၆. ဟေတုစတုက္ကံ

၂၅၆. တသ္မိံ သမယေ အဝိဇ္ဇာပစ္စယာ သင်္ခါရော အဝိဇ္ဇာဟေတုကော၊ သင်္ခါရပစ္စယာ ဝိညာဏံ သင်္ခါရဟေတုကံ၊ ဝိညာဏပစ္စယာ နာမံ ဝိညာဏဟေတုကံ၊ နာမပစ္စယာ ဆဋ္ဌာယတနံ နာမဟေတုကံ၊ ဆဋ္ဌာယတနပစ္စယာ ဖဿော ဆဋ္ဌာယတနဟေတုကော၊ ဖဿပစ္စယာ ဝေဒနာ ဖဿဟေတုကာ၊ ဝေဒနာပစ္စယာ တဏှာ ဝေဒနာဟေတုကာ၊ တဏှာပစ္စယာ ဥပါဒါနံ တဏှာဟေတုကံ၊ ဥပါဒါနပစ္စယာ ဘဝေါ၊ ဘဝပစ္စယာ ဇာတိ၊ ဇာတိပစ္စယာ ဇရာမရဏံ. ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတိ.

၂၅၇. တတ္ထ ကတမာ အဝိဇ္ဇာ? ယံ အညာဏံ အဒဿနံ။ပေ။ အဝိဇ္ဇာလင်္ဂီ မောဟော အကုသလမူလံ – အယံ ဝုစ္စတိ ‘‘အဝိဇ္ဇာ’’.

တတ္ထ ကတမော အဝိဇ္ဇာပစ္စယာ သင်္ခါရော အဝိဇ္ဇာဟေတုကော? ယာ စေတနာ သဉ္စေတနာ သဉ္စေတယိတတ္တံ – အယံ ဝုစ္စတိ ‘‘အဝိဇ္ဇာပစ္စယာ သင်္ခါရော အဝိဇ္ဇာဟေတုကော’’.

တတ္ထ ကတမံ သင်္ခါရပစ္စယာ ဝိညာဏံ သင်္ခါရဟေတုကံ? ယံ စိတ္တံ မနော မာနသံ။ပေ။ တဇ္ဇာမနောဝိညာဏဓာတု – ဣဒံ ဝုစ္စတိ ‘‘သင်္ခါရပစ္စယာ ဝိညာဏံ သင်္ခါရဟေတုကံ’’.

တတ္ထ ကတမံ ဝိညာဏပစ္စယာ နာမံ ဝိညာဏဟေတုကံ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော – ဣဒံ ဝုစ္စတိ ‘‘ဝိညာဏပစ္စယာ နာမံ ဝိညာဏဟေတုကံ’’.

တတ္ထ ကတမံ နာမပစ္စယာ ဆဋ္ဌာယတနံ နာမဟေတုကံ? ယံ စိတ္တံ မနော မာနသံ။ပေ။ တဇ္ဇာမနောဝိညာဏဓာတု – ဣဒံ ဝုစ္စတိ ‘‘နာမပစ္စယာ ဆဋ္ဌာယတနံ နာမဟေတုကံ’’.

တတ္ထ ကတမော ဆဋ္ဌာယတနပစ္စယာ ဖဿော ဆဋ္ဌာယတနဟေတုကော? ယော ဖဿော ဖုသနာ သမ္ဖုသနာ သမ္ဖုသိတတ္တံ – အယံ ဝုစ္စတိ ‘‘ဆဋ္ဌာယတနပစ္စယာ ဖဿော ဆဋ္ဌာယတနဟေတုကော’’.

တတ္ထ ကတမာ ဖဿပစ္စယာ ဝေဒနာ ဖဿဟေတုကာ? ယံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – အယံ ဝုစ္စတိ ‘‘ဖဿပစ္စယာ ဝေဒနာ ဖဿဟေတုကာ’’.

တတ္ထ ကတမာ ဝေဒနာပစ္စယာ တဏှာ ဝေဒနာဟေတုကာ? ယော ရာဂေါ သာရာဂေါ။ပေ။ စိတ္တဿ သာရာဂေါ – အယံ ဝုစ္စတိ ‘‘ဝေဒနာပစ္စယာ တဏှာ ဝေဒနာဟေတုကာ’’.

တတ္ထ ကတမံ တဏှာပစ္စယာ ဥပါဒါနံ တဏှာဟေတုကံ? ယာ ဒိဋ္ဌိ ဒိဋ္ဌိဂတံ။ပေ။ တိတ္ထာယတနံ ဝိပရိယာသဂ္ဂါဟော – ဣဒံ ဝုစ္စတိ ‘‘တဏှာပစ္စယာ ဥပါဒါနံ တဏှာဟေတုကံ’’။ပေ။ တေန ဝုစ္စတိ ‘‘ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတိ’’တိ.

၂၅၈. တသ္မိံ သမယေ အဝိဇ္ဇာပစ္စယာ သင်္ခါရော အဝိဇ္ဇာဟေတုကော၊ သင်္ခါရပစ္စယာ ဝိညာဏံ သင်္ခါရဟေတုကံ၊ ဝိညာဏပစ္စယာ နာမံ ဝိညာဏဟေတုကံ၊ နာမပစ္စယာ ဖဿော နာမဟေတုကော၊ ဖဿပစ္စယာ ဝေဒနာ ဖဿဟေတုကာ၊ ဝေဒနာပစ္စယာ တဏှာ ဝေဒနာဟေတုကာ၊ တဏှာပစ္စယာ ဥပါဒါနံ တဏှာဟေတုကံ၊ ဥပါဒါနပစ္စယာ ဘဝေါ၊ ဘဝပစ္စယာ ဇာတိ၊ ဇာတိပစ္စယာ ဇရာမရဏံ. ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတိ.

၂၅၉. တတ္ထ ကတမာ အဝိဇ္ဇာ? ယံ အညာဏံ အဒဿနံ။ပေ။ အဝိဇ္ဇာလင်္ဂီ မောဟော အကုသလမူလံ – အယံ ဝုစ္စတိ ‘‘အဝိဇ္ဇာ’’.

တတ္ထ ကတမော အဝိဇ္ဇာပစ္စယာ သင်္ခါရော အဝိဇ္ဇာဟေတုကော? ယာ စေတနာ သဉ္စေတနာ သဉ္စေတယိတတ္တံ – အယံ ဝုစ္စတိ ‘‘အဝိဇ္ဇာပစ္စယာ သင်္ခါရော အဝိဇ္ဇာဟေတုကော’’.

တတ္ထ ကတမံ သင်္ခါရပစ္စယာ ဝိညာဏံ သင်္ခါရဟေတုကံ? ယံ စိတ္တံ မနော မာနသံ။ပေ။ တဇ္ဇာမနောဝိညာဏဓာတု – ဣဒံ ဝုစ္စတိ သင်္ခါရပစ္စယာ ဝိညာဏံ သင်္ခါရဟေတုကံ.

တတ္ထ ကတမံ ဝိညာဏပစ္စယာ နာမံ ဝိညာဏဟေတုကံ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော – ဣဒံ ဝုစ္စတိ ‘‘ဝိညာဏပစ္စယာ နာမံ ဝိညာဏဟေတုကံ’’.

နာမပစ္စယာ ဖဿော နာမဟေတုကောတိ. တတ္ထ ကတမံ နာမံ? ဌပေတွာ ဖဿံ၊ ဝေဒနာက္ခန္ဓော သညာက္ခန္ဓော သင်္ခါရက္ခန္ဓော ဝိညာဏက္ခန္ဓော – ဣဒံ ဝုစ္စတိ ‘‘နာမံ’’.

တတ္ထ ကတမော နာမပစ္စယာ ဖဿော နာမဟေတုကော? ယော ဖဿော ဖုသနာ သမ္ဖုသနာ သမ္ဖုသိတတ္တံ – အယံ ဝုစ္စတိ ‘‘နာမပစ္စယာ ဖဿော နာမဟေတုကော’’။ပေ။ တေန ဝုစ္စတိ ‘‘ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတီ’’တိ.

၂၆၀. တသ္မိံ သမယေ အဝိဇ္ဇာပစ္စယာ သင်္ခါရော အဝိဇ္ဇာဟေတုကော၊ သင်္ခါရပစ္စယာ ဝိညာဏံ သင်္ခါရဟေတုကံ၊ ဝိညာဏပစ္စယာ နာမရူပံ ဝိညာဏဟေတုကံ၊ နာမရူပပစ္စယာ ဆဋ္ဌာယတနံ နာမရူပဟေတုကံ၊ ဆဋ္ဌာယတနပစ္စယာ ဖဿော ဆဋ္ဌာယတနဟေတုကော၊ ဖဿပစ္စယာ ဝေဒနာ ဖဿဟေတုကာ၊ ဝေဒနာပစ္စယာ တဏှာ ဝေဒနာဟေတုကာ၊ တဏှာပစ္စယာ ဥပါဒါနံ တဏှာဟေတုကံ၊ ဥပါဒါနပစ္စယာ ဘဝေါ၊ ဘဝပစ္စယာ ဇာတိ၊ ဇာတိပစ္စယာ ဇရာမရဏံ. ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတိ.

၂၆၁. တတ္ထ ကတမာ အဝိဇ္ဇာ? ယံ အညာဏံ အဒဿနံ။ပေ။ အဝိဇ္ဇာလင်္ဂီ မောဟော အကုသလမူလံ – အယံ ဝုစ္စတိ ‘‘အဝိဇ္ဇာ’’.

တတ္ထ ကတမော အဝိဇ္ဇာပစ္စယာ သင်္ခါရော အဝိဇ္ဇာဟေတုကော? ယာ စေတနာ သဉ္စေတနာ သဉ္စေတယိတတ္တံ – အယံ ဝုစ္စတိ ‘‘အဝိဇ္ဇာပစ္စယာ သင်္ခါရော အဝိဇ္ဇာဟေတုကော’’.

တတ္ထ ကတမံ သင်္ခါရပစ္စယာ ဝိညာဏံ သင်္ခါရဟေတုကံ? ယံ စိတ္တံ မနော မာနသံ။ပေ။ တဇ္ဇာမနောဝိညာဏဓာတု – ဣဒံ ဝုစ္စတိ ‘‘သင်္ခါရပစ္စယာ ဝိညာဏံ သင်္ခါရဟေတုကံ’’.

တတ္ထ ကတမံ ဝိညာဏပစ္စယာ နာမရူပံ ဝိညာဏဟေတုကံ? အတ္ထိ နာမံ၊ အတ္ထိ ရူပံ. တတ္ထ ကတမံ နာမံ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော – ဣဒံ ဝုစ္စတိ ‘‘နာမံ’’. တတ္ထ ကတမံ ရူပံ? စက္ခာယတနဿ ဥပစယော၊ သောတာယတနဿ ဥပစယော၊ ဃာနာယတနဿ ဥပစယော၊ ဇိဝှါယတနဿ ဥပစယော၊ ကာယာယတနဿ ဥပစယော၊ ယံ ဝါ ပနညမ္ပိ အတ္ထိ ရူပံ စိတ္တဇံ စိတ္တဟေတုကံ စိတ္တသမုဋ္ဌာနံ – ဣဒံ ဝုစ္စတိ ‘‘ရူပံ’’. ဣတိ ဣဒဉ္စ နာမံ၊ ဣဒဉ္စ ရူပံ. ဣဒံ ဝုစ္စတိ ‘‘ဝိညာဏပစ္စယာ နာမရူပံ ဝိညာဏဟေတုကံ’’.

နာမရူပပစ္စယာ ဆဋ္ဌာယတနံ နာမရူပဟေတုကန္တိ. အတ္ထိ နာမံ၊ အတ္ထိ ရူပံ. တတ္ထ ကတမံ နာမံ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော – ဣဒံ ဝုစ္စတိ ‘‘နာမံ’’. တတ္ထ ကတမံ ရူပံ? ယံ ရူပံ နိဿာယ မနောဝိညာဏဓာတု ဝတ္တတိ – ဣဒံ ဝုစ္စတိ ‘‘ရူပံ’’. ဣတိ ဣဒဉ္စ နာမံ၊ ဣဒဉ္စ ရူပံ. ဣဒံ ဝုစ္စတိ ‘‘နာမရူပံ’’.

တတ္ထ ကတမံ နာမရူပပစ္စယာ ဆဋ္ဌာယတနံ နာမရူပဟေတုကံ? ယံ စိတ္တံ မနော မာနသံ။ပေ။ တဇ္ဇာမနောဝိညာဏဓာတု – ဣဒံ ဝုစ္စတိ ‘‘နာမရူပပစ္စယာ ဆဋ္ဌာယတနံ နာမရူပဟေတုကံ’’.

တတ္ထ ကတမော ဆဋ္ဌာယတနပစ္စယာ ဖဿော ဆဋ္ဌာယတနဟေတုကော? ယော ဖဿော ဖုသနာ သမ္ဖုသနာ သမ္ဖုသိတတ္တံ – အယံ ဝုစ္စတိ ‘‘ဆဋ္ဌာယတနပစ္စယာ ဖဿော ဆဋ္ဌာယတနဟေတုကော’’။ပေ။ တေန ဝုစ္စတိ ‘‘ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတီ’’တိ.

၂၆၂. တသ္မိံ သမယေ အဝိဇ္ဇာပစ္စယာ သင်္ခါရော အဝိဇ္ဇာဟေတုကော၊ သင်္ခါရပစ္စယာ ဝိညာဏံ သင်္ခါရဟေတုကံ ဝိညာဏပစ္စယာ နာမရူပံ ဝိညာဏဟေတုကံ၊ နာမရူပပစ္စယာ သဠာယတနံ နာမရူပဟေတုကံ၊ ဆဋ္ဌာယတနပစ္စယာ ဖဿော ဆဋ္ဌာယတနဟေတုကော၊ ဖဿပစ္စယာ ဝေဒနာ ဖဿဟေတုကာ၊ ဝေဒနာပစ္စယာ တဏှာ ဝေဒနာဟေတုကာ၊ တဏှာပစ္စယာ ဥပါဒါနံ တဏှာဟေတုကံ၊ ဥပါဒါနပစ္စယာ ဘဝေါ၊ ဘဝပစ္စယာ ဇာတိ၊ ဇာတိပစ္စယာ ဇရာမရဏံ. ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတိ.

၂၆၃. တတ္ထ ကတမာ အဝိဇ္ဇာ? ယံ အညာဏံ အဒဿနံ။ပေ။ အဝိဇ္ဇာလင်္ဂီ မောဟော အကုသလမူလံ – အယံ ဝုစ္စတိ ‘‘အဝိဇ္ဇာ’’.

တတ္ထ ကတမော အဝိဇ္ဇာပစ္စယာ သင်္ခါရော အဝိဇ္ဇာဟေတုကော? ယာ စေတနာ သဉ္စေတနာ သဉ္စေတယိတတ္တံ – အယံ ဝုစ္စတိ ‘‘အဝိဇ္ဇာပစ္စယာ သင်္ခါရော အဝိဇ္ဇာဟေတုကော’’.

တတ္ထ ကတမံ သင်္ခါရပစ္စယာ ဝိညာဏံ သင်္ခါရဟေတုကံ? ယံ စိတ္တံ မနော မာနသံ။ပေ။ တဇ္ဇာမနောဝိညာဏဓာတု – ဣဒံ ဝုစ္စတိ ‘‘သင်္ခါရပစ္စယာ ဝိညာဏံ သင်္ခါရဟေတုကံ’’.

