(၃) မူလကနယော

၉၂. (က) ယေ ကေစိ နာမာ ဓမ္မာ၊ သဗ္ဗေ တေ နာမမူလကာတိ?

အဟေတုကံ နာမံ န နာမမူလကံ. သဟေတုကံ နာမံ နာမမူလကံ.

(ခ) ယေ ဝါ ပန နာမမူလကာ၊ သဗ္ဗေ တေ ဓမ္မာ နာမာတိ?

နာမသမုဋ္ဌာနံ ရူပံ နာမမူလကံ၊ န နာမံ. နာမံ နာမမူလကဉ္စေဝ နာမဉ္စ.

၉၃. (က) ယေ ကေစိ နာမာ ဓမ္မာ၊ သဗ္ဗေ တေ နာမမူလေန ဧကမူလကာတိ?

အဟေတုကံ နာမံ နာမမူလေန န ဧကမူလကံ. သဟေတုကံ နာမံ နာမမူလေန ဧကမူလကံ.

(ခ) ယေ ဝါ ပန နာမမူလေန ဧကမူလကာ၊ သဗ္ဗေ တေ ဓမ္မာ နာမာတိ?

နာမသမုဋ္ဌာနံ ရူပံ နာမမူလေန ဧကမူလကံ၊ န နာမံ. နာမံ နာမမူလေန ဧကမူလကဉ္စေဝ နာမဉ္စ.

၉၄. (က) ယေ ကေစိ နာမမူလေန ဧကမူလကာ ဓမ္မာ၊ သဗ္ဗေ တေ နာမမူလေန အညမညမူလကာတိ?

မူလာနိ ယာနိ ဧကတော ဥပ္ပဇ္ဇန္တိ နာမမူလာနိ ဧကမူလကာနိ စေဝ အညမညမူလကာနိ စ. အဝသေသာ နာမမူလသဟဇာတာ ဓမ္မာ နာမမူလေန ဧကမူလကာ၊ န စ အညမညမူလကာ.

(ခ) ယေ ဝါ ပန နာမမူလေန အညမညမူလကာ၊ သဗ္ဗေ တေ ဓမ္မာ နာမာတိ? အာမန္တာ.