၃. ဓာတုဝိဘင်္ဂေါ

၁. သုတ္တန္တဘာဇနီယံ

၁၇၂. ဆ ဓာတုယော – ပထဝီဓာတု [ပဌဝီဓာတု (သီ. သျာ.) ဧဝမုပရိပိ]၊ အာပေါဓာတု၊ တေဇောဓာတု၊ ဝါယောဓာတု၊ အာကာသဓာတု၊ ဝိညာဏဓာတု.

၁၇၃. တတ္ထ ကတမာ ပထဝီဓာတု? ပထဝီဓာတုဒွယံ – အတ္ထိ အဇ္ဈတ္တိကာ၊ အတ္ထိ ဗာဟိရာ. တတ္ထ ကတမာ အဇ္ဈတ္တိကာ ပထဝီဓာတု? ယံ အဇ္ဈတ္တံ ပစ္စတ္တံ ကက္ခဠံ ခရိဂတံ ကက္ခဠတ္တံ ကက္ခဠဘာဝေါ အဇ္ဈတ္တံ ဥပါဒိန္နံ၊ သေယျထိဒံ – ကေသာ လောမာ နခါ ဒန္တာ တစော မံသံ နှာရု [နဟာရု (သီ.)] အဋ္ဌိ အဋ္ဌိမိဉ္ဇံ [အဋ္ဌိမိဉ္ဇာ (သီ.)] ဝက္ကံ ဟဒယံ ယကနံ ကိလောမကံ ပိဟကံ ပပ္ဖါသံ အန္တံ အန္တဂုဏံ ဥဒရိယံ ကရီသံ၊ ယံ ဝါ ပနညမ္ပိ အတ္ထိ အဇ္ဈတ္တံ ပစ္စတ္တံ ကက္ခဠံ ခရိဂတံ ကက္ခဠတ္တံ ကက္ခဠဘာဝေါ အဇ္ဈတ္တံ ဥပါဒိန္နံ – အယံ ဝုစ္စတိ ‘အဇ္ဈတ္တိကာ ပထဝီဓာတု’.

တတ္ထ ကတမာ ဗာဟိရာ ပထဝီဓာတု? ယံ ဗာဟိရံ ကက္ခဠံ ခရိဂတံ ကက္ခဠတ္တံ ကက္ခဠဘာဝေါ ဗဟိဒ္ဓါ အနုပါဒိန္နံ၊ သေယျထိဒံ – အယော လောဟံ တိပု သီသံ သဇ္ဈံ [သဇ္ဈု (သျာ.)] မုတ္တာ မဏိ ဝေဠုရိယော သင်္ခေါ သိလာ ပဝါဠံ ရဇတံ ဇာတရူပံ လောဟိတင်္ကော [လောဟိတင်္ဂေါ (သျာ. က.)၊ လောဟိတကော (?)] မသာရဂလ္လံ တိဏံ ကဋ္ဌံ သက္ခရာ ကဌလံ [ကထလံ (က.)] ဘူမိ ပါသာဏော ပဗ္ဗတော၊ ယံ ဝါ ပနညမ္ပိ အတ္ထိ ဗာဟိရံ ကက္ခဠံ ခရိဂတံ ကက္ခဠတ္တံ ကက္ခဠဘာဝေါ ဗဟိဒ္ဓါ အနုပါဒိန္နံ – အယံ ဝုစ္စတိ ‘ဗာဟိရာ ပထဝီဓာတု’. ယာ စ အဇ္ဈတ္တိကာ ပထဝီဓာတု ယာ စ ဗာဟိရာ ပထဝီဓာတု၊ တဒေကဇ္ဈံ အဘိသညူဟိတွာ အဘိသင်္ခိပိတွာ – အယံ ဝုစ္စတိ ‘‘ပထဝီဓာတု’’.

၁၇၄. တတ္ထ ကတမာ အာပေါဓာတု? အာပေါဓာတုဒွယံ – အတ္ထိ အဇ္ဈတ္တိကာ၊ အတ္ထိ ဗာဟိရာ. တတ္ထ ကတမာ အဇ္ဈတ္တိကာ အာပေါဓာတု? ယံ အဇ္ဈတ္တံ ပစ္စတ္တံ အာပေါ အာပေါဂတံ သိနေဟော သိနေဟဂတံ [သ္နေဟော သ္နေဟဂတံ (သျာ.)] ဗန္ဓနတ္တံ ရူပဿ အဇ္ဈတ္တံ ဥပါဒိန္နံ၊ သေယျထိဒံ – ပိတ္တံ သေမှံ ပုဗ္ဗော လောဟိတံ သေဒေါ မေဒေါ အဿု ဝသာ ခေဠော သိင်္ဃာဏိကာ လသိကာ မုတ္တံ၊ ယံ ဝါ ပနညမ္ပိ အတ္ထိ အဇ္ဈတ္တံ ပစ္စတ္တံ အာပေါ အာပေါဂတံ သိနေဟော သိနေဟဂတံ ဗန္ဓနတ္တံ ရူပဿ အဇ္ဈတ္တံ ဥပါဒိန္နံ – အယံ ဝုစ္စတိ ‘အဇ္ဈတ္တိကာ အာပေါဓာတု’.

တတ္ထ ကတမာ ဗာဟိရာ အာပေါဓာတု? ယံ ဗာဟိရံ အာပေါ အာပေါဂတံ သိနေဟော သိနေဟဂတံ ဗန္ဓနတ္တံ ရူပဿ ဗဟိဒ္ဓါ အနုပါဒိန္နံ၊ သေယျထိဒံ – မူလရသော ခန္ဓရသော တစရသော ပတ္တရသော ပုပ္ဖရသော ဖလရသော ခီရံ ဒဓိ သပ္ပိ နဝနီတံ တေလံ မဓု ဖာဏိတံ ဘုမ္မာနိ ဝါ ဥဒကာနိ အန္တလိက္ခာနိ ဝါ၊ ယံ ဝါ ပနညမ္ပိ အတ္ထိ ဗာဟိရံ အာပေါ အာပေါဂတံ သိနေဟော သိနေဟဂတံ ဗန္ဓနတ္တံ ရူပဿ ဗဟိဒ္ဓါ အနုပါဒိန္နံ – အယံ ဝုစ္စတိ ‘ဗာဟိရာ အာပေါဓာတု’. ယာ စ အဇ္ဈတ္တိကာ အာပေါဓာတု ယာ စ ဗာဟိရာ အာပေါဓာတု၊ တဒေကဇ္ဈံ အဘိသညူဟိတွာ အဘိသင်္ခိပိတွာ – အယံ ဝုစ္စတိ ‘‘အာပေါဓာတု’’.

၁၇၅. တတ္ထ ကတမာ တေဇောဓာတု? တေဇောဓာတုဒွယံ – အတ္ထိ အဇ္ဈတ္တိကာ၊ အတ္ထိ ဗာဟိရာ. တတ္ထ ကတမာ အဇ္ဈတ္တိကာ တေဇောဓာတု? ယံ အဇ္ဈတ္တံ ပစ္စတ္တံ တေဇော တေဇောဂတံ ဥသ္မာ ဥသ္မာဂတံ ဥသုမံ ဥသုမဂတံ အဇ္ဈတ္တံ ဥပါဒိန္နံ၊ သေယျထိဒံ – ယေန စ သန္တပ္ပတိ ယေန စ ဇီရီယတိ ယေန စ ပရိဍယှတိ ယေန စ အသိတပီတခါယိတသာယိတံ သမ္မာ ပရိဏာမံ ဂစ္ဆတိ၊ ယံ ဝါ ပနညမ္ပိ အတ္ထိ အဇ္ဈတ္တံ ပစ္စတ္တံ တေဇော တေဇောဂတံ ဥသ္မာ ဥသ္မာဂတံ ဥသုမံ ဥသုမဂတံ အဇ္ဈတ္တံ ဥပါဒိန္နံ – အယံ ဝုစ္စတိ ‘အဇ္ဈတ္တိကာ တေဇောဓာတု’.

တတ္ထ ကတမာ ဗာဟိရာ တေဇောဓာတု? ယံ ဗာဟိရံ တေဇော တေဇောဂတံ ဥသ္မာ ဥသ္မာဂတံ ဥသုမံ ဥသုမဂတံ ဗဟိဒ္ဓါ အနုပါဒိန္နံ၊ သေယျထိဒံ – ကဋ္ဌဂ္ဂိ ပလာလဂ္ဂိ [သကလိကဂ္ဂိ (သဗ္ဗတ္ထ)] တိဏဂ္ဂိ ဂေါမယဂ္ဂိ ထုသဂ္ဂိ သင်္ကာရဂ္ဂိ ဣန္ဒဂ္ဂိ အဂ္ဂိသန္တာပေါ သူရိယသန္တာပေါ ကဋ္ဌသန္နိစယသန္တာပေါ တိဏသန္နိစယသန္တာပေါ ဓညသန္နိစယသန္တာပေါ ဘဏ္ဍသန္နိစယသန္တာပေါ၊ ယံ ဝါ ပနညမ္ပိ အတ္ထိ ဗာဟိရံ တေဇော တေဇောဂတံ ဥသ္မာ ဥသ္မာဂတံ ဥသုမံ ဥသုမဂတံ ဗဟိဒ္ဓါ အနုပါဒိန္နံ – အယံ ဝုစ္စတိ ‘ဗာဟိရာ တေဇောဓာတု’. ယာ စ အဇ္ဈတ္တိကာ တေဇောဓာတု ယာ စ ဗာဟိရာ တေဇောဓာတု၊ တဒေကဇ္ဈံ အဘိသညူဟိတွာ အဘိသင်္ခိပိတွာ – အယံ ဝုစ္စတိ ‘‘တေဇောဓာတု’’.

၁၇၆. တတ္ထ ကတမာ ဝါယောဓာတု? ဝါယောဓာတုဒွယံ – အတ္ထိ အဇ္ဈတ္တိကာ၊ အတ္ထိ ဗာဟိရာ. တတ္ထ ကတမာ အဇ္ဈတ္တိကာ ဝါယောဓာတု? ယံ အဇ္ဈတ္တံ ပစ္စတ္တံ ဝါယော ဝါယောဂတံ ထမ္ဘိတတ္တံ ရူပဿ အဇ္ဈတ္တံ ဥပါဒိန္နံ၊ သေယျထိဒံ – ဥဒ္ဓင်္ဂမာ ဝါတာ အဓောဂမာ ဝါတာ ကုစ္ဆိသယာ ဝါတာ ကောဋ္ဌာသယာ [ကောဋ္ဌသယာ (သီ. သျာ.)] ဝါတာ အင်္ဂမင်္ဂါနုသာရိနော ဝါတာ သတ္ထကဝါတာ ခုရကဝါတာ ဥပ္ပလကဝါတာ အဿာသော ပဿာသော ဣတိ ဝါ၊ ယံ ဝါ ပနညမ္ပိ အတ္ထိ အဇ္ဈတ္တံ ပစ္စတ္တံ ဝါယော ဝါယောဂတံ ထမ္ဘိတတ္တံ ရူပဿ အဇ္ဈတ္တံ ဥပါဒိန္နံ – အယံ ဝုစ္စတိ ‘အဇ္ဈတ္တိကာ ဝါယောဓာတု’.

