(၄) မူလမူလကနယော

၉၅. (က) ယေ ကေစိ နာမာ ဓမ္မာ၊ သဗ္ဗေ တေ နာမမူလမူလကာတိ?

အဟေတုကံ နာမံ န နာမမူလမူလကံ. သဟေတုကံ နာမံ နာမမူလမူလကံ.

(ခ) ယေ ဝါ ပန နာမမူလမူလကာ၊ သဗ္ဗေ တေ ဓမ္မာ နာမာတိ?

နာမသမုဋ္ဌာနံ ရူပံ နာမမူလမူလကံ၊ န နာမံ. နာမံ နာမမူလမူလကဉ္စေဝ နာမဉ္စ.

၉၆. (က) ယေ ကေစိ နာမာ ဓမ္မာ၊ သဗ္ဗေ တေ နာမမူလေန ဧကမူလမူလကာတိ?

အဟေတုကံ နာမံ နာမမူလေန န ဧကမူလမူလကံ. သဟေတုကံ နာမံ နာမမူလေန ဧကမူလမူလကံ.

(ခ) ယေ ဝါ ပန နာမမူလေန ဧကမူလမူလကာ၊ သဗ္ဗေ တေ ဓမ္မာ နာမာတိ?

နာမသမုဋ္ဌာနံ ရူပံ နာမမူလေန ဧကမူလမူလကံ၊ န နာမံ. နာမံ နာမမူလေန ဧကမူလမူလကဉ္စေဝ နာမဉ္စ.

၉၇. (က) ယေ ကေစိ နာမမူလေန ဧကမူလမူလကာ ဓမ္မာ၊ သဗ္ဗေ တေ နာမမူလေန အညမညမူလမူလကာတိ?

မူလာနိ ယာနိ ဧကတော ဥပ္ပဇ္ဇန္တိ နာမမူလာနိ ဧကမူလမူလကာနိ စေဝ အညမညမူလမူလကာနိ စ. အဝသေသာ နာမမူလသဟဇာတာ ဓမ္မာ နာမမူလေန ဧကမူလမူလကာ၊ န စ အညမညမူလမူလကာ.

(ခ) ယေ ဝါ ပန နာမမူလေန အညမညမူလမူလကာ၊ သဗ္ဗေ တေ ဓမ္မာ နာမာတိ?

အာမန္တာ.

မူလဝါရနိဒ္ဒေသော.