၂. ပဉှာပုစ္ဆကံ

၇၁၄. ပဉ္စ သိက္ခာပဒါနိ – ပါဏာတိပါတာ ဝေရမဏီ သိက္ခာပဒံ၊ အဒိန္နာဒါနာ ဝေရမဏီ သိက္ခာပဒံ၊ ကာမေသုမိစ္ဆာစာရာ ဝေရမဏီ သိက္ခာပဒံ၊ မုသာဝါဒါ ဝေရမဏီ သိက္ခာပဒံ၊ သုရာမေရယမဇ္ဇပမာဒဋ္ဌာနာ ဝေရမဏီ သိက္ခာပဒံ.

၇၁၅. ပဉ္စန္နံ သိက္ခာပဒါနံ ကတိ ကုသလာ၊ ကတိ အကုသလာ၊ ကတိ အဗျာကတာ။ပေ။ ကတိ သရဏာ၊ ကတိ အရဏာ?

၁. တိကံ

၇၁၆. ကုသလာယေဝ. သိယာ သုခါယ ဝေဒနာယ သမ္ပယုတ္တာ၊ သိယာ အဒုက္ခမသုခါယ ဝေဒနာယ သမ္ပယုတ္တာ၊ ဝိပါကဓမ္မဓမ္မာ၊ အနုပါဒိန္နုပါဒါနိယာ၊ အသံကိလိဋ္ဌသံကိလေသိကာ၊ သဝိတက္ကသဝိစာရာ၊ သိယာ ပီတိသဟဂတာ၊ သိယာ သုခသဟဂတာ၊ သိယာ ဥပေက္ခာသဟဂတာ.

နေဝ ဒဿနေန န ဘာဝနာယ ပဟာတဗ္ဗာ၊ နေဝ ဒဿနေန န ဘာဝနာယ ပဟာတဗ္ဗဟေတုကာ၊ အာစယဂါမိနော၊ နေဝသေက္ခနာသေက္ခာ၊ ပရိတ္တာ၊ ပရိတ္တာရမ္မဏာ၊ မဇ္ဈိမာ၊ အနိယတာ၊ န ဝတ္တဗ္ဗာ မဂ္ဂါရမ္မဏာတိပိ၊ မဂ္ဂဟေတုကာတိပိ၊ မဂ္ဂါဓိပတိနောတိပိ. သိယာ ဥပ္ပန္နာ၊ သိယာ အနုပ္ပန္နာ၊ န ဝတ္တဗ္ဗာ ဥပ္ပါဒိနောတိ၊ သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ၊ ပစ္စုပ္ပန္နာရမ္မဏာ၊ သိယာ အဇ္ဈတ္တာ၊ သိယာ ဗဟိဒ္ဓါ၊ သိယာ အဇ္ဈတ္တဗဟိဒ္ဓါ၊ ဗဟိဒ္ဓါရမ္မဏာ၊ အနိဒဿနအပ္ပဋိဃာ.

၂. ဒုကံ

၇၁၇. န ဟေတူ သဟေတုကာ၊ ဟေတုသမ္ပယုတ္တာ. န ဝတ္တဗ္ဗာ ‘‘ဟေတူ စေဝ သဟေတုကာ စာ’’တိ၊ သဟေတုကာ စေဝ န စ ဟေတူ၊ န ဝတ္တဗ္ဗာ ‘‘ဟေတူ စေဝ ဟေတုသမ္ပယုတ္တာ စာ’’တိ၊ ဟေတုသမ္ပယုတ္တာ စေဝ န စ ဟေတူ၊ န ဟေတု သဟေတူကာ၊ သပ္ပစ္စယာ၊ သင်္ခတာ၊ အနိဒဿနာ၊ အပ္ပဋိဃာ၊ အရူပါ၊ လောကိယာ၊ ကေနစိ ဝိညေယျာ၊ ကေနစိ န ဝိညေယျာ.

နော အာသဝါ၊ သာသဝါ၊ အာသဝဝိပ္ပယုတ္တာ၊ န ဝတ္တဗ္ဗာ ‘‘အာသဝါ စေဝ သာသဝါ စာ’’တိ၊ သာသဝါ စေဝ နော စ အာသဝါ၊ န ဝတ္တဗ္ဗာ ‘‘အာသဝါ စေဝ အာသဝသမ္ပယုတ္တာ စာ’’တိပိ၊ ‘‘အာသဝသမ္ပယုတ္တာ စေဝ နော စ အာသဝါ’’တိပိ. အာသဝဝိပ္ပယုတ္တာ သာသဝါ၊ နော သံယောဇနာ။ပေ။ နော ဂန္ထာ။ပေ။ နော ဩဃာ။ပေ။ နော ယောဂါ။ပေ။ နော နီဝရဏာ။ပေ။ နော ပရာမာသာ။ပေ။ သာရမ္မဏာ၊ နော စိတ္တာ၊ စေတသိကာ၊ စိတ္တသမ္ပယုတ္တာ၊ စိတ္တသံသဋ္ဌာ၊ စိတ္တသမုဋ္ဌာနာ၊ စိတ္တသဟဘုနော၊ စိတ္တာနုပရိဝတ္တိနော၊ စိတ္တသံသဋ္ဌသမုဋ္ဌာနာ၊ စိတ္တသံသဋ္ဌသမုဋ္ဌာနသဟဘုနော၊ စိတ္တသံသဋ္ဌသမုဋ္ဌာနာနုပရိဝတ္တိနော၊ ဗာဟိရာ၊ နော ဥပါဒါ၊ အနုပါဒိန္နာ၊ နော ဥပါဒါနာ။ပေ။ နော ကိလေသာ.

န ဒဿနေန ပဟာတဗ္ဗာ၊ န ဘာဝနာယပဟာတဗ္ဗာ၊ န ဒဿနေန ပဟာတဗ္ဗဟေတုကာ၊ န ဘာဝနာယ ပဟာတဗ္ဗဟေတုကာ၊ သဝိတက္ကာ၊ သဝိစာရာ၊ သိယာ သပ္ပီတိကာ၊ သိယာ အပ္ပီတိကာ၊ သိယာ ပီတိသဟဂတာ၊ သိယာ န ပီတိသဟဂတာ၊ သိယာ သုခသဟဂတာ၊ သိယာ န သုခသဟဂတာ၊ သိယာ ဥပေက္ခာသဟဂတာ၊ သိယာ န ဥပေက္ခာသဟဂတာ၊ ကာမာဝစရာ၊ န ရူပါဝစရာ၊ န အရူပါဝစရာ၊ ပရိယာပန္နာ၊ အနိယျာနိကာ၊ အနိယတာ၊ သဥတ္တရာ၊ အရဏာတိ.

ပဉှာပုစ္ဆကံ.

သိက္ခာပဒဝိဘင်္ဂေါ နိဋ္ဌိတော.