(၆) အတီတာနာဂတဝါရော
(က) အနုလောမပုဂ္ဂလော
၉၂. (က) ယဿ ရူပက္ခန္ဓော ဥပ္ပဇ္ဇိတ္ထ တဿ ဝေဒနာက္ခန္ဓော ဥပ္ပဇ္ဇိဿတီတိ?
ပစ္ဆိမဘဝိကာနံ တေသံ ရူပက္ခန္ဓော ဥပ္ပဇ္ဇိတ္ထ၊ နော စ တေသံ ဝေဒနာက္ခန္ဓော ဥပ္ပဇ္ဇိဿတိ. ဣတရေသံ တေသံ ရူပက္ခန္ဓော စ ဥပ္ပဇ္ဇိတ္ထ ဝေဒနာက္ခန္ဓော စ ဥပ္ပဇ္ဇိဿတိ.
(ခ) ယဿ ဝါ ပန ဝေဒနာက္ခန္ဓော ဥပ္ပဇ္ဇိဿတိ တဿ ရူပက္ခန္ဓော ဥပ္ပဇ္ဇိတ္ထာတိ? အာမန္တာ.
၉၃. (က) ယဿ ဝေဒနာက္ခန္ဓော ဥပ္ပဇ္ဇိတ္ထ တဿ သညာက္ခန္ဓော ဥပ္ပဇ္ဇိဿတီတိ?
ပစ္ဆိမဘဝိကာနံ တေသံ ဝေဒနာက္ခန္ဓော ဥပ္ပဇ္ဇိတ္ထ၊ နော စ တေသံ သညာက္ခန္ဓော ဥပ္ပဇ္ဇိဿတိ. ဣတရေသံ တေသံ ဝေဒနာက္ခန္ဓော စ ဥပ္ပဇ္ဇိတ္ထ သညာက္ခန္ဓော စ ဥပ္ပဇ္ဇိဿတိ.
(ခ) ယဿ ဝါ ပန သညာက္ခန္ဓော ဥပ္ပဇ္ဇိဿတိ တဿ ဝေဒနာက္ခန္ဓော ဥပ္ပဇ္ဇိတ္ထာတိ? အာမန္တာ.
(ခ) အနုလောမဩကာသော
၉၄. (က) ယတ္ထ ရူပက္ခန္ဓော ဥပ္ပဇ္ဇိတ္ထ တတ္ထ ဝေဒနာက္ခန္ဓော ဥပ္ပဇ္ဇိဿတီတိ?
အသညသတ္တေ တတ္ထ ရူပက္ခန္ဓော ဥပ္ပဇ္ဇိတ္ထ၊ နော စ တတ္ထ ဝေဒနာက္ခန္ဓော ဥပ္ပဇ္ဇိဿတိ. ပဉ္စဝေါကာရေ တတ္ထ ရူပက္ခန္ဓော စ ဥပ္ပဇ္ဇိတ္ထ ဝေဒနာက္ခန္ဓော စ ဥပ္ပဇ္ဇိဿတိ.
(ခ) ယတ္ထ ဝါ ပန ဝေဒနာက္ခန္ဓော ဥပ္ပဇ္ဇိဿတိ တတ္ထ ရူပက္ခန္ဓော ဥပ္ပဇ္ဇိတ္ထာတိ?
အရူပေ တတ္ထ ဝေဒနာက္ခန္ဓော ဥပ္ပဇ္ဇိဿတိ၊ နော စ တတ္ထ ရူပက္ခန္ဓော ဥပ္ပဇ္ဇိတ္ထ. ပဉ္စဝေါကာရေ တတ္ထ ဝေဒနာက္ခန္ဓော စ ဥပ္ပဇ္ဇိဿတိ ရူပက္ခန္ဓော စ ဥပ္ပဇ္ဇိတ္ထ.
၉၅. (က) ယတ္ထ ဝေဒနာက္ခန္ဓော ဥပ္ပဇ္ဇိတ္ထ တတ္ထ သညာက္ခန္ဓော ဥပ္ပဇ္ဇိဿတီတိ? အာမန္တာ.
(ခ) ယတ္ထ ဝါ ပန သညာက္ခန္ဓော ဥပ္ပဇ္ဇိဿတိ တတ္ထ ဝေဒနာက္ခန္ဓော ဥပ္ပဇ္ဇိတ္ထာတိ? အာမန္တာ.
(ဂ) အနုလောမပုဂ္ဂလောကာသာ
၉၆. (က) ယဿ ယတ္ထ ရူပက္ခန္ဓော ဥပ္ပဇ္ဇိတ္ထ တဿ တတ္ထ ဝေဒနာက္ခန္ဓော ဥပ္ပဇ္ဇိဿတီတိ?
ပဉ္စဝေါကာရေ ပစ္ဆိမဘဝိကာနံ အသညသတ္တာနံ တေသံ တတ္ထ ရူပက္ခန္ဓော ဥပ္ပဇ္ဇိတ္ထ၊ နော စ တေသံ တတ္ထ ဝေဒနာက္ခန္ဓော ဥပ္ပဇ္ဇိဿတိ. ဣတရေသံ ပဉ္စဝေါကာရာနံ တေသံ တတ္ထ ရူပက္ခန္ဓော စ ဥပ္ပဇ္ဇိတ္ထ ဝေဒနာက္ခန္ဓော စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ ဝေဒနာက္ခန္ဓော ဥပ္ပဇ္ဇိဿတိ တဿ တတ္ထ ရူပက္ခန္ဓော ဥပ္ပဇ္ဇိတ္ထာတိ?
အရူပါနံ တေသံ တတ္ထ ဝေဒနာက္ခန္ဓော ဥပ္ပဇ္ဇိဿတိ၊ နော စ တေသံ တတ္ထ ရူပက္ခန္ဓော ဥပ္ပဇ္ဇိတ္ထ. ပဉ္စဝေါကာရာနံ တေသံ တတ္ထ ဝေဒနာက္ခန္ဓော စ ဥပ္ပဇ္ဇိဿတိ ရူပက္ခန္ဓော စ ဥပ္ပဇ္ဇိတ္ထ.
၉၇. (က) ယဿ ယတ္ထ ဝေဒနာက္ခန္ဓော ဥပ္ပဇ္ဇိတ္ထ တဿ တတ္ထ သညာက္ခန္ဓော ဥပ္ပဇ္ဇိဿတီတိ?
ပစ္ဆိမဘဝိကာနံ တေသံ တတ္ထ ဝေဒနာက္ခန္ဓော ဥပ္ပဇ္ဇိတ္ထ၊ နော စ တေသံ တတ္ထ သညာက္ခန္ဓော ဥပ္ပဇ္ဇိဿတိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ဝေဒနာက္ခန္ဓော စ ဥပ္ပဇ္ဇိတ္ထ သညာက္ခန္ဓော စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ သညာက္ခန္ဓော ဥပ္ပဇ္ဇိဿတိ တဿ တတ္ထ ဝေဒနာက္ခန္ဓော ဥပ္ပဇ္ဇိတ္ထာတိ? အာမန္တာ.
(ဃ) ပစ္စနီကပုဂ္ဂလော
၉၈. (က) ယဿ ရူပက္ခန္ဓော နုပ္ပဇ္ဇိတ္ထ တဿ ဝေဒနာက္ခန္ဓော နုပ္ပဇ္ဇိဿတီတိ? နတ္ထိ.
(ခ) ယဿ ဝါ ပန ဝေဒနာက္ခန္ဓော နုပ္ပဇ္ဇိဿတိ တဿ ရူပက္ခန္ဓော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
၉၉. (က) ယဿ ဝေဒနာက္ခန္ဓော နုပ္ပဇ္ဇိတ္ထ တဿ သညာက္ခန္ဓော နုပ္ပဇ္ဇိဿတီတိ? နတ္ထိ.
(ခ) ယဿ ဝါ ပန သညာက္ခန္ဓော နုပ္ပဇ္ဇိဿတိ တဿ ဝေဒနာက္ခန္ဓော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
(င) ပစ္စနီကဩကာသော
၁၀၀. (က) ယတ္ထ ရူပက္ခန္ဓော နုပ္ပဇ္ဇိတ္ထ တတ္ထ ဝေဒနာက္ခန္ဓော နုပ္ပဇ္ဇိဿတီတိ? ဥပ္ပဇ္ဇိဿတိ.
(ခ) ယတ္ထ ဝါ ပန ဝေဒနာက္ခန္ဓော နုပ္ပဇ္ဇိဿတိ တတ္ထ ရူပက္ခန္ဓော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
၁၀၁. (က) ယတ္ထ ဝေဒနာက္ခန္ဓော နုပ္ပဇ္ဇိတ္ထ တတ္ထ သညာက္ခန္ဓော နုပ္ပဇ္ဇိဿတီတိ? အာမန္တာ.
(ခ) ယတ္ထ ဝါ ပန သညာက္ခန္ဓော နုပ္ပဇ္ဇိဿတိ တတ္ထ ဝေဒနာက္ခန္ဓော နုပ္ပဇ္ဇိတ္ထာတိ? အာမန္တာ.
(စ) ပစ္စနီကပုဂ္ဂလောကာသာ
၁၀၂. (က) ယဿ ယတ္ထ ရူပက္ခန္ဓော နုပ္ပဇ္ဇိတ္ထ တဿ တတ္ထ ဝေဒနာက္ခန္ဓော နုပ္ပဇ္ဇိဿတီတိ?
အရူပါနံ တေသံ တတ္ထ ရူပက္ခန္ဓော နုပ္ပဇ္ဇိတ္ထ၊ နော စ တေသံ တတ္ထ ဝေဒနာက္ခန္ဓော နုပ္ပဇ္ဇိဿတိ. သုဒ္ဓါဝါသာနံ အရူပေ ပစ္ဆိမဘဝိကာနံ တေသံ တတ္ထ ရူပက္ခန္ဓော စ နုပ္ပဇ္ဇိတ္ထ ဝေဒနာက္ခန္ဓော စ နုပ္ပဇ္ဇိဿတိ.
(ခ) ယဿ ဝါ ပန ယတ္ထ ဝေဒနာက္ခန္ဓော နုပ္ပဇ္ဇိဿတိ တဿ တတ္ထ ရူပက္ခန္ဓော နုပ္ပဇ္ဇိတ္ထာတိ?
ပဉ္စဝေါကာရေ ပစ္ဆိမဘဝိကာနံ အသညသတ္တာနံ တေသံ တတ္ထ ဝေဒနာက္ခန္ဓော နုပ္ပဇ္ဇိဿတိ၊ နော စ တေသံ တတ္ထ ရူပက္ခန္ဓော နုပ္ပဇ္ဇိတ္ထ. သုဒ္ဓါဝါသာနံ အရူပေ ပစ္ဆိမဘဝိကာနံ တေသံ တတ္ထ ဝေဒနာက္ခန္ဓော စ နုပ္ပဇ္ဇိဿတိ ရူပက္ခန္ဓော စ နုပ္ပဇ္ဇိတ္ထ.
၁၀၃. (က) ယဿ ယတ္ထ ဝေဒနာက္ခန္ဓော နုပ္ပဇ္ဇိတ္ထ တဿ တတ္ထ သညာက္ခန္ဓော နုပ္ပဇ္ဇိဿတီတိ? အာမန္တာ.
(ခ) ယဿ ဝါ ပန ယတ္ထ သညာက္ခန္ဓော နုပ္ပဇ္ဇိဿတိ တဿ တတ္ထ ဝေဒနာက္ခန္ဓော နုပ္ပဇ္ဇိတ္ထာတိ?
ပစ္ဆိမဘဝိကာနံ တေသံ တတ္ထ သညာက္ခန္ဓော နုပ္ပဇ္ဇိဿတိ၊ နော စ တေသံ တတ္ထ ဝေဒနာက္ခန္ဓော နုပ္ပဇ္ဇိတ္ထ. သုဒ္ဓါဝါသာနံ အသညသတ္တာနံ တေသံ တတ္ထ သညာက္ခန္ဓော စ နုပ္ပဇ္ဇိဿတိ ဝေဒနာက္ခန္ဓော စ နုပ္ပဇ္ဇိတ္ထ.
ဥပ္ပါဒဝါရော နိဋ္ဌိတော.