၁. ကာမဓာတု

၉၉၉. ပဉ္စန္နံ ခန္ဓာနံ ကတိ ကာမဓာတုပရိယာပန္နာ၊ ကတိ န ကာမဓာတုပရိယာပန္နာ။ပေ။ သတ္တန္နံ စိတ္တာနံ ကတိ ကာမဓာတုပရိယာပန္နာ၊ ကတိ န ကာမဓာတုပရိယာပန္နာ?

၁၀၀၀. ရူပက္ခန္ဓော ကာမဓာတုပရိယာပန္နော၊ စတ္တာရော ခန္ဓာ သိယာ ကာမဓာတုပရိယာပန္နာ၊ သိယာ န ကာမဓာတုပရိယာပန္နာ.

ဒသာယတနာ ကာမဓာတုပရိယာပန္နာ၊ ဒွေ အာယတနာ သိယာ ကာမဓာတုပရိယာပန္နာ၊ သိယာ န ကာမဓာတုပရိယာပန္နာ.

သောဠသ ဓာတုယော ကာမဓာတုပရိယာပန္နာ၊ ဒွေ ဓာတုယော သိယာ ကာမဓာတုပရိယာပန္နာ၊ သိယာ န ကာမဓာတုပရိယာပန္နာ.

သမုဒယသစ္စံ ကာမဓာတုပရိယာပန္နံ၊ ဒွေ သစ္စာ န ကာမဓာတုပရိယာပန္နာ၊ ဒုက္ခသစ္စံ သိယာ ကာမဓာတုပရိယာပန္နံ၊ သိယာ န ကာမဓာတုပရိယာပန္နံ.

ဒသိန္ဒြိယာ ကာမဓာတုပရိယာပန္နာ၊ တီဏိန္ဒြိယာ န ကာမဓာတုပရိယာပန္နာ၊ နဝိန္ဒြိယာ သိယာ ကာမဓာတုပရိယာပန္နာ၊ သိယာ န ကာမဓာတုပရိယာပန္နာ.

တယော အကုသလဟေတူ ကာမဓာတုပရိယာပန္နာ၊ ဆ ဟေတူ သိယာ ကာမဓာတုပရိယာပန္နာ၊ သိယာ န ကာမဓာတုပရိယာပန္နာ.

ကဗဠီကာရော အာဟာရော ကာမဓာတုပရိယာပန္နော၊ တယော အာဟာရာ သိယာ ကာမဓာတုပရိယာပန္နာ၊ သိယာ န ကာမဓာတုပရိယာပန္နာ.

ဆ ဖဿာ ကာမဓာတုပရိယာပန္နာ၊ မနောဝိညာဏဓာတုသမ္ဖဿော သိယာ ကာမဓာတု ပရိယာပန္နော၊ သိယာ န ကာမဓာတုပရိယာပန္နော.

ဆ ဝေဒနာ။ပေ။ ဆ သညာ။ ဆ စေတနာ။ ဆ စိတ္တာ ကာမဓာတုပရိယာပန္နာ၊ မနောဝိညာဏဓာတု သိယာ ကာမဓာတုပရိယာပန္နာ၊ သိယာ န ကာမဓာတုပရိယာပန္နာ.