၆. ပရိယတ္တိဝါရော

၇၂၄. စတဿော ပဋိသမ္ဘိဒါ – အတ္ထပဋိသမ္ဘိဒါ၊ ဓမ္မပဋိသမ္ဘိဒါ၊ နိရုတ္တိပဋိသမ္ဘိဒါ၊ ပဋိဘာနပဋိသမ္ဘိဒါ.

တတ္ထ ကတမာ ဓမ္မပဋိသမ္ဘိဒါ? ဣဓ ဘိက္ခု ဓမ္မံ ဇာနာတိ – သုတ္တံ ဂေယျံ ဝေယျာကရဏံ ဂါထံ ဥဒါနံ ဣတိဝုတ္တကံ ဇာတကံ အဗ္ဘုတဓမ္မံ ဝေဒလ္လံ. အယံ ဝုစ္စတိ ‘‘ဓမ္မပဋိသမ္ဘိဒါ’’. သော တဿ တဿေဝ ဘာသိတဿ အတ္ထံ ဇာနာတိ – ‘‘အယံ ဣမဿ ဘာသိတဿ အတ္ထော၊ အယံ ဣမဿ ဘာသိတဿ အတ္ထော’’တိ. အယံ ဝုစ္စတိ ‘‘အတ္ထပဋိသမ္ဘိဒါ’’. တတြ ဓမ္မနိရုတ္တာဘိလာပေ ဉာဏံ နိရုတ္တိပဋိသမ္ဘိဒါ. ဉာဏေသု ဉာဏံ ပဋိဘာနပဋိသမ္ဘိဒါ. အယံ ပရိယတ္တိဝါရော.

သုတ္တန္တဘာဇနီယံ.