၂. ဒုကံ

၆၄၁. န ဟေတူ၊ သဟေတုကာ၊ ဟေတုသမ္ပယုတ္တာ၊ န ဝတ္တဗ္ဗာ ‘‘ဟေတူ စေဝ သဟေတုကာ စာ’’တိ၊ သဟေတုကာ စေဝ န စ ဟေတူ၊ န ဝတ္တဗ္ဗာ ‘‘ဟေတူ စေဝ ဟေတုသမ္ပယုတ္တာ စာ’’တိ၊ ဟေတုသမ္ပယုတ္တာ စေဝ န စ ဟေတူ၊ န ဟေတူ သဟေတုကာ.

သပ္ပစ္စယာ၊ သင်္ခတာ၊ အနိဒဿနာ၊ အပ္ပဋိဃာ၊ အရူပါ၊ သိယာ လောကိယာ၊ သိယာ လောကုတ္တရာ၊ ကေနစိ ဝိညေယျာ၊ ကေနစိ န ဝိညေယျာ.

နော အာသဝါ၊ သိယာ သာသဝါ၊ သိယာ အနာသဝါ၊ အာသဝဝိပ္ပယုတ္တာ၊ န ဝတ္တဗ္ဗာ ‘‘အာသဝါ စေဝ သာသဝါ စာ’’တိ၊ သိယာ သာသဝါ စေဝ နော စ အာသဝါ၊ သိယာ န ဝတ္တဗ္ဗာ ‘‘သာသဝါ စေဝ နော စ အာသဝါ’’တိ. န ဝတ္တဗ္ဗာ ‘‘အာသဝါ စေဝ အာသဝသမ္ပယုတ္တာ စာတိ’’ပိ၊ အာသဝသမ္ပယုတ္တာ စေဝ နော စ အာသဝါတိပိ. သိယာ အာသဝဝိပ္ပယုတ္တာ သာသဝါ၊ သိယာ အာသဝဝိပ္ပယုတ္တာ အနာသဝါ.

နော သံယောဇနာ။ပေ။ နော ဂန္ထာ။ပေ။ နော ဩဃာ။ပေ။ နော ယောဂါ။ပေ။ နော နီဝရဏာ။ပေ။ နော ပရာမာသာ။ပေ။ သာရမ္မဏာ၊ နော စိတ္တာ၊ စေတသိကာ၊ စိတ္တသမ္ပယုတ္တာ၊ စိတ္တသံသဋ္ဌာ၊ စိတ္တသမုဋ္ဌာနာ၊ စိတ္တသဟဘုနော၊ စိတ္တာနုပရိဝတ္တိနော၊ စိတ္တသံသဋ္ဌသမုဋ္ဌာနာ၊ စိတ္တသံသဋ္ဌသမုဋ္ဌာနသဟဘုနော၊ စိတ္တသံသဋ္ဌသမုဋ္ဌာနာနုပရိဝတ္တိနော၊ ဗာဟိရာ၊ နော ဥပါဒါ၊ သိယာ ဥပါဒိန္နာ၊ သိယာ အနုပါဒိန္နာ.

နော ဥပါဒါနာ။ပေ။ နော ကိလေသာ။ပေ။ န ဒဿနေန ပဟာတဗ္ဗာ၊ န ဘာဝနာယ ပဟာတဗ္ဗာ၊ န ဒဿနေန ပဟာတဗ္ဗဟေတုကာ၊ န ဘာဝနာယ ပဟာတဗ္ဗဟေတုကာ. ပဌမံ ဈာနံ – ဧတ္ထုပ္ပန္နံ ဝိတက္ကံ ဌပေတွာ သဝိတက္ကံ၊ တီဏိ ဈာနာနိ အဝိတက္ကာ. ပဌမံ ဈာနံ – ဧတ္ထုပ္ပန္နံ ဝိစာရံ ဌပေတွာ သဝိစာရံ၊ တီဏိ ဈာနာနိ အဝိစာရာ. ဒွေ ဈာနာနိ – ဧတ္ထုပ္ပန္နံ ပီတိံ ဌပေတွာ သပ္ပီတိကာ၊ ဒွေ ဈာနာနိ အပ္ပီတိကာ. ဒွေ ဈာနာနိ – ဧတ္ထုပ္ပန္နံ ပီတိံ ဌပေတွာ ပီတိသဟဂတာ၊ ဒွေ ဈာနာနိ န ပီတိသဟဂတာ. တီဏိ ဈာနာနိ – ဧတ္ထုပ္ပန္နံ သုခံ ဌပေတွာ သုခသဟဂတာ၊ စတုတ္ထံ ဈာနံ န သုခသဟဂတံ. စတုတ္ထံ ဈာနံ – ဧတ္ထုပ္ပန္နံ ဥပေက္ခံ ဌပေတွာ ဥပေက္ခာသဟဂတံ၊ တီဏိ ဈာနာနိ ဥပေက္ခာသဟဂတာ၊ န ကာမာဝစရာ၊ သိယာ ရူပါဝစရာ၊ သိယာ န ရူပါဝစရာ၊ တီဏိ ဈာနာနိ န အရူပါဝစရာ၊ စတုတ္ထံ ဈာနံ သိယာ အရူပါဝစရံ၊ သိယာ န အရူပါဝစရံ၊ သိယာ ပရိယာပန္နာ၊ သိယာ အပရိယာပန္နာ၊ သိယာ နိယျာနိကာ၊ သိယာ အနိယျာနိကာ၊ သိယာ နိယတာ၊ သိယာ အနိယတာ၊ သိယာ သဥတ္တရာ၊ သိယာ အနုတ္တရာ၊ အရဏာတိ.

ပဉှာပုစ္ဆကံ.

ဈာနဝိဘင်္ဂေါ နိဋ္ဌိတော.