တတ္ထ ကတမာ ဗာဟိရာ ဝါယောဓာတု? ယံ ဗာဟိရံ ဝါယော ဝါယောဂတံ ထမ္ဘိတတ္တံ ရူပဿ ဗဟိဒ္ဓါ အနုပါဒိန္နံ၊ သေယျထိဒံ – ပုရတ္ထိမာ ဝါတာ ပစ္ဆိမာ ဝါတာ ဥတ္တရာ ဝါတာ ဒက္ခိဏာ ဝါတာ သရဇာ ဝါတာ အရဇာ ဝါတာ သီတာ ဝါတာ ဥဏှာ ဝါတာ ပရိတ္တာ ဝါတာ အဓိမတ္တာ ဝါတာ ကာဠဝါတာ ဝေရမ္ဘဝါတာ ပက္ခဝါတာ သုပဏ္ဏဝါတာ တာလဝဏ္ဋဝါတာ ဝိဓူပနဝါတာ၊ ယံ ဝါ ပနညမ္ပိ အတ္ထိ ဗာဟိရံ ဝါယော ဝါယောဂတံ ထမ္ဘိတတ္တံ ရူပဿ ဗဟိဒ္ဓါ အနုပါဒိန္နံ – အယံ ဝုစ္စတိ ‘ဗာဟိရာ ဝါယောဓာတု’. ယာ စ အဇ္ဈတ္တိကာ ဝါယောဓာတု ယာ စ ဗာဟိရာ ဝါယောဓာတု၊ တဒေကဇ္ဈံ အဘိသညူဟိတွာ အဘိသင်္ခိပိတွာ – အယံ ဝုစ္စတိ ‘‘ဝါယောဓာတု’’.

၁၇၇. တတ္ထ ကတမာ အာကာသဓာတု? အာကာသဓာတုဒွယံ – အတ္ထိ အဇ္ဈတ္တိကာ၊ အတ္ထိ ဗာဟိရာ. တတ္ထ ကတမာ အဇ္ဈတ္တိကာ အာကာသဓာတု? ယံ အဇ္ဈတ္တံ ပစ္စတ္တံ အာကာသော အာကာသဂတံ အဃံ အဃဂတံ ဝိဝရော ဝိဝရဂတံ အသမ္ဖုဋ္ဌံ မံသလောဟိတေဟိ အဇ္ဈတ္တံ ဥပါဒိန္နံ၊ သေယျထိဒံ – ကဏ္ဏစ္ဆိဒ္ဒံ နာသစ္ဆိဒ္ဒံ မုခဒွါရံ၊ ယေန စ အသိတပီတခါယိတသာယိတံ အဇ္ဈောဟရတိ၊ ယတ္ထ စ အသိတပီတခါယိတသာယိတံ သန္တိဋ္ဌတိ၊ ယေန စ အသိတပီတခါယိတသာယိတံ အဓောဘာဂံ နိက္ခမတိ၊ ယံ ဝါ ပနညမ္ပိ အတ္ထိ အဇ္ဈတ္တံ ပစ္စတ္တံ အာကာသော အာကာသဂတံ အဃံ အဃဂတံ ဝိဝရော ဝိဝရဂတံ အသမ္ဖုဋ္ဌံ မံသလောဟိတေဟိ အဇ္ဈတ္တံ ဥပါဒိန္နံ – အယံ ဝုစ္စတိ ‘အဇ္ဈတ္တိကာ အာကာသဓာတု’.

တတ္ထ ကတမာ ဗာဟိရာ အာကာသဓာတု? ယံ ဗာဟိရံ အာကာသော အာကာသဂတံ အဃံ အဃဂတံ ဝိဝရော ဝိဝရဂတံ အသမ္ဖုဋ္ဌံ စတူဟိ မဟာဘူတေဟိ ဗဟိဒ္ဓါ အနုပါဒိန္နံ – အယံ ဝုစ္စတိ ‘ဗာဟိရာ အာကာသဓာတု’. ယာ စ အဇ္ဈတ္တိကာ အာကာသဓာတု ယာ စ ဗာဟိရာ အာကာသဓာတု၊ တဒေကဇ္ဈံ အဘိသညူဟိတွာ အဘိသင်္ခိပိတွာ – အယံ ဝုစ္စတိ ‘‘အာကာသဓာတု’’.

၁၇၈. တတ္ထ ကတမာ ဝိညာဏဓာတု? စက္ခုဝိညာဏဓာတု၊ သောတဝိညာဏဓာတု၊ ဃာနဝိညာဏဓာတု၊ ဇိဝှါဝိညာဏဓာတု၊ ကာယဝိညာဏဓာတု၊ မနောဝိညာဏဓာတု – အယံ ဝုစ္စတိ ‘‘ဝိညာဏဓာတု’’.

ဣမာ ဆ ဓာတုယော.

၁၇၉. အပရာပိ ဆ ဓာတုယော – သုခဓာတု၊ ဒုက္ခဓာတု၊ သောမနဿဓာတု၊ ဒေါမနဿဓာတု၊ ဥပေက္ခာဓာတု၊ အဝိဇ္ဇာဓာတု.

၁၈၀. တတ္ထ ကတမာ သုခဓာတု? ယံ ကာယိကံ သာတံ ကာယိကံ သုခံ ကာယသမ္ဖဿဇံ သာတံ သုခံ ဝေဒယိတံ ကာယသမ္ဖဿဇာ သာတာ သုခါ ဝေဒနာ – အယံ ဝုစ္စတိ ‘‘သုခဓာတု’’.

တတ္ထ ကတမာ ဒုက္ခဓာတု? ယံ ကာယိကံ အသာတံ ကာယိကံ ဒုက္ခံ ကာယသမ္ဖဿဇံ အသာတံ ဒုက္ခံ ဝေဒယိတံ ကာယသမ္ဖဿဇာ အသာတာ ဒုက္ခာ ဝေဒနာ – အယံ ဝုစ္စတိ ‘‘ဒုက္ခဓာတု’’.

တတ္ထ ကတမာ သောမနဿဓာတု? ယံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – အယံ ဝုစ္စတိ ‘‘သောမနဿဓာတု’’.

တတ္ထ ကတမာ ဒေါမနဿဓာတု? ယံ စေတသိကံ အသာတံ စေတသိကံ ဒုက္ခံ စေတောသမ္ဖဿဇံ အသာတံ ဒုက္ခံ ဝေဒယိတံ စေတောသမ္ဖဿဇာ အသာတာ ဒုက္ခာ ဝေဒနာ – အယံ ဝုစ္စတိ ‘‘ဒေါမနဿဓာတု’’.

တတ္ထ ကတမာ ဥပေက္ခာဓာတု? ယံ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – အယံ ဝုစ္စတိ ‘‘ဥပေက္ခာဓာတု’’.

တတ္ထ ကတမာ အဝိဇ္ဇာဓာတု? ယံ အညာဏံ အဒဿနံ အနဘိသမယော အနနုဗောဓော အသမ္ဗောဓော အပ္ပဋိဝေဓော အသင်္ဂါဟဏာ အပရိယောဂါဟဏာ အသမပေက္ခနာ အပစ္စဝေက္ခဏာ အပစ္စက္ခကမ္မံ ဒုမ္မေဇ္ဈံ ဗာလျံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင်္ဂီ မောဟော အကုသလမူလံ – အယံ ဝုစ္စတိ ‘‘အဝိဇ္ဇာဓာတု’’.

ဣမာ ဆ ဓာတုယော.

၁၈၁. အပရာပိ ဆ ဓာတုယော – ကာမဓာတု၊ ဗျာပါဒဓာတု၊ ဝိဟိံသာဓာတု၊ နေက္ခမ္မဓာတု၊ အဗျာပါဒဓာတု၊ အဝိဟိံသာဓာတု.

၁၈၂. တတ္ထ ကတမာ ကာမဓာတု? ကာမပဋိသံယုတ္တော တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ မိစ္ဆာသင်္ကပ္ပေါ – အယံ ဝုစ္စတိ ကာမဓာတု. ဟေဋ္ဌတော အဝီစိနိရယံ ပရိယန္တံ ကရိတွာ ဥပရိတော ပရနိမ္မိတဝသဝတ္တီ ဒေဝေ အန္တော ကရိတွာ ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ ခန္ဓဓာတုအာယတနာ ရူပါ [ရူပံ (သျာ.)] ဝေဒနာ သညာ သင်္ခါရာ ဝိညာဏံ – အယံ ဝုစ္စတိ ‘‘ကာမဓာတု’’.

တတ္ထ ကတမာ ဗျာပါဒဓာတု? ဗျာပါဒပဋိသံယုတ္တော တက္ကော ဝိတက္ကော။ပေ။ မိစ္ဆာသင်္ကပ္ပေါ – အယံ ဝုစ္စတိ ‘‘ဗျာပါဒဓာတု’’. ဒသသု ဝါ အာဃာတဝတ္ထူသု စိတ္တဿ အာဃာတော ပဋိဃာတော ပဋိဃံ ပဋိဝိရောဓော ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓော ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဝိရောဓော ပဋိဝိရောဓော စဏ္ဍိက္ကံ အသုရောပေါ အနတ္တမနတာ စိတ္တဿ – အယံ ဝုစ္စတိ ‘‘ဗျာပါဒဓာတု’’.

တတ္ထ ကတမာ ဝိဟိံသာဓာတု? ဝိဟိံသာပဋိသံယုတ္တော တက္ကော ဝိတက္ကော။ပေ။ မိစ္ဆာသင်္ကပ္ပေါ – အယံ ဝုစ္စတိ ‘‘ဝိဟိံသာဓာတု’’. ဣဓေကစ္စော ပါဏိနာ ဝါ လေဍ္ဍုနာ ဝါ ဒဏ္ဍေန ဝါ သတ္ထေန ဝါ ရဇ္ဇုယာ ဝါ အညတရညတရေန သတ္တေ ဝိဟေဌေတိ၊ ယာ ဧဝရူပါ ဟေဌနာ ဝိဟေဌနာ ဟိံသနာ ဝိဟိံသနာ ရောသနာ ဝိရောသနာ ပရူပဃာတော – အယံ ဝုစ္စတိ ‘‘ဝိဟိံသာဓာတု’’.

တတ္ထ ကတမာ နေက္ခမ္မဓာတု? နေက္ခမ္မပဋိသံယုတ္တော တက္ကော ဝိတက္ကော။ပေ။ သမ္မာသင်္ကပ္ပေါ – အယံ ဝုစ္စတိ ‘‘နေက္ခမ္မဓာတု’’. သဗ္ဗေပိ ကုသလာ ဓမ္မာ ‘‘နေက္ခမ္မဓာတု’’.

တတ္ထ ကတမာ အဗျာပါဒဓာတု? အဗျာပါဒပဋိသံယုတ္တော တက္ကော ဝိတက္ကော။ပေ။ သမ္မာသင်္ကပ္ပေါ – အယံ ဝုစ္စတိ ‘‘အဗျာပါဒဓာတု’’. ယာ သတ္တေသု မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘အဗျာပါဒဓာတု’’.

တတ္ထ ကတမာ အဝိဟိံသာဓာတု? အဝိဟိံသာပဋိသံယုတ္တော တက္ကော ဝိတက္ကော သင်္ကပ္ပေါ အပ္ပနာ ဗျပ္ပနာ စေတသော အဘိနိရောပနာ သမ္မာသင်္ကပ္ပေါ – အယံ ဝုစ္စတိ ‘‘အဝိဟိံသာဓာတု’’. ယာ သတ္တေသု ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘အဝိဟိံသာဓာတု’’.

ဣမာ ဆ ဓာတုယော.

ဣတိ ဣမာနိ တီဏိ ဆက္ကာနိ တဒေကဇ္ဈံ အဘိသညူဟိတွာ အဘိသင်္ခိပိတွာ အဋ္ဌာရသ ဓာတုယော ဟောန္တိ.

သုတ္တန္တဘာဇနီယံ.

၂. အဘိဓမ္မဘာဇနီယံ

၁၈၃. အဋ္ဌာရသ ဓာတုယော – စက္ခုဓာတု၊ ရူပဓာတု၊ စက္ခုဝိညာဏဓာတု၊ သောတဓာတု၊ သဒ္ဒဓာတု၊ သောတဝိညာဏဓာတု၊ ဃာနဓာတု၊ ဂန္ဓဓာတု၊ ဃာနဝိညာဏဓာတု၊ ဇိဝှါဓာတု၊ ရသဓာတု၊ ဇိဝှါဝိညာဏဓာတု၊ ကာယဓာတု၊ ဖောဋ္ဌဗ္ဗဓာတု၊ ကာယဝိညာဏဓာတု၊ မနောဓာတု၊ ဓမ္မဓာတု၊ မနောဝိညာဏဓာတု.

၁၈၄. တတ္ထ ကတမာ စက္ခုဓာတု? ယံ စက္ခု စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမောပေသော – အယံ ဝုစ္စတိ ‘‘စက္ခုဓာတု’’.

တတ္ထ ကတမာ ရူပဓာတု? ယံ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ။ပေ။ ရူပဓာတုပေသာ – အယံ ဝုစ္စတိ ‘‘ရူပဓာတု’’.

တတ္ထ ကတမာ စက္ခုဝိညာဏဓာတု? စက္ခုဉ္စ ပဋိစ္စ ရူပေ စ ဥပ္ပဇ္ဇတိ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာစက္ခုဝိညာဏဓာတု – အယံ ဝုစ္စတိ ‘‘စက္ခုဝိညာဏဓာတု’’.

တတ္ထ ကတမာ သောတဓာတု? ယံ သောတံ စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမောပေသော – အယံ ဝုစ္စတိ ‘‘သောတဓာတု’’.

တတ္ထ ကတမာ သဒ္ဒဓာတု? ယော သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော။ပေ။ သဒ္ဒဓာတုပေသာ – အယံ ဝုစ္စတိ ‘‘သဒ္ဒဓာတု’’.

တတ္ထ ကတမာ သောတဝိညာဏဓာတု? သောတဉ္စ ပဋိစ္စ သဒ္ဒေ စ ဥပ္ပဇ္ဇတိ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာသောတဝိညာဏဓာတု – အယံ ဝုစ္စတိ ‘‘သောတဝိညာဏဓာတု’’.

တတ္ထ ကတမာ ဃာနဓာတု? ယံ ဃာနံ စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမောပေသော – အယံ ဝုစ္စတိ ‘‘ဃာနဓာတု’’.

တတ္ထ ကတမာ ဂန္ဓဓာတု? ယော ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော။ပေ။ ဂန္ဓဓာတုပေသာ – အယံ ဝုစ္စတိ ‘‘ဂန္ဓဓာတု’’.

တတ္ထ ကတမာ ဃာနဝိညာဏဓာတု? ဃာနဉ္စ ပဋိစ္စ ဂန္ဓေ စ ဥပ္ပဇ္ဇတိ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာဃာနဝိညာဏဓာတု – အယံ ဝုစ္စတိ ‘‘ဃာနဝိညာဏဓာတု’’.

တတ္ထ ကတမာ ဇိဝှါဓာတု? ယာ ဇိဝှါ စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမောပေသော – အယံ ဝုစ္စတိ ‘‘ဇိဝှါဓာတု’’.

တတ္ထ ကတမာ ရသဓာတု? ယော ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော။ပေ။ ရသဓာတုပေသာ – အယံ ဝုစ္စတိ ‘‘ရသဓာတု’’.

တတ္ထ ကတမာ ဇိဝှါဝိညာဏဓာတု? ဇိဝှဉ္စ ပဋိစ္စ ရသေ စ ဥပ္ပဇ္ဇတိ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာဇိဝှါဝိညာဏဓာတု – အယံ ဝုစ္စတိ ‘‘ဇိဝှါဝိညာဏဓာတု’’.

တတ္ထ ကတမာ ကာယဓာတု? ယော ကာယော စတုန္နံ မဟာဘူတာနံ ဥပါဒါယ ပသာဒေါ။ပေ။ သုညော ဂါမောပေသော – အယံ ဝုစ္စတိ ‘‘ကာယဓာတု’’.

တတ္ထ ကတမာ ဖောဋ္ဌဗ္ဗဓာတု? ပထဝီဓာတု။ပေ။ ဖောဋ္ဌဗ္ဗဓာတုပေသာ – အယံ ဝုစ္စတိ ‘‘ဖောဋ္ဌဗ္ဗဓာတု’’.

တတ္ထ ကတမာ ကာယဝိညာဏဓာတု? ကာယဉ္စ ပဋိစ္စ ဖောဋ္ဌဗ္ဗေ စ ဥပ္ပဇ္ဇတိ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာကာယဝိညာဏဓာတု – အယံ ဝုစ္စတိ ‘‘ကာယဝိညာဏဓာတု’’.

တတ္ထ ကတမာ မနောဓာတု? စက္ခုဝိညာဏဓာတုယာ ဥပ္ပဇ္ဇိတွာ နိရုဒ္ဓသမနန္တရာ ဥပ္ပဇ္ဇတိ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဓာတု၊ သောတဝိညာဏဓာတုယာ။ပေ။ ဃာနဝိညာဏဓာတုယာ။ပေ။ ဇိဝှါဝိညာဏဓာတုယာ။ပေ။ ကာယဝိညာဏဓာတုယာ ဥပ္ပဇ္ဇိတွာ နိရုဒ္ဓသမနန္တရာ ဥပ္ပဇ္ဇတိ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဓာတု သဗ္ဗဓမ္မေသု ဝါ ပန ပဌမသမန္နာဟာရော ဥပ္ပဇ္ဇတိ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဓာတု – အယံ ဝုစ္စတိ ‘‘မနောဓာတု’’.

တတ္ထ ကတမာ ဓမ္မဓာတု? ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ယဉ္စ ရူပံ အနိဒဿနအပ္ပဋိဃံ ဓမ္မာယတနပရိယာပန္နံ၊ အသင်္ခတာ စ ဓာတု.

တတ္ထ ကတမော ဝေဒနာက္ခန္ဓော? ဧကဝိဓေန ဝေဒနာက္ခန္ဓော – ဖဿသမ္ပယုတ္တော. ဒုဝိဓေန ဝေဒနာက္ခန္ဓော – အတ္ထိ သဟေတုကော၊ အတ္ထိ အဟေတုကော. တိဝိဓေန ဝေဒနာက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော။ပေ။ ဧဝံ ဒသဝိဓေန ဝေဒနာက္ခန္ဓော။ပေ။ ဧဝံ ဗဟုဝိဓေန ဝေဒနာက္ခန္ဓော. အယံ ဝုစ္စတိ ‘‘ဝေဒနာက္ခန္ဓော’’.

တတ္ထ ကတမော သညာက္ခန္ဓော? ဧကဝိဓေန သညာက္ခန္ဓော – ဖဿသမ္ပယုတ္တော. ဒုဝိဓေန သညာက္ခန္ဓော – အတ္ထိ သဟေတုကော၊ အတ္ထိ အဟေတုကော. တိဝိဓေန သညာက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော။ပေ။ ဧဝံ ဒသဝိဓေန သညာက္ခန္ဓော။ပေ။ ဧဝံ ဗဟုဝိဓေန သညာက္ခန္ဓော. အယံ ဝုစ္စတိ ‘‘သညာက္ခန္ဓော’’.

တတ္ထ ကတမော သင်္ခါရက္ခန္ဓော? ဧကဝိဓေန သင်္ခါရက္ခန္ဓော – စိတ္တသမ္ပယုတ္တော. ဒုဝိဓေန သင်္ခါရက္ခန္ဓော – အတ္ထိ ဟေတု၊ အတ္ထိ အဟေတု. တိဝိဓေန သင်္ခါရက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော။ပေ။ ဧဝံ ဒသဝိဓေန သင်္ခါရက္ခန္ဓော။ပေ။ ဧဝံ ဗဟုဝိဓေန သင်္ခါရက္ခန္ဓော – အယံ ဝုစ္စတိ ‘‘သင်္ခါရက္ခန္ဓော’’.

တတ္ထ ကတမံ ရူပံ အနိဒဿနအပ္ပဋိဃံ ဓမ္မာယတနပရိယာပန္နံ? ဣတ္ထိန္ဒြိယံ။ပေ။ ကဗဠီကာရော အာဟာရော – ဣဒံ ဝုစ္စတိ ရူပံ ‘‘အနိဒဿနအပ္ပဋိဃံ ဓမ္မာယတနပရိယာပန္နံ’’.

တတ္ထ ကတမာ အသင်္ခတာ ဓာတု? ရာဂက္ခယော၊ ဒေါသက္ခယော၊ မောဟက္ခယော – အယံ ဝုစ္စတိ ‘‘အသင်္ခတာ ဓာတု’’. အယံ ဝုစ္စတိ ‘‘ဓမ္မဓာတု’’.

တတ္ထ ကတမာ မနောဝိညာဏဓာတု? စက္ခုဝိညာဏဓာတုယာ ဥပ္ပဇ္ဇိတွာ နိရုဒ္ဓသမနန္တရာ ဥပ္ပဇ္ဇတိ မနောဓာတု၊ မနောဓာတုယာ ဥပ္ပဇ္ဇိတွာ နိရုဒ္ဓသမနန္တရာ ဥပ္ပဇ္ဇတိ စိတ္တံ မနော မာနသံ။ပေ။ တဇ္ဇာမနောဝိညာဏဓာတု၊ သောတဝိညာဏဓာတုယာ။ပေ။ ဃာနဝိညာဏဓာတုယာ ။ပေ။ ဇိဝှါဝိညာဏဓာတုယာ။ပေ။ ကာယဝိညာဏဓာတုယာ ဥပ္ပဇ္ဇိတွာ နိရုဒ္ဓသမနန္တရာ ဥပ္ပဇ္ဇတိ မနောဓာတု၊ မနောဓာတုယာပိ ဥပ္ပဇ္ဇိတွာ နိရုဒ္ဓသမနန္တရာ ဥပ္ပဇ္ဇတိ စိတ္တံ မနော မာနသံ။ပေ။ တဇ္ဇာမနောဝိညာဏဓာတု မနဉ္စ ပဋိစ္စ ဓမ္မေ စ ဥပ္ပဇ္ဇတိ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒြိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓာတု – အယံ ဝုစ္စတိ ‘‘မနောဝိညာဏဓာတု’’.

အဘိဓမ္မဘာဇနီယံ.

၃. ပဉှာပုစ္ဆကံ

အဋ္ဌာရသ ဓာတုယော – စက္ခုဓာတု၊ ရူပဓာတု၊ စက္ခုဝိညာဏဓာတု၊ သောတဓာတု၊ သဒ္ဒဓာတု၊ သောတဝိညာဏဓာတု၊ ဃာနဓာတု၊ ဂန္ဓဓာတု၊ ဃာနဝိညာဏဓာတု၊ ဇိဝှါဓာတု၊ ရသဓာတု၊ ဇိဝှါဝိညာဏဓာတု၊ ကာယဓာတု၊ ဖောဋ္ဌဗ္ဗဓာတု၊ ကာယဝိညာဏဓာတု၊ မနောဓာတု၊ ဓမ္မဓာတု၊ မနောဝိညာဏဓာတု.

၁၈၆. အဋ္ဌာရသန္နံ ဓာတူနံ ကတိ ကုသလာ၊ ကတိ အကုသလာ၊ ကတိ အဗျာကတာ။ပေ။ ကတိ သရဏာ၊ ကတိ အရဏာ?

၁. တိကံ

၁၈၇. သောဠသ ဓာတုယော အဗျာကတာ. ဒွေ ဓာတုယော သိယာ ကုသလာ၊ သိယာ အကုသလာ၊ သိယာ အဗျာကတာ. ဒသ ဓာတုယော န ဝတ္တဗ္ဗာ – ‘‘သုခါယ ဝေဒနာယ သမ္ပယုတ္တာ’’တိပိ၊ ‘‘ဒုက္ခာယ ဝေဒနာယ သမ္ပယုတ္တာ’’တိပိ၊ ‘‘အဒုက္ခမသုခါယ ဝေဒနာယ သမ္ပယုတ္တာ’’တိပိ. ပဉ္စ ဓာတုယော အဒုက္ခမသုခါယ ဝေဒနာယ သမ္ပယုတ္တာ. ကာယဝိညာဏဓာတု သိယာ သုခါယ ဝေဒနာယ သမ္ပယုတ္တာ၊ သိယာ ဒုက္ခာယ ဝေဒနာယ သမ္ပယုတ္တာ. မနောဝိညာဏဓာတု သိယာ သုခါယ ဝေဒနာယ သမ္ပယုတ္တာ၊ သိယာ ဒုက္ခာယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ. ဓမ္မဓာတု သိယာ သုခါယ ဝေဒနာယ သမ္ပယုတ္တာ၊ သိယာ ဒုက္ခာယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ၊ သိယာ န ဝတ္တဗ္ဗာ – ‘‘သုခါယ ဝေဒနာယ သမ္ပယုတ္တာ’’တိပိ၊ ‘‘ဒုက္ခာယ ဝေဒနာယ သမ္ပယုတ္တာ’’တိပိ၊ ‘‘အဒုက္ခမသုခါယ ဝေဒနာယ သမ္ပယုတ္တာ’’တိပိ.

ဒသ ဓာတုယော နေဝဝိပါကနဝိပါကဓမ္မဓမ္မာ. ပဉ္စ ဓာတုယော ဝိပါကာ. မနောဓာတု သိယာ ဝိပါကာ၊ သိယာ နေဝဝိပါကနဝိပါကဓမ္မဓမ္မာ. ဒွေ ဓာတုယော သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ.

ဒသ ဓာတုယော ဥပါဒိန္နုပါဒါနိယာ. သဒ္ဒဓာတု အနုပါဒိန္နုပါဒါနိယာ. ပဉ္စ ဓာတုယော သိယာ ဥပါဒိန္နုပါဒါနိယာ၊ သိယာ အနုပါဒိန္နုပါဒါနိယာ. ဒွေ ဓာတုယော သိယာ ဥပါဒိန္နုပါဒါနိယာ၊ သိယာ အနုပါဒိန္နုပါဒါနိယာ၊ သိယာ အနုပါဒိန္နအနုပါဒါနိယာ.

သောဠသ ဓာတုယော အသံကိလိဋ္ဌသံကိလေသိကာ. ဒွေ ဓာတုယော သိယာ သံကိလိဋ္ဌသံကိလေသိကာ၊ သိယာ အသံကိလိဋ္ဌသံကိလေသိကာ၊ သိယာ အသံကိလိဋ္ဌအသံကိလေသိကာ. ပန္နရသ ဓာတုယော အဝိတက္ကအဝိစာရာ. မနောဓာတု သဝိတက္ကသဝိစာရာ. မနောဝိညာဏဓာတု သိယာ သဝိတက္ကသဝိစာရာ၊ သိယာ အဝိတက္ကဝိစာရမတ္တာ၊ သိယာ အဝိတက္ကအဝိစာရာ. ဓမ္မဓာတု သိယာ သဝိတက္ကသဝိစာရာ၊ သိယာ အဝိတက္ကဝိစာရမတ္တာ၊ သိယာ အဝိတက္ကအဝိစာရာ၊ သိယာ န ဝတ္တဗ္ဗာ – ‘‘သဝိတက္ကသဝိစာရာ’’တိပိ၊ ‘‘အဝိတက္ကဝိစာရမတ္တာ’’တိပိ၊ ‘‘အဝိတက္ကအဝိစာရာ’’တိပိ. ဒသ ဓာတုယော န ဝတ္တဗ္ဗာ – ‘‘ပီတိသဟဂတာ’’တိပိ၊ ‘‘သုခသဟဂတာ’’တိပိ၊ ‘‘ဥပေက္ခာသဟဂတာ’’တိပိ. ပဉ္စ ဓာတုယော ဥပေက္ခာသဟဂတာ. ကာယဝိညာဏဓာတု န ပီတိသဟဂတာ၊ သိယာ သုခသဟဂတာ၊ န ဥပေက္ခာသဟဂတာ၊ သိယာ န ဝတ္တဗ္ဗာ – ‘‘သုခသဟဂတာ’’တိ. ဒွေ ဓာတုယော သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ၊ သိယာ န ဝတ္တဗ္ဗာ – ‘‘ပီတိသဟဂတာ’’တိပိ၊ ‘‘သုခသဟဂတာ’’တိပိ၊ ‘‘ဥပေက္ခာသဟဂတာ’’တိပိ.

သောဠသ ဓာတုယော နေဝ ဒဿနေန န ဘာဝနာယ ပဟာတဗ္ဗာ. ဒွေ ဓာတုယော သိယာ ဒဿနေန ပဟာတဗ္ဗာ၊ သိယာ ဘာဝနာယ ပဟာတဗ္ဗာ၊ သိယာ နေဝ ဒဿနေန န ဘာဝနာယ ပဟာတဗ္ဗာ. သောဠသ ဓာတုယော နေဝ ဒဿနေန န ဘာဝနာယ ပဟာတဗ္ဗဟေတုကာ. ဒွေ ဓာတုယော သိယာ ဒဿနေန ပဟာတဗ္ဗဟေတုကာ၊ သိယာ ဘာဝနာယ ပဟာတဗ္ဗဟေတုကာ၊ သိယာ နေဝ ဒဿနေန န ဘာဝနာယ ပဟာတဗ္ဗဟေတုကာ. သောဠသ ဓာတုယော နေဝါစယဂါမိနာပစယဂါမိနော. ဒွေ ဓာတုယော သိယာ အာစယဂါမိနော၊ သိယာ အပစယဂါမိနော၊ သိယာ နေဝါစယဂါမိနာပစယဂါမိနော. သောဠသ ဓာတုယော နေဝသေက္ခနာသေက္ခာ. ဒွေ ဓာတုယော သိယာ သေက္ခာ၊ သိယာ အသေက္ခာ၊ သိယာ နေဝသေက္ခနာသေက္ခာ.

သောဠသ ဓာတုယော ပရိတ္တာ. ဒွေ ဓာတုယော သိယာ ပရိတ္တာ၊ သိယာ မဟဂ္ဂတာ၊ သိယာ အပ္ပမာဏာ. ဒသ ဓာတုယော အနာရမ္မဏာ. ဆ ဓာတုယော ပရိတ္တာရမ္မဏာ. ဒွေ ဓာတုယော သိယာ ပရိတ္တာရမ္မဏာ၊ သိယာ မဟဂ္ဂတာရမ္မဏာ၊ သိယာ အပ္ပမာဏာရမ္မဏာ၊ သိယာ န ဝတ္တဗ္ဗာ – ‘‘ပရိတ္တာရမ္မဏာ’’တိပိ၊ ‘‘မဟဂ္ဂတာရမ္မဏာ’’တိပိ၊ ‘‘အပ္ပမာဏာရမ္မဏာ’’တိပိ. သောဠသ ဓာတုယော မဇ္ဈိမာ. ဒွေ ဓာတုယော သိယာ ဟီနာ၊ သိယာ မဇ္ဈိမာ၊ သိယာ ပဏီတာ. သောဠသ ဓာတုယော အနိယတာ. ဒွေ ဓာတုယော သိယာ မိစ္ဆတ္တနိယတာ၊ သိယာ သမ္မတ္တနိယတာ၊ သိယာ အနိယတာ.

ဒသ ဓာတုယော အနာရမ္မဏာ. ဆ ဓာတုယော န ဝတ္တဗ္ဗာ – ‘‘မဂ္ဂါရမ္မဏာ’’တိပိ၊ ‘‘မဂ္ဂဟေတုကာ’’တိပိ၊ ‘‘မဂ္ဂါဓိပတိနော’’တိပိ. ဒွေ ဓာတုယော သိယာ မဂ္ဂါရမ္မဏာ၊ သိယာ မဂ္ဂဟေတုကာ၊ သိယာ မဂ္ဂါဓိပတိနော၊ သိယာ န ဝတ္တဗ္ဗာ – ‘‘မဂ္ဂါရမ္မဏာ’’တိပိ၊ ‘‘မဂ္ဂဟေတုကာ’’တိပိ၊ ‘‘မဂ္ဂါဓိပတိနော’’တိပိ. ဒသ ဓာတုယော သိယာ ဥပ္ပန္နာ၊ သိယာ ဥပ္ပါဒိနော၊ သိယာ န ဝတ္တဗ္ဗာ – ‘‘အနုပ္ပန္နာ’’တိ. သဒ္ဒဓာတု သိယာ ဥပ္ပန္နာ၊ သိယာ အနုပ္ပန္နာ၊ သိယာ န ဝတ္တဗ္ဗာ – ‘‘ဥပ္ပါဒိနီ’’တိ. ဆ ဓာတုယော သိယာ ဥပ္ပန္နာ၊ သိယာ အနုပ္ပန္နာ၊ သိယာ ဥပ္ပါဒိနော. ဓမ္မဓာတု သိယာ ဥပ္ပန္နာ၊ သိယာ အနုပ္ပန္နာ၊ သိယာ ဥပ္ပါဒိနီ၊ သိယာ န ဝတ္တဗ္ဗာ – ‘‘ဥပ္ပန္နာ’’တိပိ၊ ‘‘အနုပ္ပန္နာ’’တိပိ၊ ‘‘ဥပ္ပါဒိနီ’’တိပိ.

သတ္တရသ ဓာတုယော သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ. ဓမ္မဓာတု သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ၊ သိယာ န ဝတ္တဗ္ဗာ – ‘‘အတီတာ’’တိပိ၊ ‘‘အနာဂတာ’’တိပိ၊ ‘‘ပစ္စုပ္ပန္နာ’’တိပိ. ဒသ ဓာတုယော အနာရမ္မဏာ. ဆ ဓာတုယော ပစ္စုပ္ပန္နာရမ္မဏာ. ဒွေ ဓာတုယော သိယာ အတီတာရမ္မဏာ၊ သိယာ အနာဂတာရမ္မဏာ၊ သိယာ ပစ္စုပ္ပန္နာရမ္မဏာ၊ သိယာ န ဝတ္တဗ္ဗာ – ‘‘အတီတာရမ္မဏာ’’တိပိ၊ ‘‘အနာဂတာရမ္မဏာ’’တိပိ၊ ‘‘ပစ္စုပ္ပန္နာရမ္မဏာ’’တိပိ၊ သိယာ အဇ္ဈတ္တာ၊ သိယာ ဗဟိဒ္ဓါ၊ သိယာ အဇ္ဈတ္တဗဟိဒ္ဓါ.

ဒသ ဓာတုယော အနာရမ္မဏာ. ဆ ဓာတုယော သိယာ အဇ္ဈတ္တာရမ္မဏာ၊ သိယာ ဗဟိဒ္ဓါရမ္မဏာ၊ သိယာ အဇ္ဈတ္တဗဟိဒ္ဓါရမ္မဏာ. ဒွေ ဓာတုယော သိယာ အဇ္ဈတ္တာရမ္မဏာ၊ သိယာ ဗဟိဒ္ဓါရမ္မဏာ၊ သိယာ အဇ္ဈတ္တဗဟိဒ္ဓါရမ္မဏာ၊ သိယာ န ဝတ္တဗ္ဗာ – ‘‘အဇ္ဈတ္တာရမ္မဏာ’’တိပိ၊ ‘‘ဗဟိဒ္ဓါရမ္မဏာ’’တိပိ၊ ‘‘အဇ္ဈတ္တဗဟိဒ္ဓါရမ္မဏာ’’တိပိ. ရူပဓာတု သနိဒဿနသပ္ပဋိဃာ. နဝ ဓာတုယော အနိဒဿနအပ္ပဋိဃာ. အဋ္ဌ ဓာတုယော အနိဒဿနအပ္ပဋိဃာ.

၂. ဒုကံ

၁၈၈. သတ္တရသ ဓာတုယော န ဟေတူ. ဓမ္မဓာတု သိယာ ဟေတု၊ သိယာ န ဟေတု. သောဠသ ဓာတုယော အဟေတုကာ. ဒွေ ဓာတုယော သိယာ သဟေတုကာ၊ သိယာ အဟေတုကာ. သောဠသ ဓာတုယော အဟေတုကာ. ဒွေ ဓာတုယော သိယာ သဟေတုကာ၊ သိယာ အဟေတုကာ. သောဠသ ဓာတုယော ဟေတုဝိပ္ပယုတ္တာ. ဒွေ ဓာတုယော သိယာ ဟေတုသမ္ပယုတ္တာ၊ သိယာ ဟေတုဝိပ္ပယုတ္တာ. သောဠသ ဓာတုယော န ဝတ္တဗ္ဗာ – ‘‘ဟေတု စေဝ သဟေတုကာ စာ’’တိပိ၊ ‘‘သဟေတုကာ စေဝ န စ ဟေတူ’’တိပိ. မနောဝိညာဏဓာတု န ဝတ္တဗ္ဗာ – ‘‘ဟေတု စေဝ သဟေတုကာ စာ’’တိ၊ သိယာ သဟေတုကာ စေဝ န စ ဟေတု၊ သိယာ န ဝတ္တဗ္ဗာ – ‘‘သဟေတုကာ စေဝ န စ ဟေတူ’’တိ. ဓမ္မဓာတု သိယာ ဟေတု စေဝ သဟေတုကာ စ၊ သိယာ သဟေတုကာ စေဝ န စ ဟေတု၊ သိယာ န ဝတ္တဗ္ဗာ – ‘‘ဟေတု စေဝ သဟေတုကာ စာ’’တိပိ၊ ‘‘သဟေတုကာ စေဝ န စ ဟေတူ’’တိပိ. သောဠသ ဓာတုယော န ဝတ္တဗ္ဗာ – ‘‘ဟေတူ စေဝ ဟေတုသမ္ပယုတ္တာ စာ’’တိပိ၊ ‘‘ဟေတုသမ္ပယုတ္တာ စေဝ န စ ဟေတူ’’တိပိ. မနောဝိညာဏဓာတု န ဝတ္တဗ္ဗာ – ‘‘ဟေတု စေဝ ဟေတုသမ္ပယုတ္တာ စာ’’တိ၊ သိယာ ဟေတုသမ္ပယုတ္တာ စေဝ န စ ဟေတု၊ သိယာ န ဝတ္တဗ္ဗာ – ‘‘ဟေတုသမ္ပယုတ္တာ စေဝ န စ ဟေတူ’’တိ. ဓမ္မဓာတု သိယာ ဟေတု စေဝ ဟေတုသမ္ပယုတ္တာ စ၊ သိယာ ဟေတုသမ္ပယုတ္တာ စေဝ န စ ဟေတု၊ သိယာ န ဝတ္တဗ္ဗာ – ‘‘ဟေတု စေဝ ဟေတုသမ္ပယုတ္တာ စာ’’တိပိ၊ ‘‘ဟေတုသမ္ပယုတ္တာ စေဝ န စ ဟေတူ’’တိပိ. သောဠသ ဓာတုယော န ဟေတုအဟေတုကာ. မနောဝိညာဏဓာတု သိယာ န ဟေတုသဟေတုကာ၊ သိယာ န ဟေတုအဟေတုကာ. ဓမ္မဓာတု သိယာ န ဟေတုသဟေတုကာ၊ သိယာ န ဟေတုအဟေတုကာ၊ သိယာ န ဝတ္တဗ္ဗာ – ‘‘န ဟေတုသဟေတုကာ’’တိပိ၊ ‘‘န ဟေတုအဟေတုကာ’’တိပိ.

သတ္တရသ ဓာတုယော သပ္ပစ္စယာ. ဓမ္မဓာတု သိယာ သပ္ပစ္စယာ၊ သိယာ အပ္ပစ္စယာ. သတ္တရသ ဓာတုယော သင်္ခတာ. ဓမ္မဓာတု သိယာ သင်္ခတာ၊ သိယာ အသင်္ခတာ. ရူပဓာတု သနိဒဿနာ. သတ္တရသ ဓာတုယော အနိဒဿနာ. ဒသ ဓာတုယော သပ္ပဋိဃာ. အဋ္ဌ ဓာတုယော အပ္ပဋိဃာ. ဒသ ဓာတုယော ရူပါ. သတ္တ ဓာတုယော အရူပါ. ဓမ္မဓာတု သိယာ ရူပါ၊ သိယာ အရူပါ. သောဠသ ဓာတုယော လောကိယာ. ဒွေ ဓာတုယော သိယာ လောကိယာ၊ သိယာ လောကုတ္တရာ၊ ကေနစိ ဝိညေယျာ၊ ကေနစိ န ဝိညေယျာ.

သတ္တရသ ဓာတုယော နော အာသဝါ. ဓမ္မဓာတု သိယာ အာသဝါ၊ သိယာ နော အာသဝါ. သောဠသ ဓာတုယော သာသဝါ. ဒွေ ဓာတုယော သိယာ သာသဝါ၊ သိယာ အနာသဝါ. သောဠသ ဓာတုယော အာသဝဝိပ္ပယုတ္တာ. ဒွေ ဓာတုယော သိယာ အာသဝသမ္ပယုတ္တာ၊ သိယာ အာသဝဝိပ္ပယုတ္တာ. သောဠသ ဓာတုယော န ဝတ္တဗ္ဗာ – ‘‘အာသဝါ စေဝ သာသဝါ စာ’’တိ၊ ‘‘သာသဝါ စေဝ နော စ အာသဝါ’’. မနောဝိညာဏဓာတု န ဝတ္တဗ္ဗာ – ‘‘အာသဝေါ စေဝ သာသဝါ စာ’’တိ၊ သိယာ သာသဝါ စေဝ နော စ အာသဝေါ၊ သိယာ န ဝတ္တဗ္ဗာ – ‘‘သာသဝါ စေဝ နော စ အာသဝေါ’’တိ. ဓမ္မဓာတု သိယာ အာသဝေါ စေဝ သာသဝါ စ၊ သိယာ သာသဝါ စေဝ နော စ အာသဝေါ၊ သိယာ န ဝတ္တဗ္ဗာ – ‘‘အာသဝေါ စေဝ သာသဝါ စာ’’တိပိ၊ ‘‘သာသဝါ စေဝ နော စ အာသဝေါ’’တိပိ.

သောဠသ ဓာတုယော န ဝတ္တဗ္ဗာ – ‘‘အာသဝါ စေဝ အာသဝသမ္ပယုတ္တာ စာ’’တိပိ၊ ‘‘အာသဝသမ္ပယုတ္တာ စေဝ နော စ အာသဝါ’’တိပိ. မနောဝိညာဏဓာတု န ဝတ္တဗ္ဗာ – ‘‘အာသဝေါ စေဝ အာသဝသမ္ပယုတ္တာ စာ’’တိ၊ သိယာ အာသဝသမ္ပယုတ္တာ စေဝ နော စ အာသဝေါ၊ သိယာ န ဝတ္တဗ္ဗာ – ‘‘အာသဝသမ္ပယုတ္တာ စေဝ နော စ အာသဝေါ’’တိ. ဓမ္မဓာတု သိယာ အာသဝေါ စေဝ အာသဝသမ္ပယုတ္တာ စ၊ သိယာ အာသဝသမ္ပယုတ္တာ စေဝ နော စ အာသဝေါ၊ သိယာ န ဝတ္တဗ္ဗာ – ‘‘အာသဝေါ စေဝ အာသဝသမ္ပယုတ္တာ စာ’’တိပိ၊ ‘‘အာသဝသမ္ပယုတ္တာ စေဝ နော စ အာသဝေါ’’တိပိ. သောဠသ ဓာတုယော အာသဝဝိပ္ပယုတ္တသာသဝါ. ဒွေ ဓာတုယော သိယာ အာသဝဝိပ္ပယုတ္တသာသဝါ၊ သိယာ အာသဝဝိပ္ပယုတ္တအနာသဝါ၊ သိယာ န ဝတ္တဗ္ဗာ – ‘‘အာသဝဝိပ္ပယုတ္တသာသဝါ’’တိပိ၊ ‘‘အာသဝဝိပ္ပယုတ္တအနာသဝါ’’တိပိ.

သတ္တရသ ဓာတုယော နော သံယောဇနာ. ဓမ္မဓာတု သိယာ သံယောဇနံ၊ သိယာ နော သံယောဇနံ. သောဠသ ဓာတုယော သံယောဇနိယာ. ဒွေ ဓာတုယော သိယာ သံယောဇနိယာ၊ သိယာ အသံယောဇနိယာ. သောဠသ ဓာတုယော သံယောဇနဝိပ္ပယုတ္တာ. ဒွေ ဓာတုယော သိယာ သံယောဇနသမ္ပယုတ္တာ၊ သိယာ သံယောဇနဝိပ္ပယုတ္တာ. သောဠသ ဓာတုယော န ဝတ္တဗ္ဗာ – ‘‘သံယောဇနာ စေဝ သံယောဇနိယာ စာ’’တိ၊ သံယောဇနိယာ စေဝ နော စ သံယောဇနာ. မနောဝိညာဏဓာတု န ဝတ္တဗ္ဗာ – ‘‘သံယောဇနဉ္စေဝ သံယောဇနိယာ စာ’’တိ၊ သိယာ သံယောဇနိယာ စေဝ နော စ သံယောဇနံ၊ သိယာ န ဝတ္တဗ္ဗာ – ‘‘သံယောဇနိယာ စေဝ နော စ သံယောဇန’’န္တိ. ဓမ္မဓာတု သိယာ သံယောဇနဉ္စေဝ သံယောဇနိယာ စ၊ သိယာ သံယောဇနိယာ စေဝ နော စ သံယောဇနံ၊ သိယာ န ဝတ္တဗ္ဗာ – ‘‘သံယောဇနဉ္စေဝ သံယောဇနိယာ စာ’’တိပိ၊ ‘‘သံယောဇနိယာ စေဝ နော စ သံယောဇန’’န္တိပိ. သောဠသ ဓာတုယော န ဝတ္တဗ္ဗာ – ‘‘သံယောဇနာ စေဝ သံယောဇနသမ္ပယုတ္တာ စာ’’တိပိ၊ ‘‘သံယောဇနသမ္ပယုတ္တာ စေဝ နော စ သံယောဇနာ’’တိပိ. မနောဝိညာဏဓာတု န ဝတ္တဗ္ဗာ – ‘‘သံယောဇနဉ္စေဝ သံယောဇနသမ္ပယုတ္တာ စာ’’တိ၊ သိယာ သံယောဇနသမ္ပယုတ္တာ စေဝ နော စ သံယောဇနံ၊ သိယာ န ဝတ္တဗ္ဗာ – ‘‘သံယောဇနသမ္ပယုတ္တာ စေဝ နော စ သံယောဇန’’န္တိ. ဓမ္မဓာတု သိယာ သံယောဇနဉ္စေဝ သံယောဇနသမ္ပယုတ္တာ စ၊ သိယာ သံယောဇနသမ္ပယုတ္တာ စေဝ နော စ သံယောဇနံ၊ သိယာ န ဝတ္တဗ္ဗာ – ‘‘သံယောဇနဉ္စေဝ သံယောဇနသမ္ပယုတ္တာ စာ’’တိပိ၊ ‘‘သံယောဇနသမ္ပယုတ္တာ စေဝ နော စ သံယောဇန’’န္တိပိ. သောဠသ ဓာတုယော သံယောဇနဝိပ္ပယုတ္တသံယောဇနိယာ. ဒွေ ဓာတုယော သိယာ သံယောဇနဝိပ္ပယုတ္တသံယောဇနိယာ၊ သိယာ သံယောဇနဝိပ္ပယုတ္တအသံယောဇနိယာ၊ သိယာ န ဝတ္တဗ္ဗာ – ‘‘သံယောဇနဝိပ္ပယုတ္တသံယောဇနိယာ’’တိပိ၊ ‘‘သံယောဇနဝိပ္ပယုတ္တအသံယောဇနိယာ’’တိပိ.

သတ္တရသ ဓာတုယော နော ဂန္ထာ. ဓမ္မဓာတု သိယာ ဂန္ထော၊ သိယာ နော ဂန္ထော. သောဠသ ဓာတုယော ဂန္ထနိယာ. ဒွေ ဓာတုယော သိယာ ဂန္ထနိယာ၊ သိယာ အဂန္ထနိယာ. သောဠသ ဓာတုယော ဂန္ထဝိပ္ပယုတ္တာ. ဒွေ ဓာတုယော သိယာ ဂန္ထသမ္ပယုတ္တာ၊ သိယာ ဂန္ထဝိပ္ပယုတ္တာ. သောဠသ ဓာတုယော န ဝတ္တဗ္ဗာ – ‘‘ဂန္ထာ စေဝ ဂန္ထနိယာ စာ’’တိ၊ ဂန္ထနိယာ စေဝ နော စ ဂန္ထာ. မနောဝိညာဏဓာတု န ဝတ္တဗ္ဗာ – ‘‘ဂန္ထော စေဝ ဂန္ထနိယာ စာ’’တိ၊ သိယာ ဂန္ထနိယာ စေဝ နော စ ဂန္ထော၊ သိယာ န ဝတ္တဗ္ဗာ – ‘‘ဂန္ထနိယာ စေဝ နော စ ဂန္ထော’’တိ. ဓမ္မဓာတု သိယာ ဂန္ထော စေဝ ဂန္ထနိယာ စ၊ သိယာ ဂန္ထနိယာ စေဝ နော စ ဂန္ထော၊ သိယာ န ဝတ္တဗ္ဗာ – ‘‘ဂန္ထော စေဝ ဂန္ထနိယာ စာ’’တိပိ၊ ‘‘ဂန္ထနိယာ စေဝ နော စ ဂန္ထော’’တိပိ. သောဠသ ဓာတုယော န ဝတ္တဗ္ဗာ – ‘‘ဂန္ထာ စေဝ ဂန္ထသမ္ပယုတ္တာ စာ’’တိပိ၊ ‘‘ဂန္ထသမ္ပယုတ္တာ စေဝ နော စ ဂန္ထာ’’တိပိ. မနောဝိညာဏဓာတု န ဝတ္တဗ္ဗာ – ‘‘ဂန္ထော စေဝ ဂန္ထသမ္ပယုတ္တာ စာ’’တိ၊ သိယာ ဂန္ထသမ္ပယုတ္တာ စေဝ နော စ ဂန္ထော၊ သိယာ န ဝတ္တဗ္ဗာ – ‘‘ဂန္ထသမ္ပယုတ္တာ စေဝ နော စ ဂန္ထော’’တိ. ဓမ္မဓာတု သိယာ ဂန္ထော စေဝ ဂန္ထသမ္ပယုတ္တာ စ၊ သိယာ ဂန္ထသမ္ပယုတ္တာ စေဝ နော စ ဂန္ထော၊ သိယာ န ဝတ္တဗ္ဗာ – ‘‘ဂန္ထော စေဝ ဂန္ထသမ္ပယုတ္တာ စာ’’တိပိ၊ ‘‘ဂန္ထသမ္ပယုတ္တာ စေဝ နော စ ဂန္ထော’’တိပိ. သောဠသ ဓာတုယော ဂန္ထဝိပ္ပယုတ္တဂန္ထနိယာ. ဒွေ ဓာတုယော သိယာ ဂန္ထဝိပ္ပယုတ္တဂန္ထနိယာ၊ သိယာ ဂန္ထဝိပ္ပယုတ္တအဂန္ထနိယာ၊ သိယာ န ဝတ္တဗ္ဗာ – ‘‘ဂန္ထဝိပ္ပယုတ္တဂန္ထနိယာ’’တိပိ၊ ‘‘ဂန္ထဝိပ္ပယုတ္တအဂန္ထနိယာ’’တိပိ.

သတ္တရသ ဓာတုယော နော ဩဃာ။ပေ။ နော ယောဂါ။ပေ။ နော နီဝရဏာ. ဓမ္မဓာတု သိယာ နီဝရဏံ၊ သိယာ နော နီဝရဏံ. သောဠသ ဓာတုယော နီဝရဏိယာ. ဒွေ ဓာတုယော သိယာ နီဝရဏိယာ၊ သိယာ အနီဝရဏိယာ. သောဠသ ဓာတုယော နီဝရဏဝိပ္ပယုတ္တာ. ဒွေ ဓာတုယော သိယာ နီဝရဏသမ္ပယုတ္တာ၊ သိယာ နီဝရဏဝိပ္ပယုတ္တာ. သောဠသ ဓာတုယော န ဝတ္တဗ္ဗာ – ‘‘နီဝရဏာ စေဝ နီဝရဏိယာ စာ’’တိ၊ နီဝရဏိယာ စေဝ နော စ နီဝရဏာ. မနောဝိညာဏဓာတု န ဝတ္တဗ္ဗာ – ‘‘နီဝရဏဉ္စေဝ နီဝရဏိယာ စာ’’တိ၊ သိယာ နီဝရဏိယာ စေဝ နော စ နီဝရဏံ၊ သိယာ န ဝတ္တဗ္ဗာ – ‘‘နီဝရဏိယာ စေဝ နော စ နီဝရဏ’’န္တိ. ဓမ္မဓာတု သိယာ နီဝရဏဉ္စေဝ နီဝရဏိယာ စ၊ သိယာ နီဝရဏိယာ စေဝ နော စ နီဝရဏံ၊ သိယာ န ဝတ္တဗ္ဗာ – ‘‘နီဝရဏဉ္စေဝ နီဝရဏိယာ စာ’’တိပိ၊ ‘‘နီဝရဏိယာ စေဝ နော စ နီဝရဏ’’န္တိပိ. သောဠသ ဓာတုယော န ဝတ္တဗ္ဗာ – ‘‘နီဝရဏာ စေဝ နီဝရဏသမ္ပယုတ္တာ စာ’’တိပိ၊ ‘‘နီဝရဏသမ္ပယုတ္တာ စေဝ နော စ နီဝရဏာ’’တိပိ. မနောဝိညာဏဓာတု န ဝတ္တဗ္ဗာ – ‘‘နီဝရဏဉ္စေဝ နီဝရဏသမ္ပယုတ္တာ စာ’’တိ၊ သိယာ နီဝရဏသမ္ပယုတ္တာ စေဝ နော စ နီဝရဏံ၊ သိယာ န ဝတ္တဗ္ဗာ – ‘‘နီဝရဏသမ္ပယုတ္တာ စေဝ နော စ နီဝရဏ’’န္တိ. ဓမ္မဓာတု သိယာ နီဝရဏဉ္စေဝ နီဝရဏသမ္ပယုတ္တာ စ၊ သိယာ နီဝရဏသမ္ပယုတ္တာ စေဝ နော စ နီဝရဏံ၊ သိယာ န ဝတ္တဗ္ဗာ – ‘‘နီဝရဏဉ္စေဝ နီဝရဏသမ္ပယုတ္တာ စာ’’တိပိ၊ ‘‘နီဝရဏသမ္ပယုတ္တာ စေဝ နော စ နီဝရဏ’’န္တိပိ. သောဠသ ဓာတုယော နီဝရဏဝိပ္ပယုတ္တနီဝရဏိယာ. ဒွေ ဓာတုယော သိယာ နီဝရဏဝိပ္ပယုတ္တနီဝရဏိယာ၊ သိယာ နီဝရဏဝိပ္ပယုတ္တအနီဝရဏိယာ၊ သိယာ န ဝတ္တဗ္ဗာ – ‘‘နီဝရဏဝိပ္ပယုတ္တနီဝရဏိယာ’’တိပိ၊ ‘‘နီဝရဏဝိပ္ပယုတ္တအနီဝရဏိယာ’’တိပိ.

