၁. ကုသလတ္တိကံ

၁၀၃၈. ပဉ္စန္နံ ခန္ဓာနံ ကတိ ကုသလာ၊ ကတိ အကုသလာ၊ ကတိ အဗျာကတာ။ပေ။ သတ္တန္နံ စိတ္တာနံ ကတိ ကုသလာ၊ ကတိ အကုသလာ၊ ကတိ အဗျာကတာ?

ရူပက္ခန္ဓော အဗျာကတော. စတ္တာရော ခန္ဓာ သိယာ ကုသလာ၊ သိယာ အကုသလာ၊ သိယာ အဗျာကတာ. ဒသာယတနာ အဗျာကတာ. ဒွါယတနာ သိယာ ကုသလာ၊ သိယာ အကုသလာ၊ သိယာ အဗျာကတာ. သောဠသ ဓာတုယော အဗျာကတာ. ဒွေ ဓာတုယော သိယာ ကုသလာ၊ သိယာ အကုသလာ၊ သိယာ အဗျာကတာ. သမုဒယသစ္စံ အကုသလံ. မဂ္ဂသစ္စံ ကုသလံ. နိရောဓသစ္စံ အဗျာကတံ. ဒုက္ခသစ္စံ သိယာ ကုသလံ၊ သိယာ အကုသလံ၊ သိယာ အဗျာကတံ.

ဒသိန္ဒြိယာ အဗျာကတာ. ဒေါမနဿိန္ဒြိယံ အကုသလံ. အနညာတညဿာမီတိန္ဒြိယံ ကုသလံ. စတ္တာရိန္ဒြိယာ သိယာ ကုသလာ၊ သိယာ အဗျာကတာ. ဆ ဣန္ဒြိယာ သိယာ ကုသလာ၊ သိယာ အကုသလာ၊ သိယာ အဗျာကတာ.

တယော ကုသလဟေတူ ကုသလာ. တယော အကုသလဟေတူ အကုသလာ. တယော အဗျာကတဟေတူ အဗျာကတာ. ကဗဠီကာရော အာဟာရော အဗျာကတော. တယော အာဟာရာ သိယာ ကုသလာ၊ သိယာ အကုသလာ၊ သိယာ အဗျာကတာ. ဆ ဖဿာ အဗျာကတာ. မနောဝိညာဏဓာတုသမ္ဖဿော သိယာ ကုသလော၊ သိယာ အကုသလော၊ သိယာ အဗျာကတော. ဆ ဝေဒနာ။ ဆ သညာ။ ဆ စေတနာ။ ဆ စိတ္တာ အဗျာကတာ. မနောဝိညာဏဓာတု သိယာ ကုသလာ၊ သိယာ အကုသလာ၊ သိယာ အဗျာကတာ.