၃. ပဉှာပုစ္ဆကံ

၄၆၂. စတ္တာရော ဣဒ္ဓိပါဒါ – ဣဓ ဘိက္ခု ဆန္ဒသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ၊ ဝီရိယသမာဓိ။ပေ။ စိတ္တသမာဓိ။ပေ။ ဝီမံသာသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ.

၄၆၃. စတုန္နံ ဣဒ္ဓိပါဒါနံ ကတိ ကုသလာ၊ ကတိ အကုသလာ၊ ကတိ အဗျာကတာ။ပေ။ ကတိ သရဏာ၊ ကတိ အရဏာ?

၁. တိကံ

၄၆၄. ကုသလာယေဝ. သိယာ သုခါယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ. ဝိပါကဓမ္မဓမ္မာ. အနုပါဒိန္နအနုပါဒါနိယာ. အသံကိလိဋ္ဌအသံကိလေသိကာ. သိယာ သဝိတက္ကသဝိစာရာ၊ သိယာ အဝိတက္ကဝိစာရမတ္တာ၊ သိယာ အဝိတက္ကအဝိစာရာ. သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ. နေဝ ဒဿနေန န ဘာဝနာယ ပဟာတဗ္ဗာ. နေဝ ဒဿနေန န ဘာဝနာယ ပဟာတဗ္ဗဟေတုကာ. အပစယဂါမိနော. သေက္ခာ. အပ္ပမာဏာ. အပ္ပမာဏာရမ္မဏာ. ပဏီတာ. သမ္မတ္တနိယတာ. န မဂ္ဂါရမ္မဏာ၊ မဂ္ဂဟေတုကာ၊ န မဂ္ဂါဓိပတိနော. သိယာ ဥပ္ပန္နာ၊ သိယာ အနုပ္ပန္နာ၊ န ဝတ္တဗ္ဗာ ဥပ္ပါဒိနောတိ. သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ. န ဝတ္တဗ္ဗာ အတီတာရမ္မဏာတိပိ၊ အနာဂတာရမ္မဏာတိပိ၊ ပစ္စုပ္ပန္နာရမ္မဏာတိပိ. သိယာ အဇ္ဈတ္တာ၊ သိယာ ဗဟိဒ္ဓါ၊ သိယာ အဇ္ဈတ္တဗဟိဒ္ဓါ. ဗဟိဒ္ဓါရမ္မဏာ. အနိဒဿနအပ္ပဋိဃာ.

၂. ဒုကံ

၄၆၅. ဝီမံသိဒ္ဓိပါဒေါ ဟေတု၊ တယော ဣဒ္ဓိပါဒါ န ဟေတူ. သဟေတုကာ. ဟေတုသမ္ပယုတ္တာ. ဝီမံသိဒ္ဓိပါဒေါ ဟေတု စေဝ သဟေတုကော စ၊ တယော ဣဒ္ဓိပါဒါ န ဝတ္တဗ္ဗာ ဟေတူ စေဝ သဟေတုကာ စာတိ၊ သဟေတုကာ စေဝ န စ ဟေတူ. ဝီမံသိဒ္ဓိပါဒေါ ဟေတု စေဝ ဟေတုသမ္ပယုတ္တော စ၊ တယော ဣဒ္ဓိပါဒါ န ဝတ္တဗ္ဗာ ဟေတူ စေဝ ဟေတုသမ္ပယုတ္တာ စာတိ၊ ဟေတုသမ္ပယုတ္တာ စေဝ န စ ဟေတူ. တယော ဣဒ္ဓိပါဒါ န ဟေတူ သဟေတုကာ၊ ဝီမံသိဒ္ဓိပါဒေါ န ဝတ္တဗ္ဗော န ဟေတု သဟေတုကောတိပိ၊ န ဟေတု အဟေတုကောတိပိ. သပ္ပစ္စယာ. သင်္ခတာ. အနိဒဿနာ. အပ္ပဋိဃာ. အရူပါ. လောကုတ္တရာ. ကေနစိ ဝိညေယျာ၊ ကေနစိ န ဝိညေယျာ. နော အာသဝါ. အနာသဝါ. အာသဝဝိပ္ပယုတ္တာ. န ဝတ္တဗ္ဗာ အာသဝါ စေဝ သာသဝါ စာတိပိ၊ သာသဝါ စေဝ နော စ အာသဝါတိပိ. န ဝတ္တဗ္ဗာ အာသဝါ စေဝ အာသဝသမ္ပယုတ္တာ စာတိပိ၊ အာသဝသမ္ပယုတ္တာ စေဝ နော စ အာသဝါတိပိ. အာသဝဝိပ္ပယုတ္တာ. အနာသဝါ.

