၄. ဝီမံသိဒ္ဓိပါဒေါ

၄၄၁. ကထဉ္စ ဘိက္ခု ဝီမံသာသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ? ဝီမံသံ စေ ဘိက္ခု အဓိပတိံ ကရိတွာ လဘတိ သမာဓိံ လဘတိ စိတ္တဿေကဂ္ဂတံ – အယံ ဝုစ္စတိ ‘‘ဝီမံသာသမာဓိ’’. သော အနုပ္ပန္နာနံ ပါပကာနံ အကုသလာနံ ဓမ္မာနံ အနုပ္ပါဒါယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ၊ ဥပ္ပန္နာနံ ပါပကာနံ အကုသလာနံ ဓမ္မာနံ ပဟာနာယ။ပေ။ အနုပ္ပန္နာနံ ကုသလာနံ ဓမ္မာနံ ဥပ္ပါဒါယ။ပေ။ ဥပ္ပန္နာနံ ကုသလာနံ ဓမ္မာနံ ဌိတိယာ အသမ္မောသာယ ဘိယျောဘာဝါယ ဝေပုလ္လာယ ဘာဝနာယ ပါရိပူရိယာ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ. ဣမေ ဝုစ္စန္တိ ‘‘ပဓာနသင်္ခါရာ’’. ဣတိ အယဉ္စ ဝီမံသာသမာဓိ၊ ဣမေ စ ပဓာနသင်္ခါရာ၊ တဒေကဇ္ဈံ အဘိသညူဟိတွာ အဘိသင်္ခိပိတွာ ဝီမံသာသမာဓိပဓာနသင်္ခါရောတွေဝ သင်္ချံ ဂစ္ဆတိ.

၄၄၂. တတ္ထ ကတမာ ဝီမံသာ? ယာ ပညာ ပဇာနနာ။ပေ။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ‘‘ဝီမံသာ’’.

တတ္ထ ကတမော သမာဓိ? ယာ စိတ္တဿ ဌိတိ သဏ္ဌိတိ။ပေ။ သမ္မာသမာဓိ – အယံ ဝုစ္စတိ ‘‘သမာဓိ’’.

တတ္ထ ကတမော ပဓာနသင်္ခါရော? ယော စေတသိကော ဝီရိယာရမ္ဘော ။ပေ။ သမ္မာဝါယာမော – အယံ ဝုစ္စတိ ‘‘ပဓာနသင်္ခါရော’’. ဣတိ ဣမာယ စ ဝီမံသာယ၊ ဣမိနာ စ သမာဓိနာ၊ ဣမိနာ စ ပဓာနသင်္ခါရေန ဥပေတော ဟောတိ။ပေ။ သမန္နာဂတော. တေန ဝုစ္စတိ ‘‘ဝီမံသာသမာဓိပဓာနသင်္ခါရသမန္နာဂတော’’တိ.

၄၄၃. ဣဒ္ဓီတိ. ယာ တေသံ ဓမ္မာနံ ဣဒ္ဓိ သမိဒ္ဓိ ဣဇ္ဈနာ သမိဇ္ဈနာ လာဘော ပဋိလာဘော ပတ္တိ သမ္ပတ္တိ ဖုသနာ သစ္ဆိကိရိယာ ဥပသမ္ပဒါ.

ဣဒ္ဓိပါဒေါတိ. တထာဘူတဿ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏခန္ဓော.

ဣဒ္ဓိပါဒံ ဘာဝေတီတိ. တေ ဓမ္မေ အာသေဝတိ ဘာဝေတိ ဗဟုလီကရောတိ. တေန ဝုစ္စတိ ‘‘ဣဒ္ဓိပါဒံ ဘာဝေတီ’’တိ.

သုတ္တန္တဘာဇနီယံ.