၅. ဘူမန္တရဒဿနဝါရော

၁၀၂၀. ကာမာဝစရာ ဓမ္မာ၊ န ကာမာဝစရာ ဓမ္မာ၊ ရူပါဝစရာ ဓမ္မာ၊ န ရူပါဝစရာ ဓမ္မာ၊ အရူပါဝစရာ ဓမ္မာ၊ န အရူပါဝစရာ ဓမ္မာ၊ ပရိယာပန္နာ ဓမ္မာ၊ အပရိယာပန္နာ ဓမ္မာ.

ကတမေ ဓမ္မာ ကာမာဝစရာ? ဟေဋ္ဌတော အဝီစိနိရယံ ပရိယန္တံ ကရိတွာ၊ ဥပရိတော ပရနိမ္မိတဝသဝတ္တီ ဒေဝေ အန္တောကရိတွာ၊ ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ ခန္ဓဓာတုအာယတနာ၊ ရူပံ၊ ဝေဒနာ၊ သညာ၊ သင်္ခါရာ၊ ဝိညာဏံ – ဣမေ ဓမ္မာ ကာမာဝစရာ.

ကတမေ ဓမ္မာ န ကာမာဝစရာ? ရူပါဝစရာ၊ အရူပါဝစရာ၊ အပရိယာပန္နာ – ဣမေ ဓမ္မာ န ကာမာဝစရာ.

ကတမေ ဓမ္မာ ရူပါဝစရာ? ဟေဋ္ဌတော ဗြဟ္မလောကံ ပရိယန္တံ ကရိတွာ၊ ဥပရိတော အကနိဋ္ဌေ ဒေဝေ အန္တောကရိတွာ၊ ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ သမာပန္နဿ ဝါ ဥပပန္နဿ ဝါ ဒိဋ္ဌဓမ္မသုခဝိဟာရိဿ ဝါ စိတ္တစေတသိကာ ဓမ္မာ – ဣမေ ဓမ္မာ ရူပါဝစရာ.

ကတမေ ဓမ္မာ န ရူပါဝစရာ? ကာမာဝစရာ၊ အရူပါဝစရာ၊ အပရိယာပန္နာ – ဣမေ ဓမ္မာ န ရူပါဝစရာ.

ကတမေ ဓမ္မာ အရူပါဝစရာ? ဟေဋ္ဌတော အာကာသာနဉ္စာယတနူပဂေ ဒေဝေ ပရိယန္တံ ကရိတွာ၊ ဥပရိတော နေဝသညာနာသညာယတနူပဂေ ဒေဝေ အန္တောကရိတွာ၊ ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ သမာပန္နဿ ဝါ ဥပပန္နဿ ဝါ ဒိဋ္ဌဓမ္မသုခဝိဟာရိဿ ဝါ စိတ္တစေတသိကာ ဓမ္မာ – ဣမေ ဓမ္မာ အရူပါဝစရာ.

ကတမေ ဓမ္မာ န အရူပါဝစရာ? ကာမာဝစရာ၊ ရူပါဝစရာ၊ အပရိယာပန္နာ – ဣမေ ဓမ္မာ န အရူပါဝစရာ.

ကတမေ ဓမ္မာ ပရိယာပန္နာ? သာသဝါ ကုသလာကုသလဗျာကတာ ဓမ္မာ ကာမာဝစရာ၊ ရူပါဝစရာ၊ အရူပါဝစရာ၊ ရူပက္ခန္ဓော၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော – ဣမေ ဓမ္မာ ပရိယာပန္နာ.

ကတမေ ဓမ္မာ အပရိယာပန္နာ? မဂ္ဂါ စ၊ မဂ္ဂဖလာနိ စ၊ အသင်္ခတာ စ ဓာတု – ဣမေ ဓမ္မာ အပရိယာပန္နာ.