(၃) မူလကနယော

၅၆. (က) ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလကာတိ? အာမန္တာ.

(ခ) ယေ ဝါ ပန ကုသလမူလကာ၊ သဗ္ဗေ တေ ဓမ္မာ ကုသလာတိ?

ကုသလသမုဋ္ဌာနံ ရူပံ ကုသလမူလကံ န ကုသလံ. ကုသလံ ကုသလမူလကဉ္စေဝ ကုသလဉ္စ.

၅၇. (က) ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလေန ဧကမူလကာတိ? အာမန္တာ.

(ခ) ယေ ဝါ ပန ကုသလမူလေန ဧကမူလကာ၊ သဗ္ဗေ တေ ဓမ္မာ ကုသလာတိ?

ကုသလသမုဋ္ဌာနံ ရူပံ ကုသလမူလေန ဧကမူလကံ၊ န ကုသလံ. ကုသလံ ကုသလမူလေန ဧကမူလကဉ္စေဝ ကုသလဉ္စ.

၅၈. (က) ယေ ကေစိ ကုသလမူလေန ဧကမူလကာ ဓမ္မာ၊ သဗ္ဗေ တေ ကုသလမူလေန အညမညမူလကာတိ?

မူလာနိ ယာနိ ဧကတော ဥပ္ပဇ္ဇန္တိ ကုသလမူလာနိ ဧကမူလကာနိ စေဝ အညမညမူလကာနိ စ. အဝသေသာ ကုသလမူလသဟဇာတာ ဓမ္မာ ကုသလမူလေန ဧကမူလကာ၊ န စ အညမညမူလကာ.

(ခ) ယေ ဝါ ပန ကုသလမူလေန အညမညမူလကာ၊ သဗ္ဗေ တေ ဓမ္မာ ကုသလာတိ? အာမန္တာ.