(၂) လောကိယဒုကံ

၁၀၄၄. ပဉ္စန္နံ ခန္ဓာနံ ကတိ လောကိယာ၊ ကတိ လောကုတ္တရာ? ဒွါဒသန္နံ အာယတနာနံ ကတိ လောကိယာ၊ ကတိ လောကုတ္တရာ? အဋ္ဌာရသန္နံ ဓာတူနံ ကတိ လောကိယာ၊ ကတိ လောကုတ္တရာ? စတုန္နံ သစ္စာနံ ကတိ လောကိယာ၊ ကတိ လောကုတ္တရာ။ပေ။ သတ္တန္နံ စိတ္တာနံ ကတိ လောကိယာ၊ ကတိ လောကုတ္တရာ?

ရူပက္ခန္ဓော လောကိယော. စတ္တာရော ခန္ဓာ သိယာ လောကိယာ၊ သိယာ လောကုတ္တရာ. ဒသာယတနာ လောကိယာ. ဒွေ အာယတနာ သိယာ လောကိယာ၊ သိယာ လောကုတ္တရာ. သောဠသ ဓာတုယော လောကိယာ. ဒွေ ဓာတုယော သိယာ လောကိယာ၊ သိယာ လောကုတ္တရာ. ဒွေ သစ္စာ လောကိယာ. ဒွေ သစ္စာ လောကုတ္တရာ.

ဒသိန္ဒြိယာ လောကိယာ. တီဏိန္ဒြိယာ လောကုတ္တရာ. နဝိန္ဒြိယာ သိယာ လောကိယာ၊ သိယာ လောကုတ္တရာ. တယော အကုသလဟေတူ လောကိယာ. ဆ ဟေတူ သိယာ လောကိယာ၊ သိယာ လောကုတ္တရာ. ကဗဠီကာရော အာဟာရော လောကိယော. တယော အာဟာရာ သိယာ လောကိယာ၊ သိယာ လောကုတ္တရာ. ဆ ဖဿာ လောကိယာ. မနောဝိညာဏဓာတုသမ္ဖဿော သိယာ လောကိယော၊ သိယာ လောကုတ္တရော. ဆ ဝေဒနာ လောကိယာ. မနောဝိညာဏဓာတုသမ္ဖဿဇာ ဝေဒနာ သိယာ လောကိယာ၊ သိယာ လောကုတ္တရာ. ဆ သညာ လောကိယာ. မနောဝိညာဏဓာတုသမ္ဖဿဇာ သညာ သိယာ လောကိယာ၊ သိယာ လောကုတ္တရာ. ဆ စေတနာ လောကိယာ. မနောဝိညာဏဓာတုသမ္ဖဿဇာ စေတနာ သိယာ လောကိယာ၊ သိယာ လောကုတ္တရာ. ဆ စိတ္တာ လောကိယာ. မနောဝိညာဏဓာတု သိယာ လောကိယာ၊ သိယာ လောကုတ္တရာတိ.

အဘိညာ ဒွေ သာရမ္မဏာ၊ ဒိဋ္ဌာ ကုသလဝေဒနာ၊

ဝိပါကာ စ ဥပါဒိန္နာ၊ ဝိတက္ကံ ရူပလောကိယာတိ.

ဓမ္မဟဒယဝိဘင်္ဂေါ နိဋ္ဌိတော.

ဝိဘင်္ဂပကရဏံ နိဋ္ဌိတံ.