ နော စ တေသံ တတ္ထ ဝေဒနာက္ခန္ဓော နုပ္ပဇ္ဇိဿတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ အသညသတ္တာ စဝန္တာနံ တေသံ တတ္ထ ရူပက္ခန္ဓော စ နုပ္ပဇ္ဇတိ ဝေဒနာက္ခန္ဓော စ နုပ္ပဇ္ဇိဿတိ.

(ခ) ယဿ ဝါ ပန ယတ္ထ ဝေဒနာက္ခန္ဓော နုပ္ပဇ္ဇိဿတိ တဿ တတ္ထ ရူပက္ခန္ဓော နုပ္ပဇ္ဇတီတိ?

ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ အသညသတ္တံ ဥပပဇ္ဇန္တာနံ တေသံ တတ္ထ ဝေဒနာက္ခန္ဓော နုပ္ပဇ္ဇိဿတိ၊ နော စ တေသံ တတ္ထ ရူပက္ခန္ဓော နုပ္ပဇ္ဇတိ. ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ အသညသတ္တာ စဝန္တာနံ တေသံ တတ္ထ ဝေဒနာက္ခန္ဓော စ နုပ္ပဇ္ဇိဿတိ ရူပက္ခန္ဓော စ နုပ္ပဇ္ဇတိ.

၉၁. (က) ယဿ ယတ္ထ ဝေဒနာက္ခန္ဓော နုပ္ပဇ္ဇတိ တဿ တတ္ထ သညာက္ခန္ဓော နုပ္ပဇ္ဇိဿတီတိ?

စတုဝေါကာရာ ပဉ္စဝေါကာရာ စဝန္တာနံ တေသံ တတ္ထ ဝေဒနာက္ခန္ဓော နုပ္ပဇ္ဇတိ၊ နော စ တေသံ တတ္ထ သညာက္ခန္ဓော နုပ္ပဇ္ဇိဿတိ. ပရိနိဗ္ဗန္တာနံ အသညသတ္တာနံ တေသံ တတ္ထ ဝေဒနာက္ခန္ဓော စ နုပ္ပဇ္ဇတိ သညာက္ခန္ဓော စ နုပ္ပဇ္ဇိဿတိ.

(ခ) ယဿ ဝါ ပန ယတ္ထ သညာက္ခန္ဓော နုပ္ပဇ္ဇိဿတိ တဿ တတ္ထ ဝေဒနာက္ခန္ဓော နုပ္ပဇ္ဇတီတိ?

ပစ္ဆိမဘဝိကာနံ ဥပပဇ္ဇန္တာနံ တေသံ တတ္ထ သညာက္ခန္ဓော နုပ္ပဇ္ဇိဿတိ၊ နော စ တေသံ တတ္ထ ဝေဒနာက္ခန္ဓော နုပ္ပဇ္ဇတိ. ပရိနိဗ္ဗန္တာနံ အသညသတ္တာနံ တေသံ တတ္ထ သညာက္ခန္ဓော စ နုပ္ပဇ္ဇိဿတိ ဝေဒနာက္ခန္ဓော စ နုပ္ပဇ္ဇတိ.