၃. ပဉှာပုစ္ဆကံ

၆၉၉. စတဿော အပ္ပမညာယော – ဣဓ ဘိက္ခု မေတ္တာသဟဂတေန စေတသာ ဧကံ ဒိသံ ဖရိတွာ ဝိဟရတိ တထာ ဒုတိယံ တထာ တတိယံ တထာ စတုတ္ထံ၊ ဣတိ ဥဒ္ဓမဓော တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ မေတ္တာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ၊ ကရုဏာသဟဂတေန စေတသာ ဧကံ ဒိသံ ဖရိတွာ ဝိဟရတိ တထာ ဒုတိယံ တထာ တတိယံ တထာ စတုတ္ထံ၊ ဣတိ ဥဒ္ဓမဓော တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ ကရုဏာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ၊ မုဒိတာသဟဂတေန စေတသာ ဧကံ ဒိသံ ဖရိတွာ ဝိဟရတိ တထာ ဒုတိယံ တထာ တတိယံ တထာ စတုတ္ထံ၊ ဣတိ ဥဒ္ဓမဓော တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ မုဒိတာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ၊ ဥပေက္ခာသဟဂတေန စေတသာ ဧကံ ဒိသံ ဖရိတွာ ဝိဟရတိ တထာ ဒုတိယံ တထာ တတိယံ တထာ စတုတ္ထံ၊ ဣတိ ဥဒ္ဓမဓော တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ ဥပေက္ခာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ.

၇၀၀. စတုန္နံ အပ္ပမညာနံ ကတိ ကုသလာ၊ ကတိ အကုသလာ၊ ကတိ အဗျာကတာ။ပေ။ ကတိ သရဏာ၊ ကတိ အရဏာ?

၁. တိကံ

၇၀၁. သိယာ ကုသလာ၊ သိယာ အဗျာကတာ. တိဿော အပ္ပမညာယော သုခါယ ဝေဒနာယ သမ္ပယုတ္တာ၊ ဥပေက္ခာ အဒုက္ခမသုခါယ ဝေဒနာယ သမ္ပယုတ္တာ. သိယာ ဝိပါကာ၊ သိယာ ဝိပါကဓမ္မဓမ္မာ၊ သိယာ နေဝဝိပါကနဝိပါကဓမ္မဓမ္မာ. သိယာ ဥပါဒိန္နုပါဒါနိယာ၊ သိယာ အနုပါဒိန္နုပါဒါနိယာ. အသံကိလိဋ္ဌသံကိလေသိကာ. တိဿော အပ္ပမညာယော သိယာ သဝိတက္ကသဝိစာရာ၊ သိယာ အဝိတက္ကဝိစာရမတ္တာ၊ သိယာ အဝိတက္ကအဝိစာရာ၊ ဥပေက္ခာ အဝိတက္ကအဝိစာရာ. တိဿော အပ္ပမညာယော သိယာ ပီတိသဟဂတာ၊ သိယာ သုခသဟဂတာ၊ န ဥပေက္ခာသဟဂတာ၊ သိယာ န ဝတ္တဗ္ဗာ ပီတိသဟဂတာတိ၊ ဥပေက္ခာ ဥပေက္ခာသဟဂတာ. နေဝ ဒဿနေန န ဘာဝနာယ ပဟာတဗ္ဗာ. နေဝ ဒဿနေန န ဘာဝနာယ ပဟာတဗ္ဗဟေတုကာ. သိယာ အာစယဂါမိနော၊ သိယာ နေဝါစယဂါမိနာပစယဂါမိနော၊ နေဝသေက္ခနာသေက္ခာ၊ မဟဂ္ဂတာ၊ န ဝတ္တဗ္ဗာ ပရိတ္တာရမ္မဏာတိပိ၊ မဟဂ္ဂတာရမ္မဏာတိပိ၊ အပ္ပမာဏာရမ္မဏာတိပိ. မဇ္ဈိမာ၊ အနိယတာ၊ န ဝတ္တဗ္ဗာ မဂ္ဂါရမ္မဏာတိပိ၊ မဂ္ဂဟေတုကာတိပိ၊ မဂ္ဂါဓိပတိနောတိပိ. သိယာ ဥပ္ပန္နာ၊ သိယာ အနုပ္ပန္နာ၊ သိယာ ဥပ္ပါဒိနော. သိယာ အတီတာ၊ သိယာ အနာဂတာ၊ သိယာ ပစ္စုပ္ပန္နာ. န ဝတ္တဗ္ဗာ အတီတာရမ္မဏာတိပိ၊ အနာဂတာရမ္မဏာတိပိ၊ ပစ္စုပ္ပန္နာရမ္မဏာတိပိ. သိယာ အဇ္ဈတ္တာ၊ သိယာ ဗဟိဒ္ဓါ၊ သိယာ အဇ္ဈတ္တဗဟိဒ္ဓါ၊ ဗဟိဒ္ဓါရမ္မဏာ၊ အနိဒဿနအပ္ပဋိဃာ.