သတ္တရသ ဓာတုယော နော ပရာမာသာ. ဓမ္မဓာတု သိယာ ပရာမာသော၊ သိယာ နော ပရာမာသော. သောဠသ ဓာတုယော ပရာမဋ္ဌာ. ဒွေ ဓာတုယော သိယာ ပရာမဋ္ဌာ၊ သိယာ အပရာမဋ္ဌာ. သောဠသ ဓာတုယော ပရာမာသဝိပ္ပယုတ္တာ. မနောဝိညာဏဓာတု သိယာ ပရာမာသသမ္ပယုတ္တာ၊ သိယာ ပရာမာသဝိပ္ပယုတ္တာ. ဓမ္မဓာတု သိယာ ပရာမာသသမ္ပယုတ္တာ၊ သိယာ ပရာမာသဝိပ္ပယုတ္တာ၊ သိယာ န ဝတ္တဗ္ဗာ – ‘‘ပရာမာသသမ္ပယုတ္တာ’’တိပိ၊ ‘‘ပရာမာသဝိပ္ပယုတ္တာ’’တိပိ. သောဠသ ဓာတုယော န ဝတ္တဗ္ဗာ – ‘‘ပရာမာသာ စေဝ ပရာမဋ္ဌာ စာတိ ပရာမဋ္ဌာ စေဝ နော စ ပရာမာသာ’’. မနောဝိညာဏဓာတု န ဝတ္တဗ္ဗာ – ‘‘ပရာမာသော စေဝ ပရာမဋ္ဌာ စာ’’တိ၊ သိယာ ပရာမဋ္ဌာ စေဝ နော စ ပရာမာသော၊ သိယာ န ဝတ္တဗ္ဗာ – ‘‘ပရာမဋ္ဌာ စေဝ နော စ ပရာမာသော’’တိ. ဓမ္မဓာတု သိယာ ပရာမာသော စေဝ ပရာမဋ္ဌာ စ၊ သိယာ ပရာမဋ္ဌာ စေဝ နော စ ပရာမာသော၊ သိယာ န ဝတ္တဗ္ဗာ – ‘‘ပရာမာသော စေဝ ပရာမဋ္ဌာ စာ’’တိပိ၊ ‘‘ပရာမဋ္ဌာ စေဝ နော စ ပရာမာသော’’တိပိ. သောဠသ ဓာတုယော ပရာမာသဝိပ္ပယုတ္တပရာမဋ္ဌာ. ဒွေ ဓာတုယော သိယာ ပရာမာသဝိပ္ပယုတ္တပရာမဋ္ဌာ၊ သိယာ ပရာမာသဝိပ္ပယုတ္တအပရာမဋ္ဌာ၊ သိယာ န ဝတ္တဗ္ဗာ – ‘‘ပရာမာသဝိပ္ပယုတ္တပရာမဋ္ဌာ’’တိပိ၊ ‘‘ပရာမာသဝိပ္ပယုတ္တအပရာမဋ္ဌာ’’တိပိ.

ဒသ ဓာတုယော အနာရမ္မဏာ. သတ္တ ဓာတုယော သာရမ္မဏာ. ဓမ္မဓာတု သိယာ သာရမ္မဏာ၊ သိယာ အနာရမ္မဏာ. သတ္တ ဓာတုယော စိတ္တာ. ဧကာဒသ ဓာတုယော နော စိတ္တာ. သတ္တရသ ဓာတုယော အစေတသိကာ. ဓမ္မဓာတု သိယာ စေတသိကာ၊ သိယာ အစေတသိကာ. ဒသ ဓာတုယော စိတ္တဝိပ္ပယုတ္တာ. ဓမ္မဓာတု သိယာ စိတ္တသမ္ပယုတ္တာ၊ သိယာ စိတ္တဝိပ္ပယုတ္တာ. သတ္တ ဓာတုယော န ဝတ္တဗ္ဗာ – ‘‘စိတ္တေန သမ္ပယုတ္တာ’’တိပိ၊ ‘‘စိတ္တေန ဝိပ္ပယုတ္တာ’’တိပိ. ဒသ ဓာတုယော စိတ္တဝိသံသဋ္ဌာ. ဓမ္မဓာတု သိယာ စိတ္တသံသဋ္ဌာ၊ သိယာ စိတ္တဝိသံသဋ္ဌာ. သတ္တ ဓာတုယော န ဝတ္တဗ္ဗာ – ‘‘စိတ္တေန သံသဋ္ဌာ’’တိပိ၊ ‘‘စိတ္တေန ဝိသံသဋ္ဌာ’’တိပိ.

ဒွါဒသ ဓာတုယော နော စိတ္တသမုဋ္ဌာနာ. ဆ ဓာတုယော သိယာ စိတ္တသမုဋ္ဌာနာ၊ သိယာ နော စိတ္တသမုဋ္ဌာနာ. သတ္တရသ ဓာတုယော နော စိတ္တသဟဘုနော. ဓမ္မဓာတု သိယာ စိတ္တသဟဘူ၊ သိယာ နော စိတ္တသဟဘူ. သတ္တရသ ဓာတုယော နော စိတ္တာနုပရိဝတ္တိနော. ဓမ္မဓာတု သိယာ စိတ္တာနုပရိဝတ္တီ၊ သိယာ နော စိတ္တာနုပရိဝတ္တီ. သတ္တရသ ဓာတုယော နော စိတ္တသံသဋ္ဌသမုဋ္ဌာနာ. ဓမ္မဓာတု သိယာ စိတ္တသံသဋ္ဌသမုဋ္ဌာနာ၊ သိယာ နော စိတ္တသံသဋ္ဌသမုဋ္ဌာနာ. သတ္တရသ ဓာတုယော နော စိတ္တသံသဋ္ဌသမုဋ္ဌာနသဟဘုနော. ဓမ္မဓာတု သိယာ စိတ္တသံသဋ္ဌသမုဋ္ဌာနသဟဘူ၊ သိယာ နော စိတ္တသံသဋ္ဌသမုဋ္ဌာနသဟဘူ. သတ္တရသ ဓာတုယော နော စိတ္တသံသဋ္ဌသမုဋ္ဌာနာနုပရိဝတ္တိနော. ဓမ္မဓာတု သိယာ စိတ္တသံသဋ္ဌသမုဋ္ဌာနာနုပရိဝတ္တီ၊ သိယာ နော စိတ္တသံသဋ္ဌသမုဋ္ဌာနာနုပရိဝတ္တီ. ဒွါဒသ ဓာတုယော အဇ္ဈတ္တိကာ. ဆ ဓာတုယော ဗာဟိရာ.

နဝ ဓာတုယော ဥပါဒါ. အဋ္ဌ ဓာတုယော နော ဥပါဒါ. ဓမ္မဓာတု သိယာ ဥပါဒါ၊ သိယာ နော ဥပါဒါ. ဒသ ဓာတုယော ဥပါဒိန္နာ. သဒ္ဒဓာတု အနုပါဒိန္နာ. သတ္တဓာတုယော သိယာ ဥပါဒိန္နာ၊ သိယာ အနုပါဒိန္နာ. သတ္တရသ ဓာတုယော နော ဥပါဒါနာ. ဓမ္မဓာတု သိယာ ဥပါဒါနံ၊ သိယာ နော ဥပါဒါနံ. သောဠသ ဓာတုယော ဥပါဒါနိယာ. ဒွေ ဓာတုယော သိယာ ဥပါဒါနိယာ၊ သိယာ အနုပါဒါနိယာ. သောဠသ ဓာတုယော ဥပါဒါနဝိပ္ပယုတ္တာ. ဒွေ ဓာတုယော သိယာ ဥပါဒါနသမ္ပယုတ္တာ၊ သိယာ ဥပါဒါနဝိပ္ပယုတ္တာ. သောဠသ ဓာတုယော န ဝတ္တဗ္ဗာ – ‘‘ဥပါဒါနာ စေဝ ဥပါဒါနိယာ စာ’’တိ၊ ‘‘ဥပါဒါနိယာ စေဝ နော စ ဥပါဒါနာ’’. မနောဝိညာဏဓာတု န ဝတ္တဗ္ဗာ – ‘‘ဥပါဒါနဉ္စေဝ ဥပါဒါနိယာ စာ’’တိ၊ သိယာ ဥပါဒါနိယာ စေဝ နော စ ဥပါဒါနံ၊ သိယာ န ဝတ္တဗ္ဗာ – ‘‘ဥပါဒါနိယာ စေဝ နော စ ဥပါဒါန’’န္တိ. ဓမ္မဓာတု သိယာ ဥပါဒါနဉ္စေဝ ဥပါဒါနိယာ စ၊ သိယာ ဥပါဒါနိယာ စေဝ နော စ ဥပါဒါနံ၊ သိယာ န ဝတ္တဗ္ဗာ – ‘‘ဥပါဒါနဉ္စေဝ ဥပါဒါနိယာ စာ’’တိပိ၊ ‘‘ဥပါဒါနိယာ စေဝ နော စ ဥပါဒါန’’န္တိပိ.

သောဠသ ဓာတုယော န ဝတ္တဗ္ဗာ – ‘‘ဥပါဒါနာ စေဝ ဥပါဒါနသမ္ပယုတ္တာ စာ’’တိပိ၊ ‘‘ဥပါဒါနသမ္ပယုတ္တာ စေဝ နော စ ဥပါဒါနာ’’တိပိ. မနောဝိညာဏဓာတု န ဝတ္တဗ္ဗာ – ‘‘ဥပါဒါနဉ္စေဝ ဥပါဒါနသမ္ပယုတ္တာ စာ’’တိ၊ သိယာ ဥပါဒါနသမ္ပယုတ္တာ စေဝ နော စ ဥပါဒါနံ၊ သိယာ န ဝတ္တဗ္ဗာ – ‘‘ဥပါဒါနသမ္ပယုတ္တာ စေဝ နော စ ဥပါဒါန’’န္တိ. ဓမ္မဓာတု သိယာ ဥပါဒါနဉ္စေဝ ဥပါဒါနသမ္ပယုတ္တာ စ၊ သိယာ ဥပါဒါနသမ္ပယုတ္တာ စေဝ နော စ ဥပါဒါနံ၊ သိယာ န ဝတ္တဗ္ဗာ – ‘‘ဥပါဒါနဉ္စေဝ ဥပါဒါနသမ္ပယုတ္တာ စာ’’တိပိ၊ ‘‘ဥပါဒါနသမ္ပယုတ္တာ စေဝ နော စ ဥပါဒါန’’န္တိပိ. သောဠသ ဓာတုယော ဥပါဒါနဝိပ္ပယုတ္တဥပါဒါနိယာ. ဒွေ ဓာတုယော သိယာ ဥပါဒါနဝိပ္ပယုတ္တဥပါဒါနိယာ၊ သိယာ ဥပါဒါနဝိပ္ပယုတ္တအနုပါဒါနိယာ၊ သိယာ န ဝတ္တဗ္ဗာ – ‘‘ဥပါဒါနဝိပ္ပယုတ္တဥပါဒါနိယာ’’တိပိ၊ ‘‘ဥပါဒါနဝိပ္ပယုတ္တအနုပါဒါနိယာ’’တိပိ.

သတ္တရသ ဓာတုယော နော ကိလေသာ. ဓမ္မဓာတု သိယာ ကိလေသာ၊ သိယာ နော ကိလေသာ. သောဠသ ဓာတုယော သံကိလေသိကာ. ဒွေ ဓာတုယော သိယာ သံကိလေသိကာ၊ သိယာ အသံကိလေသိကာ. သောဠသ ဓာတုယော အသံကိလိဋ္ဌာ. ဒွေ ဓာတုယော သိယာ သံကိလိဋ္ဌာ၊ သိယာ အသံကိလိဋ္ဌာ. သောဠသ ဓာတုယော ကိလေသဝိပ္ပယုတ္တာ. ဒွေ ဓာတုယော သိယာ ကိလေသသမ္ပယုတ္တာ၊ သိယာ ကိလေသဝိပ္ပယုတ္တာ. သောဠသ ဓာတုယော န ဝတ္တဗ္ဗာ – ‘‘ကိလေသာ စေဝ သံကိလေသိကာ စာ’’တိ၊ သံကိလေသိကာ စေဝ နော စ ကိလေသာ. မနောဝိညာဏဓာတု န ဝတ္တဗ္ဗာ – ‘‘ကိလေသော စေဝ သံကိလေသိကာ စာ’’တိ၊ သိယာ သံကိလေသိကာ စေဝ နော စ ကိလေသော၊ သိယာ န ဝတ္တဗ္ဗာ – ‘‘သံကိလေသိကာ စေဝ နော စ ကိလေသော’’တိ. ဓမ္မဓာတု သိယာ ကိလေသော စေဝ သံကိလေသိကာ စ၊ သိယာ သံကိလေသိကာ စေဝ နော စ ကိလေသော၊ သိယာ န ဝတ္တဗ္ဗာ – ‘‘ကိလေသော စေဝ သံကိလေသိကာ စာ’’တိပိ၊ ‘‘သံကိလေသိကာ စေဝ နော စ ကိလေသော’’တိပိ.

သောဠသ ဓာတုယော န ဝတ္တဗ္ဗာ – ‘‘ကိလေသာ စေဝ သံကိလိဋ္ဌာ စာ’’တိပိ၊ ‘‘သံကိလိဋ္ဌာ စေဝ နော စ ကိလေသာ’’တိပိ. မနောဝိညာဏဓာတု န ဝတ္တဗ္ဗာ – ‘‘ကိလေသော စေဝ သံကိလိဋ္ဌာ စာ’’တိ၊ သိယာ သံကိလိဋ္ဌာ စေဝ နော စ ကိလေသော၊ သိယာ န ဝတ္တဗ္ဗာ – ‘‘သံကိလိဋ္ဌာ စေဝ နော စ ကိလေသော’’တိ. ဓမ္မဓာတု သိယာ ကိလေသော စေဝ သံကိလိဋ္ဌာ စ၊ သိယာ သံကိလိဋ္ဌာ စေဝ နော စ ကိလေသော၊ သိယာ န ဝတ္တဗ္ဗာ – ‘‘ကိလေသော စေဝ သံကိလိဋ္ဌာ စာ’’တိပိ၊ ‘‘သံကိလိဋ္ဌာ စေဝ နော စ ကိလေသော’’တိပိ. သောဠသ ဓာတုယော န ဝတ္တဗ္ဗာ – ‘‘ကိလေသာ စေဝ ကိလေသသမ္ပယုတ္တာ စာ’’တိပိ၊ ‘‘ကိလေသသမ္ပယုတ္တာ စေဝ နော စ ကိလေသာ’’တိပိ. မနောဝိညာဏဓာတု န ဝတ္တဗ္ဗာ – ‘‘ကိလေသော စေဝ ကိလေသသမ္ပယုတ္တာ စာ’’တိ၊ သိယာ ကိလေသသမ္ပယုတ္တာ စေဝ နော စ ကိလေသော၊ သိယာ န ဝတ္တဗ္ဗာ – ‘‘ကိလေသသမ္ပယုတ္တာ စေဝ နော စ ကိလေသော’’တိ. ဓမ္မဓာတု သိယာ ကိလေသော စေဝ ကိလေသသမ္ပယုတ္တာ စ၊ သိယာ ကိလေသသမ္ပယုတ္တာ စေဝ နော စ ကိလေသော၊ သိယာ န ဝတ္တဗ္ဗာ – ‘‘ကိလေသော စေဝ ကိလေသသမ္ပယုတ္တာ စာ’’တိပိ၊ ‘‘ကိလေသသမ္ပယုတ္တာ စေဝ နော စ ကိလေသော’’တိပိ. သောဠသ ဓာတုယော ကိလေသဝိပ္ပယုတ္တသံကိလေသိကာ. ဒွေ ဓာတုယော သိယာ ကိလေသဝိပ္ပယုတ္တသံကိလေသိကာ၊ သိယာ ကိလေသဝိပ္ပယုတ္တအသံကိလေသိကာ၊ သိယာ န ဝတ္တဗ္ဗာ – ‘‘ကိလေသဝိပ္ပယုတ္တသံကိလေသိကာ’’တိပိ၊ ‘‘ကိလေသဝိပ္ပယုတ္တအသံကိလေသိကာ’’တိပိ.

သောဠသ ဓာတုယော န ဒဿနေန ပဟာတဗ္ဗာ. ဒွေ ဓာတုယော သိယာ ဒဿနေန ပဟာတဗ္ဗာ၊ သိယာ န ဒဿနေန ပဟာတဗ္ဗာ. သောဠသ ဓာတုယော န ဘာဝနာယ ပဟာတဗ္ဗာ. ဒွေ ဓာတုယော သိယာ ဘာဝနာယ ပဟာတဗ္ဗာ၊ သိယာ န ဘာဝနာယ ပဟာတဗ္ဗာ. သောဠသ ဓာတုယော န ဒဿနေန ပဟာတဗ္ဗဟေတုကာ. ဒွေ ဓာတုယော သိယာ ဒဿနေန ပဟာတဗ္ဗဟေတုကာ၊ သိယာ န ဒဿနေန ပဟာတဗ္ဗဟေတုကာ. သောဠသ ဓာတုယော န ဘာဝနာယ ပဟာတဗ္ဗဟေတုကာ. ဒွေ ဓာတုယော သိယာ ဘာဝနာယ ပဟာတဗ္ဗဟေတုကာ၊ သိယာ န ဘာဝနာယ ပဟာတဗ္ဗဟေတုကာ.

ပန္နရသ ဓာတုယော အဝိတက္ကာ. မနောဓာတု သဝိတက္ကာ. ဒွေ ဓာတုယော သိယာ သဝိတက္ကာ၊ သိယာ အဝိတက္ကာ. ပန္နရသ ဓာတုယော အဝိစာရာ. မနောဓာတု သဝိစာရာ. ဒွေ ဓာတုယော သိယာ သဝိစာရာ၊ သိယာ အဝိစာရာ. သောဠသ ဓာတုယော အပ္ပီတိကာ. ဒွေ ဓာတုယော သိယာ သပ္ပီတိကာ၊ သိယာ အပ္ပီတိကာ. သောဠသ ဓာတုယော န ပီတိသဟဂတာ. ဒွေ ဓာတုယော သိယာ ပီတိသဟဂတာ၊ သိယာ န ပီတိသဟဂတာ. ပန္နရသ ဓာတုယော န သုခသဟဂတာ. တိဿော ဓာတုယော သိယာ သုခသဟဂတာ၊ သိယာ န သုခသဟဂတာ. ဧကာဒသ ဓာတုယော န ဥပေက္ခာသဟဂတာ. ပဉ္စ ဓာတုယော ဥပေက္ခာသဟဂတာ. ဒွေ ဓာတုယော သိယာ ဥပေက္ခာသဟဂတာ၊ သိယာ န ဥပေက္ခာသဟဂတာ.

သောဠသ ဓာတုယော ကာမာဝစရာ. ဒွေ ဓာတုယော သိယာ ကာမာဝစရာ၊ သိယာ န ကာမာဝစရာ. သောဠသ ဓာတုယော န ရူပါဝစရာ. ဒွေ ဓာတုယော သိယာ ရူပါဝစရာ၊ သိယာ န ရူပါဝစရာ. သောဠသ ဓာတုယော န အရူပါဝစရာ. ဒွေ ဓာတုယော သိယာ အရူပါဝစရာ၊ သိယာ န အရူပါဝစရာ. သောဠသ ဓာတုယော ပရိယာပန္နာ. ဒွေ ဓာတုယော သိယာ ပရိယာပန္နာ၊ သိယာ အပရိယာပန္နာ. သောဠသ ဓာတုယော အနိယျာနိကာ. ဒွေ ဓာတုယော သိယာ နိယျာနိကာ၊ သိယာ အနိယျာနိကာ. သောဠသ ဓာတုယော အနိယတာ. ဒွေ ဓာတုယော သိယာ နိယတာ၊ သိယာ အနိယတာ. သောဠသ ဓာတုယော သဥတ္တရာ. ဒွေ ဓာတုယော သိယာ သဥတ္တရာ၊ သိယာ အနုတ္တရာ. သောဠသ ဓာတုယော အရဏာ. ဒွေ ဓာတုယော သိယာ သရဏာ၊ သိယာ အရဏာတိ.

ပဉှာပုစ္ဆကံ.

ဓာတုဝိဘင်္ဂေါ နိဋ္ဌိတော.