တတ္ထ ကတမံ ဝိညာဏပစ္စယာ နာမရူပံ ဝိညာဏဟေတုကံ? အတ္ထိ နာမံ၊ အတ္ထိ ရူပံ. တတ္ထ ကတမံ နာမံ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော – ဣဒံ ဝုစ္စတိ ‘‘နာမံ’’. တတ္ထ ကတမံ ရူပံ? စက္ခာယတနဿ ဥပစယော၊ သောတာယတနဿ ဥပစယော၊ ဃာနာယတနဿ ဥပစယော၊ ဇိဝှါယတနဿ ဥပစယော၊ ကာယာယတနဿ ဥပစယော၊ ယံ ဝါ ပနညမ္ပိ အတ္ထိ ရူပံ စိတ္တဇံ စိတ္တဟေတုကံ စိတ္တသမုဋ္ဌာနံ – ဣဒံ ဝုစ္စတိ ‘‘ရူပံ’’. ဣတိ ဣဒဉ္စ နာမံ၊ ဣဒဉ္စ ရူပံ. ဣဒံ ဝုစ္စတိ ‘‘ဝိညာဏပစ္စယာ နာမရူပံ ဝိညာဏဟေတုကံ’’.

နာမရူပပစ္စယာ သဠာယတနံ နာမရူပဟေတုကန္တိ. အတ္ထိ နာမံ၊ အတ္ထိ ရူပံ. တတ္ထ ကတမံ နာမံ? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော – ဣဒံ ဝုစ္စတိ ‘‘နာမံ’’. တတ္ထ ကတမံ ရူပံ? စတ္တာရော စ မဟာဘူတာ၊ ယဉ္စ ရူပံ နိဿာယ မနောဝိညာဏဓာတု ဝတ္တတိ – ဣဒံ ဝုစ္စတိ ‘‘ရူပံ’’. ဣတိ ဣဒဉ္စ နာမံ၊ ဣဒဉ္စ ရူပံ. ဣဒံ ဝုစ္စတိ ‘‘နာမရူပံ’’.

တတ္ထ ကတမံ နာမရူပပစ္စယာ သဠာယတနံ နာမရူပဟေတုကံ? စက္ခာယတနံ၊ သောတာယတနံ၊ ဃာနာယတနံ၊ ဇိဝှါယတနံ၊ ကာယာယတနံ၊ မနာယတနံ – ဣဒံ ဝုစ္စတိ ‘‘နာမရူပပစ္စယာ သဠာယတနံ နာမရူပဟေတုကံ’’.

တတ္ထ ကတမော ဆဋ္ဌာယတနပစ္စယာ ဖဿော ဆဋ္ဌာယတနဟေတုကော? ယော ဖဿော ဖုသနာ သမ္ဖုသနာ သမ္ဖုသိတတ္တံ – အယံ ဝုစ္စတိ ‘‘ဆဋ္ဌာယတနပစ္စယာ ဖဿော ဆဋ္ဌာယတနဟေတုကော’’.

တတ္ထ ကတမာ ဖဿပစ္စယာ ဝေဒနာ ဖဿဟေတုကာ? ယံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – အယံ ဝုစ္စတိ ‘‘ဖဿပစ္စယာ ဝေဒနာ ဖဿဟေတုကာ’’.

တတ္ထ ကတမာ ဝေဒနာပစ္စယာ တဏှာ ဝေဒနာဟေတုကာ? ယော ရာဂေါ သာရာဂေါ။ပေ။ စိတ္တဿ သာရာဂေါ – အယံ ဝုစ္စတိ ‘‘ဝေဒနာပစ္စယာ တဏှာ ဝေဒနာဟေတုကာ’’.

တတ္ထ ကတမံ တဏှာပစ္စယာ ဥပါဒါနံ တဏှာဟေတုကံ? ယာ ဒိဋ္ဌိ ဒိဋ္ဌိဂတံ။ပေ။ တိတ္ထာယတနံ ဝိပရိယာသဂ္ဂါဟော – ဣဒံ ဝုစ္စတိ ‘‘တဏှာပစ္စယာ ဥပါဒါနံ တဏှာဟေတုကံ’’။ပေ။ တေန ဝုစ္စတိ ‘‘ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတီ’’တိ.

ဟေတုစတုက္ကံ.