၃. အဗျာကတာ ဓမ္မာ (၁) မူလနယော
၇၄. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလာတိ?
တီဏေဝ အဗျာကတမူလာနိ. အဝသေသာ အဗျာကတာ ဓမ္မာ န အဗျာကတမူလာ.
(ခ) ယေ ဝါ ပန အဗျာကတမူလာ၊ သဗ္ဗေ တေ ဓမ္မာ အဗျာကတာတိ? အာမန္တာ.
၇၅. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလေန ဧကမူလာတိ?
အဟေတုကံ အဗျာကတံ အဗျာကတမူလေန န ဧကမူလံ. သဟေတုကံ အဗျာကတံ အဗျာကတမူလေန ဧကမူလံ.
(ခ) ယေ ဝါ ပန အဗျာကတမူလေန ဧကမူလာ၊ သဗ္ဗေ တေ ဓမ္မာ အဗျာကတာတိ? အာမန္တာ.
၇၆. (က) ယေ ကေစိ အဗျာကတမူလေန ဧကမူလာ ဓမ္မာ၊ သဗ္ဗေ တေ အဗျာကတမူလေန အညမညမူလာတိ?
မူလာနိ ယာနိ ဧကတော ဥပ္ပဇ္ဇန္တိ အဗျာကတမူလာနိ ဧကမူလာနိ စေဝ အညမညမူလာနိ စ. အဝသေသာ အဗျာကတမူလသဟဇာတာ ဓမ္မာ အဗျာကတမူလေန ဧကမူလာ၊ န စ အညမညမူလာ.
(ခ) ယေ ဝါ ပန အဗျာကတမူလေန အညမညမူလာ၊ သဗ္ဗေ တေ ဓမ္မာ အဗျာကတာတိ? အာမန္တာ.
(၂) မူလမူလနယော
၇၇. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလမူလာတိ?
တီဏေဝ အဗျာကတမူလမူလာနိ. အဝသေသာ အဗျာကတာ ဓမ္မာ န အဗျာကတမူလမူလာ.
(ခ) ယေ ဝါ ပန အဗျာကတမူလမူလာ၊ သဗ္ဗေ တေ ဓမ္မာ အဗျာကတာတိ? အာမန္တာ.
၇၈. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလေန ဧကမူလမူလာတိ?
အဟေတုကံ အဗျာကတံ အဗျာကတမူလေန န ဧကမူလမူလံ. သဟေတုကံ အဗျာကတံ အဗျာကတမူလေန ဧကမူလမူလံ.
(ခ) ယေ ဝါ ပန အဗျာကတမူလေန ဧကမူလမူလာ၊ သဗ္ဗေ တေ ဓမ္မာ အဗျာကတာတိ? အာမန္တာ.
၇၉. (က) ယေ ကေစိ အဗျာကတမူလေန ဧကမူလမူလာ ဓမ္မာ၊ သဗ္ဗေ တေ အဗျာကတမူလေန အညမညမူလမူလာတိ?
မူလာနိ ယာနိ ဧကတော ဥပ္ပဇ္ဇန္တိ အဗျာကတမူလာနိ ဧကမူလမူလာနိ စေဝ အညမညမူလမူလာနိ စ. အဝသေသာ အဗျာကတမူလသဟဇာတာ ဓမ္မာ အဗျာကတမူလေန ဧကမူလမူလာ၊ န စ အညမညမူလမူလာ.
(ခ) ယေ ဝါ ပန အဗျာကတမူလေန အညမညမူလမူလာ၊ သဗ္ဗေ တေ ဓမ္မာ အဗျာကတာတိ? အာမန္တာ.
(၃) မူလကနယော
၈၀. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလကာတိ?
အဟေတုကံ အဗျာကတံ န အဗျာကတမူလကံ. သဟေတုကံ အဗျာကတံ အဗျာကတမူလကံ.
(ခ) ယေ ဝါ ပန အဗျာကတမူလကာ၊ သဗ္ဗေ တေ ဓမ္မာ အဗျာကတာတိ? အာမန္တာ.
၈၁. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလေန ဧကမူလကာတိ?
အဟေတုကံ အဗျာကတံ အဗျာကတမူလေန န ဧကမူလကံ. သဟေတုကံ အဗျာကတံ အဗျာကတမူလေန ဧကမူလကံ.
(ခ) ယေ ဝါ ပန အဗျာကတမူလေန ဧကမူလကာ၊ သဗ္ဗေ တေ ဓမ္မာ အဗျာကတာတိ? အာမန္တာ.
၈၂. (က) ယေ ကေစိ အဗျာကတမူလေန ဧကမူလကာ ဓမ္မာ၊ သဗ္ဗေ တေ အဗျာကတမူလေန အညမညမူလကာတိ?
မူလာနိ ယာနိ ဧကတော ဥပ္ပဇ္ဇန္တိ အဗျာကတမူလာနိ ဧကမူလကာနိ စေဝ အညမညမူလကာနိ စ. အဝသေသာ အဗျာကတမူလသဟဇာတာ ဓမ္မာ အဗျာကတမူလေန ဧကမူလကာ၊ န စ အညမညမူလကာ.
(ခ) ယေ ဝါ ပန အဗျာကတမူလေန အညမညမူလကာ၊ သဗ္ဗေ တေ ဓမ္မာ အဗျာကတာတိ? အာမန္တာ.
(၄) မူလမူလကနယော
၈၃. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလမူလကာတိ?
အဟေတုကံ အဗျာကတံ န အဗျာကတမူလမူလကံ. သဟေတုကံ အဗျာကတံ အဗျာကတမူလမူလကံ.
(ခ) ယေ ဝါ ပန အဗျာကတမူလမူလကာ၊ သဗ္ဗေ တေ ဓမ္မာ အဗျာကတာတိ? အာမန္တာ.
၈၄. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလေန ဧကမူလမူလကာတိ?
အဟေတုကံ အဗျာကတံ အဗျာကတမူလေန န ဧကမူလမူလကံ. သဟေတုကံ အဗျာကတံ အဗျာကတမူလေန ဧကမူလမူလကံ.
(ခ) ယေ ဝါ ပန အဗျာကတမူလေန ဧကမူလမူလကာ၊ သဗ္ဗေ တေ ဓမ္မာ အဗျာကတာတိ? အာမန္တာ.
၈၅. (က) ယေ ကေစိ အဗျာကတမူလေန ဧကမူလမူလကာ ဓမ္မာ၊ သဗ္ဗေ တေ အဗျာကတမူလေန အညမညမူလမူလကာတိ?
မူလာနိ ယာနိ ဧကတော ဥပ္ပဇ္ဇန္တိ အဗျာကတမူလာနိ ဧကမူလမူလကာနိ စေဝ အညမညမူလမူလကာနိ စ. အဝသေသာ အဗျာကတမူလသဟဇာတာ ဓမ္မာ အဗျာကတမူလေန ဧကမူလမူလကာ၊ န စ အညမညမူလမူလကာ.
(ခ) ယေ ဝါ ပန အဗျာကတမူလေန အညမညမူလမူလကာ၊ သဗ္ဗေ တေ ဓမ္မာ အဗျာကတာတိ? အာမန္တာ.