၂. အကုသလာ ဓမ္မာ (၁) မူလနယော

၆၂. (က) ယေ ကေစိ အကုသလာ ဓမ္မာ၊ သဗ္ဗေ တေ အကုသလမူလာတိ?

တီဏေဝ အကုသလမူလာနိ. အဝသေသာ အကုသလာ ဓမ္မာ န အကုသလမူလာ.

(ခ) ယေ ဝါ ပန အကုသလမူလာ၊ သဗ္ဗေ တေ ဓမ္မာ အကုသလာတိ? အာမန္တာ.

၆၃. (က) ယေ ကေစိ အကုသလာ ဓမ္မာ၊ သဗ္ဗေ တေ အကုသလမူလေန ဧကမူလာတိ?

အဟေတုကံ အကုသလံ အကုသလမူလေန န ဧကမူလံ. သဟေတုကံ အကုသလံ အကုသလမူလေန ဧကမူလံ.

(ခ) ယေ ဝါ ပန အကုသလမူလေန ဧကမူလာ၊ သဗ္ဗေ တေ ဓမ္မာ အကုသလာတိ?

အကုသလသမုဋ္ဌာနံ ရူပံ အကုသလမူလေန ဧကမူလံ၊ န အကုသလံ. အကုသလံ အကုသလမူလေန ဧကမူလဉ္စေဝ အကုသလဉ္စ.

၆၄. (က) ယေ ကေစိ အကုသလမူလေန ဧကမူလာ ဓမ္မာ၊ သဗ္ဗေ တေ အကုသလမူလေန အညမညမူလာတိ?

မူလာနိ ယာနိ ဧကတော ဥပ္ပဇ္ဇန္တိ အကုသလမူလာနိ ဧကမူလာနိ စေဝ အညမညမူလာနိ စ. အဝသေသာ အကုသလမူလသဟဇာတာ ဓမ္မာ အကုသလမူလေန ဧကမူလာ၊ န စ အညမညမူလာ.

(ခ) ယေ ဝါ ပန အကုသလမူလေန အညမညမူလာ၊ သဗ္ဗေ တေ ဓမ္မာ အကုသလာတိ? အာမန္တာ.

(၂) မူလမူလနယော

၆၅. (က) ယေ ကေစိ အကုသလာ ဓမ္မာ၊ သဗ္ဗေ တေ အကုသလမူလမူလာတိ?

တီဏေဝ အကုသလမူလမူလာနိ. အဝသေသာ အကုသလာ ဓမ္မာ န အကုသလမူလမူလာ.

(ခ) ယေ ဝါ ပန အကုသလမူလမူလာ၊ သဗ္ဗေ တေ ဓမ္မာ အကုသလာတိ? အာမန္တာ.

၆၆. (က) ယေ ကေစိ အကုသလာ ဓမ္မာ၊ သဗ္ဗေ တေ အကုသလမူလေန ဧကမူလမူလာတိ?

အဟေတုကံ အကုသလံ အကုသလမူလေန န ဧကမူလမူလံ. သဟေတုကံ အကုသလံ အကုသလမူလေန ဧကမူလမူလံ.

(ခ) ယေ ဝါ ပန အကုသလမူလေန ဧကမူလမူလာ၊ သဗ္ဗေ တေ ဓမ္မာ အကုသလာတိ?

အကုသလသမုဋ္ဌာနံ ရူပံ အကုသလမူလေန ဧကမူလမူလံ၊ န အကုသလံ. အကုသလံ အကုသလမူလေန ဧကမူလမူလဉ္စေဝ အကုသလဉ္စ.

၆၇. (က) ယေ ကေစိ အကုသလမူလေန ဧကမူလမူလာ ဓမ္မာ၊ သဗ္ဗေ တေ အကုသလမူလေန အညမညမူလမူလာတိ?

မူလာနိ ယာနိ ဧကတော ဥပ္ပဇ္ဇန္တိ အကုသလမူလာနိ ဧကမူလမူလာနိ စေဝ အညမညမူလမူလာနိ စ. အဝသေသာ အကုသလမူလသဟဇာတာ ဓမ္မာ အကုသလမူလေန ဧကမူလမူလာ၊ န စ အညမညမူလမူလာ.

(ခ) ယေ ဝါ ပန အကုသလမူလေန အညမညမူလမူလာ၊ သဗ္ဗေ တေ ဓမ္မာ အကုသလာတိ? အာမန္တာ.

(၃) မူလကနယော

၆၈. (က) ယေ ကေစိ အကုသလာ ဓမ္မာ၊ သဗ္ဗေ တေ အကုသလမူလကာတိ?

အဟေတုကံ အကုသလံ န အကုသလမူလကံ. သဟေတုကံ အကုသလံ အကုသလမူလကံ.

(ခ) ယေ ဝါ ပန အကုသလမူလကာ၊ သဗ္ဗေ တေ ဓမ္မာ အကုသလာတိ?

အကုသလသမုဋ္ဌာနံ ရူပံ အကုသလမူလကံ န အကုသလံ. အကုသလံ အကုသလမူလကဉ္စေဝ အကုသလဉ္စ.

၆၉. (က) ယေ ကေစိ အကုသလာ ဓမ္မာ၊ သဗ္ဗေ တေ အကုသလမူလေန ဧကမူလကာတိ?

အဟေတုကံ အကုသလံ အကုသလမူလေန န ဧကမူလကံ. သဟေတုကံ အကုသလံ အကုသလမူလေန ဧကမူလကံ.

(ခ) ယေ ဝါ ပန အကုသလမူလေန ဧကမူလကာ၊ သဗ္ဗေ တေ ဓမ္မာ အကုသလာတိ?

အကုသလသမုဋ္ဌာနံ ရူပံ အကုသလမူလေန ဧကမူလကံ၊ န အကုသလံ. အကုသလံ အကုသလမူလေန ဧကမူလကဉ္စေဝ အကုသလဉ္စ.

၇၀. (က) ယေ ကေစိ အကုသလမူလေန ဧကမူလကာ ဓမ္မာ၊ သဗ္ဗေ တေ အကုသလမူလေန အညမညမူလကာတိ?

မူလာနိ ယာနိ ဧကတော ဥပ္ပဇ္ဇန္တိ အကုသလမူလာနိ ဧကမူလကာနိ စေဝ အညမညမူလကာနိ စ. အဝသေသာ အကုသလမူလသဟဇာတာ ဓမ္မာ အကုသလမူလေန ဧကမူလကာ န စ အညမညမူလကာ.

(ခ) ယေ ဝါ ပန အကုသလမူလေန အညမညမူလကာ၊ သဗ္ဗေ တေ ဓမ္မာ အကုသလာတိ? အာမန္တာ.

(၄) မူလမူလကနယော

၇၁. (က) ယေ ကေစိ အကုသလာ ဓမ္မာ၊ သဗ္ဗေ တေ အကုသလမူလမူလကာတိ?

အဟေတုကံ အကုသလံ န အကုသလမူလမူလကံ. သဟေတုကံ အကုသလံ အကုသလမူလမူလကံ.

(ခ) ယေ ဝါ ပန အကုသလမူလမူလကာ၊ သဗ္ဗေ တေ ဓမ္မာ အကုသလာတိ?

အကုသလသမုဋ္ဌာနံ ရူပံ အကုသလမူလမူလကံ န အကုသလံ. အကုသလံ အကုသလမူလမူလကဉ္စေဝ အကုသလဉ္စ.

၇၂. (က) ယေ ကေစိ အကုသလာ ဓမ္မာ၊ သဗ္ဗေ တေ အကုသလမူလေန ဧကမူလမူလကာတိ?

အဟေတုကံ အကုသလံ အကုသလမူလေန န ဧကမူလမူလကံ. သဟေတုကံ အကုသလံ အကုသလမူလေန ဧကမူလမူလကံ.

(ခ) ယေ ဝါ ပန အကုသလမူလေန ဧကမူလမူလကာ၊ သဗ္ဗေ တေ ဓမ္မာ အကုသလာတိ?

အကုသလသမုဋ္ဌာနံ ရူပံ အကုသလမူလေန ဧကမူလမူလကံ၊ န အကုသလံ. အကုသလံ အကုသလမူလေန ဧကမူလမူလကဉ္စေဝ အကုသလဉ္စ.

၇၃. (က) ယေ ကေစိ အကုသလမူလေန ဧကမူလမူလကာ ဓမ္မာ၊ သဗ္ဗေ တေ အကုသလမူလေန အညမညမူလမူလကာတိ?

မူလာနိ ယာနိ ဧကတော ဥပ္ပဇ္ဇန္တိ အကုသလမူလာနိ ဧကမူလမူလကာနိ စေဝ အညမညမူလမူလကာနိ စ. အဝသေသာ အကုသလမူလသဟဇာတာ ဓမ္မာ အကုသလမူလေန ဧကမူလမူလကာ၊ န စ အညမညမူလမူလကာ.

(ခ) ယေ ဝါ ပန အကုသလမူလေန အညမညမူလမူလကာ၊ သဗ္ဗေ တေ ဓမ္မာ အကုသလာတိ? အာမန္တာ.