၃. ပဉှာပုစ္ဆကံ

၇၄၇. စတဿော ပဋိသမ္ဘိဒါ – အတ္ထပဋိသမ္ဘိဒါ၊ ဓမ္မပဋိသမ္ဘိဒါ၊ နိရုတ္တိပဋိသမ္ဘိဒါ၊ ပဋိဘာနပဋိသမ္ဘိဒါ.

၇၄၈. စတုန္နံ ပဋိသမ္ဘိဒါနံ ကတိ ကုသလာ၊ ကတိ အကုသလာ၊ ကတိ အဗျာကတာ။ပေ။ ကတိ သရဏာ၊ ကတိ အရဏာ?

၁. တိကံ

၇၄၉. သိယာ ကုသလာ၊ သိယာ အဗျာကတာ. သိယာ သုခါယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ. တိဿော ပဋိသမ္ဘိဒါ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ၊ အတ္ထပဋိသမ္ဘိဒါ သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ. တိဿော ပဋိသမ္ဘိဒါ အနုပါဒိန္နုပါဒါနိယာ၊ အတ္ထပဋိသမ္ဘိဒါ သိယာ အနုပါဒိန္နုပါဒါနိယာ၊ သိယာ အနုပါဒိန္နအနုပါဒါနိယာ. တိဿော ပဋိသမ္ဘိဒါ အသံကိလိဋ္ဌအသံကိလေသိကာ၊ အတ္ထပဋိသမ္ဘိဒါ သိယာ အသံကိလိဋ္ဌသံကိလေသိကာ၊ သိယာ အသံကိလိဋ္ဌအသံကိလေသိကာ.

တိဿော ပဋိသမ္ဘိဒါ သဝိတက္ကသဝိစာရာ၊ အတ္ထပဋိသမ္ဘိဒါ သိယာ သဝိတက္ကသဝိစာရာ၊ သိယာ အဝိတက္ကဝိစာရမတ္တာ၊ သိယာ အဝိတက္ကအဝိစာရာ. သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ. နေဝ ဒဿနေန န ဘာဝနာယ ပဟာတဗ္ဗာ. နေဝ ဒဿနေန န ဘာဝနာယ ပဟာတဗ္ဗဟေတုကာ.

တိဿော ပဋိသမ္ဘိဒါ သိယာ အာစယဂါမိနော၊ သိယာ နေဝါစယဂါမိနာပစယဂါမိနော၊ အတ္ထပဋိသမ္ဘိဒါ သိယာ အာစယဂါမိနီ၊ သိယာ အပစယဂါမိနီ၊ သိယာ နေဝါစယဂါမိနာပစယဂါမိနီ.

တိဿော ပဋိသမ္ဘိဒါ နေဝသေက္ခနာသေက္ခာ၊ အတ္ထပဋိသမ္ဘိဒါ သိယာ သေက္ခာ၊ သိယာ အသေက္ခာ၊ သိယာ နေဝသေက္ခနာသေက္ခာ. တိဿော ပဋိသမ္ဘိဒါ ပရိတ္တာ၊ အတ္ထပဋိသမ္ဘိဒါ သိယာ ပရိတ္တာ၊ သိယာ အပ္ပမာဏာ. နိရုတ္တိပဋိသမ္ဘိဒါ ပရိတ္တာရမ္မဏာ၊ တိဿော ပဋိသမ္ဘိဒါ သိယာ ပရိတ္တာရမ္မဏာ၊ သိယာ မဟဂ္ဂတာရမ္မဏာ၊ သိယာ အပ္ပမာဏာရမ္မဏာ.

တိဿော ပဋိသမ္ဘိဒါ မဇ္ဈိမာ၊ အတ္ထပဋိသမ္ဘိဒါ သိယာ မဇ္ဈိမာ၊ သိယာ ပဏီတာ. တိဿော ပဋိသမ္ဘိဒါ အနိယတာ၊ အတ္ထပဋိသမ္ဘိဒါ သိယာ သမ္မတ္တနိယတာ၊ သိယာ အနိယတာ. နိရုတ္တိပဋိသမ္ဘိဒါ န ဝတ္တဗ္ဗာ – မဂ္ဂါရမ္မဏာတိပိ၊ မဂ္ဂဟေတုကာတိပိ၊ မဂ္ဂါဓိပတိနီတိပိ၊ အတ္ထပဋိသမ္ဘိဒါ န မဂ္ဂါရမ္မဏာ၊ သိယာ မဂ္ဂဟေတုကာ၊ သိယာ မဂ္ဂါဓိပတိနီ၊ သိယာ န ဝတ္တဗ္ဗာ မဂ္ဂဟေတုကာတိပိ၊ မဂ္ဂါဓိပတိနီတိပိ၊ ဒွေ ပဋိသမ္ဘိဒါ သိယာ မဂ္ဂါရမ္မဏာ၊ န မဂ္ဂဟေတုကာ၊ သိယာ မဂ္ဂါဓိပတိနော၊ သိယာ န ဝတ္တဗ္ဗာ မဂ္ဂါရမ္မဏာတိပိ၊ မဂ္ဂါဓိပတိနောတိပိ.

တိဿော ပဋိသမ္ဘိဒါ သိယာ ဥပ္ပန္နာ၊ သိယာ အနုပ္ပန္နာ၊ န ဝတ္တဗ္ဗာ ဥပ္ပါဒိနောတိ၊ အတ္ထပဋိသမ္ဘိဒါ သိယာ ဥပ္ပန္နာ၊ သိယာ အနုပ္ပန္နာ၊ သိယာ ဥပ္ပါဒိနီ. သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ. နိရုတ္တိပဋိသမ္ဘိဒါ ပစ္စုပ္ပန္နာရမ္မဏာ၊ ဒွေ ပဋိသမ္ဘိဒါ သိယာ အတီတာရမ္မဏာ၊ သိယာ အနာဂတာရမ္မဏာ၊ သိယာ ပစ္စုပ္ပန္နာရမ္မဏာ၊ အတ္ထပဋိသမ္ဘိဒါ သိယာ အတီတာရမ္မဏာ၊ သိယာ အနာဂတာရမ္မဏာ၊ သိယာ ပစ္စုပ္ပန္နာရမ္မဏာ၊ သိယာ န ဝတ္တဗ္ဗာ အတီတာရမ္မဏာတိပိ၊ အနာဂတာရမ္မဏာတိပိ၊ ပစ္စုပ္ပန္နာရမ္မဏာတိပိ. သိယာ အဇ္ဈတ္တာ၊ သိယာ ဗဟိဒ္ဓါ၊ သိယာ အဇ္ဈတ္တဗဟိဒ္ဓါ. နိရုတ္တိပဋိသမ္ဘိဒါ ဗဟိဒ္ဓါရမ္မဏာ၊ တိဿော ပဋိသမ္ဘိဒါ သိယာ အဇ္ဈတ္တာရမ္မဏာ၊ သိယာ ဗဟိဒ္ဓါရမ္မဏာ၊ သိယာ အဇ္ဈတ္တဗဟိဒ္ဓါရမ္မဏာ. အနိဒဿနအပဋိဃာ.

၂. ဒုကံ

၇၅၀. ဟေတူ၊ သဟေတုကာ၊ ဟေတုသမ္ပယုတ္တာ၊ ဟေတူ စေဝ သဟေတုကာ စ၊ ဟေတူ စေဝ ဟေတုသမ္ပယုတ္တာ စ၊ န ဝတ္တဗ္ဗာ န ဟေတူ သဟေတုကာတိပိ၊ နဟေတူအဟေတုကာတိပိ.

သပ္ပစ္စယာ၊ သင်္ခတာ၊ အနိဒဿနာ၊ အပ္ပဋိဃာ၊ အရူပါ၊ တိဿော ပဋိသမ္ဘိဒါ လောကိယာ၊ အတ္ထပဋိသမ္ဘိဒါ သိယာ လောကိယာ၊ သိယာ လောကုတ္တရာ၊ ကေနစိ ဝိညေယျာ၊ ကေနစိ န ဝိညေယျာ.

နော အာသဝါ. တိဿော ပဋိသမ္ဘိဒါ သာသဝါ၊ အတ္ထပဋိသမ္ဘိဒါ သိယာ သာသဝါ၊ သိယာ အနာသဝါ. အာသဝဝိပ္ပယုတ္တာ. တိဿော ပဋိသမ္ဘိဒါ န ဝတ္တဗ္ဗာ အာသဝါ စေဝ သာသဝါ စာတိ၊ သာသဝါ စေဝ နော စ အာသဝါ၊ အတ္ထပဋိသမ္ဘိဒါ န ဝတ္တဗ္ဗာ အာသဝေါ [အာသဝါ (သီ.) ဓာတုဝိဘင်္ဂေ ပန ပါဌနာနတ္တံ နတ္ထိ] စေဝ သာသဝါ စာတိ၊ သိယာ သာသဝါ စေဝ နော စ အာသဝေါ [အာသဝါ (သီ.) ဓာတုဝိဘင်္ဂေ ပန ပါဌနာနတ္တံ နတ္ထိ]၊ သိယာ န ဝတ္တဗ္ဗာ သာသဝါ စေဝ နော စ အာသဝါတိ. န ဝတ္တဗ္ဗာ အာသဝါ စေဝ အာသဝသမ္ပယုတ္တာ စာတိပိ၊ အာသဝသမ္ပယုတ္တာ စေဝ နော စ အာသဝါတိပိ. တိဿော ပဋိသမ္ဘိဒါ အာသဝဝိပ္ပယုတ္တာ သာသဝါ၊ အတ္ထပဋိသမ္ဘိဒါ သိယာ အာသဝဝိပ္ပယုတ္တာ သာသဝါ၊ သိယာ အာသဝဝိပ္ပယုတ္တာ အနာသဝါ.

နော သံယောဇနာ။ပေ။ နော ဂန္ထာ။ပေ။ နော ဩဃာ။ပေ။ နော ယောဂါ။ပေ။ နော နီဝရဏာ။ပေ။ နော ပရာမာသာ။ပေ။ သာရမ္မဏာ. နော စိတ္တာ၊ စေတသိကာ၊ စိတ္တသမ္ပယုတ္တာ၊ စိတ္တသံသဋ္ဌာ၊ စိတ္တသမုဋ္ဌာနာ၊ စိတ္တသဟဘုနော၊ စိတ္တာနုပရိဝတ္တိနော. စိတ္တသံသဋ္ဌသမုဋ္ဌာနာ၊ စိတ္တသံသဋ္ဌသမုဋ္ဌာနသဟဘုနော၊ စိတ္တသံသဋ္ဌသမုဋ္ဌာနာနုပရိဝတ္တိနော၊ ဗာဟိရာ၊ နော ဥပါဒါ၊ အနုပါဒိန္နာ.

နော ဥပါဒါနာ။ပေ။ နော ကိလေသာ။ပေ။ န ဒဿနေန ပဟာတဗ္ဗာ. န ဘာဝနာယ ပဟာတဗ္ဗာ. န ဒဿနေန ပဟာတဗ္ဗဟေတုကာ. န ဘာဝနာယ ပဟာတဗ္ဗဟေတုကာ. တိဿော ပဋိသမ္ဘိဒါ သဝိတက္ကာ၊ အတ္ထပဋိသမ္ဘိဒါ သိယာ သဝိတက္ကာ၊ သိယာ အဝိတက္ကာ. တိဿော ပဋိသမ္ဘိဒါ သဝိစာရာ၊ အတ္ထပဋိသမ္ဘိဒါ သိယာ သဝိစာရာ၊ သိယာ အဝိစာရာ. သိယာ သပ္ပီတိကာ၊ သိယာ အပ္ပီတိကာ. သိယာ ပီတိသဟဂတာ၊ သိယာ န ပီတိသဟဂတာ. သိယာ သုခသဟဂတာ၊ သိယာ န သုခသဟဂတာ. သိယာ ဥပေက္ခာသဟဂတာ၊ သိယာ န ဥပေက္ခာသဟဂတာ. တိဿော ပဋိသမ္ဘိဒါ ကာမာဝစရာ၊ အတ္ထပဋိသမ္ဘိဒါ သိယာ ကာမာဝစရာ၊ သိယာ န ကာမာဝစရာ. န ရူပါဝစရာ. န အရူပါဝစရာ. တိဿော ပဋိသမ္ဘိဒါ ပရိယာပန္နာ၊ အတ္ထပဋိသမ္ဘိဒါ သိယာ ပရိယာပန္နာ၊ သိယာ အပရိယာပန္နာ. တိဿော ပဋိသမ္ဘိဒါ အနိယျာနိကာ၊ အတ္ထပဋိသမ္ဘိဒါ သိယာ နိယျာနိကာ၊ သိယာ အနိယျာနိကာ. တိဿော ပဋိသမ္ဘိဒါ အနိယတာ၊ အတ္ထပဋိသမ္ဘိဒါ သိယာ နိယတာ၊ သိယာ အနိယတာ. တိဿော ပဋိသမ္ဘိဒါ သဥတ္တရာ၊ အတ္ထပဋိသမ္ဘိဒါ သိယာ သဥတ္တရာ၊ သိယာ အနုတ္တရာ. အရဏာတိ.

ပဉှာပုစ္ဆကံ.

ပဋိသမ္ဘိဒါဝိဘင်္ဂေါ နိဋ္ဌိတော.