၂. ဒုကံ

၇၀၂. မေတ္တာ ဟေတု၊ တိဿော အပ္ပမညာယော န ဟေတူ၊ သဟေတုကာ၊ ဟေတုသမ္ပယုတ္တာ. မေတ္တာ ဟေတု စေဝ သဟေတုကာ စ၊ တိဿော အပ္ပမညာယော န ဝတ္တဗ္ဗာ ဟေတူ စေဝ သဟေတုကာ စာတိ၊ သဟေတုကာ စေဝ န စ ဟေတူ. မေတ္တာ ဟေတု စေဝ ဟေတုသမ္ပယုတ္တာ စ၊ တိဿော အပ္ပမညာယော န ဝတ္တဗ္ဗာ ဟေတူ စေဝ ဟေတုသမ္ပယုတ္တာ စာတိ၊ ဟေတုသမ္ပယုတ္တာ စေဝ န စ ဟေတူ. တိဿော အပ္ပမညာယော န ဟေတူ သဟေတုကာ၊ မေတ္တာ န ဝတ္တဗ္ဗာ န ဟေတု သဟေတုကာတိပိ၊ န ဟေတု အဟေတုကာတိပိ.

သပ္ပစ္စယာ၊ သင်္ခတာ၊ အနိဒဿနာ၊ အပ္ပဋိဃာ၊ အရူပါ၊ လောကိယာ၊ ကေနစိ ဝိညေယျာ၊ ကေနစိ န ဝိညေယျာ၊ နော အာသဝါ၊ သာသဝါ၊ အာသဝဝိပ္ပယုတ္တာ၊ န ဝတ္တဗ္ဗာ အာသဝါ စေဝ သာသဝါ စာတိ၊ သာသဝါ စေဝ နော စ အာသဝါ၊ န ဝတ္တဗ္ဗာ အာသဝါ စေဝ အာသဝသမ္ပယုတ္တာ စာတိပိ၊ အာသဝသမ္ပယုတ္တာ စေဝ နော စ အာသဝါတိပိ. အာသဝဝိပ္ပယုတ္တာ သာသဝါ.

နော သံယောဇနာ။ပေ။ နော ဂန္ထာ။ပေ။ နော ဩဃာ။ပေ။ နော ယောဂါ။ပေ။ နော နီဝရဏာ။ပေ။ နော ပရာမာသာ ။ပေ။ သာရမ္မဏာ၊ နော စိတ္တာ၊ စေတသိကာ၊ စိတ္တသမ္ပယုတ္တာ၊ စိတ္တသံသဋ္ဌာ၊ စိတ္တသမုဋ္ဌာနာ၊ စိတ္တသဟဘုနော၊ စိတ္တာနုပရိဝတ္တိနော၊ စိတ္တသံသဋ္ဌသမုဋ္ဌာနာ၊ စိတ္တသံသဋ္ဌသမုဋ္ဌာနသဟဘုနော၊ စိတ္တသံသဋ္ဌသမုဋ္ဌာနာနုပရိဝတ္တိနော၊ ဗာဟိရာ၊ နော ဥပါဒါ၊ သိယာ ဥပါဒိန္နာ၊ သိယာ အနုပါဒိန္နာ.

နော ဥပါဒါနာ။ပေ။ နော ကိလေသာ။ပေ။ န ဒဿနေန ပဟာတဗ္ဗာ၊ န ဘာဝနာယ ပဟာတဗ္ဗာ၊ န ဒဿနေန ပဟာတဗ္ဗဟေတုကာ၊ န ဘာဝနာယ ပဟာတဗ္ဗဟေတုကာ. တိဿော အပ္ပမညာယော သိယာ သဝိတက္ကာ၊ သိယာ အဝိတက္ကာ၊ ဥပေက္ခာ အဝိတက္ကာ. တိဿော အပ္ပမညာယော သိယာ သဝိစာရာ၊ သိယာ အဝိစာရာ၊ ဥပေက္ခာ အဝိစာရာ. တိဿော အပ္ပမညာယော သိယာ သပ္ပီတိကာ၊ သိယာ အပ္ပီတိကာ၊ ဥပေက္ခာ အပ္ပီတိကာ. တိဿော အပ္ပမညာယော သိယာ ပီတိသဟဂတာ၊ သိယာ န ပီတိသဟဂတာ၊ ဥပေက္ခာ န ပီတိသဟဂတာ. တိဿော အပ္ပမညာယော သုခသဟဂတာ၊ ဥပေက္ခာ န သုခသဟဂတာ. ဥပေက္ခာ ဥပေက္ခာသဟဂတာ၊ တိဿော အပ္ပမညာယော န ဥပေက္ခာသဟဂတာ၊ န ကာမာဝစရာ၊ ရူပါဝစရာ၊ န အရူပါဝစရာ၊ ပရိယာပန္နာ၊ အနိယျာနိကာ၊ အနိယတာ၊ သဥတ္တရာ၊ အရဏာတိ.

ပဉှာပုစ္ဆကံ.

အပ္ပမညာဝိဘင်္ဂေါ နိဋ္ဌိတော.