၁. ကုသလာ ဓမ္မာ (၁) မူလနယော
၅၀. (က) ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလာတိ? တီဏေဝ ကုသလမူလာနိ. အဝသေသာ ကုသလာ ဓမ္မာ န ကုသလမူလာ.
(ခ) ယေ ဝါ ပန ကုသလမူလာ၊ သဗ္ဗေ တေ ဓမ္မာ ကုသလာတိ? အာမန္တာ.
၅၁. (က) ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလေန ဧကမူလာတိ? အာမန္တာ.
(ခ) ယေ ဝါ ပန ကုသလမူလေန ဧကမူလာ၊ သဗ္ဗေ တေ ဓမ္မာ ကုသလာတိ?
ကုသလသမုဋ္ဌာနံ ရူပံ ကုသလမူလေန ဧကမူလံ၊ န ကုသလံ. ကုသလံ ကုသလမူလေန ဧကမူလဉ္စေဝ ကုသလဉ္စ.
၅၂. (က) ယေ ကေစိ ကုသလမူလေန ဧကမူလာ ဓမ္မာ၊ သဗ္ဗေ တေ ကုသလမူလေန အညမညမူလာတိ?
မူလာနိ ယာနိ ဧကတော ဥပ္ပဇ္ဇန္တိ ကုသလမူလာနိ ဧကမူလာနိ စေဝ အညမညမူလာနိ စ. အဝသေသာ ကုသလမူလသဟဇာတာ ဓမ္မာ ကုသလမူလေန ဧကမူလာ၊ န စ အညမညမူလာ.
(ခ) ယေ ဝါ ပန ကုသလမူလေန အညမညမူလာ၊ သဗ္ဗေ တေ ဓမ္မာ ကုသလာတိ? အာမန္တာ.
(၂) မူလမူလနယော
၅၃. (က) ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလမူလာတိ? တီဏေဝ ကုသလမူလမူလာနိ. အဝသေသာ ကုသလာ ဓမ္မာ န ကုသလမူလမူလာ.
(ခ) ယေ ဝါ ပန ကုသလမူလမူလာ၊ သဗ္ဗေ တေ ဓမ္မာ ကုသလာတိ? အာမန္တာ.
၅၄. (က) ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလေန ဧကမူလမူလာတိ? အာမန္တာ.
(ခ) ယေ ဝါ ပန ကုသလမူလေန ဧကမူလမူလာ၊ သဗ္ဗေ တေ ဓမ္မာ ကုသလာတိ?
ကုသလသမုဋ္ဌာနံ ရူပံ ကုသလမူလေန ဧကမူလမူလံ၊ န ကုသလံ. ကုသလံ ကုသလမူလေန ဧကမူလမူလဉ္စေဝ ကုသလဉ္စ.
၅၅. (က) ယေ ကေစိ ကုသလမူလေန ဧကမူလမူလာ ဓမ္မာ၊ သဗ္ဗေ တေ ကုသလမူလေန အညမညမူလမူလာတိ?
မူလာနိ ယာနိ ဧကတော ဥပ္ပဇ္ဇန္တိ ကုသလမူလာနိ ဧကမူလမူလာနိ စေဝ အညမညမူလမူလာနိ စ. အဝသေသာ ကုသလမူလသဟဇာတာ ဓမ္မာ ကုသလမူလေန ဧကမူလမူလာ၊ န စ အညမညမူလမူလာ.
(ခ) ယေ ဝါ ပန ကုသလမူလေန အညမညမူလမူလာ၊ သဗ္ဗေ တေ ဓမ္မာ ကုသလာတိ? အာမန္တာ.
(၃) မူလကနယော
၅၆. (က) ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလကာတိ? အာမန္တာ.
(ခ) ယေ ဝါ ပန ကုသလမူလကာ၊ သဗ္ဗေ တေ ဓမ္မာ ကုသလာတိ?
ကုသလသမုဋ္ဌာနံ ရူပံ ကုသလမူလကံ န ကုသလံ. ကုသလံ ကုသလမူလကဉ္စေဝ ကုသလဉ္စ.
၅၇. (က) ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလေန ဧကမူလကာတိ? အာမန္တာ.
(ခ) ယေ ဝါ ပန ကုသလမူလေန ဧကမူလကာ၊ သဗ္ဗေ တေ ဓမ္မာ ကုသလာတိ?
ကုသလသမုဋ္ဌာနံ ရူပံ ကုသလမူလေန ဧကမူလကံ၊ န ကုသလံ. ကုသလံ ကုသလမူလေန ဧကမူလကဉ္စေဝ ကုသလဉ္စ.
၅၈. (က) ယေ ကေစိ ကုသလမူလေန ဧကမူလကာ ဓမ္မာ၊ သဗ္ဗေ တေ ကုသလမူလေန အညမညမူလကာတိ?
မူလာနိ ယာနိ ဧကတော ဥပ္ပဇ္ဇန္တိ ကုသလမူလာနိ ဧကမူလကာနိ စေဝ အညမညမူလကာနိ စ. အဝသေသာ ကုသလမူလသဟဇာတာ ဓမ္မာ ကုသလမူလေန ဧကမူလကာ၊ န စ အညမညမူလကာ.
(ခ) ယေ ဝါ ပန ကုသလမူလေန အညမညမူလကာ၊ သဗ္ဗေ တေ ဓမ္မာ ကုသလာတိ? အာမန္တာ.
(၄) မူလမူလကနယော
၅၉. (က) ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလမူလကာတိ? အာမန္တာ.
(ခ) ယေ ဝါ ပန ကုသလမူလမူလကာ၊ သဗ္ဗေ တေ ဓမ္မာ ကုသလာတိ?
ကုသလသမုဋ္ဌာနံ ရူပံ ကုသလမူလမူလကံ န ကုသလံ. ကုသလံ ကုသလမူလမူလကဉ္စေဝ ကုသလဉ္စ.
၆၀. (က) ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလေန ဧကမူလမူလကာတိ? အာမန္တာ.
(ခ) ယေ ဝါ ပန ကုသလမူလေန ဧကမူလမူလကာ၊ သဗ္ဗေ တေ ဓမ္မာ ကုသလာတိ?
ကုသလသမုဋ္ဌာနံ ရူပံ ကုသလမူလေန ဧကမူလမူလကံ၊ န ကုသလံ. ကုသလံ ကုသလမူလေန ဧကမူလမူလကဉ္စေဝ ကုသလဉ္စ.
၆၁. (က) ယေ ကေစိ ကုသလမူလေန ဧကမူလမူလကာ ဓမ္မာ၊ သဗ္ဗေ တေ ကုသလမူလေန အညမညမူလမူလကာတိ?
မူလာနိ ယာနိ ဧကတော ဥပ္ပဇ္ဇန္တိ ကုသလမူလာနိ ဧကမူလမူလကာနိ စေဝ အညမညမူလမူလကာနိ စ. အဝသေသာ ကုသလမူလသဟဇာတာ ဓမ္မာ ကုသလမူလေန ဧကမူလမူလကာ၊ န စ အညမညမူလမူလကာ.
(ခ) ယေ ဝါ ပန ကုသလမူလေန အညမညမူလမူလကာ၊ သဗ္ဗေ တေ ဓမ္မာ ကုသလာတိ? အာမန္တာ.