နော သံယောဇနာ။ပေ။ နော ဂန္ထာ။ပေ။ နော ဩဃာ။ပေ။ နော ယောဂါ။ပေ။ နော နီဝရဏာ။ပေ။ နော ပရာမာသာ။ပေ။ သာရမ္မဏာ. တယော ဣဒ္ဓိပါဒါ နော စိတ္တာ၊ စိတ္တိဒ္ဓိပါဒေါ စိတ္တံ. တယော ဣဒ္ဓိပါဒါ စေတသိကာ၊ စိတ္တိဒ္ဓိပါဒေါ အစေတသိကော. တယော ဣဒ္ဓိပါဒါ စိတ္တသမ္ပယုတ္တာ၊ စိတ္တိဒ္ဓိပါဒေါ န ဝတ္တဗ္ဗော စိတ္တေန သမ္ပယုတ္တောတိပိ၊ စိတ္တေန ဝိပ္ပယုတ္တောတိပိ. တယော ဣဒ္ဓိပါဒါ စိတ္တသံသဋ္ဌာ၊ စိတ္တိဒ္ဓိပါဒေါ န ဝတ္တဗ္ဗော စိတ္တေန သံသဋ္ဌောတိပိ၊ စိတ္တေန ဝိသံသဋ္ဌောတိပိ. တယော ဣဒ္ဓိပါဒါ စိတ္တသမုဋ္ဌာနာ၊ စိတ္တိဒ္ဓိပါဒေါ နော စိတ္တသမုဋ္ဌာနော. တယော ဣဒ္ဓိပါဒါ စိတ္တသဟဘုနော၊ စိတ္တိဒ္ဓိပါဒေါ နော စိတ္တသဟဘူ. တယော ဣဒ္ဓိပါဒါ စိတ္တာနုပရိဝတ္တိနော၊ စိတ္တိဒ္ဓိပါဒေါ နော စိတ္တာနုပရိဝတ္တိ. တယော ဣဒ္ဓိပါဒါ စိတ္တသံသဋ္ဌသမုဋ္ဌာနာ၊ စိတ္တိဒ္ဓိပါဒေါ နော စိတ္တသံသဋ္ဌသမုဋ္ဌာနော. တယော ဣဒ္ဓိပါဒါ စိတ္တသံသဋ္ဌသမုဋ္ဌာနသဟဘုနော၊ စိတ္တိဒ္ဓိပါဒေါ နော စိတ္တသံသဋ္ဌသမုဋ္ဌာနသဟဘူ. တယော ဣဒ္ဓိပါဒါ စိတ္တသံသဋ္ဌသမုဋ္ဌာနာနုပရိဝတ္တိနော၊ စိတ္တိဒ္ဓိပါဒေါ နော စိတ္တသံသဋ္ဌသမုဋ္ဌာနာနုပရိဝတ္တိ.

တယော ဣဒ္ဓိပါဒါ ဗာဟိရာ၊ စိတ္တိဒ္ဓိပါဒေါ အဇ္ဈတ္တိကော. နော ဥပါဒါ. အနုပါဒိန္နာ. နော ဥပါဒါနာ။ပေ။ နော ကိလေသာ။ပေ။ န ဒဿနေန ပဟာတဗ္ဗာ. န ဘာဝနာယ ပဟာတဗ္ဗာ. န ဒဿနေန ပဟာတဗ္ဗဟေတုကာ. န ဘာဝနာယ ပဟာတဗ္ဗဟေတုကာ. သိယာ သဝိတက္ကာ၊ သိယာ အဝိတက္ကာ. သိယာ သဝိစာရာ၊ သိယာ အဝိစာရာ. သိယာ သပ္ပီတိကာ၊ သိယာ အပ္ပီတိကာ. သိယာ ပီတိသဟဂတာ၊ သိယာ န ပီတိသဟဂတာ. သိယာ သုခသဟဂတာ၊ သိယာ န သုခသဟဂတာ. သိယာ ဥပေက္ခာသဟဂတာ၊ သိယာ န ဥပေက္ခာသဟဂတာ. န ကာမာဝစရာ. န ရူပါဝစရာ. န အရူပါဝစရာ. အပရိယာပန္နာ. နိယျာနိကာ. နိယတာ. အနုတ္တရာ. အရဏာတိ.

ပဉှာပုစ္ဆကံ.

ဣဒ္ဓိပါဒဝိဘင်္ဂေါ နိဋ္ဌိတော.