(၂) မူလမူလနယော

၇၇. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလမူလာတိ?

တီဏေဝ အဗျာကတမူလမူလာနိ. အဝသေသာ အဗျာကတာ ဓမ္မာ န အဗျာကတမူလမူလာ.

(ခ) ယေ ဝါ ပန အဗျာကတမူလမူလာ၊ သဗ္ဗေ တေ ဓမ္မာ အဗျာကတာတိ? အာမန္တာ.

၇၈. (က) ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလေန ဧကမူလမူလာတိ?

အဟေတုကံ အဗျာကတံ အဗျာကတမူလေန န ဧကမူလမူလံ. သဟေတုကံ အဗျာကတံ အဗျာကတမူလေန ဧကမူလမူလံ.

(ခ) ယေ ဝါ ပန အဗျာကတမူလေန ဧကမူလမူလာ၊ သဗ္ဗေ တေ ဓမ္မာ အဗျာကတာတိ? အာမန္တာ.

၇၉. (က) ယေ ကေစိ အဗျာကတမူလေန ဧကမူလမူလာ ဓမ္မာ၊ သဗ္ဗေ တေ အဗျာကတမူလေန အညမညမူလမူလာတိ?

မူလာနိ ယာနိ ဧကတော ဥပ္ပဇ္ဇန္တိ အဗျာကတမူလာနိ ဧကမူလမူလာနိ စေဝ အညမညမူလမူလာနိ စ. အဝသေသာ အဗျာကတမူလသဟဇာတာ ဓမ္မာ အဗျာကတမူလေန ဧကမူလမူလာ၊ န စ အညမညမူလမူလာ.

(ခ) ယေ ဝါ ပန အဗျာကတမူလေန အညမညမူလမူလာ၊ သဗ္ဗေ တေ ဓမ္မာ အဗျာကတာတိ? အာမန္တာ.