၁. တိကံ

၃၈၈. သိယာ ကုသလာ၊ သိယာ အဗျာကတာ. သိယာ သုခါယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ. သိယာ ဝိပါကာ သိယာ ဝိပါကဓမ္မဓမ္မာ. အနုပါဒိန္နအနုပါဒါနိယာ. အသံကိလိဋ္ဌအသံကိလေသိကာ. သိယာ သဝိတက္ကသဝိစာရာ၊ သိယာ အဝိတက္ကဝိစာရမတ္တာ၊ သိယာ အဝိတက္ကအဝိစာရာ. သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ. နေဝ ဒဿနေန န ဘာဝနာယ ပဟာတဗ္ဗာ. နေဝ ဒဿနေန န ဘာဝနာယ ပဟာတဗ္ဗဟေတုကာ. သိယာ အပစယဂါမိနော၊ သိယာ နေဝါစယဂါမိနာပစယဂါမိနော. သိယာ သေက္ခာ၊ သိယာ အသေက္ခာ. အပ္ပမာဏာ. အပ္ပမာဏာရမ္မဏာ. ပဏီတာ. သိယာ သမ္မတ္တနိယတာ၊ သိယာ အနိယတာ. န မဂ္ဂါရမ္မဏာ၊ သိယာ မဂ္ဂဟေတုကာ၊ သိယာ မဂ္ဂါဓိပတိနော၊ သိယာ န ဝတ္တဗ္ဗာ မဂ္ဂဟေတုကာတိပိ၊ မဂ္ဂါဓိပတိနောတိပိ. သိယာ ဥပ္ပန္နာ၊ သိယာ အနုပ္ပန္နာ၊ သိယာ ဥပ္ပါဒိနော. သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ. န ဝတ္တဗ္ဗာ အတီတာရမ္မဏာတိပိ၊ အနာဂတာရမ္မဏာတိပိ၊ ပစ္စုပ္ပန္နာရမ္မဏာတိပိ. သိယာ အဇ္ဈတ္တာ၊ သိယာ ဗဟိဒ္ဓါ၊ သိယာ အဇ္ဈတ္တဗဟိဒ္ဓါ. ဗဟိဒ္ဓါရမ္မဏာ. အနိဒဿနအပ္ပဋိဃာ.