(၄) မူလမူလကနယော

၈၃. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလမူလကာတိ?

အဟေတုကံ အဗျာကတံ န အဗျာကတမူလမူလကံ. သဟေတုကံ အဗျာကတံ အဗျာကတမူလမူလကံ.

(ခ) ယေ ဝါ ပန အဗျာကတမူလမူလကာ၊ သဗ္ဗေ တေ ဓမ္မာ အဗျာကတာတိ? အာမန္တာ.

၈၄. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလေန ဧကမူလမူလကာတိ?

အဟေတုကံ အဗျာကတံ အဗျာကတမူလေန န ဧကမူလမူလကံ. သဟေတုကံ အဗျာကတံ အဗျာကတမူလေန ဧကမူလမူလကံ.

(ခ) ယေ ဝါ ပန အဗျာကတမူလေန ဧကမူလမူလကာ၊ သဗ္ဗေ တေ ဓမ္မာ အဗျာကတာတိ? အာမန္တာ.

၈၅. (က) ယေ ကေစိ အဗျာကတမူလေန ဧကမူလမူလကာ ဓမ္မာ၊ သဗ္ဗေ တေ အဗျာကတမူလေန အညမညမူလမူလကာတိ?

မူလာနိ ယာနိ ဧကတော ဥပ္ပဇ္ဇန္တိ အဗျာကတမူလာနိ ဧကမူလမူလကာနိ စေဝ အညမညမူလမူလကာနိ စ. အဝသေသာ အဗျာကတမူလသဟဇာတာ ဓမ္မာ အဗျာကတမူလေန ဧကမူလမူလကာ၊ န စ အညမညမူလမူလကာ.

(ခ) ယေ ဝါ ပန အဗျာကတမူလေန အညမညမူလမူလကာ၊ သဗ္ဗေ တေ ဓမ္မာ အဗျာကတာတိ? အာမန္တာ.