(၂) မူလမူလနယော

၈၉. (က) ယေ ကေစိ နာမာ ဓမ္မာ၊ သဗ္ဗေ တေ နာမမူလမူလာတိ?

နဝေဝ နာမမူလမူလာနိ. အဝသေသာ နာမာ ဓမ္မာ န နာမမူလမူလာ.

(ခ) ယေ ဝါ ပန နာမမူလမူလာ၊ သဗ္ဗေ တေ ဓမ္မာ နာမာတိ? အာမန္တာ.

၉၀. (က) ယေ ကေစိ နာမာ ဓမ္မာ၊ သဗ္ဗေ တေ နာမမူလေန ဧကမူလမူလာတိ?

အဟေတုကံ နာမံ နာမမူလေန န ဧကမူလမူလံ. သဟေတုကံ နာမံ နာမမူလေန ဧကမူလမူလံ.

(ခ) ယေ ဝါ ပန နာမမူလေန ဧကမူလမူလာ၊ သဗ္ဗေ တေ ဓမ္မာ နာမာတိ?

နာမသမုဋ္ဌာနံ ရူပံ နာမမူလေန ဧကမူလမူလံ၊ န နာမံ. နာမံ နာမမူလေန ဧကမူလမူလဉ္စေဝ နာမဉ္စ.

၉၁. (က) ယေ ကေစိ နာမမူလေန ဧကမူလမူလာ ဓမ္မာ၊ သဗ္ဗေ တေ နာမမူလေန အညမညမူလမူလာတိ?

မူလာနိ ယာနိ ဧကတော ဥပ္ပဇ္ဇန္တိ နာမမူလာနိ ဧကမူလမူလာနိ စေဝ အညမညမူလမူလာနိ စ. အဝသေသာ နာမမူလသဟဇာတာ ဓမ္မာ နာမမူလေန ဧကမူလမူလာ၊ န စ အညမညမူလမူလာ.

(ခ) ယေ ဝါ ပန နာမမူလေန အညမညမူလမူလာ၊ သဗ္ဗေ တေ ဓမ္မာ နာမာတိ? အာမန္တာ.