၃. ဝိပါကတ္တိကံ

၁၀၄၀. ပဉ္စန္နံ ခန္ဓာနံ ကတိ ဝိပါကာ၊ ကတိ ဝိပါကဓမ္မဓမ္မာ၊ ကတိ နေဝဝိပါကနဝိပါကဓမ္မဓမ္မာ။ပေ။ သတ္တန္နံ စိတ္တာနံ ကတိ ဝိပါကာ၊ ကတိ ဝိပါကဓမ္မဓမ္မာ၊ ကတိ နေဝဝိပါကနဝိပါကဓမ္မဓမ္မာ?

ရူပက္ခန္ဓော နေဝဝိပါကနဝိပါကဓမ္မဓမ္မော. စတ္တာရော ခန္ဓာ သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ.

ဒသာယတနာ နေဝဝိပါကနဝိပါကဓမ္မဓမ္မာ. ဒွါယတနာ သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ.

ဒသ ဓာတုယော နေဝဝိပါကနဝိပါကဓမ္မဓမ္မာ. ပဉ္စ ဓာတုယော ဝိပါကာ. မနောဓာတု သိယာ ဝိပါကာ၊ သိယာ နေဝဝိပါကနဝိပါကဓမ္မဓမ္မာ. ဒွေ ဓာတုယော သိယာ ဝိပါကာ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ.

ဒွေ သစ္စာ ဝိပါကဓမ္မဓမ္မာ. နိရောဓသစ္စံ နေဝဝိပါကနဝိပါကဓမ္မဓမ္မံ. ဒုက္ခသစ္စံ သိယာ ဝိပါကံ၊ သိယာ ဝိပါကဓမ္မဓမ္မံ၊ သိယာ နေဝဝိပါကနဝိပါကဓမ္မဓမ္မံ.

သတ္တိန္ဒြိယာ နေဝဝိပါကနဝိပါကဓမ္မဓမ္မာ. တီဏိန္ဒြိယာ ဝိပါကာ. ဒွိန္ဒြိယာ ဝိပါကဓမ္မဓမ္မာ. အညိန္ဒြိယံ သိယာ ဝိပါကံ၊ သိယာ ဝိပါကဓမ္မဓမ္မံ. နဝိန္ဒြိယာ သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ.

ဆ ဟေတူ ဝိပါကဓမ္မဓမ္မာ. တယော အဗျာကတဟေတူ သိယာ ဝိပါကာ၊ သိယာ နေဝဝိပါကနဝိပါကဓမ္မဓမ္မာ.

ကဗဠီကာရော အာဟာရော နေဝဝိပါကနဝိပါကဓမ္မဓမ္မော. တယော အာဟာရာ သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ. ပဉ္စ ဖဿာ ဝိပါကာ. မနောဓာတုသမ္ဖဿော သိယာ ဝိပါကော၊ သိယာ နေဝဝိပါကနဝိပါကဓမ္မဓမ္မော. မနောဝိညာဏဓာတုသမ္ဖဿော သိယာ ဝိပါကော၊ သိယာ ဝိပါကဓမ္မဓမ္မော၊ သိယာ နေဝဝိပါကနဝိပါကဓမ္မဓမ္မော. ပဉ္စ ဝေဒနာ။ ပဉ္စ သညာ။ ပဉ္စ စေတနာ။ ပဉ္စ စိတ္တာ ဝိပါကာ. မနောဓာတု သိယာ ဝိပါကာ၊ သိယာ နေဝဝိပါကနဝိပါကဓမ္မဓမ္မာ. မနောဝိညာဏဓာတု